1, 2. (a) Qanoq ilil­luta nalun­ngilar­put inut­tut pis­sutsimik nutaamik atisisin­naasugut? (b) Kolos­semiut 3:10-14 naaper­torlugit pis­suserineqar­tus­sat suut inut­tut pis­sutsimut nutaamut ilaap­pat?

BIIBILIMIK nutsik­kami New World Translation of the Holy Scriptures-imi oqariar­taaseq “inut­tut pis­suseq nutaaq” marloriarluni ator­neqar­poq. (Ef 4:24, NW; Kol 3:10, NW) Oqariar­taatsimi pineqar­poq inut­tut pis­suseq “Guutip piumasaa naaper­torlugu ... pin­ngor­titaq”. Inut­tut pis­sutsimik nutaamik ilumut atisisin­naavugut? Aap. Jehovap im­minik as­silil­luni pin­ngor­tip­paatigut pis­susiminik nuan­nersunik ilaarsisin­naaq­qul­luta. – 1 Mos 1:26, 27; Ef 5:1.

² Ilumoor­poq naam­mal­luin­nan­ngis­suseq kingor­nuk­katsigu ilaan­nik­kut pileris­susipiloqar­tarsin­naasugut. Aam­ma avatangiisitsin­nit sun­ner­neqar­tar­pugut. Jehoval­li nal­lit­tuil­luni ikiuineratigut taas­suma kis­saatigisaatut pis­suseqalersin­naavugut. Inut­tut taama it­tun­ngor­nis­satsin­nik aalajangiusiman­nik­kumal­luta pis­suserineqar­tus­sat inut­tut pis­sutsimut nutaamut ilaasut arlal­lit sam­meriar­tigit. (Kolossemiut 3:10-14  atuakkit). Taava aam­ma pis­suserineqar­tus­sat taak­ku oqaluus­sinermi qanoq ersersis­sin­naanerivut sam­mis­savar­put.

3. Pis­suserineqar­tus­saq inut­tut pis­sutsimut nutaamut ilaasoq suua?

³ Paulusi nas­suiaavoq kinaassusersiortuunnginneq inut­tut pis­sutsimut nutaamut ilaasoq pingaarutilik. Ima al­lap­poq: “Apeq­qutaan­ngilaq grækeriuneq juutiunerluun­niit, kipineqar­neq kipineqan­ngin­nerluun­niit, barbariuneq, skytiuneq, inus­siaaneq inus­siaan­ngin­nerluun­niit.” * Ilagiin­ni misigisoqas­san­ngilaq am­mip qalipaataa, inuiaas­suseq inuiaqatigiin­niluun­niit inis­sisimaf­fik pis­sutigalugu al­lanit pitsaanerul­luni. Sooq? Kristusip ajoqersugaatut ‘tamat­ta ataasiugat­ta’. – Kol 3:11; Gal 3:28.

4. (a) Jehovamut kif­faasut inun­nik al­lanik qanoq pin­nit­tariaqar­pat? (b) Pis­sutsit qanoq it­tut kristumiutut ataasius­suseqar­nermut akor­nutaasin­naap­pat?

⁴ Inut­tut pis­suseq nutaaq atigaangatsigu inuit tamaasa ataq­qisar­pavut am­mimik­kut qanorluun­niit qalipaateqaraluar­pata qanorluun­niil­lu tunuliaqutaqaraluar­pata. (Rom 2:11) Nunat ilaan­ni taman­na imaan­naaneq ajor­poq. As­sersuutigalugu Sydafrikami qangaanerusoq inuit am­mip qalipaataa tun­ngavigalugu naalak­kersuisunit im­mik­koor­tin­neqarlutik najugas­sin­neqar­tar­put. Inuit amerlanersaat, ilaatigut Nalunaajaasut, sumiif­fin­ni taak­kunani suli najugaqar­put. Siulersuisoqatigiit qatan­ngutitsin­nik kajumis­saarerusup­put ‘am­maq­qul­lugit’. Taamaat­tumik 2013-imi oktobarimi, qatan­ngutit am­mimik qalipaataatigut as­sigiin­ngitsut im­min­nut ilisarisimal­lualer­nis­saan­nut iluaqutaasus­samik, im­mik­kut it­tumik aaq­qis­suus­sisoqar­nis­saanik akuersip­put. – 2 Kor 6:13.

5, 6. (a) Nunami aalajangersimasumi Guutip in­nut­tai ataasius­suseqar­neruleq­qul­lugit qanoq aaq­qis­suus­sisoqarsimava? (Al­laaserisap aal­laq­qaataani as­sit takuk­kit). (b) Taman­na qanoq kinguneqar­pa?

⁵ Qatan­ngutit aaq­qis­suus­sip­put weekendit ilaan­ni nalunaajaasut ilagiin­nit oqaatsitigut am­mil­lu qalipaataatigut as­sigiin­ngitsunit marlun­neersut peqatigiit­tar­nias­sam­mata. Qatan­ngutit ilagiin­nit marlun­nit taak­kunan­ngaan­neersut oqaluus­seqatigiit­tar­put, ataatsimiigiaqatigiit­tarlutik im­minul­lu pulaar­tarlutik. Ilagiit hundredel­lit aaq­qis­suus­sami tamatumani peqataap­put, im­mik­koor­tor­taqarfim­mul­lu amerlasuunik nuan­nersunik nalunaaruteqar­toqar­tar­poq. Al­laat nalunaajaasuun­ngitsut ilaan­nit tupigineqar­put. As­sersuutigalugu palasi ima oqar­poq: “Nalunaajaasuun­ngilanga, oqar­tariaqar­pungali oqaluus­sinersi aaq­qis­sugaal­luin­nar­toq, am­mil­lu qalipaataatigut as­sigiin­ngik­kaluarlusi ataasius­suseqar­pusi.” Qatan­ngutit aaq­qis­suus­saq taman­na qanoq isumaqarfigaat?

⁶ Aal­laq­qaam­mut qatan­ngutip ar­nap Nomamik atil­lip xhosatut oqalut­tup Nalunaajaasunik ilagiin­nit tulut­tut oqaasilin­neersunik angerlarsimaf­fin­nguaminut qaaq­qusinis­sani sukanganarivaa. Nalunaajaasul­li qaamasumik amil­lit oqaluus­seqatigereeramigit pulaareeramigil­lu qasuk­kaamivoq. Ima oqar­poq: “Uagutsitul­li iin­nar­put!” Qatan­ngutit ilagiin­nit tulut­tut oqaaseqarfiusuneersut ilagiit xhosatut oqaaseqarfiusut oqaluus­seqatigiar­tormatigit  Noma taak­kua ilaan­nik angerlarsimaf­fim­minut neriar­toq­qusivoq. Pulaar­tumi ilaat, utoq­qaaner­taq qaamasumik amilik, karseeq­qamik plastik­kimik is­siaveqarusum­mat ajasoor­poq. Aaq­qis­suus­saq suli ingerlasoq taman­na iluaqutigalugu qatan­nguter­pas­suavut ikin­ngutitaar­tor­put as­sigiin­ngitsunil­lu tunuliaqutalin­nik ilisarisiman­niler­put.

7. Sooq misigin­neqataajuar­tariaqar­pugut?

⁷ Saatanip silarsuaa piutil­lugu Jehovap in­nut­tai misilin­neqar­tuas­sap­put. Sulif­fis­saaleqinermit, perulun­nermit, malersugaanermit, pin­ngor­titarsuarmi ajunaar­nersuar­nit, til­lif­figitin­nermit ar­tor­nar­tunil­lu al­lanit tamat­ta eq­qugaasin­naavugut. Misilin­neqar­nitsin­ni ikioqatigiis­sin­naajumal­luta ilumoorluta misigin­neqataasin­naasariaqar­pugut. ‘Misiginneqataangaarneq’ al­lanut ‘inussiarnisaartarnissamut’ kajumis­sis­sutigis­savar­put. (Ef 4:32, NW) Pis­suserineqar­tus­sat taak­ku inut­tut pis­sutsimut nutaamut ilaap­put. Taak­ku Guutimik ilaarsinis­samut al­lanil­lu tup­pal­lersaanis­samut iluaqutigis­savavut. – 2 Kor 1:3, 4.

8. Ilagiin­niit­tunik tamanik misigin­neqataasarlutalu inus­siar­nisaar­tar­ner­put qanoq kinguneqarluarsin­naava? As­sersuuteqarit.

⁸ Nunamit al­lamit nuus­simasunut pis­sakil­lior­tunul­luun­niit ilagiitsin­niilersimasunut qanoq inus­siar­nisaar­nerusarsin­naavugut? Tikil­luaq­qorusup­pavut, ikin­ngutigilerusul­lugit ilagiin­nilu pisariaqar­tin­neqar­tutut misigiler­tik­kusul­lugit. (1 Kor 12:22, 25) As­sersuutigalugu Dan­nykarl Filip­pinerinin­ngaan­niit Japanimut nuup­poq. Al­lamiuugami sulif­fim­mini suleqatimi pineqar­tar­nerat­tut pitsaatigisumik pineqar­neq ajor­poq. Taamaal­luni Jehovap Nalunaajaasuisa ataatsimiin­neran­ni najuup­poq. Dan­nykarl ima oqalut­tuar­poq: “Najuut­tut tamangajam­mik Japanimiuup­put, tikil­luaq­qul­luar­paan­ngali, ilisarisimasamit­tut pil­lunga.” Qatan­ngutit inus­siar­ner­nerat Jehovamut qanil­linis­saminut iluaqutigiuar­paa. Naggataatigut Dan­nykarl kuisip­poq, ul­lumik­kul­lu utoq­qaaner­tatut kif­far­tor­poq. Utoq­qaaner­taqataasa Dan­nykarlip nuliatalu, Jen­niferip, ilagiin­niin­nerat nuan­naarutigaat, imalu oqar­put: “Taak­ku pioneriul­lutik pilimanian­ngitsumik inuup­put Guutil­lu naalagaaf­fianik sal­liutitsinermi maligas­saal­luarlutik.” – Luk 12:31.

9, 10. Oqaluus­sinermi misigin­neqataanermik ersersitsinerup kinguneqarluar­tar­neranik as­sersuuteqarit.

⁹ Guutip naalagaaf­fia pil­lugu nutaarsias­samik nuan­nersumik oqaluus­sis­sutigin­nik­kaangat­ta ‘tamanut ajun­ngitsulior­nis­samut’ periarfis­saqar­tar­pugut. (Gal 6:10) Nalunaajaasor­pas­suit nunasisunik misigin­neqataasar­put taak­kualu oqaasiinik ilin­niar­niarsarisarlutik. (1 Kor 9:23) Ilungersor­nerat kinguneqarluar­tar­poq. As­sersuutigalugu Australiami qatan­ngut ar­naq pioneri Tif­fanymik atilik swahilisut ilin­niar­poq ilagiin­ni swahilisut oqaaseqarfiusuni Brisbanemiit­tuni ikiuutaajumal­luni. Taak­kua oqaasiinik ilin­niar­neq ilungersunaraluar­toq inuunera siuner­taqarluar­neruler­poq. Tif­fany ima oqar­poq: “Il­lit kif­far­tor­nerit pis­sanganar­tuutik­kusuk­kuk­ku ilagiin­ni al­lamiutut oqaaseqar­tuniin­neq ilin­nut tul­luas­saaq. Taamatut kif­far­tor­neq il­loqarfigisaq qiman­ngik­kaluarlugu angalaner­tut ip­poq. Nunarsuaq tamak­kerlugu  qatan­ngutigiis­suar­niin­nerit ataasius­suseqar­nerlu tupin­nar­toq nam­mineerlutit misigis­savatit.”

¹⁰ Ilaqutariit Japanimiit­tut tamatumun­nga as­singusumik iliuuseqar­put. Ilaqutariin­ni paniusoq, Sakiko, ima oqar­poq: “Oqaluus­sigaangat­ta Brasiliamit nunasisunik naapitsigajup­pugut. Taak­kua Biibiliini Por­tugaliumiusuuni al­las­simaf­fiit, soorlu Saq­qum­mersitat 21:3, 4 imaluun­niit Tus­siaat 37:10, 11, 29, takutik­kaangatsigit alaper­naaler­tar­put ilaan­nik­kul­lu al­laat qul­lilisarlutik.” Ilaqutariit taak­kua nunasisut misigeqatigaat sal­lusuis­sum­mil­lu paasin­nin­nis­saan­nut ikiorusul­lugit, taamaat­tumik ilaqutariit Por­tugalimiusut ilin­nialer­put. Kingusin­nerusuk­kut ilaqutariit taak­ku ilagiin­nik Por­tugalimiutut oqaasilin­nik pilersitsinermi ikiuutaap­put. Ukiut ingerlaneran­ni nunasisor­pas­suit Jehovamut kif­far­tor­tun­ngor­nis­samut ikiorsimavaat. Sakiko ima oqar­poq: “Por­tugalimiusut ilin­niar­neq imaan­naan­ngilaq, pil­luaq­qus­sutil­li ilungersor­nitsin­nik akimuip­put. Jehovamut qujamasoqaagut.” – Apustilit Suliaat 10:34, 35 atuakkit.

11, 12. (a) Sooq inut­tut pis­sutsimik nutaamik atisinis­samut eq­qor­tunik pis­sutiginiagaqar­tariaqar­pugut? (b) Maniguut­tuar­nis­samut suut iluaqutigis­savavut?

¹¹ Inut­tut pis­sutsimik nutaamik atisinis­samut kajumis­sis­sutigisar­put tas­saasariaqar­poq Jehovamik ataq­qinar­titsinis­sar­put, tas­saanani al­lanit nersor­neqar­nis­sar­put. Eq­qaamajuk in­ngili naam­mal­luin­nar­tuugaluar­toq makitasuun­ngor­toq ajor­tuliorlunilu. (Ezekieli 28:17 naleq­qiuguk). Uagut naam­mal­luin­nan­ngitsuuvugut, taamaat­tumik makitanaveersaar­nis­saq imaan­naan­ngin­nerungaar­poq. Taamaak­kaluar­torli maniguunnermik atisisin­naavugut. Taamaalior­nis­samut suna iluaqutigis­savar­put?

¹² Maniguun­nis­samut iluaqutigisin­naasat­ta ilagaat Guutip oqaasianik ul­lut tamaasa atuar­tar­neq atuak­katsin­nil­lu eq­qarsaatigin­neq­qis­saar­tar­neq. (5 Mos 17:18-20) Pingaar­tumik Jiisusip uagutsin­nut ilin­niar­titsis­sutigisaanik maniguun­nermil­lu maligas­siaanik nuan­ningaar­tumik eq­qarsaatigin­neq­qis­saar­tariaqar­pugut. (Matt 20:28) Jiisusi ima maniguutsigivoq apustilimi isigaan­nik asaal­luni. (Joh 13:12-17) Iliuuserisin­naasar­put al­la tas­saavoq Jehova qin­nuigalugu anersaaminik tuneq­qul­luta. Taas­suma anersaava al­lanit pitsaanerusutut misigeq­qajaanermik  akiuinis­samut iluaqutigisin­naavar­put. – Gal 6:3, 4; Fil 2:3.

13. Maniguun­neq sunik akis­sarsiaqaataasar­pa?

¹³ Ussatit 22:4 atuaruk. Jehovap piumaf­figaatigut qanilaar­tuus­sasugut, tas­sa maniguutis­sasugut. Maniguun­neq akis­sarsiaqar­naqaaq. Maniguuk­kut­ta ilagiin­ni eq­qis­sineqar­nerulerlunilu ataasius­suseqar­nerulis­saaq. Aam­ma Jehovap pisas­sarin­ngisaraluatsin­nik ajun­ngisaarfigisas­savaatigut. Apustili Petrusi ima al­lap­poq: ‘Tamas­si im­mis­sin­nut qanilaarfigeqatigiin­neq [maniguuf­figeqatigiin­neq, NW] atiniarsiuk, Guutip makitasuut akerar­tor­pai, qanilaar­tul­li saam­maat­tar­pai.’ – 1 Petr 5:5.

14. Kina saamanermut naam­magit­tar­nermul­lu tun­ngatil­lugu maligas­saal­luar­ner­paava?

¹⁴ Ul­lumik­kut silarsuarmi inuk saamal­lunilu naam­magit­tar­toq san­ngiitsutut isigineqarajup­poq. Isigin­nit­taaserli taman­na kuk­kuvoq. Pis­suserineqar­tus­sat nuan­nersut taak­ku qilam­mi nunamilu pis­saaneqar­ner­paamit Jehovameersuup­put. Taan­na saamanermut naammagittarnermullu tun­ngatil­lugu maligas­saal­luar­ner­paavoq. (2 Petr 3:9) As­sersuutigalugu eq­qarsaatigeriaruk Jehovap in­ngilini aq­qutigalugu Aaperaat Lotilu akigamigit qanoq naam­magit­tar­tigisoq. (1 Mos 18:22-33; 19:18-21) Aam­ma eq­qarsaatigiuk Jehovap inuiaqatigiit Israelik­kut naalan­ngitsut ukiunit 1500-nit amerlanerusuni qanoq naam­magit­tarfigitigigai. – Ez 33:11.

15. Jiisusi saamanermut naam­magit­tar­nermul­lu tun­ngatil­lugu qanoq maligas­saal­luar­pa?

¹⁵ Jiisusi ‘saamasuuvoq’. (Matt 11:29, NW) Taas­suma ajoqersuk­kani san­ngiil­lior­taraluar­tut naam­magit­tarfigai. Jiisusi nunarsuarmi kif­far­tor­nermini tun­ngavis­saqan­ngitsumik isor­nar­torsior­neqar­tarlunilu un­nerluutigineqar­tar­poq. Toqus­sili tikil­lugu saamal­lunilu naam­magit­tar­poq. Jiisusip nap­pak­kami an­niar­titaaf­fim­mi naal­liungaar­nermini angutit im­minik nap­pak­kamut kikiat­tuisut eq­qarsaatigalugit Ataatani ima qin­nuigaa: “Isumak­keerfigik­kit suliar­tik nalum­mas­suk.” (Luk 23:34) Jiisusi tatineqangaaraluarluni an­niaraluarlunilu saamajuar­poq naam­magit­tar­tuarlunilu. – 1 Petrusi 2:21-23 atuakkit.

16. Qanoq ilil­luta saamasuul­lutalu naam­magit­tarsin­naavugut?

¹⁶ Uagut qanoq ilil­luta saamal­lutalu naam­magit­tarsin­naavugut? Paulusi iliuuserisin­naasat­ta ilaan­nik eq­qaasaqar­poq ima al­lak­kami: “Kamageqatigiigitsi isumak­keerfigeqatigiit­tarlusilu arlas­sin­nut as­suarliutis­saqaraangas­si. Soorlu Naalak­kap isumak­keerfigigaasi taamatut­taaq ilis­si ilius­saasi.” (Kol 3:13) Al­lanik isumak­keerfigin­nis­sin­naajumal­luta saamasuusariaqarlutalu naam­magit­tar­tuusariaqar­pugut. Taamaan­ner­put ilagiin­ni ataasius­susermut siuarsaataas­saaq ataasius­suseqar­tuar­titsis­sal­lunilu.

17. Sooq saamal­lutalu naam­magit­tar­tuunis­sar­put pingaaruteqar­pa?

¹⁷ Jehovap al­lanut saamasaar­tar­nis­sar­put naam­magit­tarfigin­nit­tar­nis­sar­pul­lu piumasaraa. Taas­suma silarsuas­saani nutaami inoorusuk­kut­ta pis­suserineqar­tus­sat taak­ku pingaaruteqarluin­nar­put. (Matt 5:5; Jaak 1:21) Saamal­lutalu naam­magit­tar­tuunitsigut Jehovamik ataq­qin­nit­tar­pugut al­lal­lu taamatut pis­suseqar­nis­saan­nut ikior­tarlugit. – Gal 6:1; 2 Tim 2:24, 25.

18. Asan­nin­neq kinaas­susersior­tuun­ngin­nerlu qanoq im­min­nut at­tuumas­suteqar­pat?

¹⁸ Pis­suserineqar­tus­sat eq­qar­toriik­kavut tamarmik asanninnermut atas­suteqar­put. As­sersuutigalugu ajoqersuk­kap Jaakup qatan­ngutini siun­nersor­tariaqar­pai inuit pisuut piitsunin­ngar­nit ajun­ngin­nerusumik pisarmatigit. Nas­suiaavoq taamaalior­neq Guutip peq­qus­sutaanik matumin­nga unioq­qutitsinerusoq: “Tul­lit ilit­tut asas­savat.” Taava ima nangip­poq: “Kinaas­susersiorus­sili ajor­tulior­pusi.” (Jaak 2:8, 9) Inun­nik asan­nit­tuugut­ta inuit al­lat ilin­niagaat, am­mimik­kut qalipaataat inuiaqatigiin­niluun­niit inis­sisimaf­fiat piin­narlugit siumut isum­mius­sereer­tar­navian­ngilagut. Kinaas­susersior­tuun­ngin­neq qal­lik­kuin­naq pis­suserineqarsin­naan­ngilaq. Qaman­nga pisumik pis­suserisariaqar­par­put.

19. Sooq asan­nin­nermik atisinis­sar­put pingaaruteqar­pa?

¹⁹ Asan­nin­neq aam­ma ‘kamagit­tar­tuul­lunilu saamasuuvoq’ an­nerujumatuusar­nanilu. (1 Kor 13:4) Tas­sa naam­magit­tar­tuusariaqarlutalu inus­siar­nersuusariaqarlutalu maniguut­tariaqar­pugut nutaarsias­saq nuan­nersoq tul­litsin­nut oqaluus­sis­sutigiuas­sagutsigu. (Matt 28:19) Taak­ku pis­suserigutsigit qatan­ngutivut ilagiin­niit­tut tamaasa eq­qis­seqatiginis­saat ajor­nan­ngin­nerutis­savar­put. Tamat­ta taamatut asan­nit­tulior­tarut­ta ilagiit or­nit­tak­kavut ataasius­suseqarlutil­lu Jehovamut ataq­qinaataas­sap­put. Al­lat ataasius­suseq taman­na takus­savaat sal­lusuis­sul­lu kajungerilerlugu. Taamaat­tumik inut­tut pis­sutsip nutaap Biibilimi al­laatigineqar­nera ima naggaser­neqar­poq: “Tamak­kuali tamaasa saniatigut asan­nin­neq atiniarsiuk, tas­saam­mat ataasius­sutsip qilerutaa naam­mal­luin­nar­toq.” – Kol 3:14, NW.

20. (a) Im­minut qanoq aperisariaqar­pugut, aam­ma sooq? (b) Nuan­nersumik sumik siunis­saqar­pugut?

²⁰ Im­minut ima aperisariaqar­pugut: ‘Inut­tut pis­susitoqaq peerumal­lugu peersimajuarumal­lugulu al­lanik suli al­lan­nguisariaqar­punga?’ Jehova ilungersorluta qin­nuigisariaqar­par­put ikioq­qul­luta. Eq­qarsaatipalaat ileq­qupalaal­lu al­lan­ngor­tin­niarlugit ilungersorluta iliuuseqar­tariaqar­pugut ‘Guutip naalagaaf­fia kingor­nus­sarsiarisin­naanias­sagatsigu’. (Gal 5:19-21) Aam­ma im­minut ima aperisariaqar­pugut: ‘Jehovamut iluarisaajumal­lunga eq­qarsar­taasera naleq­qus­sar­tuar­para?’ (Ef 4:23, 24) Naam­mal­luin­nan­ngitsuugat­ta inut­tut pis­suseq nutaaq atiniarlugu ator­tuar­niarlugulu ilungersorluta iliuuseqar­tuar­tariaqar­pugut. Inuusut tamarmik inut­tut pis­sutsimik nutaamik atisaqaler­pata Jehoval­lu pis­susiinik nuan­nersunik ilaarseq­qis­saar­taler­pata inuuneq qanoq nuan­ner­tigis­sava!