TOQQORSIVITSINNIT
“Qaqugu ataatsimeersuaqqissaagut?”
ILLOQARFIMMI ulapaarfiusumi 1 millioninit amerlanerusunik inulimmi 1932-mi novembari naalersoq Mexico Citymiippugut. Sapaatip-akunnera tamanna sioqqullugu aqqusinermi angallattut najoqqutassaannik qulleqaleqqaarpoq. Maannali inuit allamik pissangassuteqarput. Tusagassiortut assiliivitik piareerlugit qimutsuitsut unittarfiani tikeraartussaq immikkut ittoq utaqqivaat. Kina? Tassaavoq Joseph F. Rutherford Watch Tower Societyp præsidentia. Aamma Nalunaajaasut qatanngut Rutherford, ulluni pingasuni ataatsimeersuarnissamut peqataajartortoq, tikilluaqquniarlugu utaqqipput.
The Golden Age-mi ima allassimavoq: Mexicomi sallusuissut siaruarterniarlugu ilungersornermut tunngatillugu “ataatsimeersuarneq tamanna oqaluttuarisaanermi pingaaruteqarluinnartuusoq apeqquserneqarsinnaanngilaq”. Ataatsimeersuarnermili tamatumani inuit 150-iinnaat najuummata sooq ataatsimeersuarneq tamanna taama pingaaruteqartigaa?
Ataatsimeersuarneq tamanna sioqqullugu sallusuissut Mexicomi siaruarpallaarsimanngilaq. 1919-imiilli ataatsimeersuartoqartaraluartoq tamatuma kingorna ilagiit ikiliartulersimapput. 1929-mi Mexico Citymi immikkoortortaqarfeqalermat pissutsit ajunnginnerulissasoriniarlugit suli ajornartorsiuteqarpoq aaqqittariaqakkanik. Guutip peqatigiissortaanit piffissaq tamaat kiffartortut siunnersorneqarsimapput oqaluussiitigalutik saniatigut aningaasarsiorniartassanngitsut. Taakkua ilaata ataatsip tamanna kamaatigingaaramiuk sallusuissut qimappaa namminerlu Biibilimik atuaqqissaaqatigiinnik pilersitsilluni. Tamatumalu nalaani immikkoortortaqarfimmi nakkutilliisoq ileqqorluttuummat taarserneqartariaqarpoq. Tamakku pissutigalugit Mexicomi Nalunaajaasut ilumoorfiginnittut qiimmassarneqarnissartik pisariaqartippaat.
Qatanngutip Rutherfordip tikeraarnermini aalajaatsut taakku qiimmassangaarpai ataatsimeersuarnermi kajumissinartunik marloriarluni oqalugiarami radiukkullu oqalugiaatit tallimat aallakaatitikkamigit. Mexicomi nutaarsiassap nuannersup siaruarternerani aatsaavissuaq radio atorneqarpoq. Ataatsimeersuartoqareermat immikkoortortaqarfimmi nakkutilliisunngorlaaq oqaluussinermik aaqqissuussisussatut toqqarneqarpoq. Maanna Nalunaajaasut aallussillualerput, Jehovamillu iluarineqarlutik oqaluussiuarput.
1941-mi Mexico Citymi ataatsimeersuarneq
Aappaaguani 1933-mi ataatsimeersuarnerit marluupput aappaa Veracruzimi aappaalu Mexico Citymi. Qatanngutit oqaluussiffigisartakkaminni ilungersorput angusaqarluarlutillu. Assersuutigalugu 1931-mi oqaluussisartut 82-iupput. 1941-mi quleriaammik amerlisimapput! 1941-mi Mexico Citymi inuit 1.000-t missaat ataatsimeersuaqataapput.
“AQQUSERNGIT ULIKKAARTUT”
1943-mi ataatsimeersuarnissaq “Inuiaat kiffaanngissuseqartut”, Mexicomi illoqarfinni aqqaneq-marlunni pisussaq, Nalunaajaasut ussassaarutigilerpaat. * Taamaaliorput allagartarsualersorlutik. Allagartarsuit marluk imminnut atassusikkat oqaluussisartup tuiminnut nivinngartarpai allagartarsuup aappaa saarmioralugu aappaalu tunormioralugu. Nalunaajaasut ataatsimeersuarnissatik 1936-miilli taamatut ussassaarutigisarsimavaat.
1944-mi Mexico Citymi qatanngutit allagartarsualerlutik angalaartut aviisimi assiliartaritinneqarnerat
Allagartarsualerluni ussassaarineq Mexico Citymi iluatsilluangaarmat aviisimi La Nación-imi Nalunaajaasut ataatsimeersuarnerat ima allaatigineqarpoq: “Ulloq siulleq inunnik qaaqqusiortoqquneqarput. Aqaguanilu ataatsimeersuarfitsik tattulerpaat.” Taakkua iluatsilluarnerat ilagiit katuullit nuannarinnginnamikku Nalunaajaasut akerlilersulerpaat. Qatanngutilli sioorannginnamik ussassaarinertik unitsinngilaat. La Nación-imi allaaserisami allami ima allassimavoq: “Illoqarfissuarmiittut kikkut tamarmik Nalunaajaasut takuaat.” Allassimavoq soorlulusooq qatanngutit “allagartarsuanngortut”. Aamma allaaserisamut qatanngutit Mexico Cityp aqqusernginiittut assitaliussimavaat ima oqaasertalerlugu: “Aqquserngit ulikkaartut.”
SINIFFIIT “NATERTUT CEMENTIUSUTUT MANNGERTIGINATILLU NILLERTIGINNGITSUT”
Ukiuni tamakkunani Nalunaajaasut amerlanerit Mexicomi ataatsimeersuarnerit najuuffiginiarlugit pilliuteqangaartariaqartarput. Qatannguterpassuit illoqarfeeqqanit avinngarusimasuneersuupput qimutsuitsut unittarfii aqquserngilluunniit ungasillugit. Ilagiit ilaannit ima allattoqarpoq: “Uagutsinnut qaninnerpaaq tassaavoq nalunaarasuartaatip aqqutaa.” Taamaattumik ataatsimeersuariartut ullorpassuarni siutitoorsuup qaani qimusserlutik pisuinnarlutilluunniit qimutsuitsut unittarfianukartarput illoqarfimmut ataatsimeersuarfissamukarniarlutik.
Nalunaajaasut amerlanerit piitsuugamik ataatsimeersuariarnissartik akissaqartippianngilaat. Apuukkaangamik Nalunaajaasuni asannittuni inoroorsaartunilu inisimasuusarput. Allat naalagaaffilersaarfinni sinittarput. Ilaanni qatanngutit 90-it missaat immikkoortortaqarfimmi unnuipput, karsit atuakkanik imallit siniffigalugit. Atuakkami ukiumoortumi allassimavoq qatanngutit qujamasuttut karsit ‘natertut cementiusutut manngertiginatillu nillertiginngimmata’.
Nalunaajaasut taakku qatanngutitik peqatigisinnaasimagamikkit misigipput pilliutigisimasatik tamarmik asuliinnanngitsut. Ullumikkut Mexicomi Nalunaajaasut 850.000-nit amerlanerupput, aamma taakku taamatut qujamasungaarput. * Atuakkami ukiumoortumi 1949-moortumi allassimavoq qatanngutit pilliutigisimasariaqakkatik Jehovamut kiffartornermi aallussinikillissutigisimanngikkaat. Ataatsimeersuareernerit tamaasa “tamanna eqqartoqqittuartarpaat”. Qatanngutit ima aperiuarsimapput: “Qaqugu ataatsimeersuaqqissaagut?” – Toqqorsivitsinnit Amerika Qiterlermiittumit.