Kamajasuunnginneq – siunertaqartumik pinertusaarneq
‘ULLUSSANI kingullerni’ inuugatta inuuneq ajornakusoornerulersimammat kamagittarnissarput aatsaat taama pisariaqartilluinnarparput. (2 Tim 3:1-5) Nalitsinni inuppassuit utaqqisinnaassuseqanngillat, namminissarsiortuupput, oqqakkumatullutillu imminut aqussinnaanngillat. Taamaattumik imminut ima aperisariaqarpugut: Inuit taakku assigalugit naammagittarunnaarsimavunga? Kamajasuunnginneq qanoq paasisariaqarpa? Kamajasuunnginneq inuttut qanoq pissuserilersinnaavara?
KAMAJASUUNNGINNEQ QANOQ PAASISARIAQARPA?
Oqaaseq ‘kamajasuunnginneq’ Biibilimi atorneqartoq aamma erinitsajuissusermik utaqqisinnaassusermillu nutserneqarsinnaasoq qanoq paasisariaqarpa? Ajornartorsiut naammagalugu atorlugu pineqaannanngilaq. Inuk kamajasuunngitsoq siunertaqarluni pinertusaartarpoq, neriuuteqarluni pissutsit ajunnginnerulissasut. Imminuinnaq eqqarsaatigineq ajorpoq, allalli misigussusii eqqarsaatigisarpai allaat inunnit allanit uumitsatsinneqaraluarluni imaluunniit ajortumik pineqaraluarluni. Neriuttuaannarpoq taakkuninnga eqqisseqateqarumaarluni. Tupinnanngilaq Biibilimi allaatigineqarmat kamajasuunnginneq asanninnermit aallaaveqartoq. * (1 Kor 13:4) Kamajasuunnginneq ‘anersaap inerititaanut’ ilaavoq. (Gal 5:22, 23) Taamaattumik kamajasuunnginnissatsinnut suut pisariaqartippavut?
KAMAJASUUNNGINNEQ QANOQ INERIARTORTINNEQARSINNAASOQ
Kamajasuunnginneq ineriartortikkumallugu Jehovap anersaava, tatiginnitsiminut tunniuttagaa, qinnutigisariaqarparput. (Luk 11:13) Anersaaq sunniisinnaassuseqangaarpoq, qinnutivulli naapertorlugit iliuuseqartariaqarpugut. (Tuss 86:10, 11) Tassa erinitsajuissuseq inuttut pissuserilerniarlugu ullut tamaasa ilungersortariaqarpugut. Ilaatigulli kukkusoortarsinnaavugut. Suna iluaqutigisinnaavarput?
Jiisusip maligassiaa naammalluinnartoq pillugu atuaqqissaartariaqarlutalu ilaarniartariaqarparput. Apustilip Paulusip “inuttut pissuseq nutaaq”, kamajasuunnginnermik ilaqartoq, allaatigigamiuk ima kajumissaarpaatigut: “Kristusip eqqissisitsinera uummatissinni aalajangiisuuli.” (Kol 3:10, NW, 12, 15) Taamaaliorumalluta Jiisusip maligassiaa ilaartariaqarparput tatigilluinnarlugulu piffissaq eqqorlugu Guutip pissutsit aaqqikkumaarai. Taamatut tatiginnikkutta, qanorluunniit avatangiisitsinni pisoqaraluarpat, erinitsajuinneq pissuseriuarsinnaassavarput. – Joh 14:27; 16:33.
Silarsuartaassap qanittukkut atuutilernissaa tamatta kissaatigaarput. Jehovalli qanoq kamagittarfigisimatigigaatigut eqqarsaatigigaangatsigu erinitsajuinnissaq ilinniartarparput. Biibilimi ima neriorsorneqarpugut: “Naalakkap neriorsuutigisani paamaarutinngilaa, naak ilaat isumaqaraluartut paamaarussinerarlugu; ilissinnulli erinitsajuippoq kimilluunniit tammaqqusinnginnami, 2 Petr 3:9) Tassa Jehovap uagutsinnut qanoq kamagittarnera eqqarsaatigisarutsigu allanut kamagittarnerussaagut. (Rom 2:4) Qaqugukkut kamagittartariaqarpugut?
tamaasalu allamik isumataarnissamut periarfissikkumagamigit.” (QAQUGUKKUT KAMAGITTARTARIAQARTUGUT
Ulluinnarni inuunitsinni pisuni amerlasuuni kamagittarnissarput pisariaqarsinnaavoq. Assersuutigalugu pingaarutilimmik oqaaseqarniaraangatta allanik akornusersuinnginnissatsinnut utaqqisinnaassuseqartariaqarpugut. (Jaak 1:19) Aamma allanit uumitsatsinneqaraangatta kamagittartariaqarpugut. Utaqqisinnaassuseqanngitsutut qisuariarnata pitsaassaaq Jehovap aamma Jiisusip uagut sanngiissutitsinnut qanoq qisuariartarnerat eqqaamagutsigu. Kukkussuteerannguavut tamaasa isiginiarneq ajorpaat. Pissuserisavulli ajunngitsut isiginiarnerusarpaat kamagittarlutillu pitsanngoriarnissatsinnut periarfissittarluta. – 1 Tim 1:16; 1 Petr 3:12.
Aamma arlaata oqaaserisavut iliuutsivulluunniit pillugit uparuarpatigut kamajuinnissarput pisariaqarpoq. Immaqa siullertut ajuallaqqaarluta immitsinnullu illersorluta qisuariaqqajaasinnaavugut. Guutilli oqaasiani allatut qisuariarnissatsinnik kajumissaarneqarpugut. Ima allassimavoq: “Kamajuissuseq anneruniarnermit pitsaaneruvoq. Kamaammernaveersaartarniarit sianiitsut kisimik kamaammiasuusarmata.” (Oqal 7:8, 9) Aamma uparuaat eqqunngilluinnaraluarpat kamajuissuseqartariaqarpugut qisuariannginnitsinnilu eqqarsarluaqqaartariaqarluta. Jiisusi eqqunngitsumik allanit unnerluussaagami taamaaliorpoq. – Matt 11:19.
Ingammik angajoqqaat meeqqatik pissusilersoriaasiat kissaataalluunniit eqqunngitsut pillugit naqqiiniarnerminni kamagittartariaqarput. Mattias Betelimi Skandinaviami kiffartortoq assersuutigeriartigu. Mattias inuusuttuulluni atuaqataasa upperisaa pillugu illaruaatigisarpaat. Aallaqqaammut angajoqqaavisa tamanna naluaat. Kisianni malugaat upperisaminik qularutiginnilersoq. Gillis Mattiasip ataataa oqaluttuarpoq nulianilu pisumi tamatumani kamagittarnissartik pisariaqartilluinnarsimallugu. Mattias ima aperisarpoq: “Guuti kinaagami? Taavami Biibili Guutip oqaaserinngippagu? Qanoq nalunngissinnaavarput ilumut Guutip taamatut piumasaqarfigigaatigut?” Aamma ataatani ima aperisarpaa: “Ilittut upperisaqanngikkuma sooq eqqartuunneqassagama?”
Gillis ima nassuiaavoq: “Ilaannikkut ernerput kamalluni aperisarpoq, imaanngitsoq anaanaanut uannullu kamalluni kisianni sallusuissut kamassutigalugu. Misigivoq sallusuissut inuunermini erloqissutigalugu.” Gillisip ernini qanoq ikiorpaa? “Erneralu nalunaaquttap-akunnerpassui oqaloqatigiittarpugut.” Mattiasip misigissusii isumaalu paaserusullugit Gillis tusarnaarlunilu aperisarpoq. Ilaannikkut Gillisip ernini nassuiaattarpaa oqarfigalugulu oqaloqatigeeqqinnginnerminni ullorluunniit ataaseq eqqarsaatiginnissasoq. Ilaannikkut Gillisip ernermi oqaasii ullualuit eqqarsaatigeqqaarusuttarpai. Oqaloqatigiittarnitik pissutigalugit Mattiasip utertitsissutip isumaa, Jehovallu uatsinnik asanninnera, uatsinnullu oqartussaassuseqarnerata naleqqunnera paasiartulerpai. Ataataa ima oqarpoq: “Piffissangaatsiaq ingerlagaluartoq erloqinaraluartorlu arriitsumilli qamannga pisumik Jehova asaneruleriartorpaa. Nuliaralu ernerput inuusuttuaraatillugu ikiorniarlugu kamagittarluta ilungersornivut imminut akilerlutillu uummataanik killiimmata nuannaarutigeqaarput.”
Gillisip nuliamilu erinitsajuillutik ernerminnik ikiuiniarnerminni upperaat Jehovamit ikiorneqarumaarlutik. Gillis ima oqarpoq: “Mattias oqarfigisarpara qamannga pisumik asagatsigu anaanaalu ilungersornerulluta qinnuttarlutigu taassuma paasinninnissaanik Jehovamit ikiorneqaqqullugu.” Angajoqqaat taakku erinitsajuillutik tunniutiinnarsimannginnamik nuannaangaarput!
Aamma erinitsajuittariaqarpugut ilaquttatta ilaat imaluunniit ikinngutitta ilaat nakorsarneqarsinnaanngitsumik nappaatilik isumagigaangatsigu. Ellen * aamma Skandinaviami najugalik assersuutigeriartigu.
Ukiut arfineq-pingasut missaat matuma siorna Ellenip uia marloriarluni qaratsamigut aanaartoorpoq. Tamatuma kingunerisaanik uia pilluarnermik, aliasunnermik misiginneqatiginninnermillu ersersitsisinnaajunnaarpoq. Tamannalu Ellenimut erloqinangaarpoq. Ima oqaluttuarpoq: “Kamagittangaarnissaq qinusaqattaarnissarlu pisariaqartissimavakka. Allassimaffik nuannarinerpaasara tuppallersaatigisartagaralu tassaavoq Filippimiut 4:13, tassani ima allaqqavoq: ‘Tamaasa pissatsitsisikkut atussallugit sapinngilakka.’” Jehovap pissaaneratigut tapersersuineratigullu Ellenip tamanna erinitsajuilluni naammagalugu atorpaa. – Tuss 62:6, 7.
JEHOVAP ERINITSAJUINNERA ILAARUK
Soorunami erinitsajuinnermut maligassiuinerpaaq tassaavoq Jehova. (2 Petr 3:15) Biibilimi Jehovap erinitsajuingaarnera pillugu atuartarpugut. (Neh 9:30; Es 30:18) Sodoma piujunnaarsinniarlugu aalajangermat Aaperaat aperisaqattaarmat Jehovap qanoq qisuariarnera eqqaamaviuk? Jehovap Aaperaat oqalutseqqaarpaa. Aaperaap apeqqutai isumakuluutaalu tamaasa Jehovap erinitsajuilluni tusarnaarpai. Taava Aaperaap isumakululluni oqaatigisaanik tusarnaarnerminik Jehova ersersitsivoq qularunnaarsillugulu illoqarfimmi tassani allaat inunnik quliinnarnik naapertuilluartoqarpat Sodoma piuneerunniarnagu. (1 Mos 18:22-33) Jehova tamatigut erinitsajuilluni tusarnaartarpoq qisuariapiluunngisaannarlunilu!
Kamajasuunnginneq kristumiunut tamanut pissuserineqartussanut ilaavoq pingaarutilik. Sapinngisatsinnik ineriartortikkutsigu Ataatarput erinitsajuitsoq isumassuisorlu, Jehova, ataqqissavarput, aamma ‘uppernikkut nikallujuinnikkullu Guutip neriorsuutigisaanik kingornussisussanut’ ilaassaagut. – Hebr 6:10-12.
^ par. 4 Pissuserineqartussaq asanninneq, Guutip anersaavata inerititaa pillugu allaaserisani qulingiluaasuni, siullertut sammineqarpoq.
^ par. 15 Ateq allanngortitaavoq.