ATUAQQISSAAGASSAQ 31
“Nikallunngilagut!”
“Taamaattumik nikallunngilagut.” – 2 KOR 4:16.
ERINARSUUT 129 Pinertusaartuarta
QILANAARTUUT *
1. Inuunivimmut arpaliunnermi apuukkumallutik kristumiut susariaqarpat?
KRISTUMIUT inuunivimmut arpaliupput. Aatsaat arpaleraluarutta ukiorpassuarniluunniit arpassimagaluarutta apuussinnaaqqulluta pinertusaartariaqarpugut. Apustilip Paulusip Filippimi ilagiinnut kaammattuutaa arpaliunnermi apuunnissamut kajumississutigisinnaavarput. Paulusimit allagarsigamik Filippimiut ilaasa ukiorpassuit aalajaallutik Jehova kiffartorfigisimavaat. Paulusilli arpaliunnerminni nikallujueqqullugit eqqaasippai. Maligassiuinini ilaarlugu ‘apuuffissaq anguniartuassagaat’ kissaatigaa. – Fil 3:14.
2. Paulusip Filippimiunut kajumissaarutaa sooq naleqquppa?
2 Paulusip Filippimiunut kajumissaarutaa naleqquppoq. Ilagiit pilersinneqarnerminniilli malersugaapput. Ukiup 50-ip missaani Paulusi Guutimit ‘Makedoniamut ikaaqquneqarami’ Silasilu Filippimut apuupput. (ApS 16:9) Tassani Lydia, arnaq tusarnaarusuttoq, naapippaat, Jehovallu “taassuma uummataa ammarpaa”. (ApS 16:14) Kinguninngua inoqutinilu kuisipput. Diaavululi ingerlaannaq ajornartorsiortitsilerpoq. Paulusi Silasilu illoqarfimmi atorfilinnit eqqunngitsumik eqqissiviilliortitsisuunerarneqarput. Tamatuma kingunerisaanik peqqarniitsumik pineqarput, parnaarussaapput kingornalu illoqarfimmit aallaqquneqarlutik. (ApS 16:16-40) Nikallorpalli? Naamerluinnaq. Aamma ilagiit pilersinneqaqqammersut pinertusaarnermikkut maligassiuilluarput. Paulusip Silasillu maligassiaat qatanngutit Filippimiittut qularnanngitsumik qiimmassaatigisimassavaat.
3. Paulusip suna ilisimavaa, apeqqutillu suut sammissavavut?
2 Kor 4:16) Ilisimavaami arpaliunnermi apuutissaguni apuuffissani aalajangiusimasariaqarlugu. Maligassiaanit suna ilikkarparput? Nalitsinni aalajaallutik upperluartut misigisaannit qanoq erserpa qanorluunniit ajornartorsiuteqaraluarluta pinertusaarsinnaasugut? Siunissarlu pillugu neriuuterput uniinnannginnissamut qanoq iluaqutigisinnaavarput?
3 Paulusip nikallunnginnissani aalajangiusimalluinnarpaa. (PAULUSIP MALIGASSIAA QANOQ ILUAQUTIGISINNAAGIPPUT
4. Pissutsit atukkani aporfiginagit Paulusi qanoq iliuuseqartuarpa?
4 Filippimiunut allannermi nalaani Paulusip tamaviaarluni iliuuseqarnera eqqarsaatigiuk. Romami illumini parnaarussaaqqavoq. Kiffaanngissuseqarnera killeqarpoq. Taamaakkaluartoq pulaartuminut nalunaajaasarpoq ilagiinnullu ungasissumiittunut allattarluni. Nalitsinnittaaq uppeqativut amerlasuut peqqiilliornertik utoqqalinertilluunniit pissutigalugu angerlarsimaannartuupput, periarfissatilli tamaasa atorlugit pulaartuminnut oqaluussisarput. Aamma inunnut naapikkuminaatsunut allakkanik qiimmassaataasunik allattarput.
5. Filippimiut 3:12-14 naapertorlugit apuuffissap aalajangiusimanissaanut Paulusip suna iluaqutigaa?
5 Paulusip siornatigut angusimasani kukkussutigisimasanilu allamut saasaatiginngilai. Oqarpoq ‘siunerminiittut’ angujumallugit, tassa arpaliunnermi apuukkumalluni, ‘kingunerminiittut’ puiortariaqarlugit. (Filippimiut 3:12-14 atuakkit). Paulusip allamut saasaatiginngisaasa ilaat suuppat? Siullertut, kristumiunngunngikkallarami juutiussusermi angusai amerlangaarput. Taamaakkaluartoq taakku ‘perlukutut igitassaannaasutut’ isigai. (Fil 3:3-8) Aappaattut, siornatigut kristumiunik malersuisimanerminik ilerasunnini Jehovamut kiffartorunnaassutiginngilaa. Pingajuattullu, eqqarsalinngilaq Jehova pillugu kiffartornermini iliuuseqangaarsimanini naammalersut. Paulusi kiffartornerminik aallussilluarpoq, naak parnaarussaaneq, persuttarneqarneq, umiuneq, kaanneq qilalernerlu misigigaluarlugit. (2 Kor 11:23-27) Qanorluunniilli angusarissaartigigaluarluni naalliutsigigaluarlunilu nalunngilaa Jehova kiffartorfigiuartariaqarlugu. Uaguttaaq taamaaliortariaqarpugut.
6. ‘Kingunitsinniittut’ puiugassavut suusinnaappat?
6 Kinguninniittut puiorumallugit Paulusi qanoq ilaarsinnaaviuk? Imaassinnaavoq siornatigut ajortuliarisimasatit pillugit ingasattumik ilerasuttartutit. Taamaappat illit pillutit Kristusip utertitsissutitut pilliutaanik misissuigit tamannalu tunngavigalugu isumakkeerfigineqarsinnaanerpit akuerinissaanut qinunikkut Jehovamut ikioqqullutit. Sammisaq tamanna nuannersoq atuaqqissaarlugulu eqqarsaatigeqqissaarukku pissutissaqanngitsumik ilerasuttarunnaarsinnavutit. Immaqa allaat ajortuliarisimasatit Jehovap isumakkeerfigisimasai pillugit imminut eqqartuuttarunnaassaatit. Paulusi aamma allatut ilinniarfigisinnaavarput. Immaqa Jehovamut kiffartorninni iliuuseqarnerujumallutit suliffinnit akissarsiagissaarnartumit soraarputit. Taamaappat pigisat pisinnaasimasaraluavit kipitsavigilinnginnerisigut kinguninniittut puiorsinnaavigit? (4 Mos 11:4-6; Oqal 7:10) “Kinguninniittut” aamma tassaasinnaapput misilinneqaatitit Jehovamullu kiffartorninni angusimasatit. Soorunalimi ukiut ingerlanerini Jehovap pilluaqqusisimanerata tapersersuisimaneratalu eqqarsaatigineri Ataatatsinnut qilammiusumut qaninnerusumik attaveqalissutigisinnaavavut. Eqqarsalerusunngilagulli naammattumik Jehovamut iliuuseqarsimagatta iliuuseqaqqittariaqanngitsugut. – 1 Kor 15:58.
7. Korinthimiunut allakkat siulliit 9:24-27 naapertorlugit inuunivimmut arpaliunnermi ajugaajumalluta susariaqarpugut? Nassuiaruk.
7 Jiisusip peqqussutaa una Paulusip paasilluarpaa: “Ilungersoritsi.” (Luk 13:23, 24) Paulusip nalunngilaa Jiisusi ilaarlugu inuunermi tamaat ilungersortariaqarluni. Taamaattumik kristumiut inuunerat arpaliunnermut assersuuppaa. (1 Korinthimiut 9:24-27 atuakkit). Arpattoq apuuffissamut apuukkumalluni allamut saannaveersaartarpoq. Assersuutigalugu nalitsinni illoqarfimmi arpaliuttut pisiniarfippassuit allallu allamut saasaataasinnaasut sanioqquttarpaat. Takorloorsinnaaviuk arpaqataasoq akikillisat pisiniarfiup igalaavisigut takuniarlugit arpakkunnaartoq? Ajugaarusukkuni taamaaliornavianngilaq! Inuunivimmut arpaliunnitsinni uaguttaaq allamut saannaveersaartariaqarpugut. Apuuffissarput aalajangiusimallugu Paulusitut ilungersorutta akissarsiassarput pissavarput!
INUUNIVIMMUT ARPALIUNNERMI UNAMMINIAGASSAT
8. Unamminiagassat pingasut suut sammissavavut?
8 Maanna unamminiagassat pingasut nikallussutaasinnaasut sammeriartigit. Tassaapput ilimaginngisamik utaqqinerusariaqarneq, timikkut sanngiilliartorneq aamma sivisuumik misilinneqarneq. Allat taamatut atugaqartillutik pinertusaarsimanerat ilinniarfigisinnaavarput. – Fil 3:17.
9. Ilimaginngisamik utaqqinerusariaqarnerput qanoq sunnerneqaatigisinnaavarput?
9 Ilimaginngisamik utaqqinerusariaqarneq. Jehovap neriorsuutaasa eqquunnissaat tamatta qilanaaraarput. Pruffiiti Habakkuki taamatut misigivoq. Jehovamut oqarpoq kissaatigalugu Judami ajussuseerutsitsissasoq. Taava Jehovap oqarfigaa qilanaarluni ‘utaqqiinnassasoq’. (Hab 2:3) Uagulli neriuutigisatta eqquunnissaat kingusinaarsorigutsigu aallusserpiarunnaarsinnaavugut allaallu pakatsilluta. (Uss 13:12) 1914-ip nalaani qatanngutitta ilaat taamatut misigisaqarput. Taamani tanitat ilimagaat 1914-imi qilaliassallutik. Tamannali pinngimmat aalajaatsut ilimaginngisaminnik utaqqinerusariaqarnerminni qanoq iliorpat?
10. Aappariit ilimaginngisamik utaqqinerusariaqaraluarlutik qanoq iliorpat?
10 Kristumiut aalajaatsut marluk taama atugaqarsimasut eqqarsaatigikkit. Qatanngut Royal Spatz 1908-mi 20-nik ukioqarluni kuisippoq, upperilluinnarpaalu qanittukkut qilaliartussaalluni. Allaat 1911-mi Pearl nuliarsarfigigamiuk ima oqarfigaa: “Nalunngilat 1914-imi susoqassanersoq. Katissagutta aalameertariaqarpugut!” Aappariit kristumiut taakku qilaliarnissamik 1914-imi akissarsinnginnamik tunniutiinnarpat? Naamik, Guutimmi piumasaatut iliortuarnissartik akissarsisinneqarnissaminnit pingaartinneruaat. Arpaliunnermi pinertusaarnissartik aalajangiusimavaat. Royal aamma Pearl toqunissartik tikillugu ukiorpassuarni aalajaallutik kiffartorput. Illit Jehovap aqqata qutsissisinneqarnissaa kisimilu oqartussaanerata eqqortuuneranik uppernarsarneqarnissaa qularnanngitsumik qilanaaraat. Qularutigissanngilat piffissaq aalajangikkani nalliuppat Jehovap tamanna eqquutitikkumaaraa. Tamanna nallertinnagu Guutimut kiffartornitsinni ilungersortuarisa ilimaginngisamik utaqqinerusariaqarneq nikallussutiginagu.
11-12. Timikkut sanngiilliartoraluarluta qanoq anersaakkut siumukartuarsinnaavugut? Assersuuteqarit.
11 Timikkut sanngiilliartorneq. Arpaliunnermi piviusumi peqataasoq nukittusariaqarpoq. Anersaakkulli siumukarusuttoq timikkut nukittusariaqanngilaq. Amerlasuut timikkut sanngiilliartoraluarlutik anersaakkut siumukarusussuseqangaarput. (2 Kor 4:16) Assersuuteqariarta. Qatanngut Arthur Secord 88-inik ukioqarluni ukiut 55-it Betelimi kiffartorsimavoq. Peqqiilliortalerami peqqissaasunit isumagineqartalerpoq. Taamaalluni peqqissaasup Arthur siniffimmini nalasoq ornippaa inussiarnersumillu oqarfigalugu: “Qatanngut Secord, Jehovamut kiffartorninni iliuuseqangaarsimavutit.” Arthurilli pisimasut pingaarnerpaatinngilai. Taassuma peqqissaasoq toqqarlugu isigalugu qungujuppoq oqarfigalugulu: “Ilumoorputit. Iliuuserisimasavulli pingaaruteqanngillat. Aalajaattuarnissarput pingaarneruvoq.”
12 Immaqa illit Jehovamut kiffartorninni ukiorpassuarni pinertusaarsimavutit. Maannali peqqiilliulernerit pissutigalugu siusinnerusukkut pisinnaasattut iliuuseqarsinnaanngilatit. Nikalloqinalli. Qularutigissanngilat Jehovap aalajaallutit kiffartorninni iliuuserisimasatit qujamasuutigalugillu puiorsimanngikkai. (Hebr 6:10) Aamma eqqaamajuk iliuuserisinnaasatit killeqarpata imaanngimmat Jehovamut uummatikkut iluunngarlutit tunniusimanngitsutit. Isumalluarlutit sapinngisat tamaat iliuuseqarnikkut ersersittarpat Jehova asangaarlugu. (Kol 3:23) Jehovap pisinnaasatta killeqarnerat ilisimavai artukkatsinnillu piumaffiginngisaannarluta. – Mark 12:43, 44.
13. Anatolijip Lidijallu misigisaat sivisuumik misilinneqarsimagaluarluta pinertusaartuarnissamut qanoq kajumississutigisinnaavarput?
13 Sivisuumik misilinneqarnerit. Jehovap kiffaasa ilaat ukiorpassuit atugarliorlutillu malersugaasimapput. Assersuutigalugu Anatolij Melnik * aqqaneq-marluinnarnik ukioqarluni ataataa tigusaavoq parnaarussaallunilu. Moldovami ilaquttanilu najugaqarfigisaminnit kilometerinik 7.000-nik ungasitsigisumut ataataa Siberiamut aallartinneqarpoq. Ukioq ataaseq qaangiummat Anatolij, anaanaa, aataa aanaavalu Siberiamut aallartinneqarput. Kingorna ississuarmi aputaannaasukkut pisuttariaqaraluarlutik illoqarfeeqqami kilometerinik 30-nik ungasitsigisumiittumi ataatsimiigiartalerput. Inersimasunngoreerluni nuliani Lidija paninilu ataatsimik ukiulik qimallugit qatanngut Melnik ukiuni pingasuni parnaarussaaqqavoq. Ukiorpassuarni misilinneqaraluarlutik Anatolij ilaquttanilu aalajaallutik Jehovamut kiffartortuarput. Maanna Anatolij 82-inik ukioqarpoq Asiallu qeqqani Immikkoortortaqarfiup Ataatsimiititaliaani kiffartorluni. Anatolij aamma Lidija ilaarlugit qanortoq uagut Jehovamut kiffartornitsinni ilungersortuarisa pisarnitsitullu pinertusaartuarluta. – Gal 6:9.
SIUNISSAQ PILLUGU NERIUUTERPUT KAJUMISSISSUTIGAARPUT
14. Apuuffissaq angujumallugu Paulusi susariaqarpa?
14 Paulusip upperilluinnarpaa arpannermini apuuffissaq angujumaarlugu. Tanitaagami ‘nersornaatisiassap Guutimeersup’ pinissaa neriuutigaa. Nalunngilaali apuuffissaq angujumallugu ilungersortuartariaqarluni. (Fil 3:14) Filippimiut apuuffissaminnik aalajangiusimanninnissaannut ikiorniarlugit Paulusi soqutiginartumik assersuusiorpoq.
15. Filippimiut ilungersortuarnissaminnut ikiorniarlugit Paulusip innuttaassuseq assersuutitut qanoq atorpaa?
15 Filippimiut ‘qilammi nunavigisaqarnerannik’, tassa innuttaassuseqarnerannik, Paulusip eqqaasippai. (Fil 3:20) Sooq tamanna eqqaamasariaqarpaat? Taamani Romami innuttaassuseq naleqartinneqangaarpoq. * Kristumiulli tanitat ajunnginnerungaartumik iluaqutissartaqarnerusumillu qilammi innuttaassuseqarput. Romami innuttaaneq tassunga sanilliullugu suunngilaq! Tamanna pissutigalugu Paulusip Filippimiut Guutip naalagaaffiani innuttaasutut pissusilersoqqullugit ima kajumissaarpai: “Kristusip iivangkiiliuanut naleqquttumik inuuneqaannassaasi.” (Fil 1:27) Nalitsinni kristumiut tanitat naassaanngitsumik qilammiinnissamik akissarsisinneqarnissartik anguniarlugu ilungersortut maligassiuipput.
16. Qilaliarnissamik nunarsuarmiluunniit naassaanngitsumik inuunissamik neriuuteqaraluarutta Filippimiut 4:6, 7-ilu naapertorlugit qanoq iliortuartariaqarpugut?
16 Qilaliarnissamik nunarsuarmiluunniit naassaanngitsumik inuunissamik neriuuteqaraluarutta apuuffissarput angujumallugu ilungersortuartariaqarpugut. Qanorluunniit atugaqaraluarutta tunutsinniittut eqqarsaatitsinniitittuarnagillu suulluunniit Jehovamut kiffartorunnaassutigissanngilavut. (Fil 3:16) Imaassinnaavoq ilimagisatsinnit sivisunerusumik utaqqisariaqartugut timikkulluunniit sanngiilliartortugut. Immaqa ukiorpassuarni atugarliorlutalu malersugaasimavugut. Qanorluunniit ikkaluarpat ‘sumilluunniit isumakuluuteqarnaveerit’, qinullutillu torlulallutillu kissaatigisatit Guutimut eqqaasakkit. Taava ilimagisatit akimungaarlugit eqqissinermik tunissavaatit. – Filippimiut 4:6, 7 atuakkit.
17. Allaaserisap tulliani suna sammissavarput?
17 Arpaliuttutut apuutilerluni ilungersortutut tamatta inuunivimmut arpaliunnermi apuuffissaq aalajangiusimajuartigu. Siunissami pisussat nuanningaartut eqqaamallugit sapinngisatsinnik iliortuarisa. Qanorli pinertusaartuarsinnaavugut? Inuunitsinni ‘suut pingaarnerusut qulakkeersinnaajumallugit’ allaaserisap tullia iluaqutigissavarput. – Fil 1:9, 10, NW.
ERINARSUUT 79 Ajoqersortigit aalajaaqqullugit
^ imm. 5 Qanorluunniit sivisutigisumik Jehova kiffartorfigisimagaluarlugu anersaakkut inersimalluarnerulerlutalu siumukartuarusuppugut. Apustilip Paulusip uppeqatini nikallunnginnissamut, tassa tunniutiinnannginnissamut, kajumissaarpai. Paulusip Filippimiunut allagai inuunivimmut arpaliunnitsinni pinertusaarnissamut iluaqutigisinnaasatsinnik imaqarput. Allatai inuunitsinni qanoq maleruarsinnaanerlugit allaaserisami sammineqassaaq.
^ imm. 13 Anatolij Melnikip misigisalikkersaarutaa, “Jeg lærte at elske Gud fra jeg var ganske lille”, Vågn Op! oktobarip 22-at 2004-moortumi atuarneqarsinnaavoq.
^ imm. 15 Filippi Romamiut nunasiarimmassuk Romami innuttaassuseqartut pisinnaatitaaffiisa ilaannik Filippimiut pisinnaatitaaffeqarput. Taamaattumik qatanngutit Filippimiut Paulusip assersuusiaa paatsuunngilaat.