1. Qanoq im­mik­kut pisin­naatitaaf­feqar­pugut?

JEHOVAP ilagiivinut ilaaneq im­mik­kut pisin­naatitaaf­fiuvoq! Inuit pil­luarlutil­lu eq­qis­sisimasut anersaak­kut paratiisimeeqatigaavut. Il­lit ilagiin­ni suut sulias­saraagit?

2. Apustilip Paulusip isumas­sarsisitaal­luni al­lak­kamini arlalin­ni suna as­sersuusiaraa?

² Taman­na pil­lugu apustilip Paulusip isumas­sarsisitaal­luni al­lak­kamini arlalin­ni as­sersuusiaa ilin­niarfigil­luarsin­naavar­put. Al­lak­kani taak­kunani Paulusip ilagiit inuup timaanut as­sersuup­pai ilagiin­niit­tul­lu timip avataanut as­sersuul­lugit. – Rom 12:4-8; 1 Kor 12:12-27; Ef 4:16.

3. Al­laaserisami matumani suut pingasut sam­mis­savavut?

³ Al­laaserisami matumani Paulusip as­sersuusiaata ilin­niutis­sar­tai pingaarutil­lit pingasut sam­mis­savavut. Siul­ler­tut, paasis­savar­put tamat­ta Jehovap ilagiivini pingaar­tin­neqar­tugut. * Aap­paat­tut, sam­mis­savar­put ilagiin­ni ilumut pingaaruteqar­nerluta qularigutsigu susin­naanersugut. Pingajuat­tut, sam­mis­savar­put sooq Guutip ilagiivini sulias­sar­put naam­mas­siumal­lugu iliuuseqar­tuar­tariaqar­tugut.

4. Romamiut 12:4, 5-imilu Paulusip as­sersuusiaanit suna ilik­kar­par­put?

⁴ Paulusip as­sersuusiaata ilin­niagas­sar­taa siul­leq tas­saavoq  Jehovap ilaqutariivini tamat­ta im­mik­kut pingaar­tin­neqar­tugut. Paulusip as­sersuusiani ima aal­lar­tip­paa: “Soorlumi timimi ataatsimi arlalin­nik avateqar­tugut tamarmik im­mik­kut sulias­salin­nik, taamatut tamat­ta Kristusimi timiuvugut ataaseq tamat­ta im­mik­kut avateqatigiil­luta.” (Rom 12:4, 5) Sunaana pigaa? Ilagiin­ni as­sigiin­ngitsunik pik­korif­feqaraluarluta tamat­ta im­mik­kut pingaaruteqar­pugut.

5. Jehovap ilagiit sunik ‘tunis­suteqarfigai’?

⁵ Ilagiin­ni pingaaruteqar­tuusut eq­qar­tor­neqaraangata im­maqa siut­tuusut ingerlaan­naq eq­qaasar­patit. (1 Th 5:12; Hebr 13:17) Ilumoor­poq Kristusi aq­qutigalugu Jehovap ‘inuit tunis­sutaasut’ ilagiin­nut tun­niuk­kai. (Ef 4:8, NW) ‘Inuit tunis­sutaasut’ taak­kua ilaat tas­saap­put Siulersuisoqatigiin­ni ilaasor­taasut, Siulersuisoqatigiin­nut ikior­tit, Im­mik­koor­tor­taqarfiup Ataatsimiititaliaanut ilaasor­taasut, ilagiin­nik nak­kutil­liisut, Biibilimik ilin­niarfin­ni ilin­niar­titsisut, utoq­qaaner­tat ilagiin­nilu kif­far­tor­tut. Qatan­ngutit angutit taak­ku anersaamit il­ler­nar­tumit toq­qagaasut Jehovap savaatai isumas­sorlugil­lu ilagiit nakus­satsit­tar­paat. – 1 Petr 5:2, 3.

6. Thes­salonikamiunut al­lak­kat siul­liit 2:6-8 naaper­torlugit qatan­ngutit angutit anersaamit il­ler­nar­tumit toq­qagaasut suna sulis­sutigaat?

⁶ Qatan­ngutit angutit anersaamit il­ler­nar­tumit toq­qagaasut as­sigiin­ngitsunik akisus­saaf­feqar­put. Soorlu as­saat isik­kal­lu timimut tamarmut iluaqutaasut taamatut­taaq qatan­ngutit angutit anersaamit il­ler­nar­tumit toq­qar­neqar­tut suliaat ilagiin­niit­tunut tamanut iluaqutaap­put. Qatan­ngutitik nakus­satsit­tar­paat, imaan­ngitsoq nersor­neqarusuk­kamik. (1 Thessalonikamiut 2:6-8 atuakkit). Angutit anersaak­kut pigin­naaneqarluar­tut nam­minis­sarsiun­ngitsuusut taak­ku pil­lugit Jehova qutsavigaar­put!

7. Pif­fis­saq tamaat kif­far­tor­tut qanoq pil­luaq­qusaangaar­tar­pat?

⁷ Ilagiin­niit­tut ilaat im­maqa ajoqersuiar­tor­titaap­put, specialpioneriup­put pioneriul­lutil­luun­niit. Qatan­ngutit nunarsuarmi sumi tamani pif­fis­saq tamaat oqaluus­sisar­tuul­lutil­lu ajoqersugan­ngor­titsior­tor­tuup­put. Taamaalior­nermik­kut inup­pas­suit Kristusimut Jiisusimut ajoqersugan­ngorsin­naaq­qul­lugit ikiorsimavaat. Oqaluus­sisar­tut taak­ku pigisakip­put, taamaat­toq al­latigut Jehovamit pil­luaq­quneqangaar­tar­put. (Mark 10:29, 30) Qatan­ngutit taak­ku asangaar­pavut ilagiin­niin­neral­lu qujamasuutigingaarlugu!

8. Sooq nutaarsias­samik nuan­nersumik oqaluus­sisar­tut tamarmik Jehovamit pingaar­tin­neqar­pat?

⁸ Qatan­ngutit angutit akisus­saaf­fil­lit pif­fis­sarlu tamaat kif­far­tor­tuusut kisimik ilagiin­ni pingaar­tin­neqar­pat? Naamerluin­naq! Nutaarsias­samik nuan­nersumik oqaluus­sisar­tut tamarmik Guutimit ilagiin­niit­tunil­lu pingaar­tin­neqar­put. (Rom 10:15; 1 Kor 3:6-9) Ilagiim­mi pingaar­ner­tut anguniagaraat Naalak­katsin­nut Jiisusimut Kristusimut ajoqersugan­ngor­titsineq. (Matt 28:19, 20; 1 Tim 2:4) Ilagiin­niit­tut tamarmik, oqaluus­sisar­tut kuisimasut kuisiman­ngitsul­lu, suliaq taman­na inuunermin­ni pingaar­ner­paatik­kusup­paat. – Matt 24:14.

9. Sooq qatan­ngutivut ar­nat pingaar­tip­pavut?

⁹ Jehovap kristumiut ar­nat pingaarutilim­mik sulias­sin­nerisigut ataq­qinaaser­pai. Nuliaasut, anaanaasut, uil­lar­nerit ar­nal­lu aap­paqan­ngitsut kif­far­tor­nermin­ni aalajaatsut pingaar­tip­pai. Ar­nar­pas­suit  im­mik­kuul­laris­sut Guutimit iluarisaasut Biibilimi eq­qaaneqar­put. Ilisimas­suseqar­nik­kut, up­per­nik­kut, aal­lus­sil­luar­nik­kut, sapiitsuunik­kut, tuk­kor­tuunik­kut sulil­luar­nik­kul­lu maligas­saal­luar­tuugamik nersor­neqar­put. (Luk 8:2, 3; ApS 16:14, 15; Rom 16:3, 6; Fil 4:3; Hebr 11:11, 31, 35) Aam­ma ul­lumik­kut ilagiitsin­ni kristumiunik taamaat­tunik ar­naqarmat Jehovamut qujamasungaar­pugut!

10. Sooq utoq­qar­tavut pingaar­tip­pavut?

¹⁰ Aam­ma ilagiin­ni utoq­qar­tavut nuan­naarutigaavut. Utoq­qaat ilaat inuuner­tik tamaat aalajaal­lutik Jehovamut kif­far­torsimap­put. Utoq­qaat al­lat im­maqa aatsaat qanit­tuk­kut sal­lusuis­sut ilik­karsimavaat. Utoq­qar­pas­suit utoq­qaaner­tik pis­sutigalugu im­maqa as­sigiin­ngitsunik peq­qiil­liuuteqar­put. Im­maqa peq­qiil­lior­ner­tik pis­sutigalugu ilagiin­ni oqaluus­sinermilu iliuuseqar­piarsin­naan­ngil­lat. Utoq­qaal­li taak­ku sapin­ngisar­tik naaper­torlugu oqaluus­sisarlutil­lu al­lanik qiim­mas­saal­lutil­lu ilin­niar­titsisar­put! Misilit­tagaal­lu iluaqutigaavut. Jehovamit uagutsin­nil­lu asaneqangaar­put. – Uss 16:31.

11-12. Ilagiin­ni meerar­tavut inuusut­tor­tavul­lu qanoq qiim­mas­saatigisimavigit?

¹¹ Aam­ma meerar­tavut inuusut­tor­tavul­lu eq­qarsaatigik­kit. Silarsuarmi matumani Saatanimit Diaavulumit aqun­neqar­tumi isumanil­lu ajor­tunit sun­ner­neqarfiusuni peroriar­tor­nermin­ni ajor­nar­torsiuteqar­tar­put. (1 Joh 5:19) Ataatsimiin­ner­nili akigaangata, oqaluus­seqataagaangata up­perisar­til­lu sapiil­lutik il­lersoraangas­suk qiim­maal­lat­tar­pugut. Aap, meeraasusi inuusut­tuususilu ilagiin­ni pingaaruteqar­pusi. – Tuss 8:3.

¹² Qatan­ngutit­tali ilaasa ilagiin­ni pingaaruteqar­ner­tik up­periuminaatsip­paat. Ilagiin­ni ilumut pingaaruteqar­tutut misigilersin­naaq­qul­luta suna iluaqutigisin­naavar­put? Taman­na misis­soriar­tigu.

13-14. Sooq kristumiut ilaat ilagiin­ni pingaaruteqan­ngitsutut misigisin­naap­pat?

¹³ Paulusip as­sersuusiaata ilin­niagas­sar­taata aap­paat malugiuk. Ul­lumik­kut up­peqater­pas­suat­ta ajor­nar­torsiutaat una Paulusip sam­mivaa: Ilagiin­ni pingaaruteqar­ner­tik up­periuminaatsip­paat. Ima al­lap­poq: “Isigak oqaraluaruni: ‘As­saan­ngin­nama timip ilagin­ngilaanga,’ taamaat­toq timimut ilaavoq. Siul­lu oqaraluaruni: ‘Isiun­ngin­nama timip ilagin­ngilaanga,’ taamaat­toq timimut ilaavoq.” (1 Kor 12:15, 16) Paulusip suna paasitin­niar­paa?

¹⁴ Ilagiin­niit­tunut al­lanut naleq­qiut­taruit ilagiin­nut pingaaruteqan­ngitsutut misigilersin­naavutit. Im­maqa ilagiin­niit­tut ilaat ilin­niar­titsil­laq­qis­suup­put, aaq­qis­suus­sil­laq­qis­suup­put anersaak­kul­luun­niit paarsisuul­luar­tuul­lutik. Im­maqa isumaqar­putit il­lit taak­kunatut pik­koritsiginak. Tamatuman­nga erser­poq maniguut­tuusutit. (Fil 2:3) Mianersoril­li. Pik­korif­filin­nut im­minut sanil­liut­tuaruit im­minut nikal­lor­tis­saatit. Al­laat ilagiin­ni pingaaruteqan­ngil­luin­narlutit misigilersin­naavutit. Misigis­sutsit taamaat­tut qanoq iliuuseqarfigisin­naavigit?

15. Korinthimiunut al­lak­kat siul­liit 12:4-11 naaper­torlugit pik­korif­figisin­naasavut pil­lugit suna paasisariaqar­par­put?

¹⁵ Una eq­qarsaatigiuk: Jehovap kristumiut siul­liit ilaat tupin­nar­tuliorsin­naatip­pai, taak­kuali tupin­nar­tuliaat as­sigiin­ngil­lat. (1 Korinthimiut 12:4-11 atuakkit). Jehovap taak­ku as­sigiin­ngitsunik tunis­suteqarfigalugil­lu pigin­naaneqar­tip­pai, kristumiul­li tamaasa pingaar­tip­pai. Ul­lumik­kut tupin­nar­tuliorsin­naatitaan­ngilagut. Unali ilumoor­poq: Jehovap tamat­ta pingaar­tip­paatigut, pik­korif­fivut as­sigiin­ngik­kaluar­tut.

16. Apustilip Paulusip siun­nersuutaa suna malit­tariaqar­par­put?

¹⁶ Kristumiunut al­lanut naleq­qiun­nata apustilip Paulusip siun­nersuutaa una  malit­tariaqar­par­put: “Kialuun­niit nam­mineq suliani misilis­savaa, sulianilu nam­miniin­naq usorsisimaarutigis­savai al­lanut naleq­qiun­nagit.” – Gal 6:4.

17. Paulusip siun­nersuutaa malik­kutsigu qanoq iluaqutigis­savar­put?

¹⁷ Paulusip isumas­sarsisitaal­luni siun­nersuutaa malik­kutsigu nam­minerlu iliuutsivut misis­sorutsigit, nam­mineq im­mik­kut pik­korif­fivut pigin­naasavul­lu takusin­naalis­savavut. As­sersuutigalugu im­maqa utoq­qaaner­taq oqalut­tarfim­miit ilin­niar­titsil­laq­qin­nani ajoqersugan­ngor­titsior­tor­neq pik­korif­figaa. Im­maqaluun­niit utoq­qaaner­tatut al­latut aaq­qis­suus­sil­laq­qitsiginani asan­nil­luni oqaluus­sisar­tunik Biibili tun­ngavigalugu siun­nersuil­laq­qis­sutut saaf­figiuminar­tutul­lu ilisimaneqar­poq. Imaluun­niit inoroorsaar­tar­tuusutut ilisimaneqar­poq. (Hebr 13:2, 16) Nam­mineq pik­korif­figisavut ilisimaaril­luarutsigit ilagiin­nut iluaqutaasin­naaner­put nalerisimaarutigisin­naavar­put. Qatan­ngutivul­lu uagutsin­nit al­laanerusunik pik­korif­feqar­tut sin­ngageq­qajaan­ngin­nerus­savavut.

18. Pigin­naanivut qanoq ineriar­tor­tis­sin­naavavut?

¹⁸ Ilagiin­ni qanorluun­niit pik­korif­feqaraluarut­ta tamat­ta kis­saatigisariaqar­par­put kif­far­tor­nit­ta pitsaaneruler­nis­saa pigin­naasat­talu ineriar­tor­tin­nis­saat. Pik­korin­neruleq­qul­luta Jehovap peqatigiis­sor­tani aq­qutigalugit ilin­niar­til­luar­paatigut. As­sersuutigalugu ul­luin­nar­ni ataatsimiin­ner­ni oqaluus­sinitsin­ni angusaqarluaq­qul­luta ilitsersor­neqar­tar­pugut. Ilitsersuutit tamak­ku ator­tar­pigit?

19. Kristumiunut Oqaluus­sisar­tunut Ilin­niarfim­mi ilin­niar­neq qanoq angusin­naaviuk?

¹⁹ Ilin­niarfiusin­naasoq al­la tas­saavoq Kristumiunut Oqaluus­sisar­tunut Ilin­niarfik. Ilin­niarfim­mi ilin­niarsin­naap­put qatan­ngutit angutit ar­nal­lu pif­fis­saq tamaat kif­far­tor­tut 23-niit 65-it tungaanut ukiul­lit. Isumaqarsin­naavutit il­lit tamatumani ilin­niarsin­naan­ngisaan­nas­sasutit. Peqataasin­naan­ngin­nin­nut pis­sutaasut al­lat­tor­nagit peqataarusun­ninnut pis­sutaasut al­lat­tuk­kit. Taamaalioreeruit piuk­kun­narsisin­naaq­qul­lutit im­minut anguniagas­sigit. Jehovamit ikior­neqar­nik­kut nam­minerlu ilungersoruit angusin­naan­ngis­sorisat im­maqa angusin­naalis­savat.

20. Romamiunut al­lak­kat 12:6-8 qanoq ilin­niarfigaavut?

²⁰ Paulusip as­sersuusiaata ilin­niagas­sar­taasa pingajuat Romamiunut allakkat 12:6-8 al­las­simavoq. (Atuakkit). Tamatumani Paulusip eq­qaaq­qip­paa ilagiin­niit­tut as­sigin­ngitsunik pik­korif­feqar­tut. Maan­nali erseq­qis­sar­paa qanorluun­niit pik­korif­feqaraluarut­ta pik­korif­fivut ilagiin­nut iluaqutaatis­sagivut.

21-22. Rober­t Felicelu qanoq ilin­niarfigaavut?

²¹ Qatan­ngut Rober­timik taasin­naasar­put as­sersuutigeriar­tigu. Nunami al­lami kif­far­toreerluni nunami inun­ngorfim­mini Betelimi kif­far­tor­tus­san­ngor­tin­neqar­poq. Oqarfigineqareeraluarluni sulinerlun­neq al­lamik sulias­sin­neqar­nerminut pis­sutaan­ngitsoq ima oqar­poq: “Qaam­mater­pas­suar­ni nikal­lungavunga isumaqarama suliarisimasak­ka naam­maginarsiman­ngitsut. Ilaan­nik­kul­lu Betelimi kif­far­tor­nera unitsik­kusut­tar­para.” Qanoq nuan­naaleq­qip­pa? Utoq­qaaner­taqataata eq­qaasip­paa Jehovap sulias­siis­sutiminut tamat­ta im­mik­kut ilin­niar­tit­taraatigut  maannakkut suliatsin­ni iluaqutaal­luar­nerusin­naaq­qul­luta. Rober­tip pereersut pin­nagit maannakkut sulias­sani isiginiar­nerus­sal­lugit paasivaa.

²² Qatan­ngut Felice Episcopo as­singusumik misigisaqar­poq. Nulianilu 1956-imi Gileadimi naam­mas­sip­put Boliviamilu ilagiin­nik nak­kutil­liisun­ngorluni. 1964-imi meerar­taar­put. Felice ima oqar­poq: “Suliar­put nuan­narisar­put qimak­kuminaatsip­par­put. Ukioq ataaseq nikal­lungarusaar­punga. Jehoval­li ikiuineratigut isigin­nit­taasera al­lan­ngor­til­lugu angajoq­qaatut akisus­saaf­fit­taara pimoorutiler­para.” Rober­tip Felicel­luun­niit nikal­lor­nera paasisin­naaviuk? Kif­far­tor­nin­ni sior­natigutul­li maan­nak­kut pisin­naatitaaf­feqan­ngin­nerit pis­sutigalugu nikal­lungavit? Taamaap­pat nuan­naar­nerulis­saatit sior­natigut iliuuserisin­naasatit eq­qarsaatigival­laar­nagit maannakkut kif­far­tor­nin­ni Jehovamut qatan­ngutin­nul­lu iliuuserisin­naasatit eq­qarsaatigineruguk­kit. Ilagiin­nik ineriar­tor­titseqataanerit nuan­naarutigis­savat iliuuseqar­tuaruit pik­korif­fitil­lu al­lanut iluaqutaatit­taruk­kit.

23. Suna ilungersuutigis­savar­put, al­laaserisamilu tul­liut­tumi suna sam­mineqar­pa?

²³ Tamat­ta im­mik­kut Jehovamit asaneqar­pugut. Ilaqutariis­sor­taminut ilaatik­kusup­paatigut. Qatan­ngutivut qanoq nakus­satsisin­naanerlugit eq­qarsaatigeq­qis­saar­tarutsigu nakus­satsin­niarlugil­lu ilungersorut­ta taava ilagiin­nut pingaaruteqar­tutut misigis­saagut. Ilagiin­niit­tul­li al­lat qanoq isigin­nit­taaseqarfigis­savavut? Pingaar­til­lugit qanoq ersersis­sin­naavar­put? Al­laaserisami tul­liut­tumi pingaarutilik taman­na sam­mineqar­poq.