ATUAQQISSAAGASSAQ 35
Jehovap peqatigiissortaaniittut tamaasa ataqqikkit
“Isi assammut oqarsinnaanngilaq: ‘Atorfissaqartinngilakkit,’ niaqorluunniit isikkanut oqarsinnaanngilaq: ‘Atorfissaqartinngilassi.’” – 1 KOR 12:21.
ERINARSUUT 57 Inunnut tamalaanut oqaluussivugut
QILANAARTUUT *
1. Jehovap kiffani aalajaatsut sumiissinnaatippai?
JEHOVAP asannilluni kiffani aalajaatsut ilagiinniissinnaatippai. Suliassavut assigiinngikkaluartut tamatta pingaaruteqarpugut immitsinnullu pisariaqartilluta. Apustilip Paulusip pingaarutilik tamanna pillugu ilinniartippaatigut. Qanoq?
2. Efesosimiut 4:16 naapertorlugu sooq pingaarteqatigiillutalu suleqatigiittariaqarpugut?
2 Allassimaffimmi qulequtarisatsinni allassimasutut Paulusip erseqqissarpaa Jehovamut kiffaasoq kinaluunniit kiffaqatiminut ima oqarsinnaanngitsoq: “Atorfissaqartinngilakkit.” (1 Kor 12:21) Ilagiinni eqqisseqatigiittuassagutta pingaarteqatigiillutalu suleqatigiittariaqarpugut. (Efesosimiut 4:16 atuaruk). Ataasioqatigiilluta suleqatigiikkutta tamatta asaneqartutut misigissaagut, ilagiillu ingerlalluassapput.
3. Allaaserisami matumani suut sammissavavut?
3 Ilagiinniittut sutigut ataqqinnittuliorfigisinnaavavut? Allaaserisami matumani sammissavarput utoqqaanertat utoqqaanertaqatitik qanoq ataqqisinnaagaat. Taava sammissavarput qatanngutit angutit arnallu aappaqanngitsut tamatta qanoq pingaartissinnaagivut. Kiisalu uagut oqaatsitsinnut tunngatillugu pikkorinngitsut qanoq asannittuliorfigisinnaagivut paasissavarput.
UTOQQAANERTAQATITIT ATAQQIKKIT
4. Paulusi Romamiut 12:10-mi ilaatigut utoqqaanertanut qanoq siunnersuuteqarpa?
4 Utoqqaanertat ilagiinniittut tamarmik Jehovap anersaavanit 1 Kor 12:17, 18) Immaqa ilaat utoqqaanertanngorlaajupput misilittagaqarpallaarnatillu. Immaqalu allat utoqqaanertik peqqiilliornertillu pissutigalugit pisinnaasaat killeqarput. Utoqqaanertarli kinaluunniit utoqqaanertaqatini pillugu ima eqqarsassanngilaq: “Atorfissaqartinngilakkit.” Utoqqaanertat tamarmik Paulusip Romamiut 12:10-mi siunnersuutaa malittariaqarpaat. – Atuaruk.
illernartumit toqqagaapput. Tamarmilli assigiinngitsunik pikkoriffeqarput. (Utoqqaanertat utoqqaanertaqatimik tusarnaaqqissaarnerisigut ataqqisarpaat (Immikkoortut 5-6 takukkit)
5. Utoqqaanertat utoqqaanertaqatitik ataqqinninnermik qanoq ersersitsivigisinnaavaat, aamma sooq taamaaliornissaat pingaaruteqarpa?
5 Utoqqaanertat utoqqaanertaqatitik tusarnaaqqissaarunikkit ataqqinninnermik ersersitsivigissavaat. Tamanna pingaaruteqarpoq ingammik utoqqaanertaqatigiit pingaarutilik ataatsimiissutigigaangamikku. Sooq? Vagttårnet oktobarip aallaqqaataa 1988-imoortumi allassimasoq una malugiuk: “Utoqqaanertat paasisariaqarpaat utoqqaanertaqatigiit aalajangiilluarsinnaaqqullugit Kristusip, anersaaq illernartoq aqqutigalugu, utoqqaanertaqatigiit ilaat kinaluunniit siulersorlugu najoqqutassiamik Biibilimeersumik eqqaasissinnaagaa. (ApS 15:6-15) Utoqqaanertaqatigiinni utoqqaanertap kialuunniit anersaaq illernartoq kisermaassinnaanngilaa.”
6. Utoqqaanertat ataasioqatigiillutik qanoq suleqatigiissinnaappat, taamaaliornerallu ilagiit qanoq iluaqutigissavaat?
6 Utoqqaanertaq utoqqaanertaqatiminik ataqqinnittoq ataatsimiinnerminni oqaaseqartussani siulliuniartuaannanngilaq. Oqaluunnaavittuunanilu isumaqanngilaq nammineq isumani eqqortuujuaannartoq. Maniguullunili isumani oqaatigisarpaa. Utoqqaanertaqatini oqaaseqaraangata tusarnaaqqissartarpai. Pingaarnerusumilli najoqqutassiat Biibilimeersut oqaatigerusuttarpai aamma ‘inussiap aalajaallunilu silatuup’ ilitsersuutai maleruarusuttarlugit. (Matt 24:45-47, NW) Utoqqaanertaqatigiit asaqatigiillutik ataqqeqatigiillutillu eqqartueqatigiikkaangata ilagiit nakussatsissutigisassaannik aalajangiisinnaaqqullugit Guutip anersaavata illernartup najuulluni siulersortarpai. – Jaak 3:17, 18.
KRISTUMIUT AAPPAQANNGITSUT ATAQQIKKIT
7. Jiisusip aappaqanngitsut qanoq isiginnittaaseqarfigai?
7 Ullumikkut ilagiinnut ilaapput aappaqartut ilaqutariiusullu. Aamma qatanngutit angutit arnallu aappaqanngitsorpassuit ilagiinniipput. Aappaqanngitsut taakku qanoq isiginnittaaseqarfigissavavut? Jiisusip isiginnittaasiatut isiginnittaaseqassaagut. Taanna nunamiinnermini aappaqanngilaq. Imminut suliassiissutigineqartoq piffissani tamaat atorlugu aalluppaa. Aappartaarnissaq aappartaannginnissarluunniit piumasaqaataasoq ilinniartitsissutiginngisaannarpaa. Oqarporli kristumiut ilaat aappartaarniarnatik aalajangerumaartut. (Matt 19:11, 12) Jiisusip aappaqanngitsut ataqqivai. Isumaqanngilaq aappaqanngitsut inuunerminni amigaateqarlutillu aappalinnit nalikinnerusut.
8. Korinthimiunut allakkat siulliit 7:7-9 naapertorlugit Paulusip kristumiunut suna eqqarsaatigeqquaa?
8 Jiisusitut apustili Paulusi kiffartornermi nalaani aappaqanngilaq. Paulusip kristumiut aappartaartut eqqunngitsuliorneranngilai. Nalunngilaa inuup tamanna nammineq aalajangigassarigaa. Kristumiunulli eqqarsaatigeqquaa aappaqarnatik Jehovamut kiffartorsinnaanersut. (1 Korinthimiut 7:7-9 atuakkit). Paulusip kristumiut aappaqanngitsut nikaginngilai. Allaat Timotheusi qatanngut angut inuusuttoq aappaqanngitsoq pingaarutilimmik akisussaaffilerpaa. * (Fil 2:19-22) Paasinarpoq qatanngutip aappaqarnera aappaqannginneraluunniit kisiat tunngavigalugu pineqartoq piukkunnarnersoq nalileraanni kukkunerussasoq. – 1 Kor 7:32-35, 38.
9. Aappaqarneq aappaqannginnerlu qanoq isumaqarfigissavavut?
9 Jiisusip Paulusilluunniit kristumiut aappartaassanersut aappartaassannginnersulluunniit ilinniartitsissutiginngilaat. Taavami aappaqarneq aappaqannginnerlu qanoq isumaqarfigissavavut? Vagttårnet oktobarip aallaqqaataat 2012-imoortumi tamanna nuannersumik ima akineqarpoq: “[Aappaqarneq aappaqannginnerlu] Guutimit tunissutitut isigineqarsinnaapput. ... Jehovap [aappaqannginneq] peqqusiileqissutissatut aliasuutissatulluunniit isigeqqunngilaa.” Taamaattumik
qatanngutit angutit arnallu aappaqanngitsut ataqqisariaqarpavut.Aappaqanngitsut ataqqigutsigit sunaveersaassaagut? (Immikkoortoq 10 takuuk)
10. Qatanngutit aappaqanngitsut ataqqillugit qanoq ersersissinnaavarput?
10 Qatanngutit aappaqanngitsut misigissusii pissutsillu atugaat pillugit taakku ataqqillugit qanoq ersersissinnaavarput? Eqqarsaatigissavarput kristumiut aappaqanngitsut ilaat aappartaarniarnatik aalajangersimasut. Allallu aappartaarusukkaluarlutik aappartaarerusutaminnik nassaarsimanngillat. Aamma allat aappartik toqukkut annaasimavaat. Pissutsit qanorluunniit ikkaluarpata naleqqutissava ilagiinniittut aappassarsiuussippata imaluunniit ima aperippata: ‘Sooq aappaqanngilatit?’ Kristumiut aappaqanngitsut ilaat immaqa aappassarsiornerminni ikioqqussapput. Ikiortissarsiunngitsummi taamatut aperigutsigit qanoq misigissappat? (1 Th 4:11; 1 Tim 5:13) Qatanngutit aappaqanngitsut aalajaatsut ilaasa oqaasii misissoriartigit.
11-12. Aappaqanngitsut qanoq nikallortittoorsinnaavavut?
11 Ilagiinnik nakkutilliisoq aappaqanngitsoq suliamini pikkorissoq misigivoq aappaqanngitsuuneq iluaqutissartarpassuaqartoq. Oqarporli qatanngutit ajunngitsumik isumaqarlutik ima aperisut nikallornaralugit: “Sooq aappaqanngilatit?” Qatanngut aappaqanngitsoq alla immikkoortortaqarfimmi kiffartortoq ima oqarpoq: “Ilaannikkut qatanngutit misigitittarpaannga aappaqanngitsut nallinnartuusut. Taamaaliornerat pissutigalugu misiginarsisarpoq aappaqannginneq tunissutaanani nanertuutaasoq.”
12 Qatanngut arnaq aappaqanngitsoq Betelimi kiffartortoq ima oqaluttuarpoq: “Oqaluussisartut ilaat isumaqarput aappaqanngitsut tamarmik aappassarsiortut imaluunniit inuit allat peqatiginerit tamaasa aapparerusussinnaasaqarnerlutik maluginiaasartut. Ilaanni Betelimut suliannut tunngatillugu angalatillunga ullormi ataatsimiiffiusartumi apuuppunga. Qatanngutip arnap inissisimaffigisama oqarfigaanga qatanngutit angutit marluk peqatikka ilagiinniittut. Oqarpoq imaanngitsoq aappassarsiuullunga. Naalagaaffilersaarfimmulli iseqqammerluta qatanngutinut angutinut marlunnut taakkununnga ilassitippaanga. Taakkununnga uannullu peqqusiileqinaqaaq.”
13. Qatanngutip arnap aappaqanngitsup kikkut qiimmassaatigai?
13 Qatanngut arnaq aappaqanngitsoq alla Betelimi kiffartortoq ima oqarpoq: “Pionerit aappaqanngitsut utoqqaanerusut kiffartornerminni aalajaalluartut, pimoorussisut, imminut pilliutigeriaannaasut nalerisimaartullu ilagiinnullu iluaqutaalluartut ilisarisimavakka. Aappaqanngitsuunertik ajunngitsumik isiginnittaaseqarfigaat. Aappaqannginnertik pissutigalugu pingaaruteqarnerusutut imaluunniit aappaqannginnamik meeraqarnatillu amigaateqartutut misiginngillat.” Tassa ilagiinnut ataqqeqatigiiffiusumut asaqatigiiffiusumullu ilaaneq nuannersuuvoq. Nalligineqarnallu sinngagineqanngilatit, aamma isiginngitsuusaarneqarnallu pingaartippallaarneqanngilatit. Asaneqarlutit nalunngilat.
14. Aappaqanngitsut ataqqillugit qanoq ersersissinnaavarput?
14 Qatanngutit aappaqanngitsut piginnaasatik tunngavigalugit pingaartinneqarunik qujamasussapput, aappaqannginnertimmi pillugu nalligineqarusunngillat. Nalliginagit aalajaannerat pillugu pingaartikkutsigit ‘atorfissaqanngitsutut’ misigitissanngilavut. (1 Kor 12:21) Uagutsinnilli ataqqineqarlutik ilagiinnilu pingaartinneqarlutik nalussanngilaat.
ILITSOQQUSSARALUGU OQAATSITIT ATORLUGIT PIKKORINNGITSUT ATAQQIKKIT
15. Kiffartornerorusuttut ilaat qanoq allannguisimappat?
15 Ukiuni kingullerni oqaluussisartorpassuit oqaluussinerusinnaajumallutik allamiutut oqalussinnaalernissaq anguniagarisimavaat. Taamaaliorumallutik inuunerminni allannguipput. Qatanngutit taakku ilagiit ilitsoqqussaminnik oqaaseqartut qimappaat ilagiinni oqaluussisartunik pisariaqartitsiffiunerusuni allamiutut oqaasilinni kiffartorsinnaajumallutik. (ApS 16:9) Kristumiut taakku Jehovamut kiffartornerujumallutik namminneq taama aalajangersimapput. Oqaatsit ilinniakkatik ukiorpassuarni pikkoriffiginngikkaluarlugit ilagiinnut sorpassuartigut iluaqutaapput. Pissuserinnerat misilittagaallu ilagiinnut nakussassaataapput. Qatanngutit imminut pilliutigeriaannaasut taakku pingaartingaarpavut!
16. Utoqqaanertat qatanngut utoqqaanertatut ilagiinniluunniit kiffartortussatut piukkunnarnersoq naliliinialerunik suna tunngavigissavaat?
16 Utoqqaanertaqatigiit qatanngutip angutip ilagiinni oqaaserineqartut pikkoriffiginngimmagit utoqqaanertassatut ilagiinniluunniit kiffartortussatut innersuussutiginissaa tunuarsimaarutigissanngilaat. Utoqqaanertaqatigiit pineqartoq utoqqaanertanut ilagiinnilu kiffartortunut Biibilimi piumasaqaatit tunngavigalugit nalilissavaat oqaatsit ilagiinni atorneqartut atorlugit qanoq pikkoritsiginera tunngaviginagu. – 1 Tim 3:1-10, 12, 13; Tit 1:5-9.
17. Ilaqutariit nunamut allamut nuuttut suna eqqarsaatigisariaqarpaat?
17 Ilaqutariit kristumiut ilaat nunagisaminni inuuniapiloorneq pissutigalugu suliffissarsiorlutilluunniit nunamut allamut nuussimapput. Taamaattoqarpat imaassinnaavoq nunasiffigisami oqaatsit atorneqartut atorlugit meeqqat atuarfimmi ilinniartinneqartut. Aamma angajoqqaat suliffittaarumallutik nunasiffimminni oqaaserineqartut immaqa ilinniartariaqarpaat. Taavami nunasiffigisaminni ilageeqarpat oqaluussisartoqatigeeqarpalluunniit namminneq ilitsoqqussaminnik oqaasilinnik? Ilagiit sorliit ataatsimiigiarfigisassavaat? Nunasiffigisaminni oqaasilinnut imaluunniit ilitsoqqussaminnik oqaasilinnut ataatsimiigiartassappat?
18. Galatiamiut 6:5 eqqarsaatigalugu ilaqutariinni ittuusup aalajangigaa ataqqillutigu qanoq ersersissinnaavarput?
18 Ilaqutariinni ittuusup aalajangertussaavaa ilagiinnut sorlernut ataatsimiigiartassanerlutik. Tamanna allat aalajangersinnaanngimmassuk ilaqutariinnut suna pitsaanerpaajunersoq eqqarsaatigisariaqarpaa. (Galatiamiut 6:5 atuaruk). Ilaqutariinni ittuusup aalajangigaa ataqqisariaqarparput. Qanorluunniit aalajangiigaluarpat aalajangigaa ataqqillugu ilaqutariit ilagiitsinni tikilluaqqusaasutut misigitissavavut. – Rom 15:7.
19. Ilaqutariinni ittuusup suna eqqarsaatigisariaqarpaa?
19 Angajoqqaat allat ilagiinnut ilitsoqqussaminnik oqaaseqarfiusunut qitornatik ataatsimiigiaqatigisarpaat, immaqali meeraasa oqaatsit taakku pikkoriffiginngilaat. Nunasiffigisami oqaatsit atorneqartut ilagiinni ataatsimiigiarfigisartagaanni atorneqartunit allaanerusinnaapput. Taamaappat qitornaasut ataatsimiinnerni saqqummiussanik immaqa paasisaqarpiartarnatillu anersaakkut siumukanngillat. Sooq? Immaqa meeqqat nunagilikkaminni oqaatsit pingaarnerit atorlugit, angajoqqaajusut oqaasii atornagit, atuarfimmi ilinniartinneqarput. Taamaattoqartillugu ilaqutariinni ittuusup qitornani Jehovamut innuttaanullu qanillisinnaaqqullugit qanoq ikiorsinnaanerlugit eqqarsaatigeqqissaartariaqarpaa, tamannalu pillugu Jehovamut qinusariaqarluni. Namminneq ilitsoqqussaralugu oqaatsitik meeqqaminnut ilinniartitsissutiginianngikkunikkit ilagiinnut meeqqat saqqummiussanik paasinnilluarfigisinnaasaannut nuussanerlutik eqqarsaatigisariaqarpaat. Ilaqutariinni ittuusoq qanorluunniit aalajangeraluarpat ilageeqatigiligassaasa ilaqutariit taakku ataqqineqartutut pingaartinneqartutullu misigitittariaqarpaat.
Allamiut oqaasiinik ilinniartut pingaartillugit qanoq ersersissinnaavarput? (Immikkoortoq 20 takuuk)
20. Qatanngutit oqaatsitsinnik ilinniartut ataqqinninnermik qanoq ersersitsivigisinnaavavut?
20 Ilagiinni amerlasuuni qatannguteqarpugut sammeriikkatsitut assigiinngitsunik pissuteqarlutik uagut oqaatsitsinnik ilikkarumallutik ilungersortunik. Immaqa eqqarsaatitik oqaasertaleruminaatsittarpaat. Oqaatsitsinnilli pikkorinnginnerat isiginiarnagu Jehovamut asanninnerat taassumunngalu kiffartorfiginnikkusunnerat maluginiassavavut. Pissusii nuannersut taakku maluginiarutsigit qatanngutit taakku pingaartingaarlugillu ataqqissavavut. Oqaatsivut pikkoriffiginngippatigit ima oqassanngilagut: “Atorfissaqartinngilakkit.”
JEHOVAMIT ASANEQARPUGUT
21-22. Suna immikkut pisinnaatitaaffigaarput?
21 Jehovap ilagiissortamini immikkut pisinnaatitaaffilerluta pingaaruteqartumik suliaqartippaatigut. Angutaagaluaruit arnaagaluaruit, aappaqanngikkaluaruit aappaqaraluaruit, utoqqaagaluaruit inuusuttuugaluaruit, oqaatsinik pikkoriffeqaraluaruit pikkorinngikkaluaruilluunniit Jehovamit tamatsinnillu asaneqarputit. – Rom 12:4, 5; Kol 3:10, 11.
22 Qanortoq Paulusip inuup timaa pillugu assersuusiaanit ilinniutissarpassuit nuannersut inuunitsinni maleruartuartigit. Taamaaliorutta qatanngutitsinnik qiimmassaanissamik eqqumaffiginninnissamut taakkuninngalu asannittuarnissamut ataqqinnittuarnissamullu iluaqutigissavarput.
ERINARSUUT 90 Qiimmassaqatigiitta
^ imm. 5 Jehovap innuttai assigiinngitsunik tunuliaqutaqarput ilagiinnilu assigiinngitsunik suliaqarlutik. Jehovap ilaqutariissortaaniittut tamaasa immikkut ataqqinissaat sooq pingaaruteqartoq allaaserisami matumani paasissavarput.
^ imm. 8 Timotheusi aappartaarsimanngisaannarnersoq naluarput.