1. Qanoq sal­lusuis­sum­miilersimanitta eqqar­tor­nera sooq iluaqutigisar­par­put?

 “QANOQ sal­lusuis­sum­miiler­pit?” Qular­nan­ngitsumik apeq­qut taanna arlaleriarlutit akisimas­savat. Uppeqatigut ilisarisimalerusuk­kaangatsigit apeq­qutigisar­tak­katta siul­liit ilagaat. Qatan­ngutitta Jehova qanoq ilisarisimalerlugulu asalersimagaat tusas­sal­lugu nuan­narisar­par­put, aamma ilumoor­tumik nuan­narin­ningaar­ner­put oqalut­tuarerusut­tar­par­put. (Rom 1:11) Taamaalil­luta ilumoor­tup qanoq erlin­nar­tigineranik eqqaasin­neqar­tar­pugut. Aamma Jehovap ikiuineratigut iluarisaanik ‘ilumoor­toq malil­lugu inuujuar­nis­sar­put’ aalajangiusimaneruler­tar­par­put – Joh 3. 4.

2. Allaaserisami matumani suut eqqar­tus­savagut?

² Allaaserisami matumani ilumoor­tumik nuan­narin­ningaar­nitsin­nut pis­sutaasut ilaat sam­mis­savagut. Aamma tunis­sut erlin­nar­toq taanna qanoq pingaar­tit­tuarsin­naanerlutigu eqqar­tus­savar­put. Qular­nan­ngitsumik Jehovap ilumoor­tumut kajungilersik­kumal­luta iliuuserisimasai qujamasuutiginerulis­savagut. (Joh 6:44, q.a.i.) Aamma allat ilumoor­toq pil­lugu oqalut­tuuk­kusun­nerulis­savagut.

3. Pingaar­ner­tut sooq ilumoor­toq nuan­naringaar­par­put?

³ Assigiin­ngitsor­pas­suit pis­sutigalugit ilumoor­toq nuan­naringaar­par­put. Pingaar­ner­tut, ilumoor­tup pilerfia Jehova  Guuti asavar­put. Oqaasia, Biibili, aqqutigalugu paasivar­put qilam­mik nunarsuarmillu Pin­ngor­titsisuusoq kil­leqan­ngitsumik pis­saanilik Ataataasorlu uagutsin­nik isumas­suingaar­toq. (Pet 1. 5:7) Nalun­ngilar­put Guutiusoq “nal­lit­tuisoq saam­maasorlu, kamajaatsoq ilumoor­nermik sal­lusuis­sum­millu peqangaar­toq”. (Mos 2. 34:6) Jehovap naaper­tuil­luar­neq nuan­naraa. (Es 61:8) Naal­liun­ner­put anniaatigisar­paa, aamma pif­fis­sarititani nal­liup­pat naal­liun­nerit tamaasa atuuk­kun­naarsin­nis­saan­nut piareersimavoq, aap, qilanaar­poq! (Jer 29:11) Uagut­taaq qilanaaqaagut. Taman­nar­piarlu pis­sutigalugu Jehova asangaar­par­put!

4-5. Sooq apustilip Paulusip neriuuter­put kitsamut assersuup­paa?

⁴ Suna alla pis­sutigalugu ilumoor­toq nuan­naringaar­par­put? Iluaqutigeqigatsigu. Assersuutigalugu siunis­saq pil­lugu neriuuter­put Biibilimi ilumoor­tut ilagaat. Apustilip Paulusip neriuutip pingaaruteqas­susia assersuusiorluni ima allaatigaa: “Neriuut taanna tar­nimut kitsatut, isuman­naatsutut nikin­neq ajor­tutut, [ip­poq].” (Hebr 6:19) Soorlu kisaq umiatsiamik nikitsaaliuisitsisar­toq, taamatut­taaq neriuuter­put Biibilimik tun­ngavilik misilin­neqar­nitsinni aalajaas­sutigisin­naavar­put.

⁵ Allas­simaf­finni taak­kunani Paulusip kristumiut tanitat qilaliar­nis­samik neriuutaat eqqar­tor­paa. Oqaasiili aamma kristumiunut nunarsuarmi paratiisiusumi naas­saan­ngitsumik inuunis­samik qilanaarisaqar­tunut atuup­put. (Joh 3:16) Inuunermik naas­saan­ngitsumik neriuut paasigatsigu inuuner­put siuner­taqaler­poq.

6-7. Yvon­nep siunis­saq pil­lugu ilumoor­tup paasinera qanoq iluaqutigaa?

⁶ Qatan­ngutip Yvon­nep misigisaa eqqarsaatigiuk. Nalunaajaasutut peroriar­tun­ngilaq, meeraal­lunilu toqu ersigaa. Oqaatsit uku atuak­kani puiun­ngisaan­nar­pai: “Ullut ilaanni aqagus­saqarun­naas­saaq.” Ima oqalut­tuar­poq: “Oqaatsit taakku pis­sutigalugit siunis­saq eqqarsaatigisalerakku unnuak­kut sinis­saarut­taler­punga. ‘Soorunami inuuneq siuner­taqar­nerusimas­saaq,’ eqqarsar­tar­punga. ‘Sooq inuuvunga?’ Toqorusun­ngilanga!”

⁷ Kingusin­nerusuk­kut Yvon­nep inuusut­tuaraal­luni Jehovamik Nalunaajaasut attaveqarfigisaler­pai. Ima oqalut­tuar­poq: “Nunami paratiisiusumi naas­saan­ngitsumik inuunis­samik neriuut upperiler­para.” Qatan­ngutitta ilumoor­tup paasinera qanoq iluaqutigaa? Ima nangip­poq: “Siunis­saq toqunis­saralu unnuak­kut sinis­saarutigisarun­naar­pakka.” Takorloorsin­naasat­tut Yvon­nep ilumoor­toq erlin­nangaar­tutut isigaa, aamma neriuutimi allanut oqalut­tuarisar­nera nalerisimaarutigingaar­paa. – Tim 1. 4:16.

8-9. (a) Jiisusip assersuusiaasa ilaanni angutip erlin­nar­tuut nas­saarisani qanoq pingaar­titsigaa? (b) Ilumoor­toq qanoq pingaar­titsigaajuk?

⁸ Guutip kun­ngeqarfia pil­lugu nutaarsias­sat nuan­nersut Biibilimi ilumoor­tut aamma ilagaat. Jiisusip Kun­ngeqarfik pil­lugu ilumoor­toq erlin­nar­tuum­mut toq­qor­neqarsimasumut assersuup­paa. Matiusi 13:44 naaper­torlugu Jiisusi oqar­poq: “Qilaap kun­ngeqarfiata assigaa erlin­nar­tuut narsaammi toq­qor­neqarsimasoq angutip nas­saarisaa toq­qoq­qitaalu. Nuan­naangaarami pigisani tamaasa tuniniariar­tor­pai narsaallu pisiaralugu.” Maluginiaruk angutip erlin­nar­tuut ujan­ngik­kaa. Nas­saarigamiulli pis­sarsiariumal­lugu pil­liuteqangaar­poq. Allaat pigisani tamaasa tunivai. Sooq? Nalun­ngin­namiuk erlin­nar­tuut qanoq naleqar­tigisoq. Pigiun­naagaanit tamanit naleqar­nerungaar­poq.

 ⁹ Ilumoor­toq pil­lugu aamma taamatut misigivit? Ilimanarluin­nar­poq. Nalun­ngilar­put silarsuup neqeroorutigisin­naasai suul­luun­niit Jehovamut kif­far­tor­nerup nuan­naarutigineranut Kun­ngeqarfiullu naalak­kersuinerani naas­saan­ngitsumik inuunis­samik neriuutitsin­nut sanil­liul­lugit suun­ngitsut. Jehovamut qanit­tumik attaveqar­ner­put pil­liutigisin­naasatsin­nit tamanit naleqar­nerungaar­poq. ‘Iluaril­luin­nagaanik inuuner­put’ nuan­naarutiginer­paavar­put. – Kol 1:10.

10-11. Suna pis­sutigalugu Michaelip inuunini allan­ngor­tip­paa?

¹⁰ Amerlanersagut Jehovamit iluarisaalerumal­lutik pil­liuteqangaarsimap­put. Ilaasa atorfitik qaf­fasis­sut qimap­paat. Allat pigis­saar­niar­tuujun­naarsimap­put. Allallu Jehova ilisarisimaleramikku inooriaaser­tik allan­ngor­til­luin­nar­paat. Michael taamaaliorsimavoq. Nalunaajaasutut peroriar­tun­ngilaq inuusut­tuul­lunilu karater­tarluni. Ima oqar­poq: “Timigis­suunis­sara assut pingaar­tip­para. Ilaan­nik­kut ajugaaf­figineqarsin­naan­ngitsutut misigisar­punga.” Michaelip Biibili misis­sor­taleramiuk Jehovap nakuuser­neq qanoq isigineraa paasivaa. (Tuss 11:5) Aap­pariit Nalunaajaasut Biibilimik misis­sueqatigisar­tak­kani pil­lugit oqar­poq: “Karater­tarun­naar­nis­san­nik oqarfiginanga Biibilimi ilumoor­toq pil­lugu ilin­niar­tit­tuar­paan­nga.”

¹¹ Michaelip Jehova ilisarisimanerujar­tor­til­lugu asaneruler­paa. Pingaar­tumik Jehovap kif­faminik misigin­neqatigin­nit­tar­nera kil­litsis­sutigaa. Pif­fis­sap ingerlanerani inuunerminik allan­nguisariaqar­nini paasivaa. Ima oqar­poq: “Nalun­ngilara karater­tarun­naar­nis­sara saper­nar­ner­paatis­sal­lugu. Aam­mali nalun­ngilara Jehova nuan­naar­tik­kusul­lugu, qularin­ngilaralu kif­far­torfiginera pil­liutigisin­naasan­nit tamanit naleqar­nerungaar­toq.” Michaelip ilumoor­toq nas­saani pingaar­tingaaramiuk inuunerminik allan­nguerujus­suar­poq. – Jaak 1:25.

12-13. Maylip Biibilimi ilumoor­toq qanoq iluaqutigaa?

¹² Ilumoor­tup nalinga erseq­qis­sarumal­lugu Biibilimi ilumoor­toq taar­tumi qaam­maq­qum­mut assersuun­neqar­poq. (Tuss 119:105; Ef 5:8) Maylip, Aserbajdsjanimeersup, Guutip oqaasianit qaam­marsar­neqar­nini qujamasuutigingaar­paa. Assigiin­ngitsunik upperisalin­nik angajoq­qaaqar­poq. Angutaa musliimiuvoq arnaalu juutiul­luni. Ima oqar­poq: “Guuteqar­nera qularin­ngisaan­naraluarlugu apeq­qutis­sar­pas­suaqar­punga. Eqqarsar­tar­punga: ‘Sooq Guutip inuit pin­ngor­tip­pai, aamma sooq inuit inuuner­tik naal­lugu naal­lioriarlutik anniarfimmi qaqugorsuarmut naal­liutsitaas­sap­pat?’ Allat oqar­tarmata suut tamarmik Guutip piumasaatut pisar­tut eqqarsar­punga: ‘Guutimuna inuit aquk­kai, aamma naal­liut­tut isigin­naas­sal­lugit nuan­naraa?’”

¹³ Maylip apeq­qutini akis­sutis­sarsior­tuar­pai. Pif­fis­sap ingerlanerani Biibili misis­sor­taler­paa Nalunaajaasun­ngorlunilu. Ima oqar­poq: “Biibilimi tun­ngavilersuutit paasiuminar­tut nuan­naar­nerulis­sutigaakka. Guutip oqaasiani nas­suiaatit qularun­naar­nar­tut qamuuna eqqis­sis­sutigaakka.” Maylitut tamatta Jehova, ‘taar­tumiin­nitsinni qaamanerminut alutor­nar­tumut qaaq­qusisoq’, unnersiutigaar­put. – Pet 1. 2:9.

14. Ilumoor­toq qanoq nuan­narinerulersin­naavar­put? (Aamma takuuk ungalusaq “ Assersuutit allat”).

¹⁴ Ilumoor­tup pingaaruteqar­neranut taak­kua takus­sutis­sat amerlasuut ilagiin­nar­paat. Qular­nan­ngitsumik aamma allanik eqqaasaqarsin­naavutit. Ilumoor­tumik nuan­narin­ningaar­nitsin­nut pis­sutaasut allat  paasiumal­lugit nam­mineq misis­suisin­naavit? Ilumoor­toq nuan­narinerujar­tor­til­lugu nuan­naar­nitsin­nik ersersitseriaatsit allat paasiar­tulis­savagut.

15. Ilumoor­tumik nuan­narin­ningaar­ner­put ilaatigut qanoq ersersis­sin­naavar­put?

¹⁵ Biibilip Biibililersaarutillu misis­sukulasar­nerisigut ilumoor­toq nuan­naringaarlugu ersersit­tar­par­put. Qanorluun­niit sivisutigisumik Nalunaajaasuusimagaluarutta ilik­kagas­saqar­tuaan­nar­pugut. Atuagas­siap matuma normuani siul­ler­paami ima allas­simavoq: “Ilumoor­toq, inoqajuitsumi naasutut mikisun­nguatut ittoq, ilumuun­ngitsup naasupilup­pas­suinit avatanger­neqarlunilu ipitinneqangajappoq. Naniumal­lugu ujar­tuar­tariaqar­pat. … Pis­sarsiariumal­lugu tamaviaar­tariaqar­putit. Ilumoor­tup naasua ataaseq naam­magis­san­ngilat. … Katersuiuarit sulilu amerlanerusunik ujaasiuarlutit.” Misis­suineq tamaviaar­nar­poq, imminulli akilersin­naal­luar­poq.

16. Misis­sueriaaseq suna iluariner­paaviuk? (Ussatit 2:4-6)

¹⁶ Ilatta atuar­neq misis­suinerlu nuan­narer­pian­ngilaat. Jehovalli ilumoor­tup paasil­luar­nerunis­saanut  ‘ilungersorluta ujaaseq­quaatigut’. (Ussatit 2:4-6 atuakkit). Taamatut ilungersor­ner­put iluaqutaajuaan­nar­poq. Coreyp Biibilimik atuaraangami versit ataasiak­kuutaar­tar­pai. Ima nas­suiaavoq: “Qup­per­nerup ataani ilan­ngus­sat innersuus­sutillu tamaasa atuariarlugit misis­suinerusar­punga. … Taamaalil­lunga pis­sarsiaqangaar­tar­punga!” Periuseq taanna allal­luun­niit atoraluarutsigit ilumoor­tumik misis­suinis­samut pif­fis­saqar­tar­nitsigut nuan­narin­ningaar­ner­put ersersit­tar­par­put. – Tuss 1:1-3.

17. Ilumoor­toq malil­lugu inuuneq qanoq paasisariaqarpa? (Jaaku 1:25)

¹⁷ Soorunami ilumoor­toq pil­lugu misis­suineq naam­man­ngilaq. Tamak­kiisumik iluaqutigiumal­lugu malil­lugu inuusariaqar­pugut, tassa ilik­kak­kagut maleruar­tariaqar­pagut. Aatsaat taamaalior­nik­kut piviusumik pil­luas­saagut. (Jaaku 1:25 atuaruk). Ilumoor­toq malil­lugu inuunerluta qanoq qulak­keersin­naavar­put? Qatan­ngutip angutip siun­nersuutigaa suut pik­korif­figinerlugit sutigullu pitsan­ngorsaasin­naanerluta paasiumal­lugu imminut misis­sor­tas­sasugut. Apustili Paulusi allap­poq: “[Qanoq] siumukar­tigisimaner­put apeq­qutaatin­nagu toraak­katsin­nut tas­sunga torersumik ingerlajuarta.” – Flp 3:16. 

18. Sooq sapin­ngisamik ‘ilumoor­toq malil­lugu inuuniar­tuar­pugut’?

¹⁸ ‘Ilumoor­toq malil­lugu inuunerup’ iluaqutis­sar­tai eqqarsaatigik­kit. Inuuner­put pitsaanerulersiin­nar­nagu Jehova uppeqatigullu nuan­naalersit­tar­pagut. (Joh 3. 4; Uss 27:11) Ilumoor­tup nuan­naringaarnis­saanut ilumoor­torlu malil­lugu inuunis­samut pitsaanerusumik pis­sutis­saqan­ngilagut!