1. Inuusut­tor­pas­suit sunik naam­mas­sisaqareersimap­pat?

 UKIUT tamaasa inuusut­tor­pas­suit kristumiut imermut morsutsitaasar­put. Illimmi, imermut morsutsitaanikuuit? Taamaap­pat qatan­ngutivit Jehovallu nuan­naarutigaatsit! (Uss 27:11) Naam­mas­sisar­pas­suatit eqqarsaatigik­kit. Immaqa ukiuni arlalinni Biibili misis­soq­qis­saar­tarsimavat. Taman­nalu iluaqutigalugu qulariun­naarsimavat Biibili tas­saasoq Guutip oqaasia. Pingaar­ner­tullu, atuak­kamik iller­nar­tumik Atuak­kior­toq ilisarisimalerlugulu asaler­pat. Jehova asangaarakku tun­niusimaf­figalugu imermut morsutsitaasimasutut kif­far­torfigivat. Pitsaanerusumik aalajangersin­naan­ngilatit!

2. Allaaserisami matumani suna eqqar­tus­savar­put?

 ² Imermut morsutsitaan­ngin­ninni ilimanar­poq arlalitsigut upper­nik­kut misilin­neqar­tarsimas­sasutit. Peroriar­tor­til­lutilli allatigut misilin­neqar­taler­putit. Saatanip Jehovamik asan­nin­nerit san­ngiil­lisin­niar­tarlugulu ungasil­lisin­niar­tar­paatit. (Ef 4:14) Ajugaatis­san­ngilalli. Jehovap ilumoorfigiuar­nis­saanut tun­niul­luin­nar­nermillu neriorsuutivit eqqor­tin­nis­saanut suna iluaqutigisin­naaviuk? Kristumiutut ‘inersimal­luar­tun­ngor­nis­sat tamaviaarutigisariaqar­pat’. (Hebr 6:1) Qanorli taamaaliorsin­naavit?

3. Kristumiut tamarmik imermut morsutsitaanerup kingorna susariaqar­pat?

³ Imermut morsutsitaareer­nerup kingorna tamatta apustilip Paulusip uppeqatiminut Efesos­simiit­tunut siun­nersuutaa maleruar­tariaqar­par­put. Kristumiut ‘inersimal­luar­tun­ngoq­qul­lugit’ kajumis­saar­pai. (Ef 4:13) Tassa siumukar­tuaq­quai. Paulusip anersaak­kut ineriar­tor­ner­put meeq­qap alliar­tor­neranut assersuup­paa. Angajoq­qaat meerar­taar­tik nuan­naarutigingaarlugulu tul­luusimaarutigisar­paat. Meeraalli pif­fis­sap ingerlanerani ‘meeq­qatut pis­suseqarun­naar­tariaqar­poq’. (Kor 1. 13:11) Aamma kristumiunut taamaap­poq. Imermut morsutsitaanerup kingorna siumukar­tuar­tariaqar­pugut. Tamatumani siun­nersuutit iluaqutis­sagut sam­meriar­tigit.

4. Suna anersaak­kut siumukar­nis­samut iluaqutigis­saviuk? Nas­suiaruk. (Filip­pimiut 1:9)

⁴ Jehova asaneruleruk. Jehova asasorujus­sooreer­pat. Asanerulersin­naavalli. Qanoq? Apustilip Paulusip iluaqutigisin­naasat ataaseq Filippimiut 1:9-imi eqqaavaa. (Atuaruk). Paulusip Filip­pimiut ‘asan­nin­nerisa ineriar­tor­tuar­nis­saat’ qin­nutigaa. Tassa ‘eqqoq­qis­saar­tumik paasisimasaqaler­nik­kut naliliisin­naas­suseqarlualer­nik­kul­lu’ Jehova asanerulersin­naavar­put. Jehova ilisarisimanerujar­tor­til­lugu asanerulis­sal­lugulu kinaas­susia iliuuserisar­tagaalu qujamasuutiginerulis­savagut. Jehovamit iluarisaarusun­nerulis­sagatta pakatsis­sutigisaanik iliuuseqarusus­san­ngilagut. Piumasaa suunersoq qanorlu piumasaatut iliorsin­naanerluta paasiniar­tuas­savar­put.

5-6. Jehova qanoq asanerulersin­naavar­put? Nas­suiaruk.

⁵ Jiisusip, angusisarluin­nar­tup, ilisarisimaneruler­neratigut Jehova asanerulersin­naavar­put. (Hebr 1:3) Iivangkiiliut sisamat misis­soq­qis­saar­nerisigut Jiisusi pitsaaner­paamik ilisarisimalersin­naavar­put. Ullut tamaasa Biibilip atuar­tar­nera ileq­qulius­siman­ngik­kukku maanna ileq­qulius­sin­naaviuk? Jiisusi pil­lugu oqalut­tuat atuar­nerini pis­susii immik­kut maluginiar­tak­kit. Ilak­kuminar­tuul­lunilu meeq­qat pak­kut­tar­pai. (Mak 10:13-16) Inus­siar­nerlunilu ikin­ngutin­nermat ilin­niar­titaasa misigis­sutsitik tunuarsimaar­natik oqaatigisar­paat. (Mat 16:22) Tamatumun­nga tun­ngatil­lugu Jiisusip Ataatani qilam­miusoq ilaar­paa. Jehova aamma assut ilak­kuminar­poq. Qinunik­kut saaf­figisin­naavar­put. Qinugaangatta uum­mam­miutsin­nik aniatitsif­figisin­naavar­put. Asal­lutalu isumas­sormatigut qularin­ngilar­put assuaris­san­ngik­kaatigut. – Pet 1. 5:7.

⁶ Jiisusip inuit misigin­neqatigisar­pai. Apustili Matiusi allap­poq: “Jiisusip inup­pas­suit takuleramigit nal­ligingaaler­pai, savatummi paarsisoqan­ngitsutut naal­liutsin­neqarsimasutut imminiigin­nak­katullu immata.” (Mat 9:36) Jehovami? Jiisusi oqar­poq: “Ataatama qilam­miit­tup kis­saatigin­ngilaa taak­kua min­nin­nguit ilaat ataasiin­narluun­niit tam­mas­sasoq.” (Mat 18:14) Kis­saam­mer­nangaarami! Jiisusi ilisarisimanerujar­tor­til­lugu Jehova asanerulis­savar­put.

7. Kristumiut inersimal­luar­tut ilagisar­nerat qanoq iluaqutigisin­naaviuk?

⁷ Aamma qatan­ngutit inersimal­luar­tut ilagiin­niit­tut ilisarisimaler­nerisigut asan­nin­neruler­nis­sat kristumiutullu siumukar­nis­sat ilin­niarsin­naavatit. Qanoq nuan­naar­tigisut maluginiaruk. Jehovamut kif­far­tor­niarlutik aalajanger­ner­tik peq­qis­simis­sutigin­ngilaat. Jehovamut kif­far­tor­nermi misigisimasamin­nik oqalut­tuaq­qusak­kit. Pingaarutilin­nik aalajangigas­saqar­til­lutit isumasior­tak­kit.  Inuimmi “amerlasuunik siun­nersuisoqaraangamik ajugaasar­put”. – Uss 11:14.

8. Biibili pil­lugu qulaleruit qanoq iliorsin­naavit?

⁸ Qularutigisatit akis­sutis­sarsikkit.  Immik­koor­toq 2-mi eqqaaneqar­tutut Saatanip anersaak­kut siumukar­nerunis­sat ajoquser­niarsaris­savaa. Biibilimi ilin­niar­titsis­sutigineqar­tut ilaat pil­lugit qulalersitsiniaanik­kut ilaatigut taamaalior­tar­poq. Assersuutigalugu imaas­sin­naavoq pin­ngoriar­tuaarsimaneraaneq, Guutimik nikanarsaataasoq, pil­lugu ilin­niar­tin­neqar­tutit. Ukiukin­nerugal­laravit immaqa tamanna eqqarsaatigisiman­ngilat, peror­neruleravilli atuarfimmi tamanna pil­lugu ilin­niar­tin­neqar­putit. Pin­ngoriar­tuaarsimaneraaneq pil­lugu ilin­niar­titsisut oqaasii immaqa paasiuminar­tip­patit. Ilimanar­porli Pin­ngor­titsisoqar­neranut upper­narsaatit misis­sun­ngisaan­narsimagaat. Ussatit 18:17-imi najoq­qutas­siaq eqqaamajuk: “Eqqar­tuus­sivimmi siul­liul­luni oqalut­toq ilumoor­tuutin­neqaral­lar­tar­poq, akerlerisaatali tikiul­luni qanoq ittuunera ersersis­sin­naasar­paa.” Atuarfimmi eqqar­tor­neqar­tut upperiin­nar­nagit Guutip oqaasiani, Biibilimi, ilumoor­tut misis­soq­qis­saar­tak­kit. Biibililersaarutigut atorluar­tak­kit. Qatan­ngutit pin­ngoriar­tuaarsimaneraanermik upperin­nis­simasut oqaloqatigik­kit. Suut pis­sutigalugit uagutsin­nik asan­nit­tumik Pin­ngor­titsisoqar­nera upperilersimaneraat aperik­kit. Tamakku pil­lugit eqqar­tuisar­nerit Pin­ngor­titsisoqar­neranut upper­narsaatit misis­sor­nis­saan­nut iluaqutigisin­naavatit.

9. Melissa qanoq ilin­niarfigaajuk?

⁹ Qatan­ngutip Melis­sap pin­ngor­titsineq pil­lugu misis­suinini iluaqutigingaar­paa. * Ima oqar­poq: “Atuarfimmi pin­ngoriar­tuaar­neq ilumoor­pasit­tumik saq­qum­miun­neqar­poq. Pin­ngoriar­tuaar­neq ilumoor­tuusoq paaseqinagakku qularisama misis­sor­nis­saat aal­laq­qaam­mut merserivara. Eqqarsar­pungali upper­nitta tun­ngavis­saqarluar­nis­saa Jehovap kis­saatigis­sagaa. Taamaat­tumik qularisakka misis­sor­taler­pakka. Atuagaq Findes der en Skaber som interesserer sig for os? qup­persak­kallu Er livet en Skabers værk? aamma Fem gode spørgsmål om livets oprindelse atuar­pakka. Tassa pisariaqar­titar­piara. Ugguar­punga siusin­nerusuk­kut taamaaliorsiman­ngin­nama.”

10-11. Usser­nar­tut qanoq akiorsin­naavigit? (Tes­saluunikamiunut 1. 4:3, 4)

 ¹⁰ Pissusipiloqar­naveersaarit. Inuusut­tuaraanermi atoqateqarusus­suseq sak­kor­tusin­naavoq, atoqatigiin­nik­kullu eqqun­ngitsulior­nis­samut tatineqarsin­naavutit. Saatanip pileris­sutsin­nut nak­kaan­nar­nis­sat kis­saatigaa. Usser­nar­tut qanoq akiorsin­naavigit? (Tessaluunikamiunut 1. 4:3, 4 atuakkit). Jehovamut qinugaangavit misigis­sutsin­nik oqalut­tuut­taruk. Qanor­piaq misiginin­nik oqalut­tuut­taruk, nakus­satseq­qul­lutillu qin­nuigisaruk. (Mat 6:13) Eqqaamajuk Jehovap pil­larusun­nak ikiorusum­matit. (Tuss 103:13, 14) Aamma Guutip oqaasia iluaqutigisin­naavat. Melis­sap, eqqaaneqareersup, atoqateqar­nis­samik eqqarsaateqar­tar­neq akior­paa. Ima oqar­poq: “Ullut tamaasa Biibilimik atuar­tar­neq tun­niutiin­nan­ngin­nis­samut iluaqutigaara. Jehovamit pigineqar­nin­nik kif­far­torusun­nin­nillu eqqaasin­neqar­tar­punga.” – Tuss 119:9.

¹¹ Ajor­nar­torsiutitit kisimiil­lutit aaq­qin­niarsaris­san­ngilatit. Akiuk­katit pil­lugit angajoq­qaatit oqaloqatigisak­kit. Tamakku pil­lugit oqaloqateqar­neq saper­narsin­naavoq, taamaalior­nis­sarli pingaaruteqar­poq. Melissa oqar­poq: “Sapiil­lisin­neqar­nis­saq qin­nutigeriarlugu ajor­nar­torsiutiga pil­lugu ataataga oqaloqatigaara. Oqaloqatigereerlugu oqilial­laqaanga. Nalun­ngilara Jehovap tul­luusimaarutigigaanga.”

12. Qanoq aalajangiil­luarsin­naavit?

¹² Biibilimi najoqqutas­sianit siulersortigit. Pif­fis­sap ingerlanerani nam­mineersin­naanerujar­tulis­saatit. Misilit­tak­katilli suli kil­leqar­put. Jehovamut ikin­nguteqar­nin­nut ajoqutaasumik qanoq kuk­kunaveersaarsin­naavit? (Uss 22:3) Qatan­ngutip arnap Karimik atil­lip aalajangiil­luar­taler­nis­saminut suna iluaqutigisimal­lugu nas­suiar­paa. Paasivaa kristumiut inersimal­luar­tut sunut tamanut tun­ngatil­lugu inatsisit pisariaqar­tin­ngik­kaat. Oqar­poq: “Inatsisit kisiisa pin­nagit Biibilimi najoq­qutas­siat paasisariaqar­pakka.” Biibilimik atuaraangavit imminut aperisarit: ‘Jehovap eqqarsar­taasia pil­lugu atuak­kan­nit suut paasivakka? Eqqor­tulior­nis­san­nut iluaqutigisin­naasan­nik najoq­qutas­siaqarpa? Taamaap­pat maleruar­nerat qanoq iluaqutigis­savara?’ (Tuss 19:8; Es 48:17, 18) Biibili atuar­tarukku najoq­qutas­siallu eqqarsaatigeq­qis­saar­taruk­kit Jehovap iluarisaatut aalajangiisar­nis­sat ajor­nan­ngin­nerutilis­savat. Siumukar­nerutil­lutit Jehovap eqqarsar­taasia paasinerujar­torakku maluginias­savat sunut tamanut tun­ngatil­lugu inatsisit pisariaqar­tin­nagit.

13. Ikin­ngutaal­luar­tut qanoq ikiorsin­naavaatsit? (Ussatit 13:20)

¹³ Jehovamik asan­nit­tunik ikin­nguteqarit. Eqqaaneqareersutut ikin­ngutitit kristumiutut ineriar­tor­nin­nut sun­niuteqangaas­sap­put. (Ussatit 13:20 atuaruk). Qatan­ngut Sara nuan­naarun­naar­poq, pif­fis­salli ingerlanerani nuan­naaleq­qin­nini pil­lugu ima oqalut­tuar­poq: “Pif­fis­saq eqqorlugu pitsaasunik ikin­ngutitaar­punga. Qatan­ngut arnaq inuusut­toq ilagalugu sapaatit-akun­neri tamaasa Napasuliaq Alapernaarsuiffik piareersar­taler­par­put. Ikin­ngutima allap ataatsimiin­nerni akisaler­nis­samut ikior­paanga. Ikin­ngutima ikiorman­nga nam­mineq atuaq­qis­saar­tar­neq qinusar­nerlu pimoorun­neruler­pakka. Jehova ikin­ngutigil­luar­nerulerakku nuan­naaq­qiler­punga.”

14. John qanoq pitsaasunik ikin­nguteqalerpa?

¹⁴ Ajun­ngitsumik sun­niuteqar­tar­tunik qanoq ikin­ngutitaarsin­naavit? John, maanna utoq­qaaner­tatut kif­far­tor­toq, oqar­poq: “Inuusut­tuul­lunga oqaluus­sisar­nik­kut  pitsaasunik ikin­ngutitaar­tar­punga. Ikin­ngutitaakka aal­lus­sil­luar­tuugamik oqaluus­sinerup qanoq nuan­ner­tigisin­naaneranik paasitip­paan­nga. Pif­fis­saq tamaat kif­far­tor­nis­saq anguniagariler­para. Aamma paasivara ukioqatikka kisiisa ikin­ngutigisarak­kit nuan­nersunik soqutiginar­tunillu ikin­nguteqar­piar­nanga. Kingusin­nerusuk­kut Betelimi aamma pitsaasunik ikin­nguteqaler­punga. Maligas­siuinerat iluaqutigalugu aliik­kutas­sat pitsaanerusut toq­qar­talerak­kit Jehova attaveqarfigil­luar­neruler­para.”

15. Paulusip Timuutiusi suna pil­lugu mianersoq­quaa? (Timuutiusimut 2. 2:20-22)

¹⁵ Taavami paasigukku ilagiin­niit­tut ilaat ajor­tumik sun­niuteqar­tar­tut? Paulusip Timuutiusi kristumiut siul­liit ilaan­nik anersaak­kut ittunik pingaar­titsin­ngitsunik ilagisaqar­neq pil­lugu mianersoq­quaa. (Timuutiusimut 2. 2:20-22 atuakkit). Jehovamut ikin­ngutaaner­put erlin­nar­tuuvoq. Tamaviaarluta Jehova ikin­ngutigiler­niarsimagatsigu kinaluun­niit taas­suman­nga ungasil­lisitsisin­naasoq ikin­ngutigerusus­san­ngilar­put. – Tuss 26:4.

16. Qanoq ittunik anguniagaqar­tariaqar­pit?

¹⁶ Iluaqutaasunik anguniagaqarit. Kristumiutut nakus­satsin­nar­tunik anguniagaqarit. (Ef 3:16) Assersuutigalugu nam­mineq atuaq­qis­saar­tar­nerit Biibilimillu atuar­tar­nerit pitsaanerulersin­niarsin­naavatit. (Tuss 1:2, 3) Aamma qinusar­nerit akulikin­nerulersil­lugulu pitsan­ngorsar­niarsin­naavat. Imaluun­niit aliik­kutas­sanut pif­fis­sanillu atuinermut tun­ngatil­lugu imminut aqul­luar­neruler­niarsin­naavutit. (Ef 5:15, 16) Jehovap tamaviaarlutit siumukar­niar­nerit takul­lugu iluaris­savaa.

17. Allanik ikiuinerit qanoq iluaqutigis­saviuk?

¹⁷ Allat ikior­nerisigut kristumiutut ineriar­torsin­naavutit. Jiisusi oqar­poq: “Tunisineq tigusinermit pil­luar­nar­neruvoq.” (ApS 20:35) Pif­fis­savit nukivillu allat ikior­nis­saan­nut ator­nerat iluaqutigingaas­savat. Assersuutigalugu utoq­qaat nap­parsimasullu ilagiin­niit­tut ikior­nis­saat anguniagarisin­naavat. Immaqa pisinius­sin­naal­lugil­luun­niit ator­toris­saarutinik elektroniskiusunik ikiorsin­naavatit. Qatan­ngutaaguit angut qatan­ngutitit ikior­nerujumal­lugit  ilagiinni kif­far­tor­tun­ngor­nis­sat anguniagariuk. (Flp 2:4) Aamma Guutip kun­ngeqarfia pil­lugu oqaluus­sinik­kut ilagiit avataan­niit­tut asan­nit­tuliorfigisar­patit. (Mat 9:36, 37) Ajor­nan­ngip­pat pif­fis­saq tamaat kif­far­tor­nermut tun­ngasunik anguniagaqarit.

18. Pif­fis­saq tamaat kif­far­tor­neq siumukar­nis­samut qanoq iluaqutigisin­naaviuk?

¹⁸ Pif­fis­saq tamaat kif­far­tor­neq anersaak­kut siumukar­nis­samut amerlasuunik periarfis­siisar­poq. Pioneriuguit Kristumiunut Oqaluus­sisar­tunut Ilin­niarfim­mut peqataasin­naavutit. Betelimi kif­far­torsin­naal­lutil­luun­niit sanaar­tor­nermi ikiuus­sin­naavutit. Qatan­ngut arnaq inuusut­toq Katrinemik atilik oqar­poq: “Imermut morsutsitaanerma kingorna qatan­ngutit misilit­tagar­tuut oqaluus­seqatigisar­nerat anersaak­kut siumukar­nis­samut iluaqutigeqaara. Maligas­siuil­luarmata Biibili misis­sorusun­nerulerlugulu ilin­niar­titsil­laq­qin­nerorusuler­punga.”

19. Siumukar­tuaruit Jehovap ajun­ngitsor­pas­suar­nik sunik tunis­savaatit?

¹⁹ Anersaak­kut siumukar­tuaruit Jehovap ajun­ngitsor­pas­suar­nik tunis­savaatit. Aamma naleqan­ngitsunik anguniagaqar­nik­kut inuusut­tuunerit atulus­sin­nas­san­ngilat. (Joh 1. 2:17) Aalajangiinerlun­nerup kingunipilui naal­liuutiginagit angusaqarluarlutillu piviusumik pil­luas­saatit. (Uss 16:3) Uppeqativit inuusut­tut utoq­qaallu maligas­siuil­luar­nerit qiim­mas­saatigis­savaat. (Tim 1. 4:12) Pingaar­ner­tullu, Jehovap nuan­naar­tin­neratigut ikin­ngutigil­luar­neratigullu eqqis­sineq nalerisimaar­nerlu nuan­naarutigis­savatit. – Uss 23:15, 16.