ATUAQQISSAAGASSAQ 33
Jehovap isai innuttaanut sammipput
‘Naalakkap isai sammipput ajunngissusianik utaqqisunut.’ – TUSS 33:18.
ERINARSUUT 148 Jehova Annatsitsisoq
QILANAARTUUT *
1. Sooq Jiisusip Jehova malinnitsiminik sernissueqqullugu qinnuigaa?
JIISUSIP unnukkut toqussi aqaguttoq Ataatani qilammiusoq malinnitsiminik sernissueqqullugu immikkut qinnuigaa. (Joh 17:15, 20) Soorunami Jehovap innuttani isumassortuarlugillu sernissortuarsimavai. Jiisusilli nalunngilaa malinnitsini Saatanimit aatsaat taama akerlilersorneqartigissasut. Aamma nalunngilaa Diaavulup saassussisarnerisa akiornissaannut Jehovamit ikiorneqartariaqartut.
2. Sooq atugarliuuteqarnissarput annilaanngatigisariaqanngilarput? (Tussiaat 33:18-20)
2 Kristumiut ilumoortut Saatanip silarsuaanit tatineqangaartarput. Nikallortitsisinnaasunik allaallu Jehovap ilumoorfigiunnaarnissaanut ussernartorsiortitsisinnaasunik atugarliuuteqartarpugut. Allaaserisamili matumani annilaanganissamut pissutissaqannginnerput sammissavarput. Jehovap isumassoramisigut unamminiarnartitagut takusarlugillu ikioriaannaajuaannarpaatigut. Biibilimi eqqaaneqartut marluk Jehovap ‘isaasa ajunngissusianik utaqqisunut samminerannik’ ersersitsisut misissoriartigit. – Tussiaat 33:18-20 atuakkit.
KISIMIITTUTUT MISIGIGAANGATTA
3. Qaqugukkut kisimiittutut misigisinnaasarpugut?
3 Ilagiinni qatannguterpassuaqaraluarluta ilaannikkut kisimiittutut misigisinnaasarpugut. Assersuutigalugu inuusuttut upperisartik atuaqatiminnut nassuialeraangamikku ilagiinnulluunniit allanut nuunnermi kisimiittutut misigisinnaasarput. Ilagut aliasunnermik nikallornartunilluunniit misigissuseqarnermik akiugaqaramik immaqa eqqarsartarput misigissutsit taamaattut nammineq atugassaasut. Immaqa allanit paasineqannginnissarput ernumassutigigatsigu misigissutsigut pillugit allat oqaloqatiginissaat nangaassutigaarput. Immaqa allaat ilaannikkut allanit soqutigineqarnerluta eqqarsaatigisarparput. Sumilluunniit pissuteqartumik kisimiittutut misigineq ikiortissaqanngitsutut misigilersitsisinnaallunilu ernumalersitsisinnaavoq. Taama misiginissarput Jehovap kissaatiginngilluinnarpaa. Sooq taama oqarsinnaavugut?
4. Sooq pruffiiti Elia oqarpa: “Uanga amiakkutuaalerpunga”?
4 Elia aalajaatsoq pillugu oqaluttuaq eqqarsaatigiuk. Jezabeli toqunniarluni uppernarsaammat inuuinnarumalluni ullut 40-t sinnerlugit qimaasimavoq. (Kng 1. 19:1-9) Naggataatigut kisimiilluni qaarusummi Jehovamut oqarpoq: “Uanga [pruffiitini] amiakkutuaalerpunga.” (Kng 1. 19:10) Obadjap pruffiitit 100-t Jezabelimit toqunneqaqqunagit annaassimammagit nunami suli allanik pruffiiteqarpoq. (Kng 1. 18:7, 13) Taavami sooq Elia kisimiittutut misigiva? Pruffiitit Obadjamit annaanneqartut toqusimasorai? Qaqqami Karmelimi pissaaneqarniunnerup kingorna allat Jehovamut kiffartoqatigilinngimmanni kisimiittutut misigiva? Imaluunniit misigiva qanoq ulorianartorsiortiginini allanit paasineqanngitsoq? Imaluunniit eqqarsarpa soqutigineqarnani? Eliap misigissusii Biibilimi nassuiarneqaqqissaanngillat. Nalunngilarpulli Jehovap paasisinnaagaa sooq Elia kisimiittutut misigisoq aamma qanorpiaq ikiorsinnaallugu nalunngikkaa.
Kisimiittutut misiginermi Jehovap Eliamik ikiuinera qanoq tuppallersaatigisinnaavarput? (Immikkoortut 5-6 takukkit)
5. Eliap kisimiinnginneranik Jehovap qanoq paasitippaa?
5 Jehovap Elia arlaleriarluni ikiorpaa. Oqaloqqullugu kajumissaarpaa. Marloriarluni aperaa: “Elia, maani suniarpit?” (Kng 1. 19:10, 14) Eliap uummammiuminik oqaluttuummani tusarnaarpaa. Jehovap najuunnermi pissaaneqangaarnermilu takutinnerisigut Elia akivaa. Aamma oqarfigaa Israalikkunnik allanik kiffarpassuaqarluni. (Kng 1. 19:11, 12, 18) Qularnanngitsumik Elia uummammiuni Jehovamut aniatereerlugit akissutaalu tusareerlugu oqiliallassimassaaq. Jehovap Elia pingaarutilinnik arlalinnik suliassippaa. Oqarfigaa Hazaeli Aramimut kunnginngorteqqullugu, Jehu Israalimut kunnginngorteqqullugu Elisalu pruffiitinngorteqqullugu. (Kng 1. 19:15, 16) Jehovap Elia taama suliassinneratigut nuannersunik eqqarsaateqarnissaanut ikiorpaa. Aamma Elisamik qanimut suleqateqalernissaa isumagaa. Kisimiittutut misiginermi Jehovamut qanoq ikioqqusinnaavit?
6. Kisimiittutut misiginermi suut pillugit qinusinnaavit? (Tussiaat 62:9)
6 Jehovap kissaatigaa qinnuigisassagitsinni. Ajornartorsiutitit arajutsineq ajorpai, aamma qanoq ilisukkulluunniit qinnuigigaanganni tusarnaartarpaatit. (Tes 1. 5:17) Kiffani tusarnaarlugit nuannarisarpaa. (Uss 15:8) Kisimiittutut misigigaangavit suut pillugit qinusinnaavit? Eliatut Jehovamut uummammiutit aniatittakkit. (Tussiaat 62:9 atuaruk). Isumakuluutinnik misigissutsinnillu oqaluttuuttaruk. Misigissutsivit naammagalugit atornissaannut ikioqqusarit. Assersuutigalugu uppernerit pillugu atuaqatitit nassuiaanneranni kisimiittutut annilaangasutullu misigiguit sapiillutit oqaaseqarnissamut Jehovamut ikioqqugit. Allaat periaaserissumik nassuiaanissamut ilisimassutsimik tuneqqullutit qinnuigisinnaavat. (Luk 21:14, 15) Nikallornartunik misigissuseqaruit kristumiumik inersimalluartumik oqaloqateqarnissamut Jehovamut ikioqqusinnaavutit. Jehova qinnuigisinnaavat tatigisavit paasinnilluni tusarnaassagaatit. Uummammiutit Jehovamut aniatikkukkit, qinnutitit qanoq akigai maluginiarukku allanullu ikioqquguit kisimiinnginnerusutut misigissaatit.
Allat ilagalugit oqaluussinerujumallutit periarfissarsiortarpit? (Immikkoortoq 7 takuuk)
7. Mauricio qanoq ilinniarfigaajuk?
7 Jehovap tamatta isumaqarluartumik suliassippaatigut. Ilagiinni oqaluussinermilu iliuuserisatit tamaasa maluginiartarlugillu pingaartippai. (Tuss 110:3) Anersaakkut ulapputeqarneq kisimiittutut misiginermi qanoq iluaqutigisinnaaviuk? Qatanngutip angutip inuusuttup Mauriciop misigisai eqqarsaatigikkit. * Imermut morsutsitaaqqammersoq ikinngutiginerpaasaasa ilaata ilumoortoq qimakkiartulerpaa. Mauricio oqarpoq: “Qimagukkiartulermat imminut tatigivallaarunnaariartulerpunga. Eqqarsaatigisarpara tunniulluinnarsimanera eqqortissinnaanerlugu Jehovallu ilaqutariissortaanut ilaajuarsinnaanerlunga. Kisimiittutut misigalungalu eqqarsarpunga misigissutsikka allanit paasineqarsinnaanngitsut.” Mauriciop suna iluaqutigaa? Ima oqarpoq: “Oqaluussinerusalerpunga. Tamanna imminut eqqarsaatigivallaannginnissamut misigissutsillu nikallornartut kisiisa eqqarsaatiginnginnissaannut iluaqutigaara. Allat oqaluusseqatigigaangakkit nuannaarnerusutut kisimiinnginnerusutullu misigisarpunga.” Aap, allaat allakkatigut oqarasuaatikkullu oqaluussinitsinni immikkooraluarluta nakussatsittarpugut. Mauriciop aamma suna iluaqutigaa? Ima nangippoq: “Ilagiinni aamma ulapputeqartuarpunga. Saqqummiussassakka sapinngisannik piareersartarlugillu saqqummiuttarpakka. Tamanna pissutigalugu misigilerpunga Jehovamit allanillu pingaartinneqarlunga.”
SAPILERSUTUT MISIGIGAANGATTA
8. Sakkortuumik misilinneqarnerit qanoq sunnertissutigisinnaavagut?
8 Ulluni kingullerni makkunani misilinneqartarnissarput naatsorsuutigaarput. (Tim 2. 3:1) Taamaattorli ilimaginngisatsinnik misilinneqariasaarsinnaavugut. Imaassinnaavoq aningaasaqarnikkut ajornartorsiuteqaleriasaartugut, perululertugut asasatsinnilluunniit toqusoortugut. Tamakkuninnga nalaataqarnermi, pingaartumik misilinneqarnerit imaaginnaleraangata ataatsikkulluunniit nalliukkaangata, isumatsassinnaallutalu sapilersutut misigisinnaasarpugut. Eqqaamassavarpulli Jehovap nalaattakkagut ilisimagai ikiuineratigullu misilinneqarnerit suulluunniit pinertusaarluta atorsinnaallugit.
9. Juubip misilinneqarnerisa ilaat oqaluttuarikkit.
9 Juubip aalajaatsup Jehovamit ikiorneqarnera eqqarsaatigiuk. Piffissap sivikitsup iluani alianartunik arlalinnik misilinneqarpoq. Ullut ilaanni amiilaarnartumik pisoqarmat nersutaatini, kiffani allaallu qitornani asasani annaariasaarpai. (Job 1:13-19) Kingunitsianngua suli aliasungaarnermini annernaqisumik maajunnartumillu nappaateqalerpoq. (Job 2:7) Juubi naalliungaarluni oqarpoq: “Taamaannera qatsuteqaara, inuuinnarusunngilanga!” – Job 7:16.
Jehovap asannilluni isumassuisarnerminik Juubi eqqaasikkusukkamiuk pinngortitaminik assigiinngitsorpassuartigut isumassuisarnini eqqartorpaa (Immikkoortoq 10 takuuk)
10. Jehovap Juubi misilinneqarnermi pinertusaaqqullugu pisariaqartitaanik qanoq ikiorpaa? (Saqqaani assiliaq takuuk).
10 Jehovap Juubi nakkutigaa. Asagamiuk iluatsittumik pinertusaarnissamut pisariaqartitaanik ikiorpaa. Oqaluukkamiuk ilisimassuseqangaarnerminik pinngortitaminillu isumassuisarnerminik eqqaasippaa. Uumasut alutornartut arlallit eqqartorpai. (Job 38:1, 2; 39:9, 13, 19, 27; 40:15, 25, 26) Aamma angut inuusuttoq aalajaatsoq Elihumik atilik aqqutigalugu Juubi nakussatsillugulu tuppallersarpaa. Elihup Juubi eqqaasippaa Jehovap kiffani pinertusaartut akissarsisittuaannarai. Jehovap aamma Elihu asannilluni Juubimik naqqiinissamut kajumissisippaa. Jehovamut, nunarsuarmik avataarsuanillu Pinngortitsisumut, sanilliulluta qanoq mikitiginitsinnik Elihup Juubi eqqaasillugu imminut eqqarsaatigivallaarunnaarnissaanut ikiorpaa. (Job 37:14) Jehovap aamma Juubi ikinngutiminik pingasunik ajortuliorsimasunik qinnussinissamik suliassippaa. (Job 42:8-10) Artornartitatsinnik misilinneqarnitsinni Jehovap qanoq tapersersortarpaatigut?
11. Misilinneqarnitsinni Biibili qanoq iluaqutigisinnaavarput?
11 Jehovap Juubimut iliornermisut oqaluutinngikkaluarluta oqaatsini, Biibili, aqqutigalugu oqaluuttarpaatigut. (Rom 15:4) Siunissaq pillugu neriuuteqalersinnitsigut tuppallersartarpaatigut. Misilinneqarnitsinni Biibilimi tuppallersaatigisinnaasatta ilamininngui eqqarsaatigikkit. Jehovap Biibilimi eqqaasippaatigut suulluunniit – aamma sakkortuumik misilinneqarnerup – ‘asanninnerminit avissaartissinnaanngikkaatigut’. (Rom 8:38, 39) Aamma oqarpoq qinunikkut ‘torlorfiginnitsini tamaasa qanillugit’. (Tuss 145:18) Jehovap oqarfigaatigut tatigigutsinni misilinneqarnitsinni pinertusaarsinnaasugut allaallu naalliunnitsinni nuannaarsinnaasugut. (Kor 1. 10:13; Jaak 1:2, 12) Guutip oqaasiani aamma eqqaasinneqarpugut misilinneqarnigut inuunermut naassaanngitsumut sanilliullugu sivikillutillu annikitsut. (Kor 2. 4:16-18) Jehovap neriorsoqqissaarpaatigut misilinneqarnitsinnut pissutaasut – Saatani Diaavulu taassumatullu ajortut – tamaasa nungutikkumaarlugit. (Tuss 37:10) Biibilimi allassimaffiit tuppallernartut misilinneqarnermi pinertusaarnissamut iluaqutissatit alanngaarsinnaavigit?
12. Jehovap oqaasia tamakkiisumik iluaqutigissagutsigu qanoq iliortariaqarpugut?
12 Jehovap Biibilimik atuakulasarnissamut eqqarsaatiginneqqissaartarnissamullu piffissamik immikkoortitsisarnissarput piumasaraa. Ilikkakkagut maleruaraangatsigit uppernerulertarlutalu Ataatarput qilammiusoq qaninnerulertarparput. Tamannalu pissutigalugu misilinneqarnermi pinertusaarnissamut nukissaqalertarpugut. Jehovap aamma oqaatsiminik tatiginnittut anersaamik illernartumik tunisarpai. ‘Pissaaneq taanna nalinginnaanngitsoq Guutimeersuusoq’ qanorluunniit misilinneqarnermi pinertusaartitsisarpoq. – Kor 2. 4:7-10.
13. Anersaakkut nerisassat misilinneqarnerni pinertusaarnissamut qanoq iluaqutigisarpagut?
13 “Inussiaq aalajaallunilu silatooq” Jehovamit ikiorneqarnermigut allaaserisanik, isiginnaagassianik nipilersuutinillu amerlasuunik uppernikkut nakussatsinnissamut anersaakkullu eqqumajuarnissamut iluaqutigisinnaasatsinnik pilersuisarpoq. (Mat 24:45) Jehovap piffissaq eqqorlugu tunniuttagai tamakkiisumik atorluartariaqarpagut. Qatanngut arnaq USA-mi najugalik anersaakkut nerisassarpassuit qujamasuutigalugit ima oqarpoq: “Ukiuni 40-ni Jehovamut kiffartorninni aalajaakkunnaassutigisinnaasannik misilinneqaqattaartarpunga.” Sakkortuumik misilinneqartarpoq – aalakoorluni biilertumit aataava aportilluni toquvoq, angajoqqaavi perulullutik toqupput namminerlu marloriarluni kræfteqalersimalluni. Pinertusaarnissamut suna iluaqutigaa? Ima nassuiaavoq: “Jehovap isumassortuarpaanga. Inussiaq aalajaallunilu silatooq aqqutigalugu anersaakkut nerisassat tunniuttagai pinertusaarnissamut iluaqutigaakka. Taamaattumillu Juubitut oqarsinnaavunga: ‘Toqussara tikillugu aalajangiukkumavara isornaatsumik inuusimasunga.’” – Job 27:5.
Ilagiinniittut qanoq ikiorsinnaavagut? (Immikkoortoq 14 takuuk)
14. Jehovap misilinneqarnitsinni qatanngutigut qanoq atortarpai? (Tessaluunikamiunut 1. 4:9)
14 Jehovap innuttani erloqinartorsiorfiusuni asaqatigiinnissamik tuppallersaqatigiinnissamillu ilinniartissimavai. (Kor 2. 1:3, 4; Tessaluunikamiunut 1. 4:9 atuaruk). Qatanngutitta Elihu ilaarlugu artorsarnitsinni aalajaattuaqqulluta ikiorusungaarpaatigut. (ApS 14:22) Assersuutigalugu Diana uimi perulunnerata kingorna ilagiinniittunit qiimmassarneqarlunilu anersaakkut nukittujuarnissamut ikiorneqarpoq. Ima oqarpoq: “Artorsaqaagut. Erloqinitsinnili Jehovap pissaalluni asannillunilu ikiuinera misigaarput. Ilagiinniittunit tapersersorneqaqaagut. Pinertusaarnissamut iluaqutigisatsinnik pulaarneqartarlutalu sianerfigineqartarlutalu eqinneqartarpugut. Biilersinnaannginnama sapinngikkaangama ataatsimiigiarsinnaanissara oqaluussisinnaanissaralu qatanngutit isumagaat.” Asannittunik anersaakkut ilaqutaqarneq nuanneqateqanngilaq!
JEHOVAP ISUMASSUINERA QUJAMASUUTIGAARPUT
15. Sooq annikilliornitsinni pinertusaarsinnaanerput qularinngilarput?
15 Tamatta arlaatigut misilinneqartartussaavugut. Sammeriikkatsitulli kisimiinngisaannarpugut. Jehovap ataatatut asannittutut isumassortuarpaatigut. Uagutsinnit ungasinngilaq, qinnutigut tusarusungaarlugillu tapersersorusungaarpaatigut. (Es 43:2) Tukkorluni pinertusaarnissamut pisariaqartitatsinnik tamanik tunisimammatigut annikilliornitsinni pinertusaarsinnaanerput qularinngilarput. Qinusinnaatippaatigut, aamma Biibilimik, anersaakkut nerisassarpassuarnik qatanngutinillu asannittunik ikiueriaannaasunillu tunisimavaatigut.
16. Jehovap asannilluni isumassuinera qanoq iluaqutigiuarsinnaavarput?
16 Ataatatsinnit qilammiusumit nakkutigineqarnerput qujamasuutigingaarparput! Jehova ‘uummatitta tipaatsuutigaa’. (Tuss 33:21) Jehovap ikiorniarluta tunniuttagai tamaasa atorluartarnerisigut asannilluni isumassuinera qujamasuutigalugu takutissinnaavarput. Guutimit isumassorneqarumalluta nammineq aamma iliuuseqartariaqarpugut. Allatut oqaatigalugu Jehova naalakkumallugu iluarisaatullu iliorumalluta sapinngisatsinnik iliuuseqarutta qaqugorsuarmut nakkutigissavaatigut! – Pet 1. 3:12.
ERINARSUUT 38 Nakussatsissavaatit
^ Ajornartorsiutit qaangernissaannut Jehovamit ikiorneqarnissarput pisariaqartipparput. Allaaserisami matumani Jehovamit isumassorneqarnitsinnik eqqaasinneqassaagut. Tamatta immikkut unamminiarnartitagut maluginiartarlugillu pisariaqartitatsinnik ikiortarpaatigut.
^ Atit ilaat allanngortitaapput.