1. Ingasattumik ajortulior­toqartillugu qanoq pisoqartarpa?

 ALLAASERISAP matuma siuliani sammivarput Korintimi ingasattumik ajortuliorsimasoq qanoq pineqartoq. Taanna peqqissimin­nginnami ilagiinnit peerneqarsimavoq. Taamaattorli allaaserisami matumani allassimaffimmi najoqqutarineqartumi allassimasutut ingasattumik ajortuliorsimasoq peqqissiminis­saminut ikiorneqarsinnaavoq. (Rom 2:4) Ajortuliorsimasoq peqqissiminis­saminut utoqqaanertanit qanoq ikiorneqarsinnaava?

2-3. Paasigutsigu uppeqatitta ilaat ingasattumik ajortuliorsimasoq qanoq iliussaagut, aamma sooq?

² Ajortulior­toqarsimanera utoqqaanertat ilisiman­ngikkunikku ikiuisin­naanngillat. Taavami ingasattumik, ilagiinnit peerneqar­nissamik kinguneqarsin­naasumik, ajortulior­toqarsimasoq paasigutsigu sussaagut? Utoqqaanertanut saaffigin­neqqullugu kajumis­saassavarput. – Es 1:18; ApS 20:28; Pet 1. 5:2.

³ Taavami ajortuliorsimasoq utoqqaanertanik oqaloqatigin­nikkuman­ngippat? Pineqartup ikiorneqarnissaa qulakkeerumallugu uagut nammineq utoqqaanertat saaffigis­savagut. Qatannguterput annaajuman­nginnatsigu tamanna asannit­tuliorneruvoq. Sooq? Peqqissimin­ngikkuni Jehovamut attaveqarnini ajoquser­nerussavaa. Aamma ilagiit tusaamanerlugaatilissavai. Taamaattumik Jehova ajortuliorsimasorlu asagatsigit sapiilluta iliuuseqassaagut. – Tuss 27:14.

 UTOQQAANERTAT INGASATTUMIK AJORTULIORSIMASUNIK QANOQ IKIUISARTUT

4. Utoqqaanertat ingasattumik ajortuliorsimasoq ataatsimeeqatigigaangamikku suna anguniagarisarpaat?

⁴ Ilagiinni ingasattumik ajortulior­toqarsimagaangat utoqqaaner­taqatigiit utoqqaanertanik piukkun­nartunik pingasunik ikiuisussanik toqqaasarput. a Angutit taakku anneruniajuitsuul­lutillu maniguut­tuussapput. Ajortuliorsimasoq peqqissiminissaanut sapinngisamik ikiorniar­tarpaat. Nalunngilaalli allannguinissaanut pinngitsaalisin­naanagu. (Mos 5. 30:19) Aamma nalunngilaat ajortuliorsimasut ilaannaat kunngitut Daavitut peqqissimissasut. (Sam 2. 12:13) Ajortuliorsimasut ilaasa Jehovap oqaaqqis­saarutaa tusaajumaneq ajorpaat. (Mos 1. 4:6-8) Taamaattorli utoqqaanertat ajortuliorsimasoq peqqissiminissaanut sapinngisaminnik ikiorniarsarisarpaat. Ataatsimeeqatigigaangamikku najoqqutassiat suut eqqarsaatigisassavaat?

5. Utoqqaanertat ajortuliorsimasoq ataatsimeeqatigigaangamikku qanoq isiginnit­taaseqassappat? (Timuutiusimut 2. 2:24-26) (Aamma asseq takuuk).

⁵ Utoqqaanertat ajortuliorsimasoq savatut tammartutut erlinnar­tutullu isigisarpaat. (Luk 15:4, 6) Taamaattumik sakkortuumik oqalunnatillu misigit­taatsuliorfiginavian­ngilaat. Aamma pisimasoq pillugu paasissutis­sarsiorumallutik apersuiin­nassasorineq ajorput. Timuutiusimut allakkat aappaat 2:24-26 allassimasutut pissuseqassapput. (Atuakkit). Ajortuliorsimasup uummataa killinniarlugu saamallutillu inussiar­nersuussapput.

6. Utoqqaanertat ajortuliorsimasumik ataatsimeeqateqan­nginnerminni Jehovap isiginnittaasia qanoq uummammiulius­sinnaavaat? (Romamiut 2:4)

⁶ Utoqqaanertat Jehovap isiginnittaasia uummammiuliun­niartarpaat. Ajortuliorsimasup pinnittarnerani tamatigut Jehova ilaarniar­tarpaat. Paulusip Guuti pillugu oqaasii uku eqqarsaatigisarpaat: “Nalugakku ajunngisaarluni peqqissimeq­qullutit ikiorniaraluaraatit?” (Romamiut 2:4 atuaruk). Utoqqaanertat Kristusimit siulersor­neqarlutik pingaarnertut paarsisuunertik eqqaamassavaat. (Es 11:3, 4; Mat 18:18-20) Ajortuliorsimasup ataatsimeeqatigin­nginnerani utoqqaanertat Jehovamut qinusarput eqqarsaatigalugulu peqqissiminissamut qanoq ikiuussin­naanerlutik. Biibilimik Biibililersaarutinillu misissuisarput naliliisin­naassuseqar­nissartillu qinnutigisarlugu. Aamma ajortuliorsimasup tunuliaqutai pillugit suut paasisariaqar­nerlugit eqqarsaatigisassavaat. Tamakkumi  eqqarsariaasianut pissusilersoriaasianullu pissutaaqataasin­naapput. – Uss 20:5.

7-8. Utoqqaanertat ajortuliorsimasoq ataatsimeeqatigigaangamikku Jehovap naammagit­tartuunera qanoq ilaarsin­naavaat?

⁷ Utoqqaanertat Jehovap naammagit­tartuunera ilaartarpaat. Jehovap ajortulior­tartunik itsaq pinnittarnera eqqarsaatigisarpaat. Assersuutigalugu Jehovap naammagit­tarluni Kaini eqqarsalersin­niarpaa. Allannguin­ngippat qanoq pisoqarumaar­neranik naalappallu qanoq pilluaq­quneqarumaar­neranik paasitippaa. (Mos 1. 4:6, 7) Jehovap Daavi oqaaqqis­saarniaramiuk pruffiiti Naatat aallartippaa. Taassumalu assersuusior­nermigut Daavip uummataa killippaa. (Sam 2. 12:1-7) Jehovap aamma pruffiitit Israalikkunnut naalasseriitsunut ‘aallartit­tuartarpai’. (Jer 7:24, 25) Imaanngilaq aatsaat innuttani peqqissimigaangata ikiorniartarai. Suli ajortulior­tartillugit peqqissimeq­qullugit kajumis­saartarpai.

⁸ Ingasattumik ajortuliorsimasut ikiorniaraangamikkit utoqqaanertat Jehova ilaarniar­tarpaat. Timuutiusimut allakkat aappaat 4:2-mi allassimasutut ‘naammagit­tangaar­tuussapput’. Taamaattumik ajortuliorsimasoq eqqortulioq­qinnissaanut piumassuseqaleq­qullugu utoqqaanertap eqqissisimalluni naammagit­tarfigissavaa. Utoqqaanertarli kamappat paamitsaq­qappalluunniit imaassinnaavoq ajortuliorsimasoq oqaaqqis­saarutinik tusarnaaruman­ngitsoq peqqissiminis­samullu piumassuseqar­navianngitsoq.

9-10. Ajortuliorsimasoq aalajangikkami ajortuliornermut pissutaanerannik paasinnis­sinnaaq­qullugu utoqqaanertat qanoq ikiorsin­naavaat?

⁹ Utoqqaanertat ajortuliorsimasup iliuusii suut ajortuliornermut pissutaanersut paasiniar­tarpaat. Assersuutigalugu kristumiu nammineq Biibilimik atuartarun­naarami oqaluus­sisarun­naaramiluunniit anersaakkut sanngiilliva? Jehovamut akuttual­laartumik qinusarpa? Pileris­susipiluit akiorun­naarpai? Kikkut ilagisarpai? Sunik aliikkutaqartarpa? Aalajangigai taakku uummataanut qanoq sunniuteqarsimappat? Paasivaa aalajangikkani iliuutsinilu Ataataminut, Jehovamut, sunniuteqartut?

¹⁰ Utoqqaanertat susassarin­ngisaminnik apeqquteqarnatik eqqarsalersitsisunilli apeqquteqar­nermikkut ajortuliorsimasoq ajortuliornermut pissutaasunik paasinnin­nissaanut ikiorsin­naavaat. (Uss 20:5) Aamma assersuusior­nermikkut erseqqis­sarsinnaavaat ajortuliorsimasup iliuusii qanoq ajortigisut, soorlu Naatap Daavi assersuusior­nermigut ikioraa. Immaqa ataatsimeeqatigiinnermi siullermi ajortuliorsimasup iliuutsini eqqarsariaatsinilu aliasuutigilissavai. Allaat peqqissimisinnaavoq.

11. Jiisusip ajortuliortut qanoq pivai?

¹¹ Utoqqaanertat Jiisusi ilaarniar­tarpaat. Saulusi Taarsusimiu ikiorniarlugu Jiisusip makititaasimasup ima aperivaa: “Saulusi, Saulusi, sooq malersorpinga?” Iliuusii eqqunngitsuusut paasitin­niarlugu taamatut eqqarsalersitsivoq. (ApS 9:3-6) Aamma ‘arnaq Jeezabeeli’ pillugu Jiisusi ima oqarpoq: “Peqqissiminissamut periarfis­sippara.” – Saqq 2:20, 21.

12-13. Utoqqaanertat ajortuliorsimasoq peqqissiminissamut qanoq periarfis­sissinnaavaat? (Aamma asseq takuuk).

¹² Jiisusi ilaarlugu utoqqaanertat isummipal­lassanngillat ajortuliorsimasoq peqqissimiumanavian­ngitsoq. Ajortuliorsimasut ilaat utoqqaanertanik ataatsimeeqatigiinnermi siullermi peqqissimisarput, allalli piffissaqar­nerusariaqarput. Taamaattumik utoqqaanertat aalajangersin­naapput ajortuliorsimasoq oqaloqatigeq­qinniarlugu. Immaqa ataatsimiinnerup  siulliup kingorna ajortuliorsimasup imminut oqaaserineqartut pimoorus­silluni eqqarsaatigilissavai. Immaqa maniguulluni Jehovamut isumakkeerfigeq­qulluni qinussaaq. (Tuss 32:5; 38:19) Taamaattumik ataatsimiinnermi tulliuttumi allamik isiginnit­taaseqalersimasinnaavoq.

¹³ Ajortuliorsimasoq peqqissiminissamut ikiorniarlugu utoqqaanertat paasinnit­tuullutillu inussiar­nersuusarput. Iliuutsitik pilluaq­qoqqullugit Jehova qinnuigisarpaat, neriuutigisarpaallu ajortuliorsimasoq silattuaqillunilu peqqissimissasoq. – Tim 2. 2:25, 26.

14. Ajortuliorsimasoq peqqissimippat tamanna kia ataqqinaatigaa, aamma sooq?

¹⁴ Ajortuliorsimasoq peqqissimigaangat tamanna nuannaarutaangaartarpoq! (Luk 15:7, 10) Utoqqaanertat iliuuseqangaaraluartut ajortuliorsimasup allannguinera kia ataqqinaatigaa? Eqqaamajuk Paulusi ajortuliorsimasut pillugit ima allassimasoq: “Immaqa Guutip peqqissiminissamut periarfis­sissavai.” (Tim 2. 2:25) Kristumiup isummaminik isiginnit­taatsiminillu allannguinera pillugu Jehova, inuk pinnani, nersorneqassaaq. Paulusip aamma peqqissiminerup kinguneri nuannersut allaatigai. Ajortuliorsimasoq peqqissimisoq ilumoortoq pillugu eqqoqqis­saartumik paasisimasaqalerpoq, silattuaqivoq, Diaavulullu napiarniutaanit aniguivoq. – Tim 2. 2:26.

15. Utoqqaanertat ajortuliorsimasoq peqqissimisoq qanoq ikiorniar­tuarsin­naavaat?

¹⁵ Ajortuliorsimasoq peqqissimippat uppernermigut nakutsatsin­niassammat, ussernar­torsiun­nginniassammat eqqortulior­tuarnias­sammallu utoqqaanertat paarsisutut pulaartassavaat. (Hebr 12:12, 13) Soorunami susoqarsimanera pillugu allat susassarin­ngisaat kimulluunniit oqaluttuarinavian­ngilaat. Ilagiilli sumik paasitin­neqartariaqarpat?

“TAKUNNITTUT TAMAASA NAJUUTSILLUGIT OQAAQQIS­SAASSAVATIT”

16. Timuutiusimut allakkat siulliit 5:20 naapertorlugu “takunnittut” kikkut Paulusip pivai?

¹⁶ Timuutiusimik 1. 5:20 atuaruk. Paulusip utoqqaaner­taqatini Timuutiusi allaffigaa  ajortuliortartut ‘takunnittut tamaasa najuutsillugit oqaaqqis­saassagai’. Kikkut pivai? Ilimananngilaq “takunnittut” tassaasut ilagiin­niittut tamarmik. Pivaali ajortuliorsimaneranik ilisimannittut arlaqan­ngitsut. Taakku tassaasin­naapput pisimasumik isiginnit­tuusimasut imaluunniit ajortuliorsimasup qanoq iliorsimanerminik oqaluttuarfigisimasai. Ajortuliorsimasup oqaaqqis­saarneqarsimaneranik taakku kisiisa utoqqaanertat paasitissavaat.

17. Ingasattumik ajortulior­toqarsimanera ilagiin­niittunit amerlasuunit ilisimaneqarpat imaluunniit ilisimaneqarnissaa ilimagineqarpat sumik nalunaaruteqassava, aamma sooq?

¹⁷ Ilaannikkut ingasattumik ajortulior­toqarsimanera ilagiin­niittunit amerlasuunit ilisimaneqartarpoq ilisimaneqar­nissaaluunniit ilimagineqar­tarluni. Taamaappat “takunnittut” tassaapput ilagiin­niittut tamarmik. Taava utoqqaanertaq ilagiinnut nalunaassaaq ajortuliorsimasoq oqaaqqis­saarneqarsimasoq. Sooq? Paulusi allappoq tamanna ‘allanut mianersoq­qussutaassasoq’. Ilagiillu ajortuliun­nginnissamut iluaqutigisin­naavaat.

18. Inuusut­tuaqqat imermut morsutsitaasimasut pineqarpata utoqqaanertat qanoq iliussappat? (Aamma asseq takuuk).

¹⁸ Taavami imermut morsutsitaasimasoq 18-t inorlugit ukiulik ingasattumik ajortuliorsimappat? Utoqqaanertat marluk inuusut­tuaqqamik angajoq­qaavinillu b kristumiunik naapeqateqar­nissaat utoqqaaner­taqatigiit isumagissavaat. Utoqqaanertat paasiniassavaat angajoqqaat meerartik peqqissiminissamut ikiorniarlugu qanoq iliorsimasut. Inuusuttuaraq taanna angajoqqaami oqaaqqis­saarutaannut  tusarnaarpat ajunngitsumillu isiginnit­taaseqarpat utoqqaanertat marluk taakku aalajangersin­naapput allanik iliuuseqar­niarnatik. Angajoqqaammi meeqqaminnik asannittumik perorsaanis­saminnik Jehovamit akisussaaf­filerneqarput. (Mos 5. 6:6, 7; Uss 6:20; 22:6; Ef 6:2-4) Utoqqaanertat ilaannikkut angajoqqaat aperisin­naavaat inuusuttuaraq pineqartoq pisariaqar­titaminik ikiorneqar­tarnersoq. Taavami inuusuttuaraq imermut morsutsitaasimasoq peqqissiminani ingasattumik ajortulior­tuarpat? Taamaappat utoqqaanertat pingasut taanna angajoq­qaavilu kristumiut ataatsimeeqatigissavaat.

“JEHOVA QAMANNGA PISUMIK MISIGIS­SUSEQARLUNILU NALLITTUISUUSOQ”

19. Utoqqaanertat ingasattumik ajortuliorsimasumik pinnittar­nerminni Jehova qanoq ilaarniar­tarpaat?

¹⁹ Utoqqaanertat ilagiinnik minguitsuujuar­titsinissamik Jehovamit akisussaaf­filerneqarput. (Kor 1. 5:7) Aamma ingasattumik ajortuliorsimasoq peqqissiminissaanut sapinngisaminnik ikiorniarsarisarpaat. Neriuutigiuarpaat allannguissasoq. Sooq? “Jehova qamannga pisumik misigis­suseqarlunilu nallittuisuusoq” ilaarusuk­kamikku. (Jaak 5:11) Maluginiaruk apustili Johannesi utoqqalisimasoq taamatut isiginnit­taaseqartoq. Ima allappoq: “Ikinngutikka, ajortulioqqunasi taama allaffigaassi. Ajortulior­toqarpalli Ataatami naapertuil­luartumik, tassa Jiisusimik Kristusimik, ikiortis­saqarpugut.” – Joh 1. 2:1.

20. Allaaserisani ataqatigiinni makkunani allaaserisami kingullermi suna sammissavarput?

²⁰ Ajoraluartumik ilaannikkut kristumiu peqqissimiumaneq ajorpoq. Taamaappat taanna ilagiinnit peerneqar­tariaqarpoq. Taamaat­toqartillugu utoqqaanertat qanoq iliussappat? Tamanna allaaserisami kingullermi sammissavarput.