1-2. (a) Ajorti suua, qanorlu ajugaaf­figisin­naavarput? (Aamma “Nassuiaat” takuuk). (b) Allaaserisami matumani allaaserisallu atuagas­siamiittut sinnerini suna sammissavarput? (Aamma “Atuartartoq asasarput” atuagassiami matumaniittoq takuuk).

 JEHOVAP qanoq asatigigaatit paaserusuppiuk? Ima akissutis­sarsisinnaavat: Misissoruk ajortimit toqumillu annaanniarlutit susimanersoq. Ajorti a akeraavoq ajorluinnartoq nammineerlutit ajugaaf­figisin­naanngisat. Inuit tamarmik ullut tamaasa ajortuliortarput, ajortillu kinguneraa toqu. (Rom 5:12) Neriuutis­saqarpugulli. Jehovap ikiuineratigut ajorti ajugaaf­figisin­naavarput. Aap, ajugaanissarput qularutis­saanngilaq!

² Jehovap Guutip ukiut 6.000-t sinnerlugit inuit ajortimut akiuunneranni ikiorsimavai. Sooq? Asagamisigut. Jehovap inuit pinngor­tikkamigilli asavai, ikiorniarlugillu iliuuseqangaarsimavoq. Nalunngilaa ajorti toqumik kinguneqartartoq. Toqutik­kusunngin­namisigut naassaan­ngitsumut inuutik­kusuppaatigut. (Rom 6:23) Tamanna ilinnut kissaatigaa. Allaaserisami matumani apeqqutit pingasut uku eqqartus­savagut: (1) Inuit ajortiliusut Jehovap qanoq neriuutissippai?  (2) Inuit ajortiliusut Biibilimi oqaluttuarineqartut Jehovamit qanoq iluarisaalerpat? (3) Inuit ajortimit toqumillu annaanniarlugit Jiisusi sua?

INUIT AJORTILIUSUT JEHOVAP QANOQ NERIUUTISSIPPAI?

3. Inuit siulliit qanoq ajortilin­ngorpat?

³ Angut arnarlu siulliit Jehovap pinngor­tikkamigit pilluar­nissaat kissaatigaa. Kusanartumik angerlarsimaf­feqartippai, aappariinnermik tunissummik pilluaqquai alutornangaar­tumillu suliassillugit. Kinguaaminnik nunarsuaq ulikkaar­tussaavaat nunarsuarlu Edenimi naatsiivittut kusanar­tigilersillugu. Ataasiinnarmik killilerpai. Mianersoqquaalu tamanna unioqqutik­kunikku, tassa piaaralutik pikitsitsigunik, ajortuliornertik toqussutigissagaat. Nalunngilarpullu qanoq pisoqartoq. Anersaap ersinngitsup Guutimik inunnillu asannin­ngitsup ajortulior­nissamut usserpai. Adami Evalu Ataatartik asannittoq tatigin­nginnamikku ajortumut nakkaannarput. Jehovap oqaasii eqquupput. Taamanimiilli kingunipiluit atortariaqalerpaat: utoqqalipput naggataatigullu toqullutik. – Mos 1. 1:28, 29; 2:8, 9, 16-18; 3:1-6, 17-19, 24; 5:5.

4. Sooq Jehovap ajorti uumigaa akiuunnitsinnilu ikiorumalluta? (Romamiut 8:20, 21)

⁴ Ajorti sooq taama uumigitigineraa paasinias­sagatsigu Jehovap oqaluttuaq taanna allatsippaa. Ajorti Ataatatsinnit ungasil­lissutigisarparput, toqumillu kinguneqartarpoq. (Es 59:2) Taamaammat Saatanip, pikitsitsinermik aallarniisup, ajorti nuannaraa siuarsar­tarlugulu. Immaqa Edenimi ajugaasimaaraluarpoq, paasinngilaali Jehovap qanoq asannitsiginera. Adamip Evallu kinguaavinut Jehovap siunertani allanngor­tinngisaannarpaa. Inuit asavai ingerlaannarlu neriuutis­sillugit. (Romamiut 8:20, 21 atuakkit). Jehovap nalunngilaa inoqarumaartoq imminut asannittunik ajortimullu akiuunnerminni imminut ikioqqujumaartunik. Ataatatut Pinngor­titsisutullu ajortimit iperagaatin­niarlugit imminullu qanillisin­niarlugit periarfis­sissavai. Qanoq?

5. Qanga Jehova inunnut neriuutis­seeqqaarpa? Nassuiaruk. (Mosesimik 1. 3:15)

⁵ Mosesimik 1. 3:15 atuaruk. Saatanip eqqartuun­neqarnissaa Jehovap oqaatigigamiuk inunnut siullermik neriuutissiivoq. Guutip siulittuutigaa ‘kinguaassaq’ annaassiumaartoq. Kinguaassap Saatani aserorterumaarpaa Edenimi pisup kingunerisaanik ajortut tamaasa suujunnaarsillugit. (Joh 1. 3:8) Tamannali pitinnagu kinguaassaq naalliussaaq. Saatanip eqqorumaarpaa toqunneqar­tillugu. Tamanna Jehovap anniaatiginerpaassavaa, taamaaliorumavorli inuit kisissaan­ngitsut ajortimit toqumillu annaanneqar­niassammata.

BIIBILIP NALAANI INUIT AJORTILLIT QANOQ JEHOVAMIT ILUARISAALERPAT?

6. Angutit uppertut, soorlu Aabeli Nooalu, Jehova qanilliumallugu suppat?

⁶ Inuit ajortiliusut imminut qanoq qanillisin­naanerat piffissap ingerlanerani Jehovap paasitik­kiartuaarpaa. Aabeli, Adamip Evallu ernerat, Edenimi pikitsitsinerup kingorna Jehovamut uppertut siullersaraat. Aabelip Jehova asagamiuk qanillerusuppaa taassumanngalu iluarisaarusulluni. Aabelip savaaraatimi ilaat tiguaa Jehovamullu pilliutigalugu. Jehovap qanoq igaa? “Abelip pilliutaa iluaraa.” (Mos 1. 4:4) Jehovap kiffani asannitsini tatigin­nitsinilu, soorlu Nooatut  ittut, pilliigaangata aamma iluarin­ninnini ersersittarpaa. (Mos 1. 8:20, 21) Pilliutit taamaattut akuerinerisigut inuit ajortillit iluarisin­naallugillu imminut qanillisin­naanerat Jehovap ersersippaa. b

7. Aaperaap ernerminik pilliutigin­nikkumanera sumik ilinniarfigaarput?

⁷ Jehovap Aaperaat, angut upperluartoq, imaannaan­ngitsumik peqquaa. Ernini Iisaaq pilliutigisas­sanngoramiuk Aaperaap anniaatigingaarsimassavaa. Taamaak­kaluartoq naalannis­saminut piareersimavoq. Taamali pisoqan­ngitsiartoq Guutip sernigigamiuk unitsippaa. Pisorli Jehovap siunissami iliuusissaa pillugu ilinniarfigaarput. Jehovap inuit asangaaramigit nammineq ernini pilliutigiumavaa. – Mos 1. 22:1-18.

8. Moorsisip inatsisaani pilliisarnerit sumut tikkuussippat? (Mosesimik 3. 4:27-29; 17:11)

⁸ Ukiut hundredillit kingorna Moorsisip inatsisaani Israalikkut peqquneqarput ajortiminnik isumakkeerfigineqarumallutik uumasunik pilliisassasut. (Mosesimik 3. 4:27-29; 17:11 atuakkit). Pilliutit taamaattut pilliummut annerungaartumut inunnik ajortimit annaassisussamut tikkuussipput. Guutip pruffiitii kinguaassaq neriorsuutigisaq pillugu nassuiaanissamut isumassarsisin­neqarput. Siulittuutigaat Guutip ernera immikkuul­larilluinnartoq naalliut­tariaqarlunilu toqunneqassasoq. Savatut pilliutigineqartutut toqunneqassaaq. (Es 53:1-12) Eqqarsaatigiuk: Inuit – illit ilanngullutit – ajortimit toqumillu annaanniarlugit Jehovap ernermi asasami pilliutigineqarnissaa isumagaa!

JIISUSI QANOQ ANNAASSIVA?

9. Johannesi imermut morsutsitsisartoq Jiisusi pillugu qanoq oqaaseqarpa? (Hebræerit 9:22; 10:1-4, 12)

⁹ Ukiumi 29-mi Johannesi imermut morsutsitsisartoq Jiisusimut Naazaratsimiumut tikkuarluni oqarpoq: “Takuuk Guutip savaaraa inuit ajortiliunerannik peersisussaq!” (Joh 1:29) Oqaatsit taakkua ersersippaat Jiisusi tassaasoq kinguaassaq neriorsuutigisaq. Jiisusip inuunini pilliutiginiarmagu inuit ajortiliusut aatsaat taama neriuutis­saqartigilerput, ajortimut ajugaal­luinnassapput! – Hebræerit 9:22; 10:1-4, 12 atuakkit.

10. ‘Ajortuliortartut peqqissimeq­qullugit’ takkunnini Jiisusip qanoq ersersippaa?

¹⁰ Inuit ajortimit nanertisimasutut misigisut Jiisusip pingaarnertut ikiorlugillu maleqqulluni qaaqquai. Nalunngilaa ajorti inuit ajornar­torsiutaannut pissutaasoq. Taamaammat inuit ajortiminnik naalliuuteqartut immikkut ikiorniarpai. Assersuusiorluni nassuiaavoq: “Peqqissut pinnatik napparsimasulli nakorsamik pisariaqar­titsipput.” Imalu nangippoq: “[Tikiuppunga] inuit naapertuil­luartut pinnagit ajortulior­tartulli peqqissimeq­qullugit.” (Mat 9:12, 13) Oqaatsit taakku Jiisusip timitalertarpai. Arnaq isikkaminik qullini atorlugit allarterisoq saamalluni oqaluullugulu ajortuliaanik isumakkeerfigaa. (Luk 7:37-50) Arnaq Samaariamiu puilasumiittoq ilumoortunik pingaarutilinnik ilinniartippaa, nalunngik­kaluarlugu angut uiginngisani inooqatigigaa. (Joh 4:7, 17-19, 25, 26) Inuit ajortiliunertik pissutigalugu toqusarput, Guutilli Jiisusi angutinik, arnanik meeqqanillu toqusimasunik makititsisin­naanngortippaa. – Mat 11:5.

11. Sooq inuit ajortiliusut Jiisusimut qanillerusuttarpat?

 ¹¹ Tupinnanngilaq inuit ajortulioq­qajaasartut Jiisusimut qanillerusut­tarmata. Misigin­neqataasuuvoq, inussiar­nersuuvoq oqaloqatik­kuminar­tuullunilu. (Luk 15:1, 2) Imminullu uppertut Jiisusip nersualaar­tarlugillu akissarsisittarpai. (Luk 19:1-10) Ataatami nallittuinera ilaaqqis­saarpaa. (Joh 14:9) Jiisusip oqaasiinit iliuusiinillu ilinniarparput Jehova nallittuisuullunilu inuit ajortiliusut asagai ikiorusukkaalu. Inuit ajortulioq­qajaasartut allannguerusuler­nissaannut imminullu malinnit­tunngor­nissaannut Jiisusip ikiortarpai. – Luk 5:27, 28.

12. Jiisusi toqunissani pillugu qanoq ilinniar­titsiva?

¹² Jiisusip nalunngilaa inuunini pilliutigiumaarlugu. Ataasiaannarani malinnitsini oqarfigai akeqqanut pisinneqarumaarluni qisummilu naalliutsitsiviliami toqunneqarumaarluni. (Mat 17:22; 20:18, 19) Nalunngilaa pilliutini inuit ajortiliunerannik peersitsiumaartoq, soorlu Johannesip pruffiitillu allat siulittuutigisimagaat. Jiisusip aamma ilinniar­titsissutigaa inuunini pilliutigereeruniuk ‘inuit tamalaat imminut qanillisis­sallugit’. (Joh 12:32) Inuit ajortiliusut Jiisusip naalakkamissut akuerineratigut maligas­siaanillu ilaarsinermikkut Jehova nuannaar­tissinnaavaat. Taamaaliorunik kiisami ‘ajortimut inussiaajun­naarsin­neqassapput’. (Rom 6:14, 18, 22; Joh 8:32) Taamaammat Jiisusi kajumilluni sapiillunilu  ajorluin­nartumik toqujumavoq. – Joh 10:17, 18.

13. Jiisusi qanoq toqua, toquneralu Jehova pillugu qanoq ilinniarfigaarput? (Aamma asseq takuuk).

¹³ Jiisusi ikinngutiminit akeqqanut pisinneqarpoq, tigusaavoq, nikassar­neqarpoq, eqqartuun­neqarpoq allaallu naalliutsin­neqarluni. Toqunniarlugu qisummut sakkutuunit nivinngar­neqarpoq. Jiisusi naalliungaar­nermini pinertusaarpoq. Jehovali ernermi naalliunnera isiginnaarlugu suli anniangaar­nerusimassaaq. Pissaanini killeqan­ngitsoq noqippaa akuliunnanilu. Sooq? Ataataq asannittoq qanoq taamaasiorsin­naagami? Tassa asagamisigut. Jiisusi ima oqarpoq: “[Guutip] inuit asangaaramigit Ernituani tunniuppaa kinaluunniit taassumunnga uppertoq suujunnaarsin­neqarnani naassaan­ngitsumik inooqqullugu.” – Joh 3:16.

14. Jiisusip pilliutaanit suna paasiviuk?

¹⁴ Jiisusip pilliutaanit uppernarsar­neqarpoq Adamip Evallu kinguaavi Jehovap qanoq asatiginerai. Jehovap ilinnik qanoq asannitsigineranik uppernarsaataavoq. Ernerminik asasaminik pilliutigin­ninnini anniaatigingaarpaa illit ajortimit toqumillu annaanniarlutit. (Joh 1. 4:9, 10) Aap, tamatta ajortimut akiuunnitsinni ikiorusup­paatigut, ajugaatik­kusuppaatigullu!

15. Jiisusip utertitsis­sutitut pilliutaanik Guutip tunissutaa iluaqutigiumallugu qanoq iliortariaqarpugut?

¹⁵ Guutip tunissutaa ernituaminik utertitsis­sutitut pilliut ajortuliatsinnik isumakkeerfigineqar­nissatsinnut periarfissiivoq. Guutimilli isumakkeerfigineqarumalluta iliuuseqar­tariaqarpugut. Qanoq? Johannesi imermut morsutsitsisartoq Jiisusilu Kristusi ima akissutis­siipput: “Qilaap kunngeqarfia qanillimmat peqqissimigitsi.” (Mat 3:1, 2; 4:17) Ajorti ajugaaf­figalugulu Ataatatsinnut asannittumut qanillerusukkutta peqqissimineq pingaaruteqarluinnarpoq. Peqqissiminerli qanoq isumaqarpa, ajortimullu akiuunnitsinni qanoq iluaqutigisarparput? Allaaserisap tulliani tamanna akissutis­sarsissavarput.