1. Inuk peqqissimisoq susarpa?

 EQQUNNGITSULIORAANGATTA peqqissiminissarput pingaaruteqarluinnarpoq. Biibili naapertorlugu inuk peqqissimisoq iliuutsini pillugu isummaminik allanngor­titsisimavoq, eqqunngitsulior­tarunnaarpoq taamaalioq­qinngin­nissanilu aalajangiullugu. – Takuuk Biibili – Nunarsuup nutaanngor­nissaanik nutsikkami nassuiaatit, “Peqqissimineq”.

2. Sooq tamatta peqqissimineq pillugu ilinniar­tariaqarpugut? (Nehemia 8:9-11)

² Inuit tamarmik peqqissimineq pillugu ilinniar­tariaqarput. Sooq? Ullut tamaasa ajortulior­taratta. Adamip Evallu kinguaarim­matigut tamatta ajorti toqulu kingornuppagut. (Rom 3:23; 5:12) Aap, tamavitta ajortiliuvugut peqqissimisariaqarlutalu. Allaat upperluartut, ilaatigut apustili Paulusi, ajortulioq­qajaanertik akiortuar­tariaqarpaat. (Rom 7:21-24) Tamannali isumaqarpa ajortiliunerput nikallungas­sutigiuas­sagipput? Naamik, Jehova nallittuisuuvoq, kissaatigaalu pilluas­sasugut. Nehemiap nalaani juutit misigisaat assersuutigeriartigu. (Nehemia 8:9-11 atuakkit). Jehovap kissaatiginngilaa juutit siornatigut ajortuliorsimanertik pissutigalugu aliasorujus­suassasut, kissaatigaali pilluarlutik guutisiussasut. Nalunngilaa peqqissimineq pilluarnermik kinguneqartartoq. Taamaattumik peqqissimineq pillugu ilinniar­tippaatigut. Ajortuliagut peqqissimis­sutigigutsigit upperil­luinnarsin­naavarput Ataatatta nallittuisup isumakkeerfigis­sagaatigut.

3. Allaaserisami matumani suut sammissavagut?

³ Peqqissimineq pillugu paasisaqar­nerujumalluta uku pingasut sammeriartigit: Siullertut, peqqissimineq pillugu Jehovap Israalikkut qanoq ilinniartikkai; aappaattut, ajortuliorsimasut  peqqissiminis­saannut qanoq ikiortarai; kiisalu Jiisusip malinnitsini peqqissimineq pillugu qanoq ilinniartikkai.

PEQQISSIMINEQ PILLUGU JEHOVAP ISRAALIKKUT QANOQ ILINNIARTIKKAI

4. Jehovap Israalikkut peqqissimineq pillugu qanoq ilinniartippai?

⁴ Jehovap Israalikkut innuttarileramigit isumaqatigiis­suteqarfigai inatsiseqar­tillugillu. Inatsisit taakku naalappatigit illersussavai pilluaq­qullugillu. Inatsisini pillugit ima oqarpoq: “Ilinnut peqqussutigisakka paasiuminaatsorsuun­ngillat ungasis­sorsuunatil­luunniit.” (Mos 5. 30:11, 16) Israalikkulli Jehovamut naalakkun­naarunik, assersuutigalugu guutipilus­siulerunik, illersor­neqarun­naarlutillu naalliussapput. Taamaattorli suli Guutimit iluarineqaleq­qinnissaminnut periarfis­saqarput. Israalikkut Jehovamut Guutiminnut ‘saappata peqqussutigisaalu naalappatigit’ – tassa peqqissimippata – Jehovap imminut qanillisissavai pilluaq­qoqqillugillu. – Mos 5. 30:1-3, 17-20.

5. Jehovap qanoq ersersippaa innuttani imminiigin­narnagit? (Kunnginik 2. 17:13, 14)

⁵ Jehovap innuttamisut toqqagai arlaleriarlutik pikitsitsisarput. Guutipilus­siorput maajunnar­tunillu allanik iliuuseqar­tarlutik. Tamatuma kingunerisaanik naalliupput. Jehovalli innuttani imminiigin­nanngilai. Pruffiitit aqqutigalugit peqqissimeq­qullugit imminullu saaqqullugit arlaleriarluni kajumis­saartarpai. – Kunnginik 2. 17:13, 14 atuakkit.

6. Peqqissiminerup pingaaruteqassusia pillugu Jehovap pruffiitini aqqutigalugit innuttani qanoq ilinniartippai? (Aamma asseq takuuk).

⁶ Jehovap innuttani naalanngik­kaangata amerlanertigut pruffiitini aqqutigalugit mianersoq­qusarlugillu naqqittarpai. Assersuutigalugu Jeremia aqqutigalugu ima kajumis­saarivoq: “Saanniarniarit Israeli allasiortoq … Kamaakkun­naassavassi ilumoor­tuugama … Kamaassiuaan­nassanngilanga. Kisianni paasiniaruk iluaatsuliornerit, Naalagaq Guutit tunukkakku.” (Jer 3:12, 13) Joeli aqqutigalugu Jehova ima oqarpoq: “Uannut saanniaritsi uummatissigut iluunngarlusi.” (Joel  2:12, 13) Esajalu aqqutigalugu ima oqariar­tuuteqarpoq: “Eqqiarniaritsi! Iluaatsuliasi isinnit peersigit, ajortumik iliussaaritsi.” (Es 1:16-19) Aamma Ezekieli aqqutigalugu Jehova ima aperivoq: “Iluaatsup toqunissaa piumasaris­sagaluar­nerpara? … Ileqqorisaraluani ajortut tunukkunigit inuugin­nassannginnerpa? Massami, kialuunniit toqunissaanik piumasaqan­ngilanga … Allamut saagitsi, taava inuugin­nassaasi!” (Ez 18:23, 32) Inuit peqqissimigaangata Jehova nuannaangaartarpoq, kissaatigaami naassaan­ngitsumik inuussasut! Imaanngilaq inuit peqqissimereeraangata aatsaat Jehova iliuuseqartartoq. Assersuuteqariarta.

7. Pruffiitimik Hosseamik nulianillu oqaluttuaq aqqutigalugu Jehovap innuttani qanoq ilinniartippai?

⁷ Pruffiitip Hosseap nuliatalu Gomerip inuunerat atorlugu Jehovap innuttani qanoq ilinniartikkai maluginiaruk. Gomerip allasioreerluni angutit allat pillugit Hossea qimappaa. Jehova qanoq iliorpa? Inuup uummataa takusin­naagamiuk Hossea ima oqarfigaa: “Arnaq angutip allap arnaatigisaa allasiortorlu orniguk, asajullu. Taamatut Naalakkap Israelikkut asavai, naak taakku guutinut allanut saattaraluartut.” (Hos 3:1; Uss 16:2) Maluginiaruk Hosseap nuliata allasiorluni inuunini suli allanngor­tinngikkaa. Taamaak­kaluartoq Jehovap Hossea oqarfigaa nuliani isumakkeerfigalugulu inooqatigeq­qilissagaa. a Oqaluttuaq tamanna aqqutigalugu Jehovap innuttani qanoq misigis­suseqarfigalugit ersersippaa. Ajortuliungaaraluartut suli asavai peqqissiminis­saannut allanngor­nissaannullu ikiorniar­tuarlugit. Tamatumannga erserpoq Jehovap inuit uummammiugisaannik misissuisartup inuk suli ingasattumik ajortuliortartoq peqqissiminissaanut ikiorniartaraa. (Uss 17:3) Ilumut taamaannersoq misissoriartigu.

JEHOVAP INUIT PEQQISSIMINIS­SAANNUT QANOQ IKIORTARAI

8. Jehovap Kaini peqqissiminissaanut qanoq ikiorniarsarivaa? (Mosesimik 1. 4:3-7) (Aamma asseq takuuk).

⁸ Kaini Adamip Evallu angajul­liliaraat. Ajortulioq­qajaanini angajoq­qaaminit kingornuppaa. Kainili imminut aqussin­naanngilaq. Biibilimi allassimavoq ‘ajortunik iliuuseqartartoq’. (Joh 1. 3:12) Immaqa tamanna pissutigalugu Kainip pilliutaa Jehovap iluarinngilaa. Kainili peqqissiminani “ajuallappoq nakangallunilu”. Jehova qanoq iliorpa? Kaini oqaluuppaa. (Mosesimik 1. 4:3-7 atuakkit). Maluginiaruk Jehovap Kaini inussiar­nersumik eqqarsalersin­niarlugulu neriuuteqalersinniaraa. Aamma mianersoqquaa peqqissimin­ngippat ajortuliaa kingunipiloqassasoq. Ajoraluartumik Kainip peqqissiminis­saminut Jehovap ikiuiniar­nerigalua tusarumanngilaa. Kaini tusaruman­ngimmat Jehova ajortulior­tartunik allanik peqqissiminissamut ikiuiniarunnaarpa? Naamerluinnaq!

9. Daavi peqqissiminis­saminut Jehovamit qanoq ikiorneqarpa?

⁹ Jehovap kunngi Daavi asangaarpaa ‘uummatimilu iluarisaatut’ taallugu. (ApS 13:22) Daavili allasior­nermigut toqutsinermigullu ingasattumik ajortuliorpoq. Moorsisip inatsisai naapertorlugit Daavi toqutaasus­saagaluarpoq. (Mos 3. 20:10; Mos 4. 35:31) Taamaattorli Jehovap Daavi peqqissiminissaanut ikiorusuppaa. b Pruffiitini Naatat kunngimut  aallartippaa, naak Daavip suli peqqissimisimanerluni ersersin­ngikkaluaraa. Naatat Daavip killitsis­sutigisaanik assersuusiorpoq. Tamanna tusaramiuk Daavi qamannga pisumik peqqissimivoq. (Sam 2. 12:1-14) Ajortuliani pillugu aliasungaar­nerminik ersersitsisumik tussiaasiorpoq. (Tuss 51:1, 2) Piffissap ingerlanerani ajortuliorsimasorpassuit Tussiaat tamanna tuppallersaatigalugulu peqqissiminis­saminnut killitsis­sutigisarpaat. Qujamasuutigingaarparput Jehovap asannilluni Daavi peqqissiminissaanut ikiorsimammagu.

10. Jehovap inunnut ajortulior­tartunut naammagit­tartuunera isumakkeerfigin­nittuuneralu pillugit qanoq misigivit?

¹⁰ Jehovap ajortuliat tamaasa uumigai. (Tuss 5:4, 5) Aammali nalunngilaa ajortiliusugut, asagamisigullu ajortulioraangatta ikiorusut­tarpaatigut. Inuk qanorluunniit ajortigisumik iliorsimasoq peqqissiminissaanut ikiorniar­tuarusuppaa imminullu qanillisin­niartarlugu. Tamanna nalunagu tuppallernaqaaq! Jehovap naammagit­tartuuneranik isumakkeerfigin­nittuuneranillu eqqarsaatigin­neqqissaar­tarnerput Jehovamut ilumoorfigin­nittuar­nissatsinnut ajortulioruttalu peqqisimipal­lannissatsinnut kajumis­sissutigis­savarput. Maanna sammeriartigu kristumiut siulliit peqqissimineq pillugu qanoq ilinniar­tinneqartut.

JIISUSIP MALINNITSINI PEQQISSIMINEQ PILLUGU QANOQ ILINNIARTIKKAI

11-12. Jiisusip tusarnaartini Ataatami isumakkeerfigin­nikkumanera pillugu qanoq ilinniartippai? (Asseq takuuk).

¹¹ Ukiumi 29-mi Missiarsi tikiuttus­sanngorpoq. Allaaserisap siuliani sammeriik­katsitut Johannesi imermut morsutsitsisartoq aamma Jiisusi Kristusi aqqutigalugit Jehovap innuttani peqqissiminissap pingaaruteqas­susianik ilinniartippai. – Mat 3:1, 2; 4:17.

¹² Jiisusip nunarsuarmiin­nginnermini qilammiitilluni Ataatami ajortuliortut peqqissimisut amerlasuut nallittor­tarsimagai takusarsimassavaa. Taamaattumik Jiisusip nunarsuarmi kiffartor­nermini tusarnaartini Ataatami isumakkeerfigin­nikkumaneranik ilinniar­tittarpai. Assersuutigalugu Jiisusip erneq tammaraluartoq pillugu assersuusiaq  oqaluttuaraa. Erneq inuusuttoq taanna inuunerluppoq. Kingusin­nerusukkulli silattuaqilerpoq ataataminullu uterusulerluni. Ataataa qanoq qisuariarpa? Jiisusi ima oqaluttuarpoq: “Suli ungasiartoq ataataata takugamiuk nalligingaalerlugu arpalluni ornippaa pakkuteriarlugulu kunillugu.” Erneq aperivoq ataatami illuani inussiaatit ilaattut isigineqarsin­naanerluni, Ataataatali ernerinerarlugu inoqutiminut tikilluaqquaa. Ernini pillugu ima oqarpoq: “Tammaraluarluni nanineqarpoq.” (Luk 15:11-32) Jiisusip assersuusiaa tuppaller­nangaartoq tamanna ersersitsivoq Ataatarput Jehova qanoq nallittuitigisoq!

13-14. Apustilip Petrusip peqqissimineq pillugu suna paasivaa, paasisimasanilu allanut qanoq ilinniar­titsissutigaa? (Aamma asseq takuuk).

¹³ Apustili Petrusi peqqissimineq isumakkeerfigineqarnerlu pillugit Jiisusimit ilikkagaqangaarpoq. Petrusi kukkusaqat­taartarpoq, Jiisusilli kajumilluni isumakkeerfigisarpaa. Assersuutigalugu Petrusip Naalakkani pingasoriarluni nalunerareerlugu tamanna assut aliasuutigaa. (Mat 26:34, 35, 69-75) Jiisusilli makititaanermi kingorna Petrusi kisimiik­kunartoq saqqummerfigaa. (Luk 24:33, 34; Kor 1. 15:3-5) Qularnan­ngitsumik tassani Jiisusip Petrusi peqqissimisoq asannilluni oqarfigaa ilumut isumakkeerfigalugu. – Mak 16:7.

¹⁴ Petrusi peqqissimineq isumakkeerfigineqarnerlu nammineq misigigamigit tamanna pillugu allat ilinniar­tissinnaavai. Ullup piinsip kingorna Petrusip juuterpassuit Jiisusimut uppinngitsut oqarfigai Missiarsi toqussimagaat. Taamaattorli asannilluni ima kajumis­saarpai: ‘Ajortuliasi piiarneqar­niassammata peqqissimillusilu Guutimut saagitsi, taamaaliorussi Jehovap nakussatsis­savaasi.’ (ApS 3:14, 15, 17, 19) Taamaalilluni Petrusip erseqqissarpaa peqqissimineq tassaasoq Guutimut saanneq. Tassanilu pineqarpoq allamik  isumataarneq, ajortulius­saarneq Guutillu iluarisaatut iliuuseqar­talerneq. Petrusip aamma erseqqissarpaa Jehovap isumakkeerfigil­luinnassagai ajortuliaallu piiarlugit. Ukiorpaaluit tamatuma kingorna Petrusip kristumiut ima allaffigai: ‘Jehovap inuit tamaasa suujunnaarsitaanatik peqqissiminissamut periarfis­sikkusuk­kamigit naammagit­tarfigaasi.’ (Pet 2. 3:9) Tamanna kristumiunut ajortuliorsimasunut – aamma ingasattumik ajortuliorsimasunut – tuppaller­nangaarpoq!

15-16. (a) Apustili Paulusi isumakkeerfiginninneq pillugu qanoq ilikkagaqarpa? (Timuutiusimut 1. 1:12-15) (b) Allaaserisami tulliuttumi suna sammissavarput?

¹⁵ Saulusi Taarsusimiu ajortuliarpas­suaqarpoq. Kristusip malinnittai peqqarniitsumik malersorpai. Ilimanarpoq kristumiut amerlanerit isumaqartut allanngorsin­naanngitsoq. Jiisusili makititaasimasoq inuttut ajortiliusutut eqqarsanngilaq. Taassuma Ataatamilu Saulusip ajunngitsortai takusimavaat. Jiisusi oqarpoq ‘oqaluus­sisussatut toqqarlugu’. (ApS 9:15) Saulusi peqqissiminissamut ikiorniarlugu allaat tupinnar­tuliorpoq. (ApS 7:58–8:3; 9:1-9, 17-20) Kristumiun­ngoreerluni Saulusip, kingusin­nerusukkut apustilitut Paulusitut taaneqartup, ajunngisaarfigineqarnini nallittor­neqarninilu qujamasuutigalugu eqqaakulasarpaa. (Timuutiusimut 1. 1:12-15 atuakkit). Paulusip uppeqatini ilinniartippai ‘Guutip ajunngisaarluni peqqissimeq­qullugit ikiorniartarai’. – Rom 2:4.

¹⁶ Paulusip Korintimi ilagiinni atoqatigiinnikkut eqqunngitsuliortoq iliuuseqarfigineqan­ngitsoq tusaramiuk qanoq siunnersorpai? Korintimiunut allagaanit paasisin­naavarput Jehova kiffaminik qanoq asannilluni perorsaatis­siisartoq peqqissimisunillu qanoq nallittuisoq. Aamma paasisin­naavarput uagut Jehova qanoq ilaarsin­naagipput. Allaaserisami tulliuttumi Korintimi ilagiinni pisimasoq tamanna misissus­savarput.