Apustilip Paulusip kristumiut Tessaluunikamiut ima allaffigai: ‘Allakkani ukunani oqaatsitsinnik maleruaan­ngitsoq mianersorfigis­savarsi.’ (Tes 2. 3:14) Siornatigut isumaqar­nikuuvugut tamanna utoqqaanertanut ilitsersuutaasoq. Biibilimi najoqqutassianik uteriilluni maleruaajuman­ngitsumik ilagiin­niittoqarpat siornatigut utoqqaanertat mianersoq­qussutaasumik oqalugiar­niarlutik aalajangersin­naasimapput. Taavalu oqaluus­sisartut kinaaneranik ilisimannittut guutisiornerata saniatigut pineqartoq peqatigisarun­naassavaat.

Maannali paasivarput Paulusi taama peqqusigami ilagiin­niittut kristumiut ataasiakkaat namminneq aalajangigassaat pigaa. Tassa namminneq aalajangissapput inuk aalajangersimasoq mianersorfiginiarlugu. Taamaat­tumillu utoqqaanertat mianersoq­qussutaasumik oqalugiar­tariaqan­ngillat. Sooq paasinnit­taaserput allanngorpa? Versit ataqatigiinneri maluginiakkit.

Paulusip maluginiarpaa ilagiin­niittut ilaat ‘torinngitsumik inuusut’. Taakkua Guutip oqaasia tunngavigalugu siunnersuutit maleruaruman­ngilaat. Siusinnerusukkut tikeraarluni ima peqqusimavai: “Sulerusun­ngitsoq nerissanngilaq.” Maannali ilaat imminut pilersor­niarlutik sulisin­naagaluarlutik suli sulerusun­ngillat. Aamma susassarin­ngisaminnut akuliuttarput. Taamatut torinngitsumik inuusut uppeqatiminnit qanoq pineqar­tussaappat? – Tes 2. 3:6, 10-12.

Paulusi allappoq inuk pineqartoq ‘mianersorfigissagaat’. Oqaatsimi grækerisuumi pineqarpoq inuk taanna maluginiarlugulu sunnertin­nginnissartik eqqumaf­figissagaat. Paulusip ilagiin­niittut tamaasa, utoqqaaner­taannaan­ngitsut, taama peqquai. (Tes 2. 1:1; 3:6) Tassa kristumiut ataasiakkaat maluginiarsimagunikku uppeqatertik siunnersuutinik Biibilimeersunik maleruaajuman­ngitsoq aalajangissapput taanna ‘ilagisarun­naarniarlugu’.

Tassa isumaqarpa pineqartoq ilagiinnit peerneqarsimasutut pineqassasoq? Naamik, Paulusimi ima nangippoq: “Qatanngutitut siunnersor­tuassavarsi.” Tassa kristumiut ataasiakkaat suli taanna ataatsimiinnerni oqaluus­sinermilu peqatigisassavaat. Taakkuali saniatigut, soorlu katerisimaarnerni, peqatiginaveersaassavaat. Sooq? Paulusi allappoq “kanngusuler­niassammat”. Taamatut ilagisarun­naarutsigu imaassinnaavoq iliuuserisar­takkani kanngusuutigilerlugit allanngor­titsiniaalersoq. – Tes 2. 3:14, 15.

Siunnersuut tamanna qanoq maleruarsin­naavarput? Paaseqqaas­savarput ilumut “torinngitsumik” iliuuseqarneq pineqarnersoq, soorlu Paulusi taama allattoq. Paulusip pinngilai nalunngeqatigin­nissuterput tunngavigalugu iliuusererusun­ngisatsitut iliuuseqartartut uagutsin­nilluunniit allaanerusunik soqutigisallit. Aamma pinngilai uagutsinnik ajuallatsitsisimasut. Kisiannili Paulusip pivai Guutip oqaasianik siunnersor­neqartaraluarlutik malinnik­kusunngitsut.

Nalitsinni uppeqatitsinnik taama naalakkuman­ngitsumik pissusilersortumik a maluginiagaqarutta nammineq aalajangis­savarput guutisiornitta saniatigut, soorlu katerisimaarnerni, ilagisar­niarnagu. Tamanna nammineq aalajangigas­saammat ilaquttatta inooqatigisatta avataatigut allanut eqqaassan­ngilarput. Pineqartorlu ataatsimiinnerni oqaluus­sinermilu suli peqatigisas­savarput. Isiginnit­taatsini pissusilersorninilu allanngor­tippagit nalingin­naasumik ilageqqit­talissavarput.