1. Efesosimiut 6:10-13 naaper­torlugit Jehovap uagutsin­nik soqutigin­nin­nerminik ersersitseriaasiisa ilaat suua? Nas­suiaruk.

JEHOVAP uagutsin­nik soqutigin­nin­nerminik ersersitseriaasiisa ilagaat akeq­qatsin­nik akiuun­nitsin­ni ikiuinera. Pingaar­ner­tut akeraraavut Saatani anersaapiluil­lu. Taak­ku pil­lugit Jehovap mianersoq­quaatigut akior­nis­saan­nul­lu pisariaqar­titatsin­nik tunil­luta. (Efesosimiut 6:10-13 atuakkit). Jehova tatigil­luin­narlugu taas­suma ikiuinera akuerigutsigu Diaavulup akior­nerani iluatsis­sin­naavugut. Apustilip Paulusip tatigin­nil­luin­nar­neratut tatigin­nis­sin­naavugut. Taan­na ima al­lap­poq: “Guutip il­lersor­patigut kia as­sor­tus­savaatigut?” – Rom 8:31.

2. Al­laaserisami suut sam­mis­savavut?

² Kristumiuugat­ta ilumoor­tut Saatani anersaapiluil­lu alutorsaatigineq ajor­pavut. Jehova pil­lugu ilin­niar­ner­put taas­sumun­ngalu kif­far­tor­ner­put pingaar­tin­ner­paavavut. (Tuss 25:5) Taamaat­torli “Saatanimit nakutin­neqaq­qunata” iliuuserisar­tagai ilisimasariaqar­pavut. (2 Kor 2:11) Inun­nik sal­loqit­taaniarlutik Saatanip anersaapiluil­lu pingaar­ner­tut iliuuserisar­tagaat al­laaserisami eq­qar­tor­neqas­saaq. Aam­ma akior­neran­ni qanoq iluatsis­sin­naasugut sam­mis­savar­put.

3-4. (a) Anersaarsior­neq suua? (b) Anersaarsior­nermik up­perin­nin­neq qanoq nalingin­naatigaa?

³ Inun­nik sal­loqit­taaniarlutik Saatanip anersaapiluil­lu pingaar­ner­tut iliuuserisar­tagaat tas­saavoq anersaarsior­neq. Inuit nalingin­naasumik ilisiman­ngisaan­nik aqus­sin­naan­ngisaan­nil­lu anersaarsior­tut ilisimasaqar­nerarlutil­lu aqutsisin­naanerar­put.  As­sersuutigalugu ilaat astrologii (ul­loris­sat najoq­qutaralugit siulit­tuiniar­tar­neq) aq­qutigalugu siunis­saq pil­lugu ilisimasaqar­nerar­tar­put. Al­lat toqusimasunik at­taveqar­tuusaar­tar­put. Aam­ma inun­nik perloq­qusiniar­tar­tunik angak­kuar­tar­toqar­poq. *

⁴ Anersaarsior­nermik up­perin­nin­neq qanoq nalingin­naatigaa? Latinamerikami Caribiamilu nunani 18-ini isumasiuinermi inuit pingajorar­terutaasa mis­saat oqar­put anersaarsior­neq, ilisiin­neq angak­kuar­nerlu up­peralugu. Amerlaqatingajaasalu up­peraat anersaanut at­taveqar­toqarsin­naasoq. Aam­ma Afrikami nunani 18-ini apersuisoqar­poq. Agguaqatigiis­sil­lugit aperineqar­tut af­faat sin­nerlugit akisimap­put ilisiin­neq up­peralugu. Soorunalimi sumiik­kaluarut­taluun­niit anersaarsior­neq akior­tus­saavar­put, Saatanimi ‘silarsuarmik tamarmik tam­mar­titsiniarsarivoq’. – Saqq 12:9.

5. Jehovap anersaarsior­neq qanoq isumaqarfigaa?

⁵ Jehova ‘Guutiuvoq sal­lusuitsoq’. (Tit 1:2) Taamaat­tumik anersaarsior­neq uumigaa! Israelik­kun­nut ima oqar­poq: “Ilin­ni er­nerminik panim­minil­luun­niit in­nik­koor­titsisoqas­san­ngilaq, siulit­tuisar­toqas­sanani angak­kuar­niar­toqas­sananiluun­niit, pisus­sanik ilimasaarisoqas­sanani ilisiin­niar­tar­toqas­sananiluun­niit. Angak­kuar­niutaasunik oqalut­toqar­tas­san­ngilaq, timaajagarsior­tunik sukuiaasar­tunil­luun­niit apersuisoqar­tas­sanani toqoreersunil­lu siunersiuisoqar­tas­sanani. Taamaalior­tut kik­kul­luun­niit Naalak­kap maajugai.” (5 Mos 18:10-12) Inatsisit Jehovap Israelik­kun­nut tun­nius­sai kristumiut maleruar­tus­saan­ngilaat. Nalun­ngilar­pul­li Jehovap anersaarsior­nermut isigin­nit­taasia al­lan­ngorsiman­ngitsoq. – Mal 3:6.

6. (a) Inun­nik ajoqusiiniarluni Saatanip anersaarsior­neq qanoq ator­tar­paa? (b) Oqaluus­sisar­tup oqaasii 9:5 naaper­torlugu toqusimasut pil­lugit sal­lusuis­sut suua?

⁶ Saatanip anersaarsior­neq aq­qutigalugu inun­nik ajoqusiisar­nera Jehovap nalun­ngin­namiuk taman­na pil­lugu mianersoq­quaatigut. Anersaarsior­neq aq­qutigalugu Saatani sal­loqit­taasar­poq, sal­luliuutaasalu ilagaat toqusimasut inuugin­narlutik arlaan­nut ingerlaq­qit­tar­nerat. (Oqaluussisartup oqaasii 9:5 atuaruk). Aam­ma inun­nik qunulersitsiniarluni taak­kulu Jehovamit tunus­sitin­niarlugit Saatanip anersaarsior­neq ator­tar­paa. Inuit anersaarsior­tar­tut Jehova pin­nagu anersaapiluit tatigis­sagaat Saatanip siuner­taraa.

7. Jehovap sunik ilisimatip­paatigut?

⁷ Eq­qaaneqareersutut Saatanimit anersaapilun­nil­lu sal­loqit­tar­tin­ngin­nias­sagat­ta ilisimasariaqak­katsin­nik Jehovap ilisimatip­paatigut. Saatanip anersaapiluil­lu akior­neran­ni iliuuserisin­naasat­ta ilaat sam­meriar­tigit.

8. (a) Anersaapiluit akior­niarlugit iliuuserisin­naasar­put pingaar­ner­paaq suua? (b) Saatanip toqusimasut pil­lugit sal­luliuutaa Tus­siaat 146:4-mi qanoq qulaajar­neqar­pa?

⁸ Biibilimik atuarlutillu eqqarsaatiginneqqissaartarit. Taman­na anersaapiluit sal­luliuutaan­nik itigar­titseriaasiuvoq pingaar­ner­paaq. Guutip oqaasia panatut ipit­tutut ip­poq, Saatanim­mi sal­luliuutai ilumoor­tunit avis­saar­tit­tar­pai. (Ef 6:17) As­sersuutigalugu toqusimasut inuusunut at­taveqarsin­naanerata sal­luunera Biibilimi qulaar­neqar­poq. (Tussiaat 146:4 atuaruk). Aam­ma Jehovap tutsuiginar­tumik siulit­tuisin­naasutuaanera eq­qaasitsis­sutigineqar­poq. (Es 45:21; 46:10) Ul­lut tamaasa  Biibilimik atuar­tar­nik­kut eq­qarsaatigin­neq­qis­saar­tar­nik­kul­lu anersaapiluit sal­luliuutaan­nik up­perin­nin­ngin­nis­samut uumigin­nin­nis­samul­lu pigin­naan­ngorsagaas­saagut.

9. Anersaarsioriaatsit suut ingalas­simal­luin­nar­tar­pavut?

⁹ Anersaarsiornermut tunngasunik sunilluunniit iliuuseqaqinak. Kristumiuugat­ta ilumoor­tut anersaarsioriaatsit suul­luun­niit sam­mineq ajor­pavut. As­sersuutigalugu anersaanut at­taveqar­tar­tut saaf­figinavian­ngilavut toqusimasul­luun­niit arlaatigut at­taveqarfiginagit. Al­laaserisap siuliani eq­qar­tor­neqar­tutut ilisinermi ileq­qut toqusimasut suli arlaan­ni inuuneran­nik up­perin­nin­nermik tun­ngaveqar­tut ingalas­simasar­pavut. Aam­ma astrologii siulit­tuiniar­tar­nerluun­niit aq­qutigalugit siunis­saq pil­lugu paasiniaaneq ajor­pugut. (Es 8:19) Nalun­ngilar­put anersaarsioriaatsit taamaat­tut navianar­tuusut aam­ma toq­qaan­nar­tumik Saatanimut anersaapilun­nul­lu at­taveqar­titsisin­naasut.

10-11. (a) Efesosimi inuit ilai sal­lusuis­sut ilin­niaramik­ku sup­pat? (b) Korinthimiunut al­lak­kat siul­liit 10:21 naaper­torlugu sooq kristumiut siul­liit ilaar­tariaqar­pavut, qanorlu ilaarsin­naavavut?

¹⁰ Anersaarsiornermut attuumassuteqartut suulluunniit pigiunnaakkit. Kristumiut siul­liit nalaan­ni Efesosimiut ilaat anersaarsior­tar­put. Sal­lusuis­sul­li ilin­niaramik­ku an­ner­tuumik iliuuseqar­put. “Angak­kuar­niar­tarsimasut ilaasa atuagaatitik nas­sar­paat tamarmil­lu tak­kuan­ni ikual­lal­lugit.” (ApS 19:19) Inuit taak­ku anersaapiluit akior­niarlugit sapin­ngisamin­nik ilior­put. Naak atuagaatitik angak­kuar­nermut tun­ngasut akisoorujuugaluar­tut al­lanut tun­niun­nagit tuniniar­nagil­luun­niit ikual­lap­paat. Jehovamit iluarisaanis­sar­tik atuak­kat qanoq naleqar­tigineran­nit soqutigineruaat.

¹¹ Kristumiut taak­ku qanoq ilaarsin­naavavut? Anersaarsior­nermut at­tuumas­suteqar­tut suul­luun­niit pigiun­naarutsigit silatusaas­saagut. Taak­kunun­nga ilaap­put aar­nus­sat, angak­kuar­niutit al­lal­luun­niit anersaapilun­nit  il­lersor­niarluni pigineqarsin­naasut ator­tul­lu il­lersuutaasorineqar­tut. – 1 Korinthimiut 10:21 atuaruk.

12. Aliik­kutarisar­tak­katsin­nut tun­ngatil­lugu im­minut qanoq aperisariaqar­pugut?

¹² Aliikkutarisartakkatit nalilersoqqissaakkit. Im­minut ima aperigit: ‘Atuak­kani, atuagas­siani inter­netik­kul­lu atuar­tak­kak­ka anersaarsior­ner­taqar­pat? Nipilersuutim­mi tusar­naar­tak­kak­ka, fjer­nsynik­kut aal­lakaatitas­siat isigin­naar­tak­kak­ka imaluun­niit spil­lit spil­ler­tak­kak­ka? Aliik­kutarisar­tak­kak­ka arlaatigut anersaarsior­ner­taqar­pat? Vampyrit, zombiet imaluun­niit anersaanit pis­saaneqar­titaasut ilaap­pat? Taak­kunani angak­kuar­neq, angak­kuar­tin­neq perloq­qusinerlu ajoqutaan­ngitsutut saq­qum­miun­neqar­tar­pat?’ Imaan­ngilaq oqalut­tualiat piviusorsiun­ngitsut tamarmik anersaarsior­nermut at­tuumas­suteqar­tut. Aliik­kutarisar­tak­kavil­li nalilersor­nerini Jehovap uumigisaasa ingalas­simanis­saanut iluaqutigisin­naasan­nik toq­qaanis­sat aalajangiusimasariaqar­pat. Guutimum­mi ‘ilerasuuteqan­ngitsuunis­sar­put’ sapin­ngisatsin­nik sulis­sutigerusup­par­put. – ApS 24:16. *

13. Sorusun­ngil­luin­nar­pugut?

¹³ Anersaapiluit pillugit oqaluttuat siammarteqinagit. Tamatumun­nga tun­ngatil­lugu Jiisusi ilaarusup­par­put. (1 Petr 2:21) Nunarsuarmukan­ngik­kal­larami Jiisusi qilam­miik­kami Saatani anersaapiluil­lu pil­lugit ilisimasaqangaar­poq. Taamaak­kaluar­toq taak­kua qanoq iliorsimanerinik oqalut­tuar­neq ajor­poq. Jiisusi Jehovamik nalunaajaasoorusup­poq, Saatanimiun­ngitsoq. Jiisusi ilaarsin­naavar­put anersaapiluit pil­lugit oqalut­tuar­tan­ngin­nik­kut. Paarlat­tuanik  ‘uum­mater­put oqaatsinik tusaruminar­tunik’, tas­sa ilumoor­tunik, ‘utsersor­toq’ oqaatsitsigut ersersit­tar­par­put. – Tuss 45:2.

14-15. (a) Sooq anersaapiluit siooragisariaqan­ngilavut? (b) Nalitsin­ni Jehovap in­nut­taminik il­lersuisar­neranik sunik up­per­narsaateqar­pa?

¹⁴ Anersaapiluit sioorageqinagit. Silarsuarmi matumani ajor­tunik nalaataqarsin­naavugut. Imaas­sin­naavoq ajutooriataar­tugut, nap­parsimaleriataar­tugut ilimagin­ngisamil­luun­niit toquk­kut an­naasaqar­tugut. Isumaqas­san­ngilagul­li anersaat pisunut taamaat­tunut pisuusut. Biibilimi nas­suiar­neqar­poq inuit tamarmik ilimagin­ngisanik eq­qugaasar­tut. (Jaak 4:13, 14) Aam­ma anersaapilun­nut tun­ngatil­lugu Jehovap pis­saaneqar­nerungaar­nini ersersis­simavaa. As­sersuutigalugu akuerin­ngilaa Jobi Saatanimit toqutaas­sasoq. (Job 2:6) Mosesip nalaani Egyptenimi angak­kuar­niar­tar­tunit Jehovap pis­saaneqar­nerunini ersersip­paa. (2 Mos 8:14; 9:11) Jehovamit pis­saaneqar­titaal­luni Jiisusip naalan­narsisitaasimasup Saatani anersaapiluil­lu qilam­mit nunamut igik­kamigit taak­kunan­nga pis­saaneqar­nerunini ersersip­paa. Ungasin­ngitsuk­kul­lu itinersuarmut igitaagunik kik­kun­nil­luun­niit ajoqusiisin­naajun­naas­sap­put. – Saqq 12:9; 20:2, 3.

¹⁵ Jehovap nalitsin­ni in­nut­taminik il­lersuisar­neranut up­per­narsaater­pas­suaqar­poq. Una eq­qarsaatigiuk: Nunarsuaq tamak­kerlugu sal­lusuis­sut oqaluus­sis­sutigalugulu ilin­niar­titsis­sutigaar­put. (Matt 28:19, 20) Taamaalior­nik­kut Diaavulup suliai ajor­tut qulaajar­tar­pavut. Saatanip suliniar­ner­put unitsis­simas­sagaluar­paa taamaalior­nis­saminut pisin­naasuuguni. Saper­porli. Aap, ersarip­poq anersaapiluit siooragisariaqan­ngik­kivut. Nalun­ngilar­pum­mi Jehovap ‘nunarsuarmiit­tut tamaasa takusin­naagai uum­matimik­kut iluun­ngarlutik im­minik tunaarin­nit­tut pis­saanermigut ikior­niarlugit’. (2 Nal 16:9) Jehovamut aalajaat­tuarut­ta anersaapiluit ataavar­tumik ajoqusersin­naas­san­ngilaatigut.

16-17. Anersaapiluit akior­neran­ni sapiis­suseqar­tariaqar­nermik as­sersuuteqarit.

¹⁶ Anersaapiluit akior­niarlugit sapiis­suseq pisariaqar­poq, ingam­mik ilaqut­tat ikin­ngutil­lu  ajor­tumik isumaqan­ngik­kaluarlutik akerliugaangata. Jehoval­li sapiis­susermik ersersitsisut pil­luaq­qusar­pai. Ericap, Ghanami najugaqar­tup, misigisaa eq­qarsaatigiuk. 21-nik ukioqarluni Biibilimik atuaq­qis­saar­taler­poq. Ataataa palasium­mat angak­kuar­tar­toq naatsorsuutigineqar­poq anersaarsior­nermut tun­ngatil­lugu Erica neqinik ataatami guutiinut pil­liutigineqarsimasunik nereqataas­sasoq. Erical­li nereqataarusun­ngin­nera ilaqutaasa pal­lorfigisamin­nut kan­ngunarsaataanerar­paat. Isumaqar­put guutit eq­qarsar­taatsik­kut timik­kul­lu nap­paateqalersitsil­lutik pil­larumaaraatik.

¹⁷ Ericap ilaqutaasa ileq­qumut tas­sunga peqataanis­saanut pin­ngitsaaliniarsaraat. Ericali al­lamut nuut­tariaqar­nis­samik kinguneqaraluar­toq ileq­quan­nut peqataarusun­ngilaq. Nalunaajaasut as­sigiin­ngitsut angerlarsimaf­fian­ni inisimasuuler­poq. Taamaalil­luni Erica up­peq­qatiminik qatan­ngutigilik­kaminik ilaqutar­taarluni Jehovamit pil­luaq­quneqar­poq. (Mark 10:29, 30) Ilaqut­tami tunus­simagaluaraani pigisaalu ikual­lak­kaluaraat Erica Jehovamut aalajaat­tuar­poq. Kuisip­poq maan­nalu pioneritut kif­far­torluni. Ericap anersaapiluit siooragin­ngilai, ilaqut­tanilu pil­lugit ima oqar­poq: “Jehovap, Guutit­ta asan­nit­tup, ilisarisimanerata pil­luaq­qus­sutisias­sar­tai taas­sumun­ngalu kif­far­tor­nerup kingunerisaanik kif­faan­ngis­suseqar­neq ilaqut­tama misigis­sagaat ul­lut tamaasa qin­nutigisar­para.”

18. Jehova tatigigutsigu qanoq pil­luaq­quneqas­saagut?

¹⁸ Tamat­ta taama ingasatsigisumik up­per­nik­kut misilin­neqar­navian­ngilagut. Taamaat­torli tamat­ta Jehova tatigalugu anersaapiluit akior­niar­tus­saavavut. Taamaaliorut­ta pil­luaq­quneqangaas­saagut Saatanimil­lu sal­loqit­tar­tin­nata. Aam­ma anersaapilun­nik siooragin­nin­nik­kut soriarsin­naan­ngitsutut is­san­ngilagut. Pingaar­ner­tul­li Jehovamik ikin­nguteqar­ner­put nakus­satsis­savar­put. Jaaku ima al­lap­poq: “Guutimut naalatsigitin­niaritsi; Diaavululu akerar­torsiuk [akiorsiuk, NW], taava ilis­sin­nit qimaas­saaq. Guuti qanin­niarsiuk, taava taan­na ilis­sin­nut qanil­lis­saaq.” – Jaak 4:7, 8.