ATUAQQISSAAGASSAQ 17
Jehovap illit asavaatit!
‘Jehovap innuttani tipaatsuutigai.’ – TUSS 149:4.
ERINARSUUT 3 Jehova, neriuffigivatsigit nakuussutigalutillu
QILANAARTUUT *
Ataatatta qilammiusup tamatta immikkut ‘tipaatsuutigaatigut’ (Immikkoortoq 1 takuuk)
1. Jehovap innuttamini suut maluginiartarpai?
JEHOVAP GUUTIP ‘innuttani tipaatsuutigai’. (Tuss 149:4) Eqqarsaat tamanna nuanningaarami! Pissusigut nuannersut qanorlu ajunngitsunik pissuseqalersinnaanerput maluginiartarpai imminullu kajungilersittarluta. Aalajaaffigiuarutsinni qanimut attaveqarfigiuassavaatigut. – Joh 6:44.
2. Sooq inuit ilaasa Jehovamit asaneqarnertik upperiuminaatsissinnaavaat?
2 Ima eqqarsartoqartarpoq: ‘Nalunngilara Jehovap innuttani ataatsimut isigalugit asagai. Uangarpiarli sooq asassavaanga?’ Sooq inuit ilaat taama eqqarsartarpat? Oksana, * meeraalluni atugarliorsimasoq, ima oqarpoq: “Imermut morsutsinneqarama kingornalu pioneritut kiffartulerama nuannaangaarpunga. Ukiulli 15-it qaangiummata meeraallunga misigisapilukka eqqaajortulerpakka. Taava eqqarsartalerpunga Jehovamit iluarisaanangalu asaneqarsinnaananga.” Yua, qatanngut arnaq pioneri meeraalluni imaannaanngitsunik atugaqarsimasoq, ima oqarpoq: “Jehova nuannaartikkusukkakku taassumunnga tunniulluinnarpunga, misigivungali asasinnaanngikkaanga.”
3. Allaaserisami matumani apeqqutit suut akissutissarsissavagut?
3 Qatanngutigut eqqaaneqaqqammersut assigalugit Jehova qamannga pisumik asagaluarlugu immaqa taassumannga asaneqarnerit qularivat. Tamannali sooq navianarpa? Aamma Jehovamit asaneqanngitsutut misigileraangavit
suna iluaqutigisinnaaviuk? Apeqqutit taakku akissutissarseriartigit.JEHOVAP ASANNINNERANIK QULARINNINNEQ NAVIANARPOQ
4. Sooq Jehovap asanninneranik qularinninneq navianarpa?
4 Asanninneq sakkortuumik kajumississutigisarparput. Jehovamit asaneqarluta tapersersorneqarlutalu qularinngikkutsigu qanorluunniit atugaqaraluarluta sapinngisamik kiffartorfigiuarsinnaavarput. Akerlianilli, Jehovap asanninnera qularutigigutsigu ‘nukigut annikillissapput’. (Uss 24:10) Tamatuma kingunerisaanik Saatanip saassussinerinut akiuussinnaajunnaassaagut. – Ef 6:16.
5. Guutip asanninneranik qularinninneq qatanngutit ilaannut qanoq sunniuteqarsimava?
5 Qatanngutit ilaasa Jehovamit asaneqarnerminnik qularutiginnilernertik anersaakkut sanngiilliulissutigisimavaat. Utoqqaanertaq Jamesimik atilik ima oqarpoq: “Naak betelimi kiffartornera allanillu oqaasilinni ilagiinniinnera nuannaarutigigaluarlugit eqqarsaatigisarpara ilumut Jehovap iliuutsikka iluarinerai. Allaammi Jehovap qinnutikka tusartarnerai qularileraluarpara.” Piffissaq tamaat kiffartortoq alla, Eva, ima oqarpoq: “Paasivara Jehovap asanninnerata qularutiginera navianartuusoq, tamannami kiffartornitsinnut sutigut tamatigut ajortumik sunniuteqartarpoq. Aamma anersaakkut immersornissaq nakernarunnaartarpoq Jehovamullu kiffartorneq nuannerunnaarluni.” Michael pioneriusoq utoqqaanertaasorlu ima oqarpoq: “Guutip ilinnut asanninnera upperinngikkukku Jehova ungasilliartulissavat.”
6. Jehovap uagutsinnut asanninnera qularilerutsigu qanoq iliortariaqarpugut?
6 Qatanngutitta misigisaannit erserpoq Jehovap asanninneranik qularinninneq qanoq navianarsinnaatigisoq. Taamatulli eqqarsaateqalerutta qanoq iliortariaqarpugut? Eqqarsaatit taamaattut ingerlaannaq itigartittariaqarpagut! Qulaleraangavit Jehovamut ikioqqusarit, taava ‘eqqissinerup Guutimit pisup siuneqassusernit tamanit annerungaartup uummatit eqqarsaatitillu sernigissavai’. (Tuss 139:23; Fil 4:6, 7) Eqqaamajuk qatannguterpassuit aalajaatsut ilittulli akiugaqartut. Allaammi Jehovap kiffai itsaq inuusimasut taamatut akiugaqarsimapput. Apustili Paulusi qanoq ilinniarfigisinnaanerlugu maanna sammeriartigu.
PAULUSI QANOQ ILINNIARFIGISINNAAGIPPUT
7. Paulusi sunik akiugaqarsimava?
7 Ilaannikkut misigisarpit akisussaaffeqarpallaaravit suliassatit tamaasa angumerisinnaasarnagit? Nappaateqarnerit nuannaarunnaassutigaajuk? Imaluunniit naammalluinnanngitsuunerit nikallungassutigisarpiuk? Taamaappat Paulusip misigissusii ilisarisinnaassavatit. Taassuma ‘ilagiit tamaasa ernumassutigisarpai’. (2 Kor 11:23-28) Aamma ‘timiminut kapputtutut’ ittumik anniaateqarpoq, tassa anigorusutaminik nappaateqarsimasinnaavoq. (2 Kor 12:7-10) Tamatuma saniatigut Paulusip naammalluinnanngitsuunerminik akiugaqartuartariaqarnini nikallungassutigisarpaa. – Rom 7:21-24.
8. Paulusip ajornartorsioraluarluni pinertusaarnissaminut suna iluaqutigaa?
8 Paulusi assigiinngitsutigut misilinneqartaraluarluni Jehovamut kiffartortuarpoq. Naammalluinnanngitsuunini ilisimalluaraluarlugu sooq pinertusaarsinnaasimava? Utertitsissut upperilluinnaramiuk. Aamma Jiisusip neriorsuutaa una ilisimavaa: ‘Kinaluunniit [Jiisusimut] uppertoq inuussaaq.’ (Joh 3:16; Rom 6:23) Paulusip utertitsissut upperigamiuk qularingilluinnarpaa Jehovap ingasattumik ajortuliorsimasut allaat ajortuliaminnilli peqqissimissutiginnittut isumakkeerfigerusuttarai. – Tuss 86:5.
9. Paulusip Galatiamiut 2:20-mi allatai qanoq ilinniarfigaagut?
9 Aamma Guutip asanningaarnera Kristusip pilliutaatigut ersersinneqartoq Paulusip upperaa. (Galatiamiut 2:19, 20 atuakkit). Versip 20-p naggataatungaani Paulusip oqaasii uku maluginiakkit: ‘Guutip ernera uannik asannippoq uangalu pillunga imminut tunniuppoq.’ Guutip asanninnera killilittut isiginngilaa, imalu eqqarsalinngilaq: ‘Paasisinnaavara sooq Jehovap qatanngutikka asagai. Uangali asasinnaanavianngilaanga.’ Paarlattuanilli Romamiut ima eqqaasippai: ‘Ajortiliugallartilluta Kristusi uagut pilluta toquvoq.’ (Rom 5:8) Ilumummi, Guutip uagutsinnut asanninnera killeqanngilaq!
10. Romamiut 8:38, 39-lu qanoq ilinniarfigaagut?
10 Romamiut 8:38, 39 atuakkit. Guutip asanningaartuunera Paulusip qularutiginngilluinnarpaa. Allappoq suulluunniit “avissaartissinnaanngikkaatigut Guutip asannissusianit”. Nalunngilaa Jehovap Israelikkut kamagittarfigingaarsimagai. Aammami nammineq Jehovamit nallittorneqarsimavoq. Allatut oqaatigalugu Paulusi ima oqarpoq: “Jehovap ernini uanga pillunga pilliutigaa. Taava sooq asanninnera qularissavara?” – Rom 8:32.
Jehovap maannamiit iliuuserisagut pingaarnerpaatippai qanga kukkussutigisimasagut pinnagit (Immikkoortoq 11 takuuk) *
11. Sooq Paulusip Guutimit asaneqarnini upperilluinnarpaa, naak 1 Timotheusi 1:12-15 allassimasutut ajortuliornikuugaluarluni?
11 1 Timotheusi 1:12-15 atuakkit. Paulusip suli kristumiunngorani iliuuserisarsimasani artorsaatigisarsimassavai. Allaallumi imminut ‘ajorteqarnersaanerarpoq’, tamannalu tupinnanngilaq. Taamanikkummi Paulusip kristumiut illoqarfinniit illoqarfinnut malersortarpai, ilai parnaarussaatittarlugit allallu toqutaatittarlugit. (ApS 26:10, 11) Qanoq misigisimassasoraajuk kristumioqatini inuusuttunnguaq taamaaliornini pissutigalugu angajoqqaaverussimasoq naapissimasuuguniuk? Ajorsimassaqaaq. Paulusilli ajortuliani peqqissimissutigigaluarlugit nalunngilaa pereersut allanngortissinnaanagit. Kristusip utertitsissutaata nalinga upperilluinnarlugu ima allappoq: ‘Guutip saammaanneragut taannaavunga.’ (1 Kor 15:3, 10) Qanoq ilinniarfigisinnaavarput? Qulareqinagu Jiisusip illit pillutit toqunermigut Jehovamut qanittumik attaveqarsinnaalersikkaatit. (ApS 3:19, 20) Jehovap maannamiit iliuuserisagut pingaarnerpaatippai, qanga – allaat Jehovamik Nalunaajaasunngoreerluta – kukkussutigisimasagut pinnagit. – Es 1:18.
12. Naleqanngitsutut asaneqarsinnaanngitsutullu misigigaangatta 1 Johannesi 3:19, 20-milu allassimasut qanoq tuppallersaatigisinnaavagut?
12 Jiisusip illit ajortuliannik isumakkeerfigineqarniassagavit imminut pilliutiginera 1 Johannesi 3:19, 20 atuakkit). Taama misigileraangatta eqqaamasariaqarparput ‘Guuti uummatitsinnit annerusoq’. Tassa uummatitta salloqittaraluarpatigulluunniit Ataatatta qilammiusup asajuarlutalu isumakkeerfigerusuttassavaatigut. Tamanna upperisariaqarparput. Taamaattumik Biibilimik atuaqqissaakulanissaq, qinujuarnissaq Guutillu innuttaanik peqateqartarnissaq pingaaruteqarput. Sooq?
eqqarsaatigigaangakku immaqa ajukkuttarputit. Sooq taamatut misigilertarpugut? Uummatitta naammalluinnanngitsup salloqittarluta naleqanngitsutut asaneqarsinnaanngitsutullu misigilersissinnaammatigut. (NALEQANNGITSUTUT MISIGINEQ QANOQ AKIORSINNAAGIT
13. Biibilimik atuaqqissaartarneq qanoq iluaqutigisinnaavarput? (Ungalusaq “ Biibili qanoq iluaqutigigaat” takuuk).
13 Biibili ullut tamaasa atuaqqissaartaruk, taava Jehovap pissusii nuannersut ersarinnerulissapput. Aamma ilinnut qanoq asannitsiginera paasiartulissavat. Ullut tamaasa Biibilimi atuakkatsinnik eqqarsaatiginneqqissaartarnerput eqqarsaatitsinnut misigissutsitsinnullu ajunngitsumik sunniuteqartassaaq. (2 Tim 3:16) Utoqqaanertaq Kevinimik atilik naleqanngitsutut misiginermik akiugaqarsimasoq ima oqarpoq: “Imminut ajoreqqajaaleraangama Tussiaat 103 iluaqutigisarpara tassani eqqaasinneqartarama Jehovap qanorpiaq isigineraanga.” Eva, eqqaneqareersoq, ima oqarpoq: “Ulloq naggaserlugu Jehovap pingaartitai eqqarsaatigeqqissaartarpakka. Tamanna qamuuna eqqissisimaannarnissannut uppernerulernissannullu iluaqutigisarpara.”
14. Qinukulaneq qanoq iluaqutaasinnaava?
14 Qinukulagit. (1 Th 5:17) Kinaluunniit ikinngutigillualissagutsigu ammasumik oqaloqatigikulasariaqarparput. Aamma Jehovamut tunngatillugu taamaappoq. Misigissutsigut, eqqarsaatigut isumakuluutigullu qinunikkut oqaluttuarigaangatsigit ersersittarparput tatigalugu nalunngikkippullu asagaatigut. (Tuss 94:17-19; 1 Joh 5:14, 15) Yua, eqqaneqareersoq, ima oqarpoq: “Qinugaangama ullormut misigisimasakka kisiisa pinnagit aammali eqqarsaatikka misigissutsikkalu ilorlerpaat oqaluttuariniarsarisarpakka. Taamaaliortarnikkut Jehova suliffeqarfissuarmi aqutsisutut pinnagu Ataatatulli meeqqaminut asannittutut isiginerujartulerpara.” – Ungalusaq “ Iluaqutiginikuuiuk?” takuuk.
15. Sooq oqarsinnaavugut Jehovap tamatta immikkut soqutigigaatigut?
15 Ikinngutaalluartunik ilaqartarit, taakkumi Jehovamit tunissutaapput. (Jaak 1:17) Ataatatta qilammiusup tamatta immikkut soqutigigamisigut anersaakkut ilaqutassatsinnik tunisimavaatigut, taakkualu ‘tamatigut asanninnermik takutitsisarput’. (Uss 17:17) Paulusip Kolossemiunut allakkamini kristumioqatini tapersersortigisimasani atiisigut taallugit ‘tuppalliutaasutut’ eqqaavai. (Kol 4:10, 11) Allaammi Jiisusip qilammi nunamilu ikinngutiminit tapersersorneqarnini qujamasuutigaa, nalunngilaami pisariaqartillugu. – Luk 22:28, 43.
16. Ilagiinni ikinngutitsinnit ikiorneqarnerput qanoq Jehovamut qaninnerulissutigisarparput?
16 Ilagiinni ikinngutinnit ikiorneqarnissat akuerisarpiuk? Anersaakkut inersimalluartumut isumakuluutitsinnik annissuineq sanngiinnermut ersiutaanngilaq, illersuutaasinnaavorli. James, eqqaaneqareersoq, ima oqarpoq: “Anersaakkut inersimalluartunik ikinnguteqarluarnera iluaqutiginikooqaara. Eqqarsaatikka nuanniilligaangata annissuiffigisarpakka. Taakkua tusarnaaqqissaartarlungalu eqqaasittarpaannga asallunga. Taamaalioraangata malugisarpara Jehovap asallungalu isumassoraanga.” Anersaakkut qatanngutitsinnut qanimut ikinnguteqarneq pingaaruteqangaarami!
JEHOVAP ASANNINNERANIITTUARIT
17-18. Kina tusarnaartariaqarparput, aamma sooq?
17 Ajunngitsuliornissamik ilungersuussiunnaarnissarput Saatanip kissaatigaa. Isumaqalersikkusuppaatigut Jehovamit asaneqanngitsugut annaanneqarnissamullu ajukkunnartugut. Saatanimilli salloqittarteqinak!
18 Jehovap asavaatit naleqangaartutullu isigivaatit. Naalakkukku Jiisusitulli ‘asannissusianiittuassaatit’. (Joh 15:10) Taamaattumik Saatanip uummativilluunniit salluliuutai uppereqinagit. Akerlianik Jehova tusarnaaruk, taassumami tamatta immikkut ajunngitsortagut maluginiartarpai. Qularutiginngilluinnaruk ‘innuttani tipaatsuutigigamigit’ aamma illit tipaatsuutigigaatit!
ERINARSUUT 5 Guutip suliai tupinnangaartut
^ imm. 5 Qatanngutit ilaasa Jehovamit asaneqarsinnaanertik upperiuminaatsittarpaat. Sooq qularinngissinnaavarput Jehovap inuttut ataasiakkaatut asagaatigut? Tamannalu qularilissagaluarutsigu qanoq iliorsinnaavugut? Apeqqutit taakku allaaserisami matumani sammineqassapput.
^ imm. 2 Atit ilaat allanngortitaapput.
^ imm. 67 ASSIMI MALUGISASSAT: Paulusi kristumiunngunngikkallarami kristumiut parnaarussaatittarsimavai. Jiisusilli imminut iliuuserisimasai akuerigamigit allanngorpoq kristumioqatinilu qiimmassartalerlugit. Taakku ilaat malersugarisimasaasa ilaqutarisimassagunarpaat.