1-2. Jiisusip naggam­mik oqaaseqan­ngin­nerani pisut oqalut­tuarik­kit.

UKIUMI 33-mi nisanip 14-ian­ni Jiisusi eq­qun­ngitsumik un­nerluus­saal­lunilu eq­qar­tuus­saavoq. Aam­ma il­laruaatigineqar­poq, peq­qar­niitsumik pineqar­poq nap­pak­kamul­lu an­niar­titaaf­fim­mut as­sam­migut isik­kamigul­lu kikiat­tor­neqarluni. Anersaar­toraangami oqaluk­kaangamilu an­niangaar­tar­poq. Pingaaruteqar­tunil­li oqaasis­saqarami oqalut­tariaqar­poq.

² Jiisusip nap­pak­kami an­niar­titaaf­fim­mi toqulerluni oqaasii taak­kulu qanoq ilin­niarfigisin­naagigut sam­meriar­tigit – tas­sa ‘tusaariar­tigit’. – Matt 17:5.

3. Jiisusip kik­kut pigunar­pai ima oqarami: “Ataataq, isumak­keerfigik­kit.”

³ Jiisusi qanoq oqarpa? Nap­pak­kamut kikiat­tor­neqareerluni Jiisusi ima qinuvoq: “Ataataq, isumak­keerfigik­kit.” Kik­kut pivai? Oqaasiinit tul­liut­tunit taman­na paasivar­put, imami oqar­poq: ‘Suliar­tik naluaat.’ (Luk 23:33, 34) Ilimanar­poq Romamiut sak­kutuui as­sam­migut isik­kamigul­lu im­minik kikiat­tuisut Jiisusip pigai. Sak­kutuut taak­kua Jiisusi kinar­piaanersoq naluaat. Aam­ma inup­pas­suit toqutaanis­saminik piumasaqar­tut ilaat kingusin­nerusuk­kul­li up­per­tun­ngor­tut pisimasin­naavai. (ApS 2:36-38) Jiisusi naaper­tuil­luan­ngitsuliorfigineqar­nini pis­sutigalugu narrutsas­simaaler­nanilu  kamalin­ngilaq. (1 Petr 2:23) Akerlianil­li Jehova qin­nuigaa im­minik toqutsilersut isumak­keerfigeq­qul­lugit.

4. Jiisusip akerlilersor­timinik isumak­keerfigin­neriaan­naanera qanoq ilin­niarfigaar­put?

⁴ Jiisusip oqaasii qanoq ilin­niar­figisin­naavagut? Jiisusi ilaarlugu al­lanik isumak­keerfigin­neriaan­naasariaqar­pugut. (Kol 3:13) Inuit ilaasa, im­maqa ilaqut­tat­ta, up­perisar­put inooriaaser­pul­lu paasisin­naan­ngin­namik­kit akerlilersor­paatigut. Im­maqa sal­luliuutigaatigut, al­lat isigitil­lugit nikanarsar­paatigut, Biibililersaarutaatigut aseror­ter­paat al­laal­luun­niit nakuuserfiginiarluta sioorasaarluta. Narrutsas­simaaler­natali akerlilersor­tigut ilumoor­tumik paasin­nis­sin­naanias­sam­mata Jehova qin­nuigisin­naavar­put taak­ku ikioq­qul­lugit. (Matt 5:44, 45) Ilaan­nik­kut, ingam­mik ajorluin­nar­tumik pineqarsimagut­ta, isumak­keerfigin­nin­nis­saq saper­nar­tis­sin­naavar­put. Narrutsas­simaalerut­tali kamalerlutalu im­minut ajoqusiin­nas­saagut. Qatan­ngut ar­naq ima nas­suiaavoq: “Paasivara isumak­keerfigin­nin­neq ajor­tumik pineqar­nermik iluarin­nin­nerun­ngitsoq akuerin­nin­nerun­ngitsorluun­niit. Narrutsas­simaniar­nanili aalajanger­neruvoq.” (Tuss 37:8) Isumak­keerfigin­nin­niarluta aalajangeraangat­ta ajor­tumik pineqar­ner­put pis­sutigalugu narrutsas­simaar­niar­nata aalajanger­tar­pugut. – Ef 4:31, 32.

5. Jiisusip pinerlut­toq sanimini nivingasoq qanoq neriorsor­paa, aam­ma sooq taamaalior­pa?

⁵ Jiisusi qanoq oqarpa? Pinerlut­tut marluk Jiisusip saniani nap­pak­kani an­niar­titaaf­fin­ni kikiat­tugaasut aal­laq­qaam­mut Jiisusimik mitaatigin­neqataap­put. (Matt 27:44) Kingusin­nerusuk­kul­li aap­paata Jiisusi ajor­tuliorsiman­ngitsoq paasigamiuk taamaaliorun­naar­poq. (Luk 23:40, 41) Aam­ma Jiisusip toqusunit makititaanis­saanik siunis­samilu kun­ngin­ngorumaar­neranik up­perin­nin­nini ima oqarluni ersersip­paa: “Jiisusi, naalagaaf­fin­nut piguit eq­qaaginga.” (Luk 23:42) Ila up­persusia! Jiisusil­lu ima akivaa: “Paratiisimeeqatigiumaar­parma.” (Luk 23:43) Malugiuk Jiisusip pinerlut­toq toq­qarlugu neriorsoraa. Jiisusip Ataatani nal­lit­tuisuusoq nalun­ngin­namiuk pinerlut­toq toqulersoq neriuutis­sip­paa. – Tuss 103:8.

6. Jiisusip pinerlut­tumut oqaasii qanoq ilin­niarfigaagut?

⁶ Jiisusip oqaasii qanoq ilin­niar­figisin­naavagut? Jiisusip pis­susimigut Ataatani as­sigeq­qis­saar­paa. (Hebr 1:3) Ajor­tuliagut ilumoorluta peq­qis­simis­sutigigutsigit Jiisusil­lu pil­liutaa tun­ngavigalugu isumak­keerfigineqar­nis­sar­put up­peril­luin­narutsigu Jehovap nal­lit­torlutalu isumak­keerfigerusungaas­savaatigut. (1 Joh 1:7) Ilaasa im­maqa sior­natigut ajor­tuliatik pil­lugit Jehovamit isumak­keerfigineqarsin­naanis­sar­tik up­periuminaatsip­paat. Il­lit ilaan­nik­kut taamatut misigisaruit una eq­qarsaatigiuk: Jiisusip toqun­ngitsiarluni pinerlut­tutut eq­qar­tuun­neqareersoq up­per­tun­ngorlaaq nal­lit­tor­paa. Pal­lorfigin­nit­tut aalajaatsut sapin­ngisamin­nik Jehovap peq­qus­sutaanik maleruaaniarsarisut an­nerusumik taas­suman­nga nal­lit­tor­neqas­san­ngin­ner­pat? – Tuss 51:3; 1 Joh 2:1, 2.

7. Johan­nesi 19:26, 27-milu al­las­simasutut Jiisusi Mariamut Johan­nesimul­lu qanoq oqar­pa, aam­ma sooq?

⁷ Jiisusi qanoq oqarpa? (Johannesi 19:26, 27 atuakkit). Jiisusip anaanami  uil­lar­nerugunar­tup isumas­sor­neqar­nis­saa qulak­keerusup­paa. Nalun­ngilaa qatan­ngutimi anaanar­tik timik­kut isumagisin­naas­sagunaraat. Kial­li anersaak­kut pisariaqar­titaanik isumagis­savaa? Qatan­ngutai suli ajoqersugan­ngorsimagunan­ngil­lat. Johan­nesili apustiliuvoq aalajaatsoq, Jiisusil­lu ikin­ngutiginer­paasaasa ilagaat. Jiisusip up­peqatini anersaak­kut ilaqut­tamisut isigai. (Matt 12:46-50) Anaananilu asagamiuk nalun­ngin­namiul­lu Johan­nesimit isumagil­luar­neqas­sasoq taas­sumun­nga isumageq­quaa. Anaanaminut ima oqar­poq: “Aajuna er­nerit.” Johan­nesimul­lu ima oqar­poq: “Aajuna anaanat.” Taamanimiil­li Johan­nesi Mariamut er­nerusutut iler­poq taan­nalu anaanamisut  isumagilerlugu. Jiisusip inun­ngoramili ar­naq asan­nil­luni im­minik isumagin­nis­simasoq maan­nalu toquler­nermini eq­qaminiit­toq asan­nit­tuliorfigingaar­paa!

8. Jiisusip Mariamut Johan­nesimul­lu oqaasii qanoq ilin­niarfigaagut?

⁸ Jiisusip oqaasii qanoq ilin­niar­figisin­naavagut? Up­peqatigut ilaqut­tatsin­nit qanin­nerusin­naavagut. Imaas­sin­naavoq ilaqut­tat­ta akerlilersoraatigut al­laal­luun­niit alaraatigut, Jiisusil­li neriorsor­paatigut Jehova peqatigiis­sor­taalu at­tavigiuarutsigit an­naasat­ta ‘100-riaataanik’ pis­sarsis­sasugut. Up­peqater­pas­suagut uagutsin­nut er­ner­tut, panit­tut, anaanatut ataatatul­luun­niit ilis­sap­put. (Mark 10:29, 30) Up­per­neq, Jehovamik asan­nin­neq asaqatigiin­nerlu pis­sutigalugit anersaak­kut ilaqutariin­nut ataasioqatigiit­tunut ilaagavit qanoq misigivit? – Kol 3:14; 1 Petr 2:17.

9. Jiisusip oqaasiinit Mat­thæusi 27:46-mi al­las­simasunit suut paasivagut?

⁹ Jiisusi qanoq oqarpa? Jiisusi toqulerluni ima suaar­poq: “Guutiga, Guutiga! Sooq qimap­pinga?” (Matt 27:46) Jiisusip taamatut oqar­neranut pis­sutaasoq Biibilimi nas­suiar­neqan­ngilaq. Oqaatsil­li taak­ku qanoq ilin­niarfigisin­naavagut? Jiisusip taamatut oqarami siulit­tuut Tus­siaat 22:2-mi al­las­simasoq eq­quutitip­paa. * Aam­ma oqaatsinit taak­kunan­nga erseq­qip­poq Jehovap er­nini ilaan­nik­kut ser­nis­sor­neq ajoraa. (Job 1:10) Jiisusip paasivaa al­laat toqus­si tikil­lugu up­per­nik­kut tamak­kiisumik misilin­neqar­nini Ataatami akuerisimagaa. Inuk kinaluun­niit taama sak­kor­tutigisumik misilin­neqar­nikuun­ngisaan­nar­poq. Aam­mami oqaatsinit taak­kunan­nga erser­poq pisuus­suteqan­ngin­nami toqusus­saan­ngik­kaluar­toq.

10. Jiisusip Ataataminut oqaasii qanoq ilin­niarfigaagut?

¹⁰ Jiisusip oqaasii qanoq ilin­niar­figisin­naavagut? Ilik­kar­par­put up­per­nik­kut misilin­neqaraangat­ta ilimagisas­san­ngik­kip­put Jehovap tamatigut ser­nis­sus­sagaatigut. Uagut Jiisusi ilaarlugu al­laat toqu tikil­lugu aalajaat­tariaqar­pugut. (Matt 16:24, 25) Neriorsor­neqar­pugul­li ar­tuk­katsin­nik misilin­neqar­nis­sar­put Guutip akuerinavian­ngik­kaa. (1 Kor 10:13) Aam­ma ilik­kar­par­put Jiisusip pineqar­neratut pisuus­suteqan­ngik­kaluarluta naal­liutsitaasin­naasugut. (1 Petr 2:19, 20) Imaan­ngilaq ajor­tuliorsimagat­ta akerlilersor­neqar­tugut, taamatul­li pineqar­tar­pugut silarsuarmut ilaan­ngin­nat­ta ilumoor­torlu oqaluus­sis­sutigisaratsigu. (Joh 17:14; 1 Petr 4:15, 16) Jiisusip paasivaa naal­liun­nini sooq Jehovamit akuerineqar­toq. Kif­far­tor­tul­li aalajaatsut al­lat ilaasa misilin­neqar­til­lutik apeq­qutigisar­paat taamatut nalaataqar­ner­tik sooq Jehovap akuerineraa. (Hab 1:3) Guutit­ta nal­lit­tuil­lunilu kamagit­tar­tuusup nalun­ngilaa taamatut aperisut up­per­nikitsuun­ngitsut, im­minil­li tup­pal­lersar­neqar­nis­sar­tik pisariaqar­tik­kaat. – 2 Kor 1:3, 4.

11. Sooq Johan­nesi 19:28-mi al­las­simasutut Jiisusi oqar­pa?

¹¹ Jiisusi qanoq oqarpa? (Johannesi 19:28 atuaruk). Sooq Jiisusi imerusun­nerar­pa? ‘Al­lak­kat eq­quuteq­qul­lugit’ – tas­sa Tus­siaat 22:16-imi al­las­simasut uku eq­quuteq­qul­lugit: “Marraminer­tut paner­poq qilaara, oqara nipeq­qavoq ik­kin­nut.”  Aam­ma nap­pak­kamut an­niar­titaaf­fim­mut nivin­ngar­neqar­nis­sami tungaanut naal­liungaarsimagami imerusungaarsimas­saaq. Imis­sagunilu ikior­neqar­tariaqar­poq.

12. Jiisusip imerusun­nerar­nera qanoq ilin­niarfigaar­put?

¹² Jiisusip oqaasii qanoq ilin­niar­figisin­naavagut? Jiisusip pisariaqar­titami oqaatiginis­saat tunuarsimaarutigineq ajor­paa, uagut­taaq pisariaqar­titagut oqaatigisas­savagut. Im­maqa inuunit­ta ilarujus­suani ikior­tis­sarsior­neq ileq­qorin­ngilar­put. Ikior­neqar­tariaqalerut­tali ikior­tis­sarsior­nis­saq tunuarsimaarutigis­san­ngilar­put. As­sersuutigalugu utoq­qaligut­ta peq­qiil­liulerut­taluun­niit pisiniar­nialerut­ta nakorsiar­nialerut­taluun­niit ikin­ngutitsin­nut biiliuteq­qusariaqarsin­naas­saagut. Nikal­lungagut­ta utoq­qaaner­tamut ikin­ngum­mul­luun­niit anersaak­kut inersimal­luar­tumut tusar­naaq­qul­lutalu ‘qiim­mas­saq­qusin­naavugut’. (Uss 12:25) Eq­qaamajuk up­peqatit­ta asagaatigut aam­ma “an­nikil­lior­nermi” ikiorusut­taraatigut. (Uss 17:17) Ikior­neqar­tariaqar­ner­pul­li eq­qarsaatigul­lu up­peqatitsin­nut oqaatigin­ngik­kutsigit susin­naanerlutik paasinavian­ngilaat.

13. Jiisusip toqus­si tikil­lugu aalajaat­tuarami suut naam­mas­sivai?

¹³ Jiisusi qanoq oqarpa? Nisanip 14-ian­ni ualik­kut pingasut mis­saani Jiisusi ima oqar­poq: “Naam­mas­sivoq!” (Joh 19:30) Jiisusip inuunermini Jehovap iliuusereq­qusai tamaasa naam­mas­sivai. Toqus­si tikil­lugu aalajaat­tuarami arlalin­nik naam­mas­sisaqar­poq. Siul­ler­tut, up­per­narsar­paa Saatani sal­lutuujusoq. Ersersip­paami inuk naam­mal­luin­nar­toq Saatanimit qanorluun­niit akerlilersor­neqaraluaruni aalajaal­luin­narsin­naasoq. Aap­paat­tut, Jiisusip inuunini uter­titsis­sutitut pil­liutigaa. Taamaaliormat inuit naam­mal­luin­nan­ngitsut Guutip isaani naaper­tuil­luar­tutut naatsorsuun­neqalerlutil­lu naas­saan­ngitsumik inuusin­naaler­put. Pingajuat­tut, Jehovap kisimi oqar­tus­saanerata eq­qor­tuunera up­per­narsarlugulu aq­qa ataq­qinarsisip­paa.

14. Ul­lut tamaasa suna ersersit­tariaqar­par­put? Nas­suiaruk.

¹⁴ Jiisusip oqaasii qanoq ilin­niar­figisin­naavagut? Ul­lut tamarluin­naasa aalajaat­tuar­nis­sar­put aalajangiusimasariaqar­par­put. Qatan­ngutip Maxwel­l Friendip Ilin­niarfim­mi Gileadimi ilin­niar­titsisuusup oqaasii malugik­kit. Ataatsimeersuar­nermi nunanit tamalaanit peqataaf­figineqar­tumi aalajaan­neq pil­lugu oqalugiaam­mi ima oqar­poq: “Ul­lumi oqaatigisin­naasat iliuuserisin­naasal­luun­niit aqagumut kinguar­teqinagu. Naluam­mi aqagu inuus­sanerlutit. Ul­lut tamaasa ersersin­niar­tariaqar­pat naas­saan­ngitsumik inuunis­samut piuk­kun­nar­nerit.” Aalajaat­tuarusun­ner­put ul­lut tamaasa ersersit­tuar­tigu! Taava toqus­sagaluarut­ta makititaanermi ima oqarsin­naas­saagut: “Jehova, sapin­ngisan­nik aalajaat­tuarsimavunga, Saatanip sal­lutuujunera up­per­narsar­para, aam­ma il­lit atit il­ler­narsisil­lugulu kisivit oqar­tus­saaner­pit eq­qor­tuunera up­per­narsar­para.”

15. Lukasi 23:46 naaper­torlugu Jiisusip suna qularin­ngilaa?

¹⁵ Jiisusi qanoq oqarpa? (Lukasi 23:46 atuaruk). Jiisusi tatigin­nil­luin­narluni ima oqar­poq: “Ataataq, anersaara as­san­nut tun­niup­para.” Nalun­ngilaa siunis­sani Jehovamit  aalajanger­neqas­sasoq, qularin­ngilaalu Ataataminit eq­qaamaneqas­sal­luni.

16. Nalunaajaasup 15-inik ukiul­lip misigisaanit suna ilik­kar­piuk?

¹⁶ Jiisusip oqaasii qanoq ilin­niar­figisin­naavagut? Navianar­torsioraluaruil­luun­niit Jehovamut aalajaat­tuarit. Taamaliorsin­naajumal­lutit “uum­matik­kut iluun­ngarlutit” Jehova tatigisariaqar­pat. (Uss 3:5) Joshua, Nalunaajaasoq 15-inik ukiulik perulun­nar­tumik nap­paatilik, sam­meriar­tigu. Katsorsaariaatsit Guutip inatsisaan­nut naaper­tuutin­ngitsut itigar­tip­pai. Toqun­ngitsiar­nermini anaanaminut ima oqar­poq: “Anaana, Jehovap isumagis­savaanga. ... Qular­nanga ima oqarfigis­savak­kit: Nalun­ngilara Jehovap makitik­kumaaraanga. Uum­mam­miuk­ka nalun­ngilai, asangaar­paralu.” * Tamat­ta uku eq­qarsaatigisariaqar­pagut: ‘Up­per­nik­kut misilin­neqarlunga inuunera navianar­torsiuler­pat Jehovamut aalajaat­tuas­saanga? Toqus­sagumalu eq­qaamajumaaraanga up­peraara?’

17-18. Suut ilik­kar­pagut? (Aam­ma takuuk ungalusaq “ Jiisusip oqaasii kingul­liit qanoq ilin­niarfigigigut”).

¹⁷ Jiisusip oqaasii kingul­liit ilin­niarfigingaar­pagut. Eq­qaasin­neqar­pugut inoqatitsin­nik isumak­keerfigin­nit­tariaqar­tugut Jehovamil­lu isumak­keerfigineqar­nis­sar­put up­perisariaqarip­put. Anersaak­kut ilaqut­tagut ikiuerusum­mata qujamasuutigeqaagut, ikior­neqar­tariaqar­ner­pul­li nam­mineq oqaatigisariaqar­par­put. Nalun­ngilar­put qanorluun­niit nalaataqaraluarut­ta piner­tusaarsin­naaq­qul­luta Jehovap ikiorumaaraatigut. Paasivagul­lu aalajaan­nit­ta ul­lut tamaasa ersersin­nis­saa pingaaruteqar­toq toqus­sagaluarut­talu Jehovamit makitin­neqar­nis­sar­put up­peril­luin­nar­tariaqarip­put.

¹⁸ Jiisusip nap­pak­kami an­niar­titaaf­fim­mi toqulerluni oqaasii isumalerujus­suup­put! Ilik­kak­kagut maleruarutsigit Jehovap er­nini pil­lugu oqaasii uku naalas­savagut: “Taan­na tusarsiuk!” – Matt 17:5.