1-2. Uter­titsis­sut suua, aam­ma sooq pisariaqar­tip­par­put?

ADAMI angutaavoq naam­mal­luin­nar­toq. Piaaralunili ajor­tuliorami naas­saan­ngitsumik inuunis­saraluani an­naavaa. Taman­na kinguaavinut qanoq sun­niuteqar­pa? Taak­ku Adamip ajor­tuliaanut pisuus­suteqan­ngik­kaluarlutik toqu kingor­nup­paat. (Rom 5:12, 14) Aniguisin­neqarsin­naap­pal­li? Aap! Adamip ajor­tulior­nerata kingunitsian­ngua Jehovap siulit­tuutigaa qanoq kinguaavi mil­lionil­lit ajor­timit toqumil­lu aniguisis­sanerlugit. (1 Mos 3:15) Jehovap pif­fis­sarititamini er­nini qilam­miit nunamut aal­lar­tip­paa “amerlasuut uter­tin­neqaatis­saat­tut”. – Mark 10:45; Joh 6:51.

² Uter­titsis­sut suugami? Oqaaseq taan­na Grækerisut Al­lak­kani Il­ler­nar­tuni ator­neqaraangat Jiisusip inuunini akiliutigalugu Adamip an­naasaanik uter­titsinera pineqar­tar­poq. (1 Kor 15:22) Sooq pisariaqar­pa? Jehovap naaper­tuil­luar­nera pis­sutigalugu. Israelik­kun­nut inatsisimini Jehovap inuuneq inuunermik naleqar­teq­quaa. (2 Mos 21:23, 24) Adamip inuunini naam­mal­luin­nar­toq an­naavaa. Jiisusil­lu – Guutip naaper­tuil­luar­tuuneranut naaper­tuut­tumik – inuunini naam­mal­luin­nar­toq pil­liutigaa. (Rom 5:17) Taamaalior­nermigut uter­titsis­sum­mik up­perin­nit­tunut tamanut tas­saaler­poq “Naas­saan­ngitsumik Ataataq”. – Es 9:5; Rom 3:23, 24.

3. Johan­nesi 14:31 aam­ma 15:13 naaper­torlugit sooq Jiisusip inuunini kajumil­luni pil­liutigaa?

³ Jiisusip Ataatani qilam­miusoq uagul­lu asangaaramisigut kajumil­luni inuunini pil­liutigaa. (Johannesi 14:31; 15:13 atuakkit). Asan­nin­neq taan­na kajumis­sis­sutigalugu inuunini tamaat aalajaan­nis­sani Ataatamilu piumasaatut ilior­nis­sani aalajangiusimavaa. Tamatuma kingunerisaanik Jehovap aal­laq­qaam­mul­li inun­nut nunarsuarmul­lu siuner­tarisaa  piviusun­ngus­saaq. Al­laaserisami matumani eq­qar­tus­savar­put Jiisusip toqun­ngitsiar­nermini taama naal­liutsiginis­saa sooq Guutip akuerigaa. Aam­ma Biibilimik al­lat­tup ilaata uter­titsis­sum­mik qujamasuutigin­ningaar­tup maligas­siuinera iserfigil­latsias­savar­put. Kiisalu uagut uter­titsis­sum­mik qujamasuutigin­nin­ner­put qanoq ersersis­sin­naanerlutigu sam­mis­savar­put, naggataatigul­lu eq­qar­tus­savar­put pil­liut taan­na qanoq qujamasuutiginerulersin­naagip­put.

4. Jiisusip qanoq toqusimanera nas­suiaruk.

⁴ Jiisusip nunarsuarmi ul­loq kingul­leq inuuf­figisaa takorlooriaruk. Romamiut sak­kutuuinit tigusarineqar­poq peq­qar­niitsumil­lu unatar­neqarluni. Naak in­ngiler­pas­suar­nut ikior­tis­sarsiorsin­naagaluarluni taamaaliun­ngilaq. (Matt 26:52-54; Joh 18:3; 19:1) Iperar­tor­neqarami tunua aagin­nan­ngorluni am­mar­titer­poq. Taamaak­kaluar­torli paak­karut oqimaatsoq nam­mak­kiutsin­neqar­poq. Jiisusip paak­karut taan­na toqutaaf­fis­saminukaal­lugu ilungersoqaluni unialer­paa. Sivitsun­ngitsorli Romamiut sak­kutuuisa angut isigin­naar­tut ilaat pin­ngitsaalil­lugu Jiisusip nam­mataanik nam­matsiler­paat. (Matt 27:32) Toqutaaf­fis­saanut apuuk­kamik Jiisusip isigai as­saalu paak­karum­mut kikiat­tuler­paat. Nap­pak­kamiitil­luni Jiisusip kikiat­tor­neqarfim­migut ikii al­liar­tuin­nar­put. Eq­qaani anaanaa ikin­ngutaalu aliasungaar­put, juutil­li siut­tuisa Jiisusi mitaatigaat. (Luk 23:32-38; Joh 19:25) Jiisusi akun­ner­pas­suit naal­liup­poq. Uum­mataa puaalu ilungersor­nerujar­tor­til­lugit anersaar­tor­nera ajor­narsigalut­tuin­nar­poq. Jiisusip aalajaas­simanini nalun­ngilaa, toqun­ngitsiarlunilu naggam­mik qinuvoq. Taava niaq­quni sikitip­paa aner­ningerlunilu. (Mark 15:37; Luk 23:46; Joh 10:17, 18; 19:30) Jiisusi sivisuumik an­niar­tin­neqareerluni kan­ngunarsaataasumik toqutaavoq.

5. Jiisusip naal­liul­luni toqutaanis­saminiit suna isumakuluutigineruaa?

⁵ Jiisusip naal­liul­luni toqutaasus­saanini ajor­ner­paatut isigin­ngilaa. Guutimil­li mitaatigin­nit­tutut – tas­sa Guutimit taas­sumalu aq­qanik ataq­qin­nin­ngitsutut – eq­qun­ngitsumik un­nerluun­neqarluni toqutaasus­saanini isumakuluutigineruaa. (Matt 26:64-66) Taman­na ar­torsaatigingaaramiuk neriuk­kaluar­poq taamatut kan­ngunarsagaanis­sani Ataatami akueris­san­ngik­kaa. (Matt 26:38, 39, 42) Sooq Jehovap er­nermi asasami naal­liutsitaanis­saa toqutaanis­saalu akueraa? Pis­sutaasut pingasut sam­meriar­tigit.

6. Sooq Jiisusi nap­pak­kamut nivin­ngar­neqar­tariaqarsimava?

⁶ Siul­ler­tut, Jiisusi nap­pak­kamut nivin­ngar­neqar­tariaqar­poq juutit perloq­qusaaneran­niit aniguisik­kumal­lugit. (Gal 3:10, 13) Juutit perloq­qusaap­put Guutip inatsisaanik maleruaaniarlutik neriorsuisimagaluarlutik maleruaan­ngin­namik. Tamatuma saniatigut ajor­ti Adamimiit kingor­nus­simagamik­ku toqusus­saagaluar­put. (Rom 5:12) Guutip Israelik­kun­nut inatsisaani al­las­simavoq inuk ajor­tulior­toq toqumik pil­lar­neqas­sasoq toqoreer­pal­lu timaa nap­pak­kamut nivin­ngar­neqarsin­naasoq. * Aam­ma al­las­simavoq inuk ‘qisum­mut nivin­ngagaasoq Guutimit perloq­qusaasoq’. (5 Mos 21:22, 23; 27:26) Tas­sa Jiisusi nap­pak­kamut nivin­ngar­neqarami juutit perloq­qus­sutis­saraluat im­minerminut tutsip­paa tamatuman­nga aniguisin­naalersil­lugit, Jiisusimil­lu ajat­tuisimagaluarlutik pil­liutaa iluaqutigisin­naaler­paat.

7. Guutip er­nermi naal­liun­nis­saanik akuersineranut pis­sutaasut aap­paat suua?

 ⁷ Aap­paat­tut, Jehovap er­nini palasiuner­tut ilin­niar­tik­kumal­lugu naal­liun­nis­saa akueraa. Jiisusip nam­mineerluni misigivaa sak­kor­tuumik misilin­neqar­nermi Guutimut naalan­nis­saq qanoq saper­nar­tigisoq. Ima ilungersor­tigigami “nil­lingaarluni qul­lilil­lunilu qinuvoq”. ‘Nam­mineq us­ser­neqarlunilu naal­liutsitaasimagami us­ser­neqar­tut ikiorsin­naavai’ pisariaqar­titagul­lu ilisimal­luarlugit. Jehova palasiunermik ‘qajan­nas­sutsitsin­ni taama naak­kigin­nis­sin­naatigisumik’ iver­titsisimam­mat qujamasungaar­pugut. – Hebr 2:17, 18; 4:14-16; 5:7-10.

8. Jiisusip taama naal­liutsiginis­saanik Guutip akuersineranut pis­sutaasut pingajuat suua?

⁸ Pingajuat­tut, Jiisusip taama naal­liutsiginis­saa Jehovap akueraa apeq­qut pingaarutilik una akineqar­nias­sam­mat: Inuk sak­kor­tuumik misilin­neqaruni Jehovamut aalajaas­sin­naava? Saatanip taamaan­ngin­nerar­paa oqarluni inuit nam­minis­sarsior­ner­tik pis­sutigiin­narlugu Guutimut kif­far­tor­tar­tut. Isumaqar­poq taak­ku Adamitul­li Jehova qaman­nga pisumik asan­ngik­kaat. (Job 1:9-11; 2:4, 5) Jehovap er­nermi aalajaan­nis­saa qularin­ngin­namiuk taama sak­kor­tutigisumik misilin­neqar­nis­saa akueraa. Jiisusi aalajaat­tuar­poq Saatanil­lu sal­lutuujunera up­per­narsarlugu.

9. Apustili Johan­nesi qanoq maligas­siuiva?

⁹ Uter­titsis­sut kristumior­pas­suit up­per­neran­nut nakus­satsis­sutaasimavoq. Akerlilersor­neqaraluarlutik oqaluus­siuar­put, as­sigiin­ngitsor­pas­suar­nil­lu misilin­neqaraluarlutik inuuner­tik tamaat piner­tusaarsimap­put. Apustili Johan­nesi as­sersuutigeriar­tigu. Taan­na 100-ngajan­nik ukioqarluni ukiut 60-it mis­saan­ni Kristusi uter­titsis­sul­lu pil­lugit aalajaal­luni oqaluus­sisimavoq. Romamiul­li taan­na navianar­tutut isigigamik­ku qeqer­tami Patmosimi par­naarus­saatip­paat. Sooruna? ‘Guutip oqaasianik Jiisusimil­lu nalunaajaanera’ pis­sutigalugu. (Saqq 1:9) Up­persuseqar­nermut piner­tusaar­nermul­lu maligas­siuil­luangaarami.

10. Johan­nesip uter­titsis­sum­mik qujamasuutigin­nin­nera al­lataani qanoq erser­pa?

¹⁰ Johan­nesip al­latai Jiisusimik asan­ningaar­neranik uter­titsis­sum­mil­lu qujamasuutigin­nin­neranik ersersitsisut Biibilimi atuar­neqarsin­naap­put. Taak­kunani uter­titsis­sut uter­titsis­sutil­lu iluaqutis­sar­tai pil­lugit al­las­simasut 100-nit amerlanerup­put. As­sersuutigalugu Johan­nesi ima al­lap­poq: ‘Ajor­tulior­toqas­sap­pat il­lersor­tis­saqar­pugut Ataatami, tas­sa Jiisusi-Kristusimik iluar­tuusumik.’ (1 Joh 2:1, 2) Aam­ma ‘Jiisusimik nalunaajaanerup’ pingaaruteqas­susia erseq­qis­sar­paa. (Saqq 19:10) Erseq­qip­poq Johan­nesip uter­titsis­sut qujamasuutigingaaraa. Uagum­mi uter­titsis­sum­mik qujamasuutigin­nin­ner­put qanoq ersersis­sin­naavar­put?

11. Us­ser­nar­torsioraangat­ta nak­kaan­nan­ngin­nis­satsin­nut suna iluaqutigisin­naavar­put?

¹¹ Usser­nartor­sioraangavit nakkaan­nar­taqinak. Uter­titsis­sut qujamasuutigigutsigu ima eq­qarsaler­navian­ngilagut: ‘Us­ser­nar­torsior­nin­ni akiuut­tariaqan­ngilanga, ajor­tuliorumami qinunik­kut isumak­keerfigeq­qoriaan­naavunga.’ Akerlianil­li us­ser­nar­torsioraangat­ta ima eq­qarsar­tas­saagut: ‘Qanoq aam­ma! Jehova Jiisusilu uanga pil­lunga iliuuseqar­nikooreer­tigisut nak­kaan­narusun­ngilanga!’ Tamatuma saniatigut us­ser­nar­tumik akiuinitsin­ni  nukis­satsin­nik tuneq­qul­luta Jehova ilungersorluta qin­nuigisin­naavar­put. – Matt 6:13.

12. Siun­nersuut Johan­nesip al­lagai siul­liit 3:16-18 al­las­simasoq qanoq maleruarsin­naavar­put?

¹² Anersaakkut qatan­ngutitit asakkit. Qatan­ngutigut asal­lugit ersersik­kaangatsigu uter­titsis­sum­mik qujamasuutigin­nin­ner­put takutit­tar­par­put. Jiisusim­mi uagut kisit­ta pin­nata qatan­ngutigul­li aam­ma pil­lugit inuunini pil­liutigaa. Tamatumuuna paasivar­put Jiisusip qatan­ngutigut asangaarai. (1 Johannesi 3:16-18 atuakkit). Qatan­ngutitsin­nut pis­susilersor­nitsigut asan­nin­ner­put takutis­sin­naavar­put. (Ef 4:29, 31–5:2) As­sersuutigalugu nap­parsimagaangata sak­kor­tuumil­lu misilin­neqaraangata ikior­tar­pagut, aam­ma pin­ngor­titami ajunaar­nersuaqaraangat. Qatan­ngutit­tali ajual­latsip­patigut qanoq ilius­saagut?

13. Sooq isumak­keerfigin­nik­kumasariaqar­pugut?

¹³ Up­peqativit isumak­keerfiginis­saat saper­nar­tit­tar­piuk? (3 Mos 19:18) Taamaap­pat siun­nersuut una maleruaruk: “Kamageqatigiigitsi isumak­keerfigeqatigiit­tarlusilu arlas­sin­nut as­suarliutis­saqaraangas­si. Soorlu Naalak­kap isumak­keerfigigaasi taamatut­taaq ilis­si ilius­saasi.” (Kol 3:13) Qatan­ngutigut isumak­keerfigigaangatsigit uter­titsis­sum­mik ilumut qujamasuutigin­nin­ner­put Ataatatsin­nut qilam­miusumut takutit­tar­par­put. Uter­titsis­sul­li qanoq qujamasuutiginerulersin­naavar­put?

14. Uter­titsis­sut ilaatigut qanoq qujamasuutiginerulersin­naavar­put?

¹⁴ Jehova qujaffigisaruk. Joan­na, qatan­ngut 83-inik ukiulik Indiamilu najugalik, ima oqar­poq: “Uter­titsis­sutip ul­lut tamaasa Jehovamut qujas­sutigisar­nis­saa pingaaruteqarsorivara.” Il­lit qinugaangavit ul­lup ingerlanerani kuk­kus­sutitit pil­lugit Jehovamut oqalut­tuar­tarit isumak­keerfigeq­qul­lutil­lu. Soorunami ingasat­tumik ajor­tuliorsimaguit utoq­qaaner­tanit ikior­neqar­tariaqas­saatit. Taak­kua tusar­naas­savaatsit Biibililu tun­ngavigalugu asan­nit­tumik siun­nersorlutit. Jehovamut at­taveqarluaq­qilersin­naanias­sagavit qinoqatigalutit Jehova kimigiiserfigis­savaat isumak­keerfigeq­qul­lutit. – Jaak 5:14-16.

15. Sooq uter­titsis­sut pil­lugu atuar­nis­sar­put eq­qarsaatigin­neq­qis­saar­nis­sar­pul­lu pif­fis­saqarfigisariaqar­pagut?

¹⁵ Utertitsissut eqqar­saatigeq­qis­saar­taruk. Rajamani, qatan­ngut ar­naq 73-inik ukiulik, ima oqar­poq: “Jiisusip naal­lius­simanera atuaraangak­ku isik­ka im­mat­tar­put.” Il­lit­taaq  Jiisusip taama an­niar­tigisimanera eq­qarsaatigigaangak­ku taama misigisas­sagunar­putit. Uter­titsis­sum­mil­li eq­qarsaatigin­neq­qis­saaraangat­ta Jiisusi Jehovalu asaneruler­tar­pagut. Taman­na kajumis­sis­sutigalugu uter­titsis­sut pil­lugu nam­mineq atuaq­qis­saarsin­naavit?

16. Uter­titsis­sum­mik ilin­niar­titsiner­put qanoq iluaqutigisar­par­put? (Saq­qaani as­siliaq takuuk).

¹⁶ Allanik ilinniartitsigit. Uter­titsis­sut oqaluus­sis­sutigigaangatsigu qujamasuutigineruler­tar­par­put. Jiisusip uagut pil­luta toqusariaqarsimaneranik ilin­niar­titsinermi Biibililersaarutit atorluarsin­naasagut arlaqar­put. As­sersuutigalugu qup­persak­kami Tusagassat nuannersut Guutimeersut!-mi ilin­niagas­saq 4 atorsin­naavar­put. Taan­na ima qulequtaqar­poq: “Jiisusi Kristusi kinaava?” Imaluun­niit atuak­kami Biibilimi sorpiaat ajoqer­suutigineqarpat?-mi kapitali 5 in­nersuus­sutigisin­naavar­put. Taan­na ima qulequtaqar­poq: “Uter­titsis­sut – Guutip tunis­sutaa pingaar­ner­paaq.” Aam­ma Jiisusip toquneranik ukiut tamaasa eq­qaaniaaqataagaangat­ta eq­qaaniaanermul­lu ilungersorluta qaaq­qusigaangat­ta uter­titsis­sum­mik qujamasuutigin­nin­neruler­tar­pugut. Ilumum­mi, Jehovap im­mik­kut pisin­naatitaaf­filer­paatigut er­nini pil­lugu ilin­niar­titsisin­naatil­luta.

17. Sooq uter­titsis­sut Guutip inun­nut tunis­sutaanit tamanit naleqar­ner­paava?

¹⁷ Uter­titsis­sutip qujamasuutigiuar­nis­saanut qujamasun­nit­talu ineriar­tor­tin­nis­saanut pis­sutis­saqarluar­pugut. Uter­titsis­sut pis­sutigalugu suna ajor­narun­naar­nersoq eq­qarsaatigiuk. Naam­mal­luin­nan­ngitsuugaluarluta Jehovamik qanimut ikin­nguteqarsin­naavugut. Diaavulup suliai suujun­naarsin­neqarluin­nas­sap­put. (1 Joh 3:8) Aam­ma nunarsuarmut Jehovap aal­laq­qaam­mul­li siuner­taa naam­mas­sineqas­saaq. Nunarsuaq tamarmi paratiisin­ngus­saaq kik­kul­lu tamarmik Jehova asal­lugu kif­far­torfigis­savaat. Taamaat­tumik qanor­toq Guutip inun­nut tunis­sutaa naleqar­ner­paaq taan­na qujamasuutigiuar­tigu!