ISUMAKULUUTEQANGAAR­NEQ uum­matitsin­nik artorsaatis­siisin­naavoq. (Uss 12:25) Illit isumakuluuteqar­nerit pis­sutigalugu naal­liun­nikuuit? Artorsin­neqar­tutut misiginikuuit? Taamaap­pat kisimiin­ngilatit. Assigiin­ngitsut pis­sutigalugit ilar­pas­suagut qasungaarsimap­put, isumakuluuteqangaarsimap­put nikal­lorujus­suarlutil­luun­niit. Assersuutigalugu ilaasa nap­parsimasoq isumagisariaqarsimavaat, ilaat asasamik toqusoorsimap­put, allallu pin­ngor­titarsuarmi ajunaar­nersuaq pis­sutigalugu naal­lius­simap­put. Isumakuluuteqangaar­ner­put qanoq naam­magalugu atorsin­naavar­put? a

Isumakuluuteqangaar­nerup qanoq naam­magalugu ator­neqarsin­naanera pil­lugu kun­ngi Daavi ilin­niarfigingaarsin­naavar­put. Daavi ajor­nar­torsiuteqangaar­tarsimavoq allaat toqutaangajat­tarsimal­luni. (Sam 1. 17:34, 35; 18:10, 11) Daavip isumakuluuteqangaar­nini qanoq naam­magalugu atorsimavaa? Qanorlu ilaarsin­naavar­put?

Daavi ataatsik­kut arlalin­nik ajor­nar­torsiuteqar­poq. Kun­ngimit Saulimit qimaatil­luni misigisimasaa sam­meriar­tigu. Daavi sak­kutuunilu sorsoreerlutik angerlaramik tupas­sutigisamin­nik paasivaat pigisatik akeq­qanit til­lin­neqarsimasut, illutik ikual­lan­neqarsimasut ilaqut­tatillu aal­larus­saasimasut. Daavi qanoq qisuariar­pa? “Daavi angutitaalu nipituumik qis­saser­put, qiajuar­pullu qias­saarutserlutik.” Daavillu sak­kutuumi “ujaq­qanik mil­loorumal­luni sioorasaarman­ni” isumakulun­nerulis­sutigaa. (Sam 1. 30:1-6) Daavip ataatsik­kut isumakuluutigingaagai pingasuup­put: Ilaqutai navianar­torsior­put, sak­kutuuminit toqun­niar­neqarsorivoq, kun­ngimillu Saulimit suli malersor­neqar­poq. Daavi isumakulungaarsimas­saaq!

Daavi sua? Ingerlaan­naq “Guutimigut pis­satsitaavoq”. Qanoq? Nalun­ngilar­put Daavi Jehovamut ikioq­qul­luni qinusar­toq Jehovamillu qanoq ikior­neqar­tarsimanini eqqarsaatigisaraa. (Sam 1. 17:37; Tuss 18:3, 7) Aamma nalun­ngin­namiuk Jehovamit siulersor­neqar­nis­sani pisariaqar­til­lugu qanoq ilius­sanerluni Jehova aperaa. Jehovamit akineqarami ingerlaan­naq iliuuseqar­poq. Taamaat­tumillu sak­kutuunilu Jehovamit pil­luaq­quneqarlutillu ilaqut­tatik pigisatillu annaap­paat. (Sam 1. 30:7-9, 18, 19) Daavip iliuuserisimasai pingasut maluginiar­pigit? Jehovamut ikioq­qul­luni qinuvoq, Jehovamit ikior­neqar­tarsimanini eqqarsaatigai Jehovallu siulersuinera naaper­torlugu iliuuseqarluni. Taak­kunatigut pingasutigut Daavi qanoq ilaarsin­naavar­put?

1. Qinusarit. Isumakuluuteqaleraangatta Jehovamut ikioq­qul­luta ilisimas­suseqaleq­qul­lutalu qinusin­naasar­pugut. Isumakuluutigut tamaasa qinunik­kut aniatik­kutsigit iluaal­las­saagut. Imaluun­niit pisariaqar­titsif­figisatsinni taamaaliorsin­naan­ngik­kutta naatsumik nipeqan­ngitsumillu qinusin­naavugut. Jehovamut ikioq­qugaangatta Daavi ima oqar­toq ilaar­tar­par­put: “Naalagaq tassa qaarsora, pal­lit­taalisara, aniguisitsisiga, Guutiga, qaq­qara qimar­nguf­figa.” (Tuss 18:3) Qinuneq ilumut iluaqutaasar­pa? Qatan­ngut arnaq pioneriusoq Kahliamik atilik ima oqar­poq: “Qinoreeraangama eqqis­sisar­punga. Qinuneq iluaqutigalugu Jehovap eqqarsar­taasiatut eqqarsar­taaseqar­nerulerlungalu taanna tatigineruler­tar­para.” Qinuneq isumakuluuteqar­nitsinni iluaqutigisin­naagatsigu Jehovamit tunis­sutaavoq erlin­nar­toq.

 2. Jehovamit ikiorneqar­tar­simanerit eqqar­saatigisaruk. Jehovap ikiuineratiguin­naq piner­tusaarfigisimasin­naasan­nik ajor­nar­torsiuteqar­nikuuit? Jehovamit ikior­neqar­tarsimaner­put itsarlu kif­fani qanoq ikior­tarsimagai eqqarsaatigigaangatsigit eqqis­sisimanerul­lutalu Jehova tatigineruler­tar­par­put. (Tuss 18:18-20) Utoq­qaaner­taq Joshuamik atilik ima oqar­poq: “Qin­nutikka akineqarsimasut allat­tar­pakka. Taamaalior­tarama Jehovamut aalajangersimasut pil­lugit qin­nutigisimasama akineqar­tar­neri eqqaamanerusin­naasar­pakka.” Aap, Jehovamit ikior­neqar­tar­ner­put eqqarsaatigigaangatsigu isumakuluuteqangaar­nerup akior­nis­saanut nukis­saqar­neruler­tar­pugut.

3. Iliuuseqartarit. Siulersor­tik­kumal­luta iliuuseqan­ngin­nitsinni Guutip oqaasia misis­suif­figisin­naavar­put. (Tuss 19:8, 12) Amerlasuut allas­simaf­fik aalajangersimasoq misis­soq­qis­saaraangamikku allas­simaf­fik inuunerminni qanoq atorsin­naanerlugu paasinerusar­paat. Utoq­qaaner­taq Jarrodimik atilik ima oqar­poq: “Allas­simaf­fik misis­soq­qis­saaraangakku paasinerusarlugulu Jehovap qanoq oqarfiginiar­neraanga paasisar­para. Taamaalioraangama atuak­kakka upperineruler­tar­pakka aamma Jehovap siulersuinera naaper­torlugu iliuuseqar­nerusin­naaler­tarlunga.” Jehovap siulersuinera Biibilimi misis­soraangatsigu taman­nalu naaper­torlugu iliuuseqaraangatta isumakuluuteqangaar­neq naam­magalugu atorsin­naasar­par­put.

Daavip nalun­ngilaa isumakuluuteqangaar­nermini piner­tusaarsin­naas­saguni Jehovamit ikior­neqar­tariaqarluni. Jehovap ikiuinera qujamasuutigingaaramiuk ima oqar­poq: ‘Guutima ikiuineragut qarmaliat qulaal­lugit pis­sip­punga. Guuti tas­saavoq pis­saanermik sak­kuliisiga.’ (Tuss 18:30, 33) Misilin­neqar­nigut uagutsin­nut qarmarsuar­tut qaangersin­naan­ngisatsitut issin­naap­put. Jehovalli ikiuineratigut misilin­neqar­nitsinni qanorluun­niit ittuni piner­tusaarsin­naavugut. Jehovamut ikioq­qul­luta qinugaangatta, taas­suman­nga ikior­neqar­tar­ner­put eqqarsaatigigaangatsigu siulersuineralu naaper­torlugu iliuuseqaraangatta upperil­luin­narsin­naasar­par­put isumakuluuteqangaar­ner­put naam­magalugu atorsin­naanias­sagatsigu Jehovap nukis­saqar­til­lutalu ilisimas­suseqar­tis­sagaatigut.