1. Suna upperil­luinnarparput?

 JEHOVAMIK NALUNAAJAASUUSUGUT nalunngilarput Jehovap asagaatigut pitsaanerpaamillu inuuneqas­sasugut kissaatigigaa. (Rom 8:35-39) Aamma upperaarput najoqqutassiat Biibilimeersut maleruarneri iluaqutaajuaannartut. (Es 48:17, 18) Ajornar­torsiuleruttali qanoq iliussaagut?

2. Qanoq ajornar­torsior­tarsinnaavugut, qanorlu ajornar­torsiorutta eqqarsalersin­naavugut?

² Jehovap kiffai tamarmik ajornar­torsiortarput. Assersuutigalugu ilaquttatsinnit arlaatigut pakatsisin­neqarsin­naavugut. Aamma Jehovamut kiffartor­nitsinnut killiliisumik ilungersunartumik peqqiil­liuuteqarsin­naavugut. Pinngortitami ajunaar­nersuaqarnera pissutigalugu ajornar­torsiulersin­naavugut. Imaluunniit upperisarput pillugu malersugaalersin­naavugut. Taamatut ajornar­torsiortut immaqa ima eqqarsalertarput: ‘Sooq uangarpiaq? Arlaatigut ajortuliorama? Tassa imaappa Jehovap pilluaq­qunngikkaanga?’ Taama eqqarsar­tarnikuuit? Taamaappat nikalloqinak. Jehovap kiffai aalajaatsorpassuit assingusunik ilittulli eqqarsarlutillu misigisarput. – Tuss 22:2, 3; Hab 1:2, 3.

3. Tussiaat 34:20 qanoq ilinniarfigisin­naavarput?

 ³ Tussiaat 34:20 atuaruk. Tussiaat tamanna marlutsigut ilinniarfigaarput: (1) Iluartoq, tassa naapertuil­luartoq, ajornar­torsiortarpoq. (2) Jehovap ajornar­torsior­nitsinni annaattarpaatigut. Qanoq? Ilaatigut atukkatsinnut piviusorsiortumik isiginnit­taaseqar­nissamut ikiorluta. Jehovap neriorsoramisigut kiffartornerput nuannaarutigis­sagipput oqanngilaq maanna ajornar­torsiuteqan­ngivissasugut. (Es 66:14) Kajumis­saarpaatigut siunissaq, kissaatigisamisut naassaan­ngitsumik inuuler­nissarput, eqqarsaatiginerus­sagipput. (Kor 2. 4:16-18) Utaqqinitsinni ullut tamaasa kiffartorsin­naaqqulluta ikiortuarpaatigut. – Upp 3:22-24.

4. Allaaserisami matumani suna sammissavarput?

⁴ Biibilip nalaani nalitsinnilu Jehovap kiffai aalajaatsut qanoq ilinniarfigisin­naagigut sammeriartigu. Eqqartoreerparput ilimagin­ngisatsinnik ajornar­torsiulersin­naasugut. Jehovap tatigin­nitsini ikiortuarpai. (Tuss 55:23) Oqaluttuat tamakkua sammineranni uku eqqarsaatigikkit: ‘Assingusumik atugaqaraluaruma qanoq qisuarias­sagaluarpunga? Taakku qanoq Jehovamik tatigin­ninnerulis­sutigaakka? Taakkua ilaat sorleq qanoq ilaarsin­naavara?’

5. Labani pissutigalugu Jaaku qanoq ajornar­torsiortarpa? (Saqqaani assiliaq takuuk).

⁵ Biibilip nalaani Jehovamut kiffartortut ilimagin­ngisaminnik ajornar­torsiuteqalertarput. Jaaku assersuutigeriartigu. Ataataminit oqarfigineqarpoq eqqarlimi Jehovamut uppertup Labanip paniata ilaat nuliartaariguniuk Jehovamit pilluaq­quneqangaassasoq. (Mos 1. 28:1-4) Jaaku naalalluni Labanikkut nunaannut aallarami Labanip pania Lea nukaalu Rakeli naapippai. Jaaku Rakelimut asannilersoorpoq, Labanillu kissaatigaa Jaakup ukiuni arfineq-marlunni sulissuteq­qaassagaani katissaguniuk. (Mos 1. 29:18) Ilimagisaatulli pisoqanngilaq. Labanip Jaaku uukapaatillugu Leamut katitippaa. Labanilu Jaakumut oqarpoq sapaatip-akunnera ataaseq qaangiuppat Rakeli nuliartaarissagaa aatsaalli ukiuni suli arfineq-marlunni sullinniarluni neriorsuippat. (Mos 1. 29:25-27) Labanip aamma niuernikkut Jaaku naapertuil­luanngitsuliorfigisarpaa. Tassa ukiuni 20-ni Labanip Jaaku ajortumik pisarpaa. – Mos 1. 31:41, 42.

6. Jaaku allatigut qanoq ajornar­torsiorpa?

⁶ Jaaku allatigut aamma ajornar­torsiortarpoq. Meerarpas­suaqarpoq. Ernerili eqqisseqatigiit­tuaannan­ngillat. Allaammi qatanngutertik Juuserfi inussiassatut tunivaat. Ernerilu marluk Simmiuut Levilu ilaqutaasunut Jehovallu aqqanut kanngunarsaataasumik iliuuseqarput. Aamma Jaakup nulia Rakeli asangaagaa toquvoq aappassaanik ernertaar­nermini. Kaannersuaqarneralu pissutigalugu Jaaku utoqqaalluni Egyptenimut nuuttariaqarpoq. – Mos 1. 34:30; 35:16-19; 37:28; 45:9-11, 28.

7. Jehovap Jaakumik iluarin­ninnini qanoq ersersittarpaa?

⁷ Jaakup ajornar­torsior­taraluarluni Jehova taassumalu neriorsuutai upperiuaannarpai. Jehovallu Jaakumik iluarin­ninnini takutittarpaa. Assersuutigalugu Jaaku Labanimit uukapaatin­neqartaraluarluni Jehovamit pigisatigut pilluaq­qusaavoq. Eqqarsaatigiuk Jaaku Jehovamut qanoq qujamasutsigisimas­sanersoq ernini toqusimasorisani Juuserfi takoqqikkamiuk. Jaakup ajornar­torsioraangami Jehovamik qanimut ikinnguteqarnini pinertusaar­nissaminut iluaqutigisarpaa.  (Mos 1. 30:43; 32:10, 11; 46:28-30) Jehova qanimut ikinngutigiuarutsigu uaguttaaq ilimagin­ngisatsinnik ajornar­torsioraangatta pinertusaarsin­naasassaagut.

8. Kunngip Daavip suna neriuutigaa?

⁸ Kunngip Daavip Jehovamut kiffartor­nermini iliuusererusutani tamaasa iliuuserisin­naanngilai. Assersuutigalugu Jehova guutisiorfiliuuk­kusungaarpaa. Tamannalu pruffiitimut Naatamut oqaatigimmagu taassuma ima akivaa: “Qaa, pilersaarutitit tamaasa naammas­siniarniakkit Guutip najormatit.” (Nal 1. 17:1, 2) Tamanna nuannaarutigisimassaqaa. Immaqalu sanaartornissaa ingerlaannaq pilersaarusiulerpaa.

9. Daavi pakatsinartumik kalerrin­neqarami qanoq qisuariarpa?

⁹ “Unnuamili tassani” Jehovap Naatat oqarfigaa Daavi pinnani taassuma ernerisa ilaata guutisiorfiliuutis­sagaani. (Nal 1. 17:3, 4, 11, 12) Daavip taamatut nikallor­nartumik kalerrin­neqarami Jehovap piumasaa eqqarsaatigineruaa. Taamaattumik aningaasat atortussallu allat guutisiorfiliornermi ernermi atugassai katersulerpai. – Nal 1. 29:1-5.

10. Jehovap qanoq Daavi pilluaqquaa?

¹⁰ Jehovap Daavi guutisiorfiliuutis­sanngikkaani oqarfigeriarlugu ingerlaannaq isumaqatigiis­suteqarfigaa. Daavi neriorsorpaa kinguaavisa ilaat naassaan­ngitsumik kunngiussasoq. (Sam 2. 7:16) Takorlooruk Daavi paratiisimi qanoq nuannaar­tigissasoq paasiguniuk kinguaami ilaat Jiisusi ukiuni 1.000-ni naalakkersuisoq. Immaqa Jehovamut kiffartor­nitsinni iliuusererusutatsitut iliuuseqar­tuaannarsin­naanngik­kaluarluta aamma uagut Jehovap ilimagin­ngisatsinnik siunissami pilluaq­qussagaatigut takorloorsin­naavarput.

11. Kristumiut siulliit Guutip kunngeqarfia ilimagisamittut suli tikiutin­ngikkaluartoq qanoq pilluaq­quneqarpat? (Apustilit Suliaat 6:7)

¹¹ Kristumiut siulliit Guutip kunngeqarfiata tikiunnissaa ilimasuutigigaluarlugu qaqugorpiaq tikiunnissaa naluaat. (ApS 1:6, 7) Utaqqinerminni sulerippat? Oqaluussineq ulapputigaat. Oqaluus­sinerujar­tortillutik takusin­naajartorpaat Jehovap suliartik pilluaq­qusaraa. – Apustilit Suliaat 6:7 atuaruk.

12. Kristumiut siulliit kaannersuaqarnerani suppat?

¹² Ilaanni nunarsuarmi ‘tamarmi sualuttumik kaannersuaqalerpoq’. (ApS 11:28) Tamannalu kristumiut siulliit aamma malugaat. Nerisas­saaleqinerujussuaq taakkununnga qanoq sunniuteqartoq takorloorsin­naaviuk? Ilaqutariinni ittuusut ilaquttaminnik pilersuiniarnertik isumakuluutigisarsimassavaat. Aamma inuusun­nerusut kiffartor­nerminni iliuuseqar­neruniarlutik pilersaaruteqartut pilersaarutitik kinguar­tiinnassavaat? Kristumiulli pissutsinut naleqqus­saannarput. Pisinnaasatik naapertorlugit oqaluus­siuarput. Kajumil­lutillu pigisaminnik uppeqatitik Judiiamiittut avitseqatigaat. – ApS 11:29, 30.

13. Kaannersuaqarnerani kristumiut Jehovamit qanoq pilluaq­quneqarpat?

¹³ Kaannersuaqarnerani kristumiut siulliit qanoq pilluaq­quneqarpat? Ikiuiniarnermi ikiorneqartut Jehovap pilluaq­qusinera malugaat. (Mat 6:31-33) Uppeqatitik ikiuisut qaninnerulersimassavaat. Tunissuteqartullu allatigul­luunniit avitseqatigiittut tunisinerup pilluarnartua misigisimassavaat. (ApS 20:35) Kristumiut pissutsinut naleqqus­saramik Jehovamit pilluaq­quneqarput.

14. Barnaba apustili Paulusilu qanoq nalaataqarpat, tamannalu qanoq kinguneqarpa? (Apustilit Suliaat 14:21, 22)

¹⁴ Kristumiut siulliit malersugaasarput  ilaannikkullu inunnit ilimagin­ngisaminnit malersor­neqartarlutik. Barnabap apustilillu Paulusip Lystrami oqaluus­sinerminni nalaataat sammeriartigit. Inunnit tusarnaarusuttunit tikilluaq­qusaangaarput. Kingusin­nerusukkut inuppassuit akerlilersuisunit “kamassaar­neqaramik” Paulusi toqunniaraluarlugu ujaqqanik milloorpaat. (ApS 14:19) Kinguninngua allamut oqaluus­siartorlutik aallarput. Qanoq kinguneqartumik? ‘Amerlasuunik ilinniar­titanngor­titaqarput’. Barnabap Paulusillu oqaasii maligas­siuinerallu uppeqataasa nakussatsis­sutigaat. (Apustilit Suliaat 14:21, 22 atuakkit). Malersugaagaluarlutik oqaluus­sinertik unitsin­ngimmassuk amerlasuut iluaqutigaat. Jehovap suliareqqusaa unitsin­ngikkutsigu pilluaq­qusaassaagut.

15. Qatanngut A. H. Macmillan qanoq ilinniarfigaajuk?

¹⁵ Suli 1914-inngunngitsoq Jehovap innuttaasa qilammukangajalernertik ilimagaat. Qatanngut A. H. Macmillan assersuutigeriartigu. Qatanngutip Macmillanip uppeqaterpas­suarmitulli qilaliangajaliivinnini ilimagaa. 1914-imi septembarimi oqalugiaammini ima oqarpoq: “Ilimanarpoq naggataamik maanna oqalugiartunga.” Taamatulli pisoqanngilaq. Kingusin­nerusukkut ima allappoq: “Immaqaana isummiaarpal­laarsimasugut qilammukangajaliivilluta.” Nangipporlu: “Naalakkamut kiffartorneq ulapputigisus­saavarput.” Qatanngullu Macmillan taamaaliorpoq. Uppeqaterpas­suarminik sakkutuujuman­nginnertik pissutigalugu parnaarus­saaqqasunik qiimmas­saasarpoq. Utoqqan­ngoreeraluarluni aalajaalluni ilagiit ataatsimiin­nerannut najuuttuarpoq. Macmillanip akissarsias­saminik utaqqinermini Jehovamut kiffartornermi ulapissimanini qanoq iluaqutigisimavaa? 1966-imi toqussi qanillisoq ima allappoq: “Aatsaat taama uppertigaanga.” Maligas­saalluangaarami – ingammik ilimagisaminnit sivisunerusumik utaqqisimasunut. – Hebr 13:7.

16. Herbert Jennings nulialu ilimagin­ngisaminnik qanoq ajornar­torsiuteqalerpat? (Jaaku 4:14)

¹⁶ Jehovamut kiffartor­torpassuit ilimagin­ngisaminnik peqqiil­liuuteqalertarput. Assersuutigalugu Herbert Jennings misigisalik­kersaarummini oqaluttuarpoq Ghanami oqaluus­sisartutut aallartitaanertik nuliamilu nuannaarutigingaarsimallugu. b Ilungersunar­tumilli misigis­sutsikkut napparsimalerpoq. Jaaku 4:14 issuarlugu qatanngut Jennings oqarpoq “aqagu qanoq issanersoq” ilisimaneqan­ngitsoq. (Atuaruk). Ima allappoq: “Pissutsit atukkagut paasillualeriaratsigit [katsorsar­tinniassagama] Ghana qanimullu ikinnguterpassuagut qimallugit Canadamut uterniarluta aalajangerpugut.” Qatanngut Jennings nulialu ilungersunar­torsioraluarlutik Jehovap ikiuineratigut kiffartor­nerminni aalajaat­tuarput.

17. Qatanngutip Jenningsip misigisaa uppeqataanut qanoq iluaqutaava?

¹⁷ Qatanngutip Jenningsip misigisalik­kersaarutaa allanut iluaqutaangaarpoq. Qatanngut arnaq ima allappoq: “Misigisalik­kersaarutaa atuarakku aatsaat taama killitsitsigaanga. ... Qatanngutip Jenningsip napparsimalernini pissutigalugu oqaluus­sisartutut aallartitaanini taamaatsit­tariaqaraa atuarakku atukkama allanngor­neranut isiginnit­taatsinnut iluaqutigaara.” Qatanngut angut assingusumik ima allappoq: “Ukiuni qulini ilagiinni utoqqaaner­taareerlunga misigis­sutsikkut napparsimalerama taamatut  kiffartornera unitsit­tariaqalerpara. Iluatsin­ngitsutut misigigama misigisalik­kersaarutit atuaraangakkit nikallor­narisarpakka, qatanngutilli Jenningsip pinertusaarnera atuarakku iluaqutigaara.” Oqaaseqartunit taakkunannga paasivarput ilimagin­ngisatsinnik ajornar­torsior­nitsinni pinertusaaraangatta allat iluaqutigisaraat. Neriuutigisatsitut inuuneqan­ngikkaluarluta uppernikkut pinertusaar­nikkullu maligas­siuisin­naavugut. – Pet 1. 5:9.

18. Assimi ersersin­niarneqartutut uillarneq Nigeriamiu qanoq ilinniarfigaajuk?

¹⁸ Nappaalanersuup COVID-19-ip atuunnera uppeqaterpas­suatsinnut sunniuteqarpoq. Assersuutigalugu uillarneq Nalunaajaasoq Nigeriamiu piitsorujussuuvoq. Ullaat ilaanni qaqorteqqasut amiakkuusut nerileramikkit paniata arni aperivaa ullup sinnerani sutussanerlutik. Arnaata akivaa aningaasaataarukkamik nerisas­saataarul­lutillu uillarneq Zareptamiu ilaarlugu Jehova tatigil­luinnar­tariaqaritsik. (Kng 1. 17:8-16) Suliluunniit ulloqeq­qanngitsoq uppeqataat ikiueqqaar­niutinik nassarlutik iserput nerisassanik sapaatit-akunnerinut marlunnut sinnilinnik pajullutik. Uillarnerup oqaluttuarivaa ullaakkorsiorlutik panimminut oqaatsini Jehovap qanoq tusarnaaq­qissaar­tigisimanerai aatsaat paasilerlugu. Ilimagin­ngisatsinnik inuunitsinni nalaataqaraangatta Jehovamik tatigin­ninnerput taassumunnga qanillis­sutigisarparput. – Pet 1. 5:6, 7.

19. Qatanngut Jersjov qanoq malersugaasimava?

¹⁹ Ukiuni kingullerni Nalunaajaasorpassuit ilimagin­ngisaminnik malersugaapput. Qatanngut angut Aleksej Jersjov Ruslandimiu assersuutigisin­naavarput. 1994-imi imermut morsutsitaammat killeqaraluartumik kiffaan­ngissuseqarput. Tamatuma kingorna  ukiut arlallit ingerlaneranni Ruslandimi pissutsit allanngoriartorput. 2020-mi qatanngutip Jersjovip naalakkersuisuneersunit angerlarsimaffia tamaat misissor­neqarlunilu ujaasif­figineqarpoq, pigisarpas­suisalu ilaat arsaarin­nissutaallutik. Qaammatit arlallit qaangiuttut pinerluttutut unnerluutigineqarpoq. Unnerluussullu tamanna videulianik tunngaveqarpoq. Videuliortorlu tassaasimavoq soqutigin­nittuusaarluni ukioq ataaseq sinnerlugu Biibilimik misissueqatigineqartartoq. Ingasak!

20. Qatanngutip Jersjovip Jehovamut attaveqarnini qanoq nakussatsis­simavaa?

²⁰ Qatanngutip Jersjovip malersugaanini arlaatigut iluaqutigaa? Aap. Jehovamut qaninnerulerpoq. Ima oqaluttuarpoq: “Nuliaralu qinukulasar­nerulerpugut. Paasivara Jehovap ikiorsiman­ngippatigut pinertusaarsimasin­naassan­ngikkaluarlunga.” Imalu nangippoq: “Nammineq Biibilimik misissueq­qissaar­tarnera nikallun­nginnissannut iluaqutigivara. Aamma itsaq Jehovap kiffai aalajaatsut eqqarsaatigeq­qissaar­tarpakka. Eqqissisimaan­narnissap Jehovamillu tatigin­ninnissap pingaaruteqar­nerannik ersersitsisunik Biibilimi oqaluttuarpas­suaqarpoq.”

21. Allaaserisami matumani suna ilikkarparput?

²¹ Allaaserisami matumani suna ilikkarparput? Pissutsini maannakkut atuuttuni ilimagin­ngisatsinnik nalaataqarsin­naavugut. Taamaak­kaluartoq Jehovap tatigin­nitsini ikiortuaannarpai. Allassimaffimmi qulequtarisatsinni ima allassimavoq: “Iluartoq ajunaarnernik amerlasuunik eqqorneqartarpoq, Naalakkalli tamakkunannga tamanit annaattarpaa.” (Tuss 34:20) Qanortoq ajornar­torsiutit pinnagit Jehovalli pissaanera inuuinnar­titsisoq eqqarsaatigiuartigu. Taava apustilitut Paulusitut ima oqarsin­naassaagut: “Guutip pissatsit­tarmanga suulluunniit nukissaqarfigaakka.” – Flp 4:13.