1. Jiisusi tupinnar­tulioqqaarmat pisut oqaluttuarikkit.

 UKIUP 29-p Kr.in.king. naalernerani Jiisusip kiffartornini aallartimmagu qanoq pisoqartoq takorlooruk. Jiisusi, anaanaa Mariia ilinniar­titaasalu ilaat katittorsiornermut qaaqqusaapput. Kaanami, Jiisusip peroriar­torfiata Naazaratsip avannaatungaaniittumi, pivoq. Mariiap ilaqutariit ikinngutigigamigit qaaqqusanik ikiuinnguatsiarpoq. Nalliut­torsior­nerulli nalaani ilaqutariinnut katerlaanullu peqqusiileqilersitsisin­naasumik pisoqarpoq – viinniutaarupput. b Immaqa najuuttut ilimagineqartumit amerlanerupput. Mariiap ernini oqarfigaa: “Viinniutaarupput.” (Joh 2:1-3) Taava Jiisusi tupinnangaartumik iliuuseqarpoq. Imeq ‘viinnin­ngortippaa pitsaasoq’. – Joh 2:9, 10.

2-3. (a) Jiisusi qanoq tupinnar­tuliortarpa? (b) Jiisusip tupinnar­tuliaanik sammisaqarnerput qanoq iluaqutigis­savarput?

² Jiisusi kiffartor­nermini aamma allarpas­suarnik tupinnar­tuliorpoq. c Tupinnar­tuliorluni inuit 10.000-t sinnerlugit  ikiorpai. Assersuutigalugu tupinnar­tuliorluni marloriarluni inuppassuit – siullermik angutit 5.000-t kingusin­nerusukkullu angutit 4.000-t – nerisippai. Pisuni taakkunani arnat meeqqallu najuuttut ilannguk­kutsigit inuit 27.000-t sinnerlugit nerisippai. (Mat 14:15-21; 15:32-38) Pisuni taakkunani Jiisusip aamma napparsimasut amerlasuut ajorunnaarsippai. (Mat 14:14; 15:30, 31) Inuppassuit Jiisusimit ajorunnaarsin­neqarlutillu nerisin­neqaramik qanoq tupigusutsigisimassasut takorlooriaruk!

³ Jiisusip tupinnartuliai ilinniarfigingaarsin­naavagut. Aamma misissorutsigit uppernikkut nakussatsin­neqassaagut. Allaaserisami matumani tamanna sammissavarput. Aamma sammissavarput Jiisusi tupinnar­tulioraangami maniguut­tarnera misigin­neqataasarneralu qanoq ilaarsin­naagigut.

4. Jiisusip tupinnar­tuliaasa misissornerat kikkut pillugit ilinniarfigaarput?

⁴ Jiisusip tupinnar­tuliaasa misissor­nerisigut Jiisusi pillugu ilinniaannarata aamma Ataataa pillugu ilinniar­tarpugut. Jehovammi pissaaneratigut Jiisusi tupinnar­tuliorsin­naasarpoq. Taakkualu samminerat uppernikkut nakussatsinnarpoq. Apustilit Suliaat 10:38-mi ima allassimavoq: ‘Jiisusi anersaamik illernartumik Guutimit taninneqarpoq pissaanermillu tunineqarluni, Guutimillu najorneqarluni nunami tamarmi angalaarpoq, Diaavulumillu naqisimaneqartunut tamanut ajunngitsulior­tarlunilu ajorunnaarsitsisarpoq.’ Jiisusi oqaatsimigut iliuutsimigullu – aamma tupinnar­tulioraangami – Ataatami eqqarsar­tariaasia misigis­susiilu ilaaqqis­saartarpai. (Joh 14:9) Jiisusip tupinnar­tuliaanit ilinniarsin­naasagut pingasut sammeriartigit.

5. Suna killinneqaatigalugu Jiisusi tupinnar­tuliortarpa? (Matiusi 20:30-34)

⁵ Siullertut, Jiisusip Ataataatalu asangaarpaatigut. Jiisusi nunarsuarmiik­kallarami inunnik asanningaarnini takutippaa naalliuttut ikiorumallugit pissaanermi tupinnar­tuliornikkut atorneratigut. Ilaanni angutit tappiitsut marluk ikioqqullutik suaarfigaat. (Matiusi 20:30-34 atuakkit). Maluginiaruk Jiisusip ‘nalligingaaleramigit’ ajorunnaarsikkai. Oqaaseq ‘nalligin­ningaarneq’ uani atorneqartoq qamanngavik pisumik misigin­neqataanermit aallaaveqarpoq. Jiisusi taamatut misigin­neqataangaarami, tassa asannit­tuugami, kaattut nerisil­lugillu pupissoq ajorunnaarsippaa. (Mat 15:32; Mak 1:41) Qularin­ngissin­naavarput Jehovap Guutiusup ‘misigin­neqataangaartuusup’ erneratalu asangaaraatigut naalliuk­kaangattalu aliasuutigisaraat. (Luk 1:78; Pet 1. 5:7) Ajornar­torsiutitta atuukkun­naarsin­nissaat qilanaarutigingaarpaat!

6. Guutip Jiisusi qanoq pissaaneqalersippaa?

⁶ Aappaattut, Jiisusip Guutimit pissaaneqalersin­neqarami inuit ajornar­torsiutaat tamaasa aaqqissinnaavai. Jiisusip tupinnar­tuliornermigut ersersippaa ajornar­torsiutit nammineq aaqqissin­naanngisagut aaqqikkumaarlugit. Assersuutigalugu ajortip kingornus­simasatta tamatumalu kingunipiluisa – nappaatit toqullu – atuukkun­naarsin­nissaannut pissaaneqarpoq. (Mat 9:1-6; Rom 5:12, 18, 19) Jiisusip tupinnar­tuliornermigut ersersippaa nappaatit ‘qanorluunniit ittut’ ajorunnaarsis­sinnaal­lugillu toqusunik makititsisin­naalluni. (Mat 4:23; Joh 11:43, 44) Aamma anorersuarujussuaq qatsortis­sinnaavaa inuillu anersaapilunnit aniguisis­sinnaallugit. (Mak 4:37-39; Luk 8:2) Toqqissial­lannarpoq nalunagu Jehovap ernini taama pissaaneqalersikkaa!

7-8. (a) Jiisusi tupinnar­tuliortarmat suna qularis­sanngilarput? (b) Paratiisimi suna qilanaaraajuk?

 ⁷ Pingajuattut, Guutip kunngeqarfiani pilluaq­qussutissat eqquukkumaarneri qularutigin­ngilluin­narsinnaavagut. Jiisusip nunarsuarmiik­kallarami tupinnar­tuliaminit annerungaartumik nunarsuarmut naalakkersuileruni iliuuseqassaaq. Ungasin­ngitsukkut misigisassatit takorluukkit. Jiisusip ajorunnaarsis­sammatigut napparsimasoqarun­naarlunilu innarluuteqar­toqarun­naarlunilu inuit tamarmik peqqilluin­nartunngussapput. (Es 33:24; 35:5, 6; Saqq 21:3, 4) Kaannavian­ngilagut pinngor­titamilu ajunaar­nersuarnit eqqorneqar­naviarnata. (Es 25:6; Mak 4:41) Asasatta toqusimasut maanna “ilivermiittut” takoqqin­nissaat nuannaarutigingaas­savarput. (Joh 5:28, 29) Illit paratiisimi suna qilanaarinerpaaviuk?

⁸ Jiisusi tupinnar­tulioraangami maniguullunilu misigin­neqataasarpoq. Uaguttaaq Jiisusi ilaarlugu maniguullutalu misigin­neqataarusuppugut. Oqaluttuat marluk sammeriartigit, Kaanami katittorsiorneq aallarniutigalugu.

9. Sooq Jiisusi katittorsiornermi tupinnar­tuliorpa? (Johannesi 2:6-10)

⁹ Johannesi 2:6-10 atuakkit. Katittorsiornermi viinniutaarut­toqarmat Jiisusi iliuuseqar­nissaminut pisussaava? Naamik. Missiarsip imermik viinnin­ngortitsinissaa pillugu  Biibilimi siulittuuteqanngilaq. Takorlooriarulli katinnissinni iggisissamik sassaal­liutissaaruttusi. Ilaa paasinarpoq Jiisusi ilaqutariit, ingammik katerlaat, misigin­neqatigalugit peqqusiileqileq­qunagit iliuuseqarmat! Allaaserisap aallaqqaataani eqqaaneqartutut tupinnar­tuliorluni imeq 390 liiterit missaa viinnin­ngortippaa pitsaasoq. Immaqa taama sinnilis­suarmik viinnin­ngortitsivoq katerlaat siunissami atorsin­naanias­sammassuk imaluunniit tuniniagas­saminnik peqarnias­sammata. Katerlaat taakku qujamasus­simassapput!

10. Johannesi kapitali 2-mi oqaluttuami pingaarutillit ilaat suuppat? (Aamma assiliaq takuuk).

¹⁰ Johannesi kapitali 2-mi oqaluttuami pingaarutillit ilaat misissoriartigit. Maluginiarpiuk Jiisusip imiisiviit ujaqqat nammineq imminngikkai? Imminut malugeq­qusaarnani katittorsiornermi kiffartuussisut oqarfigai imiisiviit immissagaat. (Versit 6, 7) Imeq viinnin­ngortereerlugu Jiisusip nammineerluni katittorsiornermi aqutsisumut tunniutinngilaa. Kiffartuus­sisulli taamaalioqquai. (Versi 8) Jiisusi kikkut tamaasa tusaatillugit oqarataarluni oqanngilaq: ‘Imeq viinnin­ngortitara ussilaarsiuk!’

11. Jiisusip tupinnartuliaa qanoq ilinniarfigisin­naavarput?

¹¹ Jiisusip tupinnar­tuliornikkut imermik viinnin­ngortitsinera qanoq ilinniarfigisin­naavarput? Maniguunneq pillugu ilikkagaqarpugut. Jiisusi tupinnar­tuliani naammas­sisaniluunniit allat pillugit oqarataan­ngisaannarpoq. Maniguullunili Ataatani ataqqinarsisit­tuaannarpaa. (Joh 5:19, 30; 8:28) Jiisusi ilaarlugu maniguukkutta naammas­sisagut pillugit oqarataar­tassanngilagut. Jehovamut kiffartornermi qanorluunniit pisinnaatitaaf­feqaraluarluta uagut pilluta oqarataar­naveersaarluta Guutimulli assissaqan­ngitsumut kiffartornerput tulluusimaarutigisigu. (Jer 9:22, 23) Taanna kisiat ataqqinarsisis­savarput. Jehovamimmi ikiorneqan­ngikkutta suna naammas­sisinnaas­sagatsigu? – Kor 1. 1:26-31.

12. Jiisusip maniguunnera allatigut qanoq ilaarsin­naavarput? Assersuuteqarit.

¹² Jiisusip maniguunnera allatigut qanoq ilaarsin­naaneripput sammeriartigu. Takorlooriaruk ima pisoqartoq: Utoqqaanertap ilagiinni kiffartortoq inuusuttoq tamanut oqalugiar­nissaanut piareersartoq piffissangaatsiaq atorlugu ikiorpaa. Utoqqaanertap ikiormagu inuusuttoq taanna ilagiit nuannaarutigeqisaanik qiimmaal­lannartumik oqalugiaateqarpoq. Ataatsimiinnerup kingorna utoqqaanertaq ima oqarfigineqarpoq: ‘Qatanngut oqalugiallaqqik, ilaa?’ Utoqqaanertaq ima oqartariaqanngilaq: ‘Aap, piffissangaatsiaq atorlugu ikiornikuugakku.’ Maniguullunili ima oqarsinnaavoq: ‘Ilaa, tulluusimaarnaq!’ Maniguukkutta ajunngitsuliagut allanut maluginiaq­qunavian­ngilagut. Jehovap maluginiarlugillu pingaar­timmagit naammagaarput. (Naleqqiuguk Matiusi 6:2-4; Hebr 13:16) Jiisusip maniguunnera taamatut ilaaraangatsigu Jehova nuannaar­tittarparput. – Pet 1. 5:6.

13. Jiisusip Nainip ungasin­ngisaani suna takuaa, aamma qanoq iliorpa? (Lukkarsi 7:11-15)

¹³ Lukkarsi 7:11-15 atuakkit. Jiisusi ukioq ataaseq sinnerlugu kiffartoreersoq pisoq una takorlooriaruk. Galiliiami Nainiliarsimavoq. Nainip ungasin­ngisaani Shunemimi ukiut 900-t missaat tamatuma siorna arnap ernera pruffiitip Elisap toqusunit makitis­simavaa. (Kng 2. 4:32-37) Jiisusip illoqarfiup isaariaanut qanilligami ilisisut takuai. Pisoq alianangaarpoq uillarnerup ernituani annaasimammagu. Anaanaasorli aliasuttoq  taanna kisimiinngilaq; illoqarfimmiit inuppassuit ingerlaqatigaat. Jiisusip ornippai tupinnangaar­tumillu iliuuseqarluni – anaanaasup aliasuttup ernera toqusunit makitippaa! Jiisusip makititsinerisa iivangkiiliuni eqqaaneqartut pingasut taanna siullersaraat.

14. Lukkarsi kapitali 7-imi oqaluttuami pingaarutillit ilaat suuppat? (Aamma assilissat takukkit).

¹⁴ Lukkarsi kapitali 7-imi oqaluttuami pingaarutillit ilaat misissoriartigit. Maluginiarpiuk Jiisusip anaanaasoq aliasuttoq ‘takugamiuk nalligingaaleraa’? (Versi 13) Tassa Jiisusip anaanaasoq qiasoq ernermi akiarneqartup saniani ingerlasoq takugamiuk misigin­neqatigingaalerpaa. Jiisusip nalligingaarlugulu misigin­neqataanini ersersippaa. Saamalluni tuppallersarlugu oqarfigaa: “Qiaqinak.” Taava aamma ikiorniarlugu iliuuseqarpoq. Angut inuusuttoq toqusunit makiteriarlugu ‘anaanaanut utertippaa’. – Versit 14, 15.

15. Jiisusip tupinnartuliaa qanoq ilinniarfigaarput?

¹⁵ Jiisusip uillarnerup erneranik toqusunit makititsinera qanoq ilinniarfigisin­naavarput? Aliasuttunik misigin­neqataasar­nissarput ilikkarparput. Soorunami Jiisusi ilaarlugu toqusunik makititsisin­naanngilagut. Jiisusili ilaarlugu toqukkut annaasaqarsimasut eqqumaf­figinerisigut misigin­neqatigisin­naavagut. Misigin­neqataanerput ersersis­sinnaavarput ikiorumallugit tuppallersarumal­lugillu oqaaseqarnikkut iliuuseqar­nikkullu. d (Uss 17:17; Kor 2. 1:3, 4; Pet 1. 3:8) Oqaaseqalaaginnarneq iliuuseqalaagin­narnerluunniit isumaqar­torujus­suusinnaavoq.

16. Assimi takutin­neqartutut anaanaasup meeqqaminik annaasaqarsimasup tuppallersar­neqarnera qanoq ilinniarfigaajuk?

¹⁶ Ukiut arlaqan­ngitsut matuma siorna ilagiit ataatsimiin­nerminni erinarsor­tillugit qatanngutip arnap anaanaasoq qiasoq maluginiarpaa. Makititaanissamik neriuut erinarsuummi atorneqarpoq, anaanaasullu qanittukkut paninnguani toqukkut annaasimavaa. Qatanngutip arnap tamanna nalunnginnamiuk ingerlaannaq ornippaa eqillugulu erinarsoqatigalugu.  Anaanaasoq kingusin­nerusukkut ima oqarpoq: “Qatanngutinnik uummatikkut asanninnermik ulikkaarlunga misigivunga.” Ataatsimiigiarsimagami qujamasoqaaq. Ima nangippoq: “Ataatsimiinnerni ikiorneqar­tarpugut.” ‘Sequmis­simasumik uummatilinnik’, tassa aliasuttunik, misigin­neqataanerput Jehovap maluginiarlugulu pingaartikkaa qularin­ngissin­naavarput. – Tuss 34:19.

17. Allaaserisami matumani suna ilikkarparput?

¹⁷ Jiisusip tupinnartuliai Biibilimi oqaluttuarineqartut misissorutsigit uppernikkut nakussatsin­neqassaagut. Taakku ilinniarfigalugit uku paasivagut: Jehovap Jiisusillu asangaarpaatigut, Jiisusip inuit ajornar­torsiutaannik aaqqiinis­saminut pissaaneqarpoq, paratiisimilu neriorsuutit eqquukkumaarnerat qularin­ngissin­naavagut. Oqaluttuat taakku misissor­neranni Jiisusi qanoq ilaarsin­naanerlutigu eqqarsaatigeq­qissaarsin­naavarput. Immaqa nammineq Biibilimik misissueq­qissaarninni ilaqutariit­tulluunniit Biibilimik misissueqatigiin­nissinni Jiisusip tupinnartuliai allat misissorsin­naavasi. Ilinniakkatit aamma allanut oqaluttuarigukkit eqqartueqateqarnerit qanoq nuanner­tigissasoq takorlooruk! – Rom 1:11, 12.

18. Allaaserisami tulliuttumi suut sammissavagut?

¹⁸ Nunarsuarmi kiffartornini naammas­singajalerlugu Jiisusi pingajussaanik makititsivoq. Makititsinerali taanna immikkuul­larissuuvoq ikinngutini asasani toqusunit makitikkamiuk. Tupinnartuliaq tamanna qanoq ilinniarfigaarput? Makititaanis­samillu neriuut qanoq upperinerulersin­naavarput? Allaaserisami tulliuttumi tamakku sammineqassapput.