1-2. Paratiisissap utaqqinerani susariaqarpugut?

 JEHOVAP paratiiseqaler­nissaanik neriorsuutaa qujamasuutigaarput. (Pet 2. 3:13) Nalugaluarlugu qaqugorpiaq paratiisi piviusun­ngorumaartoq nalitsinni pissutsinit erserpoq neriorsuut qanittukkut eqquukkumaartoq. – Mat 24:32-34, 36; ApS 1:7.

² Utaqqinitsinni qanorluunniit sivisutigisumik Nalunaajaasuusimagaluarutta tamatta paratiisi pillugu neriorsuummik upperin­ninnerput nakussas­sartariaqarparput. Sooq? Upperneq sanngiil­lisinnaammat. Apustilimmi Paulusip uppernikillineq tassaanerarpaa ‘ajortuliorneq uagutsinnut nermutiasoq’. (Hebr 12:1) Uppernikil­lissanngikkutta qanittukkut paratiiseqaler­nissaanik uppernarsaatit misissukulasariaqarpagut. – Hebr 11:1.

3. Allaaserisami matumani suut sammissavagut?

³ Allaaserisami matumani sammissavarput paratiisissamik Jehovap neriorsuutaanik upperin­ninnerput pingasutigut qanoq nakussas­sarsinnaagipput: (1) Utertitsis­sutitut akiliummik eqqarsaatigin­neqqissaar­tarnikkut, (2) Jehovap pissaaneranik takorluuisarnikkut aamma (3) anersaakkut ittunik sammisaqar­tarnikkut. Taava Jehovap Habakkukimut oqaasii qanoq uagutsinnut nakussas­saataasin­naanersut sammissavarput. Sammeqqaariartiguli paratiiseqaler­nissaanik upperin­nilluin­narnermik ersersitsif­fiusariaqartumik nalitsinni nalaataqar­tarsinnaanerput.

 QAQUGUKKUT UPPERLUAR­TUUSARIAQARPUGUT?

4. Qaqugukkut upperluar­tuunerput ersersit­tariaqarparput?

⁴ Inuunitsinni upperluar­nitsinnik ersersitsisunik aalajangiisariaqar­tarpugut. Assersuutigalugu ilagisar­takkanut, aliikkutanut, ilinniagaqarnermut, aappariinnermut, meeqqanut aamma suliffeqarnermut tunngasunik aalajangiisarpugut. Uku eqqarsaatigisariaqarpagut: ‘Aalajangikkannit erserpa pissutsit maanna atuuttut atuukkun­naarlutik paratiisimik taarser­neqassasut upperil­luinnariga? Imaluunniit aalajangiinikka inunnit upperisaqan­ngitsunit sunnerneqartarpat?’ (Mat 6:19, 20; Luk 12:16-21) Paratiisip takkutingajaliivin­neranik upperin­ninnerput nakussas­sartarutsigu pitsaanerpaamik aalajangiisarsin­naavugut.

5-6. Sooq ajornar­torsiorfiusuni uppersuseqar­tariaqarpugut? Assersuuteqarit.

⁵ Misilin­neqarsin­naavugut upperluar­tuunitsinnik ersersitsif­fiusariaqartunik. Immaqa malersugaasin­naavugut, perulun­nartumik nappaateqarsin­naavugut allatul­luunniit ajornar­torsiorsin­naalluta nikallus­sutigisin­naasatsinnik. Immaqa pinertusaarsin­naasutut misigeq­qaarsin­naavugut. Ajornar­torsiutigulli sivitsor­toorutigigutsigit upperluar­tuusariaqarpugut pinertusaarsin­naaqqulluta nuannaarlutalu Jehova kiffartorfigiuarsin­naaqqullugu. – Rom 12:12; Pet 1. 1:6, 7.

⁶ Ajornar­torsiornitta nalaani misigisin­naavugut paratiiseqaler­navianngitsoq. Taava uppernikippugut? Taamaat­tariaqanngilaq. Assersuuteqariarta. Ukiorlulluni issersuaar­tillugu misigisin­naavugut aasanngisaan­nassasoq. Nalunngilarpulli aasassaq­qaartoq. Tassa nikallungarujus­suartilluta misigisin­naavugut qilanaarisarput paratiisi takkunnavian­ngitsoq. Upperluar­tuuguttali nalussan­ngilarput Guutip neriorsuutai eqquukkumaartut. (Tuss 94:3, 14, 15; Hebr 6:17-19) Taamatut uppersuseqarutta Jehovamik guutisiornerput inuunitsinni pingaar­nerpaatit­tuassavarput.

7. Suna mianersorfigis­savarput?

⁷ Upperluar­tuunermik aamma ersersitsif­fiusariaqartoq oqaluus­sinermut tunngavoq. Paratiisissaq pillugu “nutaarsiassat nuannersut” oqaluus­sissutigisagut inuppassuit upperiuman­ngilluin­narpaat. (Mat 24:14; Ez 33:32) Upperin­nikkuman­ngitsunit sunnertik­kusunngilagut. Taamaak­kumanata uppernerput nakussas­sartuar­tariaqarpoq. Pingasutigut qanoq taamaaliorsin­naasugut sammeriartigu.

UTERTITSISSUMMIK EQQARSAATIGIN­NEQQISSAARNEQ

8-9. Utertitsissutip eqqarsaatigeq­qissaarnera uppernitsinnut qanoq sunniuteqarsinnaava?

⁸ Uppernerput ilaatigut nakussatsis­sinnaavarput utertitsissutip eqqarsaatigeq­qissaar­neratigut. Utertitsissut Guutip neriorsuutaasa eqquukkumaar­nerannut uppernarsaataavoq. Sooq utertitsissutip pilersin­neqarsimanersoq Jehovallu qanoq pilliuteqar­tigisimanersoq eqqarsaatigeq­qissaarutsigit paratiisimi naassaan­ngitsumik inuunissamik upperin­ninnerput nakussatsis­savarput. Sooq taama oqarsin­naavugut?

⁹ Utertitsissutip pilersin­neqarnera sammeriartigu. Jehovap ernituani asasani qaniginerpaasani qilammiit nunamut naammal­luinnartutut inunngor­tussanngorlugu aallartippaa. Jiisusi nunarsuarmiitilluni assigiin­ngitsorpas­suartigut ajornar­torsiortarpoq. Taava naalliulluni anniangaarlunilu toquvoq. Tamanna Jehovamut akisoqaaq!  Sivikitsuinnarmik pitsaanerusumik inuusin­naaqqulluta Guutitta asannittup ernermi naalliulluni toqunissaa akuerinavianngilaa. (Joh 3:16; Pet 1. 1:18, 19) Jehovap ernini asangaakkani ikiorumalluta akisuumik pilliuteqar­nermigut qulakkeerpaa paratiisimi naassaan­ngitsumik inuusin­naalernissarput.

JEHOVAP PISSAANERA TAKORLOORTARUK

10. Efesossimiut 3:20 naapertorlugu Jehova susinnaava?

¹⁰ Uppernerput nakussas­sarsinnaavarput Jehovap pissaaneranik takorluuisarnikkut. Neriorsuutimi tamaasa eqquutitin­nissaannut pissaaneqarpoq. Nalitsinni inuppassuit isumaqarput paratiisimi naassaan­ngitsumik inuusoqarsin­naanngitsoq. Jehova Killeqan­ngitsumik Pissaaneqarami inuit eqquutitis­sinnaan­ngisaannik neriorsuisarpoq. (Job 42:2; Mak 10:27) Taamaattumik tupigusuutigineq ajorparput tupinnangaartunik neriorsuuteqaraangat! – Efesossimiut 3:20 atuaruk.

11. Guutip immikkuul­larissumik neriorsuineranik assersuuteqarit. (Takuuk ungalusaq “ Neriorsuutit immikkuul­larissut eqquuttut ilaat”).

¹¹ Jehovap itsaq innuttaminut neriorsuutaasa ilaat inuit eqquutitis­sinnaan­ngisaat sammeriartigit. Aaperaat Saaralu oqarfigai utoqqaagaluarlutik ernertaarumaartut. (Mos 1. 17:15-17) Aamma Aaperaat oqarfigaa kinguaavisa Kaanaani nunagilissagaat. Aaperaalli kinguaavi, Israalikkut, ukiorpassuarni Egyptenimi inussiaataagamik isumaqarsimasin­naapput neriorsuut eqquutin­ngisaan­nassasoq. Eqquupporli. Kingusin­nerujus­suakkullu Jehovap Elizabetti utoqqaasoq paasitippaa meerartaassasoq. Aamma Mariia atoqateqarsiman­ngisaannartoq oqarfigaa ernertaassasoq. Ernertaassaalu tassaassaaq Guutip ukiut tuusintillit tamatuma siorna Edenimi neriorsuutigisimasaa. Tassa neriorsuutai eqquupput! – Mos 1. 3:15.

12. Jehovap pissaanera pillugu Josva 23:14-imi aamma Esaja 55:10, 11-milu qanoq paasitin­neqarpugut?

¹² Jehovap neriorsuutai qanorlu eqquutitinnerai eqqarsaatigisarutsigit qanoq pissaaneqar­tigisoq paasissavarput. Taamaalior­tarutta paratiisissamik neriorsuut upperinerulis­savarput. (Josva 23:14; Esaja 55:10, 11 atuakkit). Taava paratiisimik neriorsuutip takorluuinerin­naanani ilumoortuusoq nassuiarluar­nerusin­naassavarput. Jehovami qilak nutaaq nunalu nutaaq pillugit ima oqarpoq: ‘Oqaatsit taakku tutsuiginarlutillu ilumoorput.’ – Saqq 21:1, 5.

ANERSAAKKUT ITTUNIK SAMMISAQARTARIT

13. Ilagiit ataatsimiinneri qanoq nakussatsis­sutigisin­naavagut? Nassuiaruk.

¹³ Uppernikkut nakussatsis­sutigisin­naasarput alla tassaavoq anersaakkut sammisaqartarneq. Ilagiit ataatsimiinnerisa iluaqutaanerat assersuutigisin­naavarput. Anna ukiorpassuarni kiffartoriaatsini assigiin­ngitsuni piffissaq tamaat kiffartor­tuusimasoq ima oqarpoq: “Upperluar­nissannut ataatsimiinnerit iluaqutigisarpakka. Saqqummiussisut ilaat pikkorinnerit ilaginngik­kaluaraat nutaanil­luunniit saqqummius­sinngik­kaluartut ilumoortoq Biibilimeersoq upperlualer­nerussutigisannik paasilluar­nerusarpara.” b Uagut aamma najuuttut akissutaat uppernikkut nakussatsis­sutigaagut. – Rom 1:11, 12; 10:17.

14. Oqaluussineq qanoq uppernerulersitsisarpa?

¹⁴ Uppernerput aamma nakussatsit­tarparput oqaluus­sigaangatta. (Hebr 10:23) Barbara ukiut 70-it sinnerlugit Jehovamut  kiffartor­tuusimasoq ima oqarpoq: “Oqaluussineq upperninnut nakussas­saatigiuarsimavara. Jehovap neriorsuutai nuanningaartut oqaluttuarigaangakkit tamatigut uppernera nakussatsit­tarpara.”

15. Nammineq Biibilimik misissueq­qissaartarneq qanoq uppernerulis­sutaasarpa? (Aamma assilissat takukkit).

¹⁵ Uppernerulis­sutigisarput alla tassaavoq nammineq Biibilimik misissueq­qissaarneq. Susanip misissueq­qissaar­nissaminut pilersaarusiorsimanini iluaqutigisarsimavaa. Ima oqarpoq: “Sapaatikkut sapaatip-akunnerata tulliani Napasuliaq Alapernaarsuiffik-mik atuaqqis­saaqatigiin­nissamut piareersar­tarpunga. Ataasin­ngornikkut marlunngor­nikkullu ulluinnarni ataatsimiinnernut piareersar­tarpunga. Sapaatip-akunnerata ulluisa sinnerani nammineq misissueq­qissaar­tarpunga.” Misissueq­qissaar­nissamut pilersaarutini malittuaan­naramigit uppernikkut nakussatsit­tuaannarpoq. Irenep, qullersaqarfimmi ukiorpassuarni kiffartor­tuusimasup, siulittuutit Biibilimeersut misissoq­qissaar­tarnerat uppernerminut nakussatsis­sutigisarpaa. Ima oqarpoq: “Tupigusuutigisarpakka Jehovap siulittuutaasa eqquuteq­qeqqissaar­tarnerat.” c

‘EQQUUTIN­NGITSOORANI PIVIUSUN­NGORUMAARPOQ’

16. Jehovap Habakkukimut neriorsuutaa sooq nalitsinnut aamma tunngava? (Hebræerit 10:36, 37)

¹⁶ Jehovamut kiffartortut ilaasa pissutsit maannakkut atuuttut atuukkun­naarnissaat sivisoorujus­suarmik utaqqisimavaat. Inuit eqqarsar­taasiat naapertorlugu Jehovap neriorsuutaata eqquunnissaa kingusinaarsorinarsinnaavoq. Jehovalli kiffani qanoq misiginersut nalunnginnamiuk pruffiiti Habakkuki ima neriorsorpaa: “Takorluugaq piffissarititami aatsaat eqquutissaaq, naggatissamik nalunaajaavoq  eqquutin­ngitsuus­sananilu. Nalliutiaan­ngikkaluarpat utaqqiinnarina, eqquutin­ngitsoorani piviusun­ngorumaarmat.” (Hab 2:3) Guutip neriorsuinera Habakkukip kisimi iluaqutigissavaa? Imaluunniit aamma nalitsinnut tunngava? Apustili Paulusi isumassarsisitaalluni oqaatsit Habakkukimiittut kristumiunut, paratiisissap takkunnissaanik utaqqisunut, tunngatippai. (Hebræerit 10:36, 37 atuakkit). Neriorsuulli kingusinaarpasis­sinnaagaluartoq upperil­luinnarsin­naavarput ‘eqquutin­ngitsoorani piviusun­ngorumaartoq’!

17. Jehovap Habakkukimut siunnersuutaa qatanngutip arnap qanoq maleruarsimavaa?

¹⁷ Nalunaajaasorpassuit Jehovap ‘utaqqiin­narnissamik’ siunnersuutaa ukiorpassuarni maleruarsimavaat. Louise 1939-mi Nalunaajaasun­ngortoq ima oqarpoq: “Taamanikkut isumaqaraluarpunga suli atuartuutillunga Harmagedonni nalliutissasoq. Taamaan­ngilarli. Ukiut ingerlaneranni oqaluttuat Biibilimeersut Noa, Aaperaat, Juuserfi aamma allat Jehovamit pilluaq­quneqar­nissaminnit sivisoorujus­suarmik utaqqisimasut pillugit misissuisarnera iluaqutigisarpara. Paratiisissap takkunnissaanut ilimasut­tuarnera iluaqutigisimavara.” Sivisuumik Nalunaajaasuusimasorpassuit aamma taama isumaqarput.

18. Pinngortitat eqqarsaatiginerisigut paratiiseqalernissaa qanoq upperinerulersin­naavarput?

¹⁸ Ilumoorpoq paratiisi suli takkutin­ngitsoq. Maannali pioreersut eqqarsaatigeriartigit – soorlu ullorissat, orpiit, uumasut inoqatigullu. Qanga piviusiman­ngikkaluartut qularutigin­ngilarput taakku Jehovap pinngor­titarimmagit piviusuusut. (Mos 1. 1:1, 26, 27) Guutitta aamma paratiiseqalernissaa siunertaraa. Siunertanilu piviusun­ngortissavaa. Paratiisimi inuit peqqilluin­narlutik naassaan­ngitsumik inuussapput. Guutip piffissarititaani paratiisi piviusun­ngussaaq. – Es 65:17; Saqq 21:3, 4.

19. Qanoq uppernerulersinnaavit?

¹⁹ Utaqqininni upperneruler­nissamut periarfissatit tamaasa atorluartakkit. Utertitsissut qujamasuutiginerujartoruk. Jehovap pissaanera takorloortaruk. Anersaakkut ittunik sammisaqartarit. Taamaaliortaruit “neriorsuutigisaanik kingornus­sisussat” ilagisin­naassavaatsit. – Hebr 6:11, 12; Rom 5:5.