1. Nukappiaqqap toqusunit makititaanissamik neriuut upperalugu qanoq oqaatigaa?

 NUKAPPIARAQ Matthewimik atilik perulun­nartumik napparsimavoq pilanneqar­tariaqar­tarlunilu. Arfineq-marlunnik ukioqarluni ilaquttanilu JW Broadcasting^® isiginnaarpaat. Aallakaatitassiap naalernerani musikvideo asasaminnik toqumit makitin­neqartunik tikilluaq­qusisut isiginnaarpaat. b Kingorna Matthewip angajoqqaani assaasigut tigoriarlugit ima oqarfigai: “Anaana ataata, takoreerparsi! Toqussagaluarumaluunniit makititaassaanga. Utaqqiin­nassavassinga, suna tamarmi aaqqikkumaarpoq.” Nukappiaqqap makititaanissamik neriuut upperil­luinnaraa angajoq­qaavisa paasigamikku qanoq misiginersut takorloorsin­naaviuk?

2-3. Sooq toqusunit makititaanissamik neriorsuutip eqqarsaatigisarnissaa iluaqutigis­savarput?

² Tamatta ilaannikkut toqusunit makititaanissamik Biibilimi neriorsuutip eqqarsaatigisarnissaa iluaqutigis­savarput. (Joh 5:28, 29) Sooq? Perulun­nartumik napparsimalersin­naagatta asasatsin­nilluunnit toqukkut annaasaqariaan­naagatta. (Jaak 4:13, 14) Taamatut neriuuteqaratta unamminiarnartut naammagalugit atorsin­naavagut. (Tes 1. 4:13) Biibilimi ersersin­neqarpoq Ataatatta qilammiusup ilisarisimal­luaraatigut asangaarlutalu. (Luk 12:7) Jehovap Guutip toqusunit makititaanissami inuttut kinaassuserput pilerseq­qissaguniuk ilisarisimal­luinnarsimas­savaatigut. Jehovap asangaarpaatigut naassaan­ngitsumillu inuunissamik periarfis­silluta! Toqussagaluarut­taluunniit makitis­savaatigut.

 ³ Allaaserisami matumani makititaanissamik neriorsuut sooq upperisin­naanerlugu sammeqqaas­savarput. Taava uppernikkut nakussatsinnartoq Biibilimi oqaluttuaq sammissavarput. Allassimaffik najoqqutarineqartoq una tassanngaan­neersuuvoq: “Qatanngutit toqusunit makititaassaaq.” (Joh 11:23) Kiisalu sammissavarput toqusunit makititaanissamik neriuut qanoq upperinerulersin­naagipput.

4. Neriorsuut upperis­sagutsigu suna qularutigin­ngittariaqarparput? Assersuuteqarit.

⁴ Neriorsuut upperis­sagutsigu neriorsuisoq neriorsuutimi eqqortin­nissaanut kissaateqarlunilu pissaaneqartoq qularutigin­ngittariaqarparput. Assersuuteqariarta. Takorlooriaruk illut anorersuarmit aseruatitersimasoq. Ikinngutivit ornillutit ima neriorsorpaatit: ‘Illup iluarsaannerani ikiussavakkit.’ Ilumoorluni taamatut neriorsuivoq, qularutigin­ngilallu ikiorusungaaraatit. Sanasuuppallu pikkorissoq pisariaqar­tunillu sakkoqarpat ikiorsin­naagaatit nalunngilat. Taamaattumik neriorsuutaa qularutigin­ngilluinnarpat. Taavami Guutip makititaanissamik neriorsuutaa upperisin­naaviuk? Ilumut eqquutitin­nissaanut kissaateqarlunilu pissaaneqarpa?

5-6. Sooq upperil­luinnarsin­naavarput Jehovap toqusimasunik makititsinis­saminut kissaateqartoq?

⁵ Jehovap toqusimasut makitik­kusuppai? Aap, kissaatigingaarpaa! Makititaanissamik neriorsuutini arlaleriarluni Biibilimi allatsippaa. (Es 26:19; Hos 13:14; Saqq 20:11-13) Jehovallu neriorsuutini tamatigut eqquutitittarpai. (Jos 23:14) Jehovap toqusimasut inuulerseq­qinnissaat qilanaaringaarpaa. Sooq taamatut oqarsin­naavugut?

⁶ Ataataanerpaap Jobip oqaasii eqqarsaatigeriakkit. Qularutiginngilaa toqugaluaruni Jehovap ‘kipitsavigiumaaraani’. (Job 14:14, 15, NW) Jehovap aamma kiffani toqusimasut allat taamatut kipitsavigisarpai. Peqqillutillu pilluarlutillu inuuleq­qissasut kissaatigingaarpaa. Inuilli milliardillit imminut pilluni ilumoortumik paasinnin­nissaminnut periarfis­saqarsiman­ngitsut pillugit qanoq misigiva? Guutitta asannittup aamma taakku makitik­kusuppai. (ApS 24:15) Kissaatigaa imminut ikinngutaalissasut naassaan­ngitsumillu nunarsuarmi inuulissasut. (Joh 3:16) Ersarippoq Jehovap toqusimasut makitik­kusungaarai.

7-8. Jehova toqusimasunik makititsinis­saminut pissaaneqartoq qanoq nalunngilarput?

⁷ Jehovap ‘Killeqan­ngitsumik Pissaaneqarami’ toqusimasut makitis­sinnaavai. (Saqq 1:8) Ima pissaaneqartigaaq akeraq sunaluunniit – allaat toqu – ajugaaf­figisin­naallugu. (Kor 1. 15:26) Tamanna nalunngin­natsigu nakussatsis­sutigalugulu tuppallersaatigaarput. Qatanngut Emma Arnold taamatut misigisaqarpoq. Sorsunnersuup kingulliup nalaani ilaquttanilu uppernikkut misilin­neqangaarput. Nazistit tigusanut inissiaataanni asasamik annaasaqareerlutik Emmap panini tuppallersarumallugu ima oqarfigaa: “Toqu naassaan­ngitsumik atuutis­sagaluaruni Guutimit nukittunerus­sagaluarpoq, ilaa?” Jehovamit nukittunerusoqanngilaq. Guutip Killeqan­ngitsumik Pissaanillip inuunermik pilersitsisup soorunami inuit toqusimasut makiteq­qissinnaavai.

⁸ Guutip toqusunit makititsisin­naaneranut uppernarsaat alla tassaavoq killeqan­ngitsumik eqqaaman­nissinnaanera. Ullorissat tamaasa atiisigut taasarpai. (Es 40:26) Aamma toqusimasut eqqaamal­luinnarpai. (Job 14:13; Luk 20:37, 38) Annikitsualuttortai tamaasa – ilaatigut eqqaamasin­naasaat, isikkuat, kinaassusiat inuunermilu misigisimasaat – eqqaamasinnaavai.

9. Sooq siunissami Jehovap toqusimasunik makititsinissaa upperaajuk?

 ⁹ Jehova siunissami toqusimasunik makititsinis­saminut kissaateqarlunilu pissaaneqarmat neriorsuutaa upperil­luinnarsin­naavarput. Neriorsuutip upperinissaanut aamma allamik uppernarsaateqarpoq. Jehova toqusimasunik makititsisareer­nikuuvoq. Itsaq angutit aalajaatsut amerlan­ngitsut, ilaatigut Jiisusi, toqusimasunik makititsinissaanut pissaaneqalersippai. Jiisusip makititsinerisa ilaat Johannesi kapitali 11-mi oqaluttuarineqartoq misissoriartigu.

10. Jiisusi Jordanip ungataani oqaluus­sitillugu susoqarpa, aamma sua? (Johannesi 11:1-3)

¹⁰ Johannesi 11:1-3 atuakkit. Ukiup 32-p naalernerani Betaaniami pisut takorluukkit. Jiisusip ikinngutigilluagai Laazarusi qatanngutaalu Mariia Martalu tassani najugaqarput. (Luk 10:38-42) Laazarusili napparsimalermat qatanngutaasa isumakuluutigilerpaat. Jiisusi oqariar­tortitsivigaat, kuussuummi Jordanip ungataaniiippoq Betaaniamiit ullut marluk missaanni pisunnertut ungasitsigisumi. (Joh 10:40) Alianaraluar­tumilli oqariar­tortitsisoq Jiisusimut apuummat Laazarusi toqoreersimavoq. Jiisusip ikinngutigil­luakkani toqusimasoq nalunngik­kaluarlugu Betaaniamukan­nginnermini ulluni marlunni kuussuup Jordanip eqqaaniiginnarpoq. Taamaattumik Jiisusi Betaaniamut apuummat Laazarusi ulluni sisamani toqungareersimavoq. Guutip ataqqineqar­nissaanik kinguneqar­tussamik ikinngutini pillugit Jiisusi iliuuseqarusuppoq. – Joh 11:4, 6, 11, 17.

11. Ikinngutaal­luarneq pillugu oqaluttuamit suna ilikkarparput?

¹¹ Oqaluttuamit ikinngutaal­luarneq pillugu ilikkagaqarpugut. Una eqqarsaatigiuk: Mariia Martalu Jiisusimut oqariar­tortitsigamik oqanngillat Betaaniamukassasoq. Oqaannarput ikinngutigilluagaa napparsimasoq. (Joh 11:3) Laazarusi toqummat Jiisusip ungasianiit toqusunit makitis­sinnaagaluarpaa. Ikinngutinili Mariia Martalu orninniarlugit Betaaniamukarpoq. Illit aamma taamaattumik ikinnguteqarpit peqquneqan­ngikkaluarluni ikiuerusuttumik? Taava nalunngilat “annikil­liornermi” taanna tatigisin­naallugu. (Uss 17:17) Jiisusi ilaarlugu uaguttaaq allanut taamatut ikinngutaagisa! Nangillugu qanoq pisoqarnersoq sammeriartigu.

12. Jiisusip Marta qanoq neriorsorpaa, aamma sooq Martap upperisinnaavaa? (Johannesi 11:23-26)

¹² Johannesi 11:23-26 atuakkit. Martap paasivaa Jiisusi Betaaniap eqqaaniittoq. Tuaviorluni ornippaa naapikkamiullu ima oqarfigalugu: “Naalagaq, maaniis­simagaluaruit qatanngutiga toqusimas­sanngik­kaluarpoq.” (Joh 11:21) Ilumoorpoq Jiisusip Laazarusi ajorunnaarsis­sinnaagaluaraa. Jiisusili tupinnangaar­nerusumik iliuuseqar­niarpoq. Ima neriorsuivoq: “Qatanngutit toqusunit makititaassaaq.” Jiisusip neriorsuutini Martap upperinias­sammagu ima oqarfigaa: “Uanga toqusunik makititsisuul­lungalu inuussutaavunga.”  Tassa Guutimit pissaaneqalersin­neqarami Jiisusip toqusimasut inuulerseq­qissinnaavai. Siusinnerusukkut niviarsiaraq toqoqqammersoq makitis­simavaa aamma angut inuusuttoq ulloq taanna toquffianiugunartoq makitis­simallugu. (Luk 7:11-15; 8:49-55) Ullunili sisamani toqungareersoq timaalu tippareersimas­sagunartoq makitis­sinnaavaa?

13. Johannesi 11:32-35 allassimasutut Mariia allallu qiasut takugamigit Jiisusi qanoq qisuariarpa? (Aamma assiliaq takuuk).

¹³ Johannesi 11:32-35 atuakkit. Taava qanoq pisoqartoq takorlooriaruk. Laazarusip qatanngutaata Mariiap Jiisusi naapigiarpaa. Martatulli ima oqarpoq: “Naalagaq, maaniis­simagaluaruit qatanngutiga toqusimas­sanngik­kaluarpoq.” Taanna ilagisaalu aliasungaarput. Jiisusip qiasut takugamigit aliasungaalerpoq. Ikinngutini misigin­neqatigingaarlugit qullilivoq. Paasilluin­narsinnaavaa asasamik toqusoorneq qanoq annernar­tigisoq. Aliasun­nerannut pissutaasup atuukkun­naarsinnissaa qilanaarutigingaarpaa.

14. Mariiap aliasun­neranut Jiisusip qisuariar­neranit Jehova pillugu qanoq ilikkagaqarsin­naavugut?

¹⁴ Mariiap aliasun­neranut Jiisusip qisuariar­neranit ilikkarparput Jehova Guutiusoq misigin­neqataangaartoq. Sooq taama oqarsin­naavugut? Allaaserisap siuliani sammivarput Jiisusip Ataatami eqqarsar­tariaasia misigis­susiilu ilaaqqis­saartarai. (Joh 12:45) Tassa Jiisusi ikinngutini aliasuttut misigin­neqatigingaarlugit qullilimmat paasivarput Jehovap aliasuk­kaangatta nalligingaar­taraatigut. (Tuss 56:9) Guuterput misigin­neqataangaartoq qanillerusun­nerulerparput, ilaa?

15. Johannesi 11:41-44 allassimasutut Laazarusip iliviata eqqaani qanoq pisoqarnersoq nassuiaruk. (Aamma assiliaq takuuk).

¹⁵ Johannesi 11:41-44 atuakkit. Laazarusip ilivianut apuukkami Jiisusip ujarak illikaqquaa. Marta akerliliigaluarpoq oqarluni timaa tippareersimassasoq. Jiisusilli oqarfigaa: “Oqarfigeriin­nginnerpakkit upperuit Guutip pissaaneqangaarnera takussagit?” (Joh 11:39, 40) Taava qilammut qiviariarluni nipituumik qinuvoq. Pisussamut ataqqinaat tamaat Jehovamut tutsikkusuppaa. Taava  Jiisusi suaarpoq: “Laazarusi, anigit!” Taava Laazarusi ilivermiit anivoq! Jiisusi inuit allat ajornartutut isigisaattut iliuuseqarpoq. – Johannesi 11:17-imut studienote qallunaatuaniittoq takuuk.

16. Johannesi kapitali 11-mi oqaluttuaq uppernitsinnik qanoq nakussatsitsisarpa?

¹⁶ Johannesi kapitali 11-mi oqaluttuaq pissutigalugu makititaanissamik neriuut upperinerulerparput. Jiisusimmi Martamut neriorsuutaa una eqqaamajuk: “Qatanngutit toqusunit makititaassaaq.” (Joh 11:23) Ataatamisut Jiisusi neriorsuummik tamatuminnga eqquutititsinis­saminut kissaateqarlunilu pissaaneqarpoq. Qulliligami ersersippaa toqu aliasunnerlu atuukkun­naarsik­kusullugit. Laazarusilu ilivermit animmat Jiisusip uppernarsarpaa toqusunit makititsinis­saminut pissaaneqarluni. Aamma eqqarsaatigiuk Jiisusip Marta ima eqqaasimmagu: “Oqarfigeriin­nginnerpakkit upperuit Guutip pissaaneqangaarnera takussagit?” (Joh 11:40) Guutip toqusimasunik makititsinissaata eqquukkumaarnerata upperinissaanut pissutis­saqarluarpugut. Uppernerput allatigut qanoq nakussatsis­sinnaavarput?

17. Toqusunit makititaasimasut pillugit Biibilimi oqaluttuat atuaraangatsigit suut eqqaamasariaqarpagut?

¹⁷ Itsaq makititaasimasut pillugit atuarlutillu eqqarsaatigin­neqqissaartarit. Toqusunit maani nunarsuarmi inuunissamut makititaasimasut arfineq-pingasut Biibilimi oqaluttuarineqarput. c Taakku misissoq­qissaarsin­naavatit, taamaalior­tillutillu eqqaamajuk angutit, arnat meeqqallu oqaluttuarineqartut ilumut inuusimasut. Ilinniarfigisin­naasatit eqqumaf­figikkit eqqarsaatigalugulu oqaluttuat taakkua immikkut ersersikkaat Guuti toqusimasunik makititsinis­saminut kissaateqarlunilu pissaaneqartoq. Pingaar­nertullu Jiisusip makititaanera eqqarsaatigeq­qissaaruk, makititaasimasunimi taanna pingaar­nerpaavoq. Jiisusip makititaanera inunnit takunnittunit hundredilinnit  uppernarsar­neqarsimavoq, taamaat­tumillu upperinissaanut tunngavis­saqarluarpugut. – Kor 1. 15:3-6, 20-22.

18. Erinarsuutit toqusunit makititaanissamik neriuuteqalersitsisut qanoq atorluarsin­naavigit? (Aamma quppernerup ataani ilanngussaq takuuk).

¹⁸ Erinarsuutit toqusunit makititaanissamik neriuutilimmik imallit tusarnaartakkit, erinarsortakkit eqqarsaatigisarlugillu. d (Ef 5:19) Erinarsuutit taakku iluaqutigalugit makititaanissamik neriuut piviusutut isiginerulerlugulu upperinerulersin­naavarput. Taamaattumik erinarsorlugit sungiusakkit. Ilaqutariittullu Biibilimik misissueqatigiin­nissinni isumai eqqartor­tarsigit. Alanngaar­niarsarisakkit uummammiuliul­lugillu. Taamaalioruit misilin­neqaatit inuuninnik navianar­torsior­titsisinnaasut nalaakkukkit asasamil­luunniit toqukkut annaasaqaruit Jehovap anersaava iluaqutigalugu erinarsuutit taakku eqqaasin­naalissavatit tuppallersaatigalugillu nakussatsis­sutigis­savatit.

19. Makititaanissaq pillugu suut takorloorsin­naavagut? (Ungalusaq “ Qanoq aperissavigit?” takuuk).

¹⁹ Takorluuisarit. Paratiisissami inuunis­satsinnik takorluuisin­naaqqulluta Jehovap pinngor­tippaatigut. Qatanngut arnaq ima oqarpoq: “Paratiisissaq takorluungaarakku soorlulusooq ruusat sikkerartut naamasin­naallugit.” Takorlooruk angutit arnallu aalajaatsut Biibilimi oqaluttuarineqartut naapillugit. Kiap naapinnissaa qilanaaraajuk? Qanoq aperissaviuk? Aamma takorlooruk asasatit toqusimasut ilageqqiler­nissaat. Takoqqikkukkit iliuusissasi takorluukkit – oqaatsit siulliit, eqitaarneq nuannaar­nerullu pianik qiaqatigiinnersi.

20. Sunissat aalajangiusimaviuk?

²⁰ Jehovap toqusimasunik makititaanissamik neriorsuutaa qujamasuutigingaarparput! Qularutigin­ngissin­naavarput neriorsuut tamanna eqquukkumaartoq. Neriorsuutimmi eqquutsin­nissaanut Jehova kissaateqarlunilu pissaaneqarpoq. Neriuummik nuanningaartumik tamatuminnga upperin­ninnerput nakussatsit­tuarisigu! Taamaaliorutta Guutimut qanimut attaveqalissaagut, Taassumami tamatta ima neriorsorpaatigut: ‘Asasatit toqusunit makititaassapput!’