1, 2. Sooq kristumiut tanitat Romamiunut allakkat kapitali 8 soqutigingaarpaat?

ROMAMIUT 8:15-17 Jiisusip toquneranik eqqaaniaanerup nalaani immaqa atuarnikuuatit. Allassimaffinni taakkunani kristumiut tanitat toqujuitsutut qilaliarnissamik neriuuteqarlutik qanoq nalunngissinnaagaat nassuiarneqarpoq. Tanitat Romamiut 8:1-imi ‘Kristusi-Jiisusimiittutut’ allaatigineqarput. Romamiunulli allakkat kapitali 8 tanitanut taamaallaat atuuppa? Imaluunniit aamma nunarsuarmi naassaanngitsumik inuunissamik neriugisallit iluaqutigisinnaavaat?

² Tanitat eqqarsaatiginerullugit Romamiunut allakkat kapitali 8 allanneqarpoq. ‘Anersaamik’ tunineqaramik ‘qitornanngornissartik, timiminnit aniguisitaanissartik, erinigilerpaat’. (Rom 8:23) Aap, siunissami qilammi Guutimut qitornanngussapput. Jehovap utertitsissut tunngavigalugu ajortuliaat isumakkeerfigigamigit qitornamisut naapertuilluartuutippai. – Rom 3:23-26; 4:25; 8:30.

3. Sooq nunarsuarmi naassaanngitsumik inuunissamik neriugisallit aamma Romamiunut allakkat kapitali 8 soqutigisariaqarpaat?

 ³ Taamaattorli Romamiunut allakkani kapitali 4-mi Paulusip Aaperaat aalajaatsoq tanitaanngikkaluarluni Jehovamit naapertuilluartutut isigineqartoq allaatigaa. Aaperaat Jiisusip inuunerminik utertitsissutitut tunniussinera sioqquterujussuarlugu inuuvoq. (Romamiut 4:20-22 atuakkit). Ullumikkuttaaq kristumiut aalajaatsut nunarsuarmi naassaanngitsumik inuunissamik neriugisallit Jehovamit naapertuilluartutut isigineqarsinnaapput. Taakkua aamma Romamiunut allakkat kapitali 8-mi eqqaasitsissut iluaqutigisinnaavaat.

4. Romamiut 8:21-p atuarnerani imminut qanoq aperisariaqarpugut?

⁴ Romamiut 8:21-mi silarsuassap nutaap pilersinneqarnissaa inuillu ajortimit toqumillu aniguisinneqarnissaat pillugit Jehovap qulakkeerutaa atuarsinnaavarput. Tassani allassimavoq “kiffaanngissuseq Guutip qitornaasa naalannarsiffissami pisassaat” inuit nuannaarutigissagaat. Silarsuassami nutaami inuullutit takorloorsinnaaviuk? Tassani inuulerumalluta susariaqartugut misissoriartigu.

5. Romamiut 8:4-13 Paulusip suna allaatigaa?

⁵ Romamiut 8:4-13 atuakkit. Romamiunut allakkat kapitali 8-mi Paulusip  “uinik malillugu inuusut” aamma ‘anersaaq malillugu inuusut’ allaatigai. Inuit ilaat isumaqartarput Paulusip kristumiuunngitsut kristumiullu allaatigigai. Matumanili Paulusip kristumiut, ‘illernartooqqullugit qaaqqusaasut’, allaffigai. (Rom 1:7) Taamaattumik “uinik malillugu inuusut” aamma ‘anersaaq malillugu inuusut’ kristumiuupput. Qanoq assigiinngissuteqaramik?

6, 7. (a) Biibilimi oqaaseq “uinik” qanoq isumaqarsinnaasarpa? (b) Oqaaseq “uinik” Romamiut 8:4-13 qanoq atorneqarpa?

⁶ Biibilimi oqaaseq “uinik” assigiinngitsunik isumaqartarpoq. Ilaannikkut timimut innersuussutaasarpoq. (Rom 2:28; 1 Kor 15:39, 50) Aamma ilaqutariinnut innersuussutaasinnaavoq. Assersuutigalugu Biibilimi allassimavoq Jiisusi “uinikkut eqqarleriinnit Daavikkunnit” pisuusoq. – Rom 1:3.

⁷ Taamaattumik Romamiut 8:4-13 ‘uinik malillugu inuuneq’ Paulusip allaatigisaa qanoq paasisariaqarpa? Tamanna akissutissarsiumallugu Romamiut 7:5 atuarsinnaavarput. Paulusi allappoq: “[Taamani] uinimmiikkallaratta pilerissutsit ajortuliuutaasut inatsisit saqqummersitaasa avativut sunnertarpaat.” Matumani Paulusip nassuiarpaa “uinik malillugu inuusut” tassaasut pilerissusipiluminnik eqqarsaatiginnittuartut piumasaannarmittullu iliortartut.

8. Sooq Paulusip kristumiut tanitat ‘uinik malillugu inuuneq’ pillugu mianersoqquai?

⁸ Sooq Paulusip kristumiut tanitat  ‘uinik malillugu inuuneq’ pillugu mianersoqquai? Aamma sooq nalitsinni kristumiut mianersoqqussut taanna eqqarsaatigisariaqarpaat? Guutimut kiffartortup aalajaatsup kialuunniit pilerissutsini inuunermini pingaarnerpaatilersinnaagamigit. Assersuutigalugu Paulusi allappoq Romami qatanngutit ilaasa kajungerisatik ‘kiffartorfigigaat’. Taamatut allannermigut atoqatigiinnermik, nerinermik allanilluunniit inuunerminni pingaarnerpaatitsilernerat pisimasinnaavaa. (Rom 16:17, 18; Fil 3:18, 19; Jud 4, 8, 12) Aamma piffissap ilaani Korinthimi ilagiinni qatanngut angut ‘ataatami nulia inooqatigalugu’ kinguaassiuutitigut inuunerluttarpoq. (1 Kor 5:1) Kristumiut ‘uinik malillugu inuuneq’ pillugu Paulusimit mianersoqquneqartariaqarnerat paasinarpoq. – Rom 8:5, 6.

9. Romamiut 8:6-imi suna pineqanngila?

⁹ Mianersoqqussut taanna aamma nalitsinni atuuppoq. Allaat inuit ukiorpassuarni Jehovamut kiffartorsimasut ‘uinik malillugu inuulersinnaapput’. Taava imaappa nerisassat, suliffeqarneq, aliikkutassat asanninnerluunniit eqqarsaatiginngisaannassagivut? Soorunami naamik. Taakku inuunermi nalinginnaapput. Allaat Jiisusip nerineq allanillu nerisitsineq nuannarisarpaa. Aamma qasuersaartariaqartarpoq. Aamma Paulusi allappoq aappariinnermi atoqatigiinneq pingaaruteqartoq.

10. ‘Kajungerneq’ qanoq paasisariaqarpa?

¹⁰ ‘Uinimmut atasunik kajungerneq’ Paulusip allaatigisaa qanoq paasisariaqarpa? Grækerit oqaasiat Paulusip atugaa aalajangersimasumik eqqarsaatiginnittuarnermut pilersaarusiornermullu innersuussutaavoq. Misissueqqissaartartoq oqarpoq matumani namminissarsiorlutik pilerissutsiminnik “pingaartitsingaartut oqaluuserinnittuartullu” pineqartut. Taakku pilerissutsiminnit aqunneqarput.

11. Suut pingaartippallaalersinnaavavut?

¹¹ Romami kristumiut imminut misissortariaqarlutillu sunik kajungerisaqarnerlutik paasiniartariaqarpaat. “Uinimmut atasut” kajungerisarpaat? Uaguttaaq suut pingaarnerpaatinnerlugit eqqarsaatigisariaqarparput. Suna oqaluuserissallugu nuannarinerpaavarput? Sulerissalluta nuannarinerpaavarput? Immaqa ilaasa viinninik assigiinngitsunik misileraaneq, angerlarsimaffimmik kusassaaneq, nutaanik atisartaartorneq, aningaasaliisarneq feeriamilluunniit pilersaarusiorneq kisiat eqqarsaatigisarlugu paasissavaat. Tamakku ajortuunngitsut immaqa inuunitsinni nalinginnaapput. Assersuutigalugu Jiisusi katittorsiornermi viinniliorpoq, Paulusillu Timotheusi naarissaatitut ‘viinnisulaartaqquaa’. (1 Tim 5:23; Joh 2:3-11) Viinnili inuunerminni pingaarnerpaatinngilaat. Uagummi? Suna inuunitsinni soqutiginerpaavarput?

12, 13. Sooq kajungerisanut tunngatillugu mianersortariaqarpugut?

¹² Paulusi ima mianersoqqusivoq:  “Uinngup kajungernera toqussutaavoq.” (Rom 8:6) Matumani suna pivaa? ‘Uinik malillugu inuugutta’ Jehovamut attaveqarnerput siunissamullu neriuuterput annaasinnaavavut. Taamatulli pisoqartariaqanngilaq. Inuk allanngorsinnaavoq. Korinthimi kinguaassiuutitigut inuunerluttoq ilaajunnaarsitaasimasoq eqqaamaviuk? Allanngorpoq atoqatigiinnermillu pilerissusipiluni malillugit inuujunnaarluni. Taamaalilluni minguitsumik Jehovamut kiffartoqqilerpoq. – 2 Kor 2:6-8.

¹³ Angut Korinthimiu ‘uinik malillugu inuugami’ ajortorujussuarmik ileqqoqaraluarluni allanngorpoq. Taamaattumik kristumiu Jehovap najoqqutassiaanik maleruaajunnaarluni pilerissusipiluni ajortut malillugit iliuuseqartalersimasoq aamma allanngorsinnaavoq. Paulusip mianersoqqussutaa eqqaamagutsigu pisariaqartumik allannguinissamut piumassuseqarsinnaavugut.

14, 15. (a) Paulusip sunik eqqarsaateqaqqulluta kajumissaarpaatigut? (b) ‘Anersaaq malillugu inuuneq’ qanoq paasisariaqanngila?

¹⁴ “Uinngup kajungernera” pillugu Paulusi mianersoqqusereerluni ima nassuiaavoq: “[Anersaap] kajungernera inuussutaallunilu eqqississutaavoq.” Akissarsiaq nuanningaarami!

¹⁵ Imaanngilarli ‘anersaaq malillugu inuusup’ piviusorsiortuunani Jehova Biibililu taamaallaat oqaluuserisassagai. Assersuutigalugu kristumiut siulliit nalinginnaasumik inuuneqarput. Nerineq imernerlu, katinneq, ilaqutartaarneq sulinerlu nuannaarutigisarpaat. – Mark 6:3; 1 Th 2:9.

16. Paulusip inuunermini suna pingaarnerpaatippaa?

¹⁶ Paulusilli kristumioqataasalu tamakku inuunerminni pingaarnerpaatilernissaat mianersuutigaat. Assersuutigalugu Paulusi tupiliortartuusoq nalunngilarput. Paulusilli suliffini inuunermini pingaarnerpaatinnagu Guutimut kiffartornini pingaarnerpaatikkamiuk oqaluussineq ilinniartitsinerlu salliutittarpai. (Apustilit Suliaat 18:2-4; 20:20, 21, 34, 35 atuakkit). Qatanngutit Romamiut Paulusi ilaartariaqarpaat, aamma uagut taamaaliortariaqarpugut. – Rom 15:15, 16.

17. ‘Anersaap kajungernera’ malillugu inuuneq qanoq iluaqutaasinnaava?

¹⁷ Jehovamut kiffartornermik pingaarnerpaatitsineq qanoq iluaqutaasinnaava? Romamiut 8:6-imi allassimavoq: “[Anersaap] kajungernera inuussutaallunilu eqqississutaavoq.” Jehovap anersaavanit siulersortinneq taassumatullu eqqarsartaaseqarneq ‘anersaap kajungernera’ malillugu inuunermut ilaapput. Jehovap maannangaaq nuannersumik nalerisimaarnartumillu aamma siunissami naassaanngitsumik inuuneqalernissatsinnik neriorsorpaatigut.

18. ‘Anersaap kajungernera’ qanoq eqqissisitsisarpa?

 ¹⁸ Paulusip ‘anersaap kajungernera eqqississutaaneraramiuk’ suna pivaa? Kikkut tamarmik eqqissisimasumik atugaqarnissartik, ingammik isumakkut eqqissisimanissartik, kissaatigisarpaat – ikittuinnaalli tamanna misigisarpaat. Jehovap ikiuineratigut isumakkut piviusumik eqqissineq misigisinnaavarput. Aamma ilaquttavut ilagiinniittullu eqqisseqatigisinnaavavut. Naammalluinnanngitsuugatta ilaannikkut qatanngutivut isumaqatiginngissinnaasarpavut. Taamali pisoqaraangat Jiisusip siunnersuutaa una maleruartarparput: “Qatanngutit saammaakkiartoqqaarallaak.” (Matt 5:24) Eqqaamajuk aamma qatanngutivit Jehova, ‘Guuti eqqissisitsisoq’, kiffartorfigimmassuk. – Rom 15:33; 16:20.

19. Eqqissineq asseqanngitsoq suna nuannaarutigisinnaavarput?

¹⁹ ‘Anersaap kajungernera’ malillugu inuugutta aamma Guuti eqqisseqatigissavarput. Jehovap pilluaqqusinera pillugu pruffiiti Esaja ima allappoq: ‘Aalajaatsumik piumassusillit eqqissisippatit tatigimmatsit.’ – Es 26:3; Romamiut 5:1 atuaruk.

20. Sooq Romamiunut allakkat kapitali 8-mi eqqaasitsissut qujamasuutigaajuk?

²⁰ Nunarsuarmi naassaanngitsumik inuunissamik toqujuitsutulluunniit qilaliarnissamik neriugisaqaraluarutta Romamiunut allakkat kapitali 8-mi eqqaasitsissut isumassarsiarititaasoq iluaqutigisinnaavarput. Pilerissutsitsinnik salliutitsinata Jehovamut kiffartornermik pingaarnerpaatitsinissamik Biibilimi kajumissaarneqarnerput qujamasuutigaarput. Nalunngilarput ‘anersaaq malillugu inuunitsigut’ nuannerluinnartumik akissarsisinneqassalluta. Paulusi ima allappoq: ‘Guutip tunissutaa tassaavoq inuuneq naassaanngitsoq Kristusi-Jiisusimi Naalakkatsinni.’ – Rom 6:23.