1, 2. (a) Asanninneq uppernerlu qanoq ataqatigiippat? (b) Apeqqutit suut sammissavavut?

ATAATATTA, Jehovap, kiffani ilumoorfiginnittut akissarsisinniarlugit neriorsorpai. Tamanna Jehovap asanninnerminik ersersitseriaasiisa ilagaat, aamma asavarput “taassuma asaqqaarmatigut”. (1 Joh 4:19) Jehovamik asanninnerujartortilluta uppernikkut nukittunerujartortarlutalu Jehovap asannitsiminik akissarsisitsiumaarnera upperinerujartuinnartarparput. – Hebræerit 11:6 atuaruk.

² Jehova akissarsisitsisartuuvoq. Kinaassusianut iliuuserisartagaanullu tamanna pingaaruteqarpoq. Ujarlersiminik akissarsisitsiumaarnera qularigutsigu Guuti tamakkiisumik upperisinnaanngilarput. Sooq? ‘Upperneq tassaammat neriugisamik tatiginnilluinnarneq.’ (Hebr 11:1) Upperneq tassaavoq Guutip ilumoorfiginnitsiminik pilluaqqusiumaarneranik tatiginnilluinnarneq. Akissarsisinneqarnissamilli neriuut qanoq iluaqutigisarparput? Jehovap kiffani itsaq nalitsinnilu qanoq akissarsisittarpai? Tamanna sammeriartigu.

3. Malaki 3:10-mi qanoq neriorsuuteqarpa?

³ Jehovap Guutip kiffani aalajaatsut akissarsisinniarlugit neriorsorpai. Pitsaanerpaamik imminut tunniusseqqulluta pilluaqqusiumaarnerminillu tatiginneqqulluta kajumissaarpaatigut. Ima oqarpoq: “Misilinniarsinga qilaap igalaavi ammassanerikka ilissinnut pilluaatissanillu killeqanngitsunik kueraaffigalusi.” (Mal 3:10) Jehovap misileqqulluni kajumissaarutaa malillugu iliuuseqaraangatta qujamasunnerput ersersittarparput.

4. Sooq Matthæusi 6:33-mi Jiisusip neriorsuutaa tatigisinnaavarput?

⁴ Jiisusip ajoqersukkani naalagaaffimmik salliutitsisut Guutimit isumassorneqarumaarnerannik neriorsorpai. (Matthæusi 6:33 atuaruk). Guutip neriorsuutai piviusunngortuaannartut nalunnginnamiuk Jiisusi taama oqarsinnaavoq. (Es 55:11) Taamaattumik Jehovamut uppernerput ersersittuarutsigu ima neriorsuinermisut iliorumaartoq qularinngilluinnarsinnaavarput: “Iperassanngilakkit imminiiginnassanallu.” (Hebr 13:5) Jehovap neriorsuutaa tamanna Matthæusi 6:33-mi Jiisusip oqaasiinik tatiginninnissamut iluaqutigaarput.

5. Sooq Jiisusip Petrusimut akissutaa tamatsinnut tuppallernarpa?

⁵ Apustilip Petrusip taamaalluni Jiisusi ima aperaa: “Uagut suut tamaasa qimallugit malippatsigit; sunami taava pisassaraarput?” (Matt 19:27) Taama aperinera  pillugu Jiisusip Petrusi naqqinnagu ajoqersukkat pilliuteqarnitik pillugit akissarsisinneqarumaarnerannik oqarfigai. Apustilit aalajaatsullu allat siunissami Jiisusi qilammi naalakkersueqatigissavaat. Jiisusili aamma oqarpoq maanna akissarsiassaqartoq: “Kinaluunniit illuminik, qatanngutiminik angutinik arnanillu, ataataminik anaanaminillu, qitornaminik narsaamminilluunniit atera pillugu qimatsisimasoq pissarseqqissaaq 100-riaammik inuunerlu naassaanngitsoq kingornutissallugu.” (Matt 19:29) Nalitsinni Jiisusip ajoqersugai tamarmik ilagiinni ataataqalersinnaapput, anaanaqalersinnaapput, qatannguteqalersinnaapput qitornartaarlutillu. Guutip naalagaaffia pillugu pilliutigisatsinnit tamanit tamanna naleqarnerungaarpoq.

6. Sooq Jehovap kiffani akissarsisinniarlugit neriorsorpai?

⁶ Maanna pilluaqqussuterpassuit nuannaarutiginerisa saniatigut siunissami suli annerungaartumik akissarsisinneqarnissaq qilanaarisinnaavarput. (1 Tim 4:8) Jehovap kiffaminik aalajaatsunik akissarsisitsinissamik neriorsuutaa pissutsini erloqinartuni pinertusaarnissamut iluaqutigisarparput. Jehovap ‘ujarlersiminik akissarsisitsisarnerata’ qularinngilluinnarneratigut aalajaattuarsinnaavugut. – Hebr 11:6.

7. Neriunneq qanoq kitsatut ippa?

⁷ Jiisusi qaqqami oqaluutsimini ima oqarpoq: “Tipaatsugitsi nuannaarlusilu akissarsiassarsi qilanniittoq angeqimmat; taamatuttaarmi pruffiitit qinugisarpaat ilissi siunissigut.” (Matt 5:12) Guutip kiffaasa ilaat qilammi akissarsiassartik pissavaat. Allallu nunarsuarmi naassaanngitsumik inuunermik akissarsisinneqassapput. Tamanna aamma ‘tipaatsunnissamut nuannaarnissamullu’ pissutaasut ilagaat. (Tuss 37:11; Luk 18:30) Qanorluunniilli neriugisaqaraluarutta neriugisarput ‘tarnimut kitsatut aalariartitassaanngitsutut isumannaatsutullu issinnaavoq’. (Hebr 6:17-20) Anorersuartumi kitsap umiarsuarmik uninngatitsisinnaaneratut upperluarnerput aalajaattuarnissamut iluaqutigisinnaavarput. Pissutsini erloqinartuni pinertusaarnissamut nakussatsissutigisinnaavarput.

8. Neriuuterput qanoq isumakuluppallaarunnaassutigisarparput?

⁸ Neriuuterput isumakuluppallaarunnaarnissamut iluaqutigisinnaavarput. Tarngutip anniarpallaarunnaarnissamut iluaqutaasarneratut Guutip neriorsuutai uummatikkut eqqissisimanissamut iluaqutigisinnaavavut. Nanertuutigisavut Jehovamut tunniukkutsigit taassuma isumagiumaaraatigut nalunagu tuppallernarpoq. (Tuss 55:23) Guuti ‘paasisinnaasavut akimungaarlugit  iliorsinnaasoq’ qularinngilluinnarsinnaavarput. (Ef 3:20) Jehovap naammattumik sinnilimmilluunniit ikiuinnarnata ‘paasisinnaasavut akimungaarlugit’ ikiussavaatigut!

9. Jehovamit pilluaqquneqarumalluta susariaqarpugut?

⁹ Akissarsisinneqarumalluta Jehova upperilluinnartariaqarlugulu ilitsersuutai naalattariaqarpavut. Mosesip Israelikkut ima oqarfigai: “[Nunami] Naalakkap Guutivit agguagassarsiarititassaani pigisassanngortitassaanilu [pilluaqquneqangaarumaarputit] – Naalagaq Guutit naalakkukku peqqussutillu ullumi tunniussakka tamaasa maleruaqqissaarlugit. Naalakkap Guutivit neriorsuisimanermisut pilluaqquaatit.” (5 Mos 15:4-6) Aalajaallutit kiffartorfigiuarunni Jehovap pilluaqqujumaaraatit upperilluinnarpiuk? Tamatuma upperinissaanut pissutissaqarluarputit.

10, 11. Jehovap Josefi qanoq akissarsisippaa?

¹⁰ Biibili uatsinnut iluaqutissatut allagaavoq. Tassani itsaq Guutip kiffaminik aalajaatsunik akissarsisitsisarneranik oqaluttuarpassuit atuarsinnaavavut. (Rom 15:4) Tamatumunnga tunngatillugu Josefi assersuutissaalluarpoq. Taanna inussiatut qatanngutiminit tunineqarpoq. Kingusinnerusukkut naalakkami nuliata sallulluni unnerluutigimmani Egyptenimi parnaarussaavoq. Josefi parnaarussaaqqanermini Jehovamit ungasilliva? Naamerluinnaq! Biibilimi ima allassimavoq: Jehovap “Josefi najorpaa ajunngitsuliorfigalugulu,” aamma ‘Jehovap Josefi najorpaa suliarisaanillu iluatsitsisittarlugu.’ (1 Mos 39:21, 23) Erloqinartorsioraluarluni Josefip erinitsajuilluni Guutini utaqqiuarpaa.

¹¹ Ukiut arlallit qaangiummata Faraop Josefi inussiaq maniguuttoq parnaarussivimmit iperagaateriarlugu Egyptenimi naalakkersuisumut pissaaneqarnerpaamut tullersortinngortippaa. (1 Mos 41:1, 37-43) Nuliami marlunnik ernertaammani “Josefip angajulleq Manassemik atserpaa ima oqarami: ‘Guutip erloqissutinnik tamanik ataatamalu illuaniittunik tamanik puigortippaanga.’ Nukaa Efraimimik atserpaa ima oqarami: ‘Guutip nunami naalliuffinni qitornartaarsinnaalersippaanga.’” (1 Mos 41:51, 52) Josefi ilumoorfiginnikkami Jehovamit akissarsisinneqarlunilu Israelikkunnik Egyptenimiunillu kaannersuarmit aniguisitsivoq. Jehovap akissarsisillunilu pilluaqqugaani Josefip aamma nalunngilaa. – 1 Mos 45:5-9.

12. Jiisusi misilinneqarnermini qanoq aalajaattuarpa?

¹² Jiisusi Kristusi aamma misilinneqangaarnermini Guutimut naalattuarami akissarsisinneqarpoq. Aalajaannissaminut suna iluaqutigaa? Guutip oqaasiani allassimavoq: “Nuannaarnissaq siunerminiittoq pillugu sanningasulik [nappagaq anniartitaaffik, NW] naammagalugu atorpaa kanngunarsaataanera soqutiginagu.” (Hebr 12:2) Guutip aqqanik  illernarsisitsisinnaanini Jiisusip nuannaarutigingaarpaa. Aamma Ataataminit akuerineqarnermigut amerlasuunillu nuannersunik immikkut pisinnaatitaaffilerneqarnermigut akissarsisinneqarpoq. Biibilimi allassimavoq “Guutip issiavissaarsuata talerpiata tungaani” issiasoq. Aamma allassimavoq “atermik akimuisumik tamanik” Guutimit tunineqarnermigut akitsisitaangaartoq. – Fil 2:9.

13, 14. Kiffartornitsinni iliuutsivut Jehovap qanoq isumaqarfigai?

¹³ Kiffartornitsinni iliuutsivut tamaasa Jehovap pingaartikkai qularinngissinnaavarput. Ajukkunnerput sapiunnerpullu paasisinnaavai. Suliffipput ilaquttatsinnilluunniit pilersuinerput pillugu isumakulukkaangatta misiginneqatigingaartarpaatigut. Aamma napparsimanerput isumatsaqqangaarnerpulluunniit pissutigalugu kiffartornermi siornatigutut iliuuseqartigisinnaannginnerput paasisinnaavaa. Ajornartorsiuteqaraluarluta aalajaattuarnerput Jehovap pingaartikkaa qularinngilluinnarsinnaavarput. – Hebræerit 6:10, 11 atuakkit.

¹⁴ Eqqaamajuttaaq Jehovap ‘qinnutitsinnik tusartartup’ isumakuluutitsinnut tusarnaarumaarnera qularinngissinnaagakku. (Tuss 65:3) ‘Ataatap nallittuisup Guutillu tuppallersaajuartup’ misigissutsikkut anersaakkullu pisariaqartitatsinnik sunilluunniit, ilaatigut qatanngutit aqqutigalugit, tunerusuppaatigut. (2 Kor 1:3) Allanut misiginneqatiginnittuunerput Jehovap iluaraa. ‘Nikanartumut naakkinnittup Naalagaq atukkerpaa, taassumalu akilerumaarpaa angajoqqaatsernerata nalissaanik.’ (Uss 19:17, tastamantitoĸaĸ; Matt 6:3, 4) Qatanngutivut namminissarsiorata ikioraangatsigit Jehovap ajunngitsuliavut imminit taarserneqartussatut isigisarpai. Taamatullu inussiarnisaarnerput pillugu akissarsisinniarluta neriorsorpaatigut.

15. Akissarsiassat suut qilanaaraagit? (Allaaserisap aallaqqaataani assiliaq takuuk).

¹⁵ Kristumiut tanitat ‘niaqorusiussassamik iluarsutsip pianik’ Jiisusimit akissarsisinneqarnissartik neriuutigaat. (2 Tim 4:7, 8) Taakkunatulli neriuuteqanngikkaluarlutit Guutimit pingaartinneqarputit. Jiisusip ‘savaataasa allat’ millionillit siunissami nunarsuarmi paratiisimi naassaanngitsumik inuuneqalernissartik qilanaaraat. Taakkua ‘pilluangaarnertik nuannaarutigissavaat’. – Joh 10:16; Tuss 37:11.

16. Johannesip allagai siulliit 3:19, 20-milu qanoq tuppallernartumik allassimasoqarpa?

¹⁶ Ilaannikkut Jehovamut kiffartornermi iliuuseqarpianngitsutut misigisarsinnaallutaluunniit iliuutsivut Jehovamit iluarineqarnersut nalornissutigisarsinnaavarput. Immaqa allaat akissarsisinneqarnissamut ajukkuttarpugut. Puiunngisaannassavarpulli ‘Guuti uummatitsinnit annerusoq suullu tamaasa ilisimallugit’. (1 Johannesi 3:19, 20 atuakkit). Upperneq asanninnerlu tunngavigalugit Jehova kiffartorfigigutsigu, allaat iliuutsivut naleqarpianngitsutut isigigaluarutsigit, akissarsisinneqarnissarput qularinngissinnaavarput. – Mark 12:41-44.

17. Pilluaqqussutit ilaat maannangaaq nuannaarutigisinnaasavut suuppat?

 ¹⁷ Allaat Saatanip pissutsinik aaqqissuussinerata ajortup ulluisa kingulliit nalaanni makkunani Jehovap innuttani pilluaqqusarpai. Nunarsuaq tamakkerlugu qatanngutigiissuartut ilisimasaqangaalernissarput pilluangaarnissarpullu isumagisarpaa. (Es 54:13) Aap, Jiisusip neriorsuineratut Jehovap nunarsuaq tamakkerlugu qatanngutinik asannittunik maannangaaq pilluaqqusarpaatigut. (Mark 10:29, 30) Aamma ilumoorlutik Guutimik ujarlersut qamuuna eqqissinermik, nalerisimaarnermik pilluarnermillu akissarsisinneqartarput. – Fil 4:4-7.

18, 19. Jehovap kiffaasa akissarsiatik qanoq isumaqarfigaat?

¹⁸ Jehovap kiffani nunani tamalaaniittut nuannersunik akissarsisittarpai. Assersuutigalugu Bianca Tysklandimiu ima oqarpoq: “Isumakuluutinnik ikiortarmanga najortarmangalu Jehova assorsuaq qujamasuffigaara. Silarsuarmi inuit paatsiveqarnatillu neriuuteqanngillat. Jehovamilli qanimut suleqateqarninni toqqissisimasutut misigisarpunga. Arlaannik pilliuteqarfigigaanganni 100-riaammik pilluaqqusarpaanga.”

¹⁹ Imaluunniit Paula Canadamiu 70-inik ukiulik qimerlummigut spina bifidamik nappaateqarnini pissutigalugu killilimmik pisinnaasalik eqqarsaatigiuk. Oqaluttuarpoq nappaatini pissutigalugu nikippiarsinnaanngikkaluarluni oqaluussiniartuarluni. Ima nangippoq: “Oqaluusseriaatsit assigiinngitsut, soorlu oqarasuaatikkut aamma torrutiinnarlugu oqaluussineq, atorluartarpakka. Allassimaffiit Biibililersaarutinilu oqaaseqatigiit tuppallernartut qupperallattaasarniassagakkit allattortarpakka. Allattaavik ‘Aniguinissamut Allattaavittut’ taasarpara. Jehovap neriorsuutai isiginiarnerugutsigit nikallunganeq sivikitsutut isigissavarput. Jehovap atukkavut apeqqutaatinnagit najortuarpaatigut.” Atukkatit Biancap Paulallu atugaannit immaqa allaanerujussuupput. Jehovali ilinnik qanigisannillu qanoq akissarsisitsisimasoq pillugu eqqaasaqarsinnaassaatit. Maanna siunissamilu Jehovamit akissarsiassat eqqarsaatigisarnerat iluaqutaangaartarpoq!

20. Aalajaalluta Jehovamut kiffartortuarutta suna qilanaarisinnaavarput?

²⁰ Puiunngisaannaruk qamannga pisumik qinujuaruit ‘angingaartumik akissarsisinneqassagavit’. “Guutip piumasaa” malillugu iliuuseqaruit ‘neriorsuutigisaata pissarsiarinissaa’ qularinngissinnaavat. (Hebr 10:35, 36) Taamaattumik sapinngisatsinnik uppernerput ineriartortittuarlugulu Jehovamut kiffartortuarisa. Jehovap akissarsisikkumaaraatigut qularinngilarput! – Kolossemiut 3:23, 24 atuakkit.