1, 2. (a) Sooq isumakuluuteqartarpugut? (Allaaserisap aallaqqaataani assiliaq takuuk). (b) Allaaserisami matumani suut sammissavavut?

ULLUNI erloqinartuni inuuvugut. Saatani “løvitut uiannisaartutut angalasarpoq iisassarsiorluni”. (1 Petr 5:8; Saqq 12:17) Taamaattumik allaat Guutimut kiffaagaluarluta isumakuluuteqartarnerput tupinnanngilaq. Itsaq Guutip kiffai aamma isumakuluuteqartarput. Assersuutigalugu Biibilimi allassimavoq kunngi Daavi isumakuluuteqartoq. (Tuss 13:3) Aamma apustili Paulusi ‘ilagiit tamaasa pillugit ernumassuteqarpoq’. (2 Kor 11:28) Isumakuluuteqarnerli pissutigalugu sapilersutut misigigutta qanoq iliorsinnaavugut?

² Ataatatta asannittup qilammiusup itsaq kiffani isumakuluppallaarunnaaqqullugit ikiorpai, aamma uagut taamatut ikiorusuppaatigut. Biibilimi ima kajumissaarneqarpugut: ‘Isumakuluutisi tamaasa taassumunnga pisissigit isumassormasi.’ (1 Petr 5:7) Qanorli taamaaliorsinnaavit? Iliuuserisinnaasavut sisamat uku sammissavavut:  (1) Qinuneq, (2) Guutip oqaasianik eqqarsaatiginneqqissaarneq, (3) Jehovap anersaavanit illernartumit siulersortinneq aamma (4) misigissutsit pillugit tatigisamik oqaloqateqarneq. Iliuuserineqarsinnaasut taakku sisamat samminerini taakkua ilaat pikkoriffiginerulersinnaanerlugit eqqarsaatigiuk.

3. ‘Nanertuutigisat Jehovamut’ qanoq ‘tunniussinnaaviuk’?

³ Isumakuluuterput Jehovamut pisikkumallugu iliuuserisinnaasarput siulleq tassaavoq qamannga pisumik qinuneq. Ataatavit asannittup qilammiusup isumakulunninni misigissutsinnik aniatitsivigissaginni kissaatigaa. Tussiaasiortup Daavip Jehova ima kimigiiserfigaa: “Tusaaniaruk qinnutiga.” Tussiaammi tassani Daavi aamma ima allappoq: “Nanertuutigisat Naalakkamut tunniuguk, taava isumagiumaarpaatit.” (Tuss 55:2, 23) Ajornartorsiut aaqqinniarlugu sapinngisannik iliuuseqareeruit uummammit pisumik Jehovamut qinuneq isumakulunnermit iluaqutiginerussavat. Qinunerli qanoq sunniuteqartarpa? Isumakulunneq pissutigalugu sapilersutut misigiunnaarnissamut qanoq iluaqutigisinnaavarput? – Tuss 94:18, 19.

4. Sooq isumakulunnermi qinusarneq pingaaruteqarpa?

⁴ Filippimiut 4:6, 7 atuakkit. Uummammik pisumik kimigiiserluta qinnutivut Jehovap qanoq akisarpai? Eqqissisimalernissamut nikallornartunillu eqqarsaateqarunnaarnissamut misigissuseqarunnaarnissamullu ikiorsinnaavaatigut. Guutip annilaangajunnaarluta qamuuna misigisimanngisaannakkatsitut eqqissisimanissamut ikiortarpaatigut. Qatannguterpassuit taamatut eqqissisimaneq misiginikuusaat aamma illit misigisinnaavat. ‘Eqqissineq Guutimit pisoq’ unamminiarnartunik sunilluunniit qaangiinissamut iluaqutigisinnaavat! Jehovap neriorsuutaa una upperilluinnarsinnaavat: “Erseqinak, uangaagama illit Guutit. Nakussatsippakkit ikiorlutillu.” – Es 41:10.

5. Guutip oqaasia qamuuna eqqissinissamut qanoq iluaqutigisinnaaviuk?

⁵ Qamuuna eqqissiniarluta iliuuserisinnaasatta aappaat tassaavoq Biibilimik atuarneq eqqarsaatiginneqqissaarnerlu. Sooq tamanna pingaaruteqarpa? Biibili Guutip oqaaserimmagu. Tassani Pinngortitsisitta ilisimassuseqangaartup siunnersuutai atoriaannaasut atuarsinnaavavut. Qanoq ilisukkulluunniit isumakululeraangavit Guutip eqqarsaatai siunnersuutaalu nakussatsinnartut eqqarsaatigeqqissaarsinnaavatit. Tamanna isumakulukkunnaarnissamut, isumakuluppallaarunnaarnissamut allaallu isumakuluttannginnissamut iluaqutigisinnaavat. Jehovap oqaatsiminik atuartarneq ‘ersiunnaarluni nikallungajunnaarlunilu tuppallernissamut pissatsinnissamullu’ atassuserpaa. – Jos 1:7-9.

6. Jiisusip oqaasii qanoq iluaqutigisinnaavigit?

⁶ Jiisusip inuit qanoq oqaluuttarai Guutip oqaasiani atuarsinnaavarput. Jiisusi, pingaartumik sanngiitsunut isumatsaqqasunullu, tuppallernartumik qiimmaallannartumillu oqaluttarmat inuit tusarnaassallugu nuannarisarpaat. (Matthæusi  11:28-30 atuakkit). Allat qanoq misiginersut Jiisusip soqutigingaartarpaa. (Mark 6:30-32) Apustiliminik angalaqatiminik ikiuinissamik neriorsuisimanermisut uagutsinnik ikiuiumaarpoq. Ikiorneqarumalluta Jiisusi ilagisariaqanngilarput. Jiisusi, qilammi kunngiusoq, uagutsinnik asanninnermik ersersitsiuarpoq. Taamaattumik isumakuluuteqarninni nallittussagaatit piffissarlu eqqorlugu ikiussagaatit qularinngissinnaavat. Jiisusip neriuutissillutalu nakussatsimmatigut isumakuluttarneq qaangersinnaavarput. – Hebr 2:17, 18; 4:16.

7. Guutip anersaava illernartoq qanoq iluaqutigisarparput?

⁷ Jiisusip neriorsorpaatigut Ataatatta anersaaminik illernartumik qinnuigigutsinni tuniumaaraatigut. (Luk 11:10-13) Iliuuserineqarsinnaasut pingajuat tamanna isumakuluppallaarunnaarnissamut qanoq iluaqutigisinnaavarput? Guutip anersaava illernartoq, imaluunniit nukinga sulisoq, Guutitsitut Ajugaqanngitsutut nuannersunik pissuseqalernissamut iluaqutigisarparput. (Kol 3:10) Pissuserineqartussat taakku Biibilimi ‘anersaap inerititaatut’ taaneqarput. (Galatiamiut 5:22, 23 atuakkit). Taakku ineriartortikkaangatsigit allanut attaveqarnerput pitsaanerulertarlunilu pissutsit isumakululissutigisinnaasavut ingalassimasarpavut. Anersaap inerititaa qanorpiaq iluaqutigisinnaallugu sammeriartigu.

8-12. Guutip anersaavata inerititaa qanoq iluaqutigisinnaaviuk?

⁸ “Asanninneq, nuannaarneq, eqqissineq.” Allat ataqqinnittumik pisarukkit isumakuluuteqannginnerulissaatit. Qanoq? Qatanngutigiittut asanninnermik, qamannga pisumik tunniusimanermik ataqqinninnermillu ersersitsisarnikkut pissutsit kamannermik, pakatsinermik nanertisimanermilluunniit kinguneqarsinnaasut pinngitsoortissinnaavatit. Tamanna allanik eqqisseqateqarnissamut ajornannginnerulersitsissaaq. – Rom 12:10.

⁹ “Kamajasuunnginneq, inussiarnisaarneq, ajunngitsuuneq.” Biibilimi ima allassimavoq: “[Immissinnut] ajunngitsuliorfigigitsi nallittuillusilu, isumakkeerfigeqatigiittaritsilu.” (Ef 4:32) Siunnersuut taanna maleruarutsigu allat eqqisseqatigissallugillu pissutsit isumakululersitsisinnaasut pinngitsoortissavavut. Aamma naammalluinnanngissuserput pissutigalugu ajornartorsiutaalersut aaqqinnissaat ajornannginnerulertarpoq.

¹⁰ “Upperneq.” (NW) Aningaasat pigisallu isumakuluutigikulasarpavut. (Uss 18:11) Tamakku qanoq isumakuluutiginaveersaarsinnaavavut? Apustilip Paulusip ‘pigisatsinnik naammaginninnissamik’ siunnersuutaa maleruartariaqarparput. Jehovamut upperluarneq taassuma pisariaqartitatsinnik asannilluni matussusiiumaarneranik tatiginninnissamut iluaqutigissavarput. Ima neriorsuivoq: “Iperassanngilakkit imminiiginnassanallu.” Taamaattumik Paulusitut ima oqarsinnaavugut: “Naalagaq ikiortigaara, sioorassanngilanga, inuup qanoq iliorfigisinnaagaminga?” – Hebr 13:5, 6.

¹¹ “Qanilaarneq imminullu naalakkersinnaaneq.” Qanilaarnerit imminullu  naalakkersinnaanerit qanoq iluaqutigitigissallugit eqqarsaatigiuk. Pissuserineqartussat taakku isumakululissutaasinnaasunik oqaaseqannginnissamut iliuuseqannginnissamullu iluaqutigissavatit, aamma ‘narrutsannginnissamut, puffajalinnginnissamut, kamannginnissamut, nipiliunnginnissamut mitalliinnginnissamullu’ iluaqutigissavatit. – Ef 4:31.

¹² ‘Guutip assaa pissarsuaq’ tatigiumallugu ‘isumakuluutitillu tamaasa taassumunnga pisikkumallugit’ maniguuttariaqarputit. (1 Petr 5:6, 7) Maniguukkuit Jehovap tapersersussallutillu isumassussavaatit. Suut iliuuserisinnaallugit suullu iliuuserisinnaanagit eqqumaffigigukku imminut tatigivallaalissanngilatit. Guuti tatigigakku isumakuluppallaarunnaassaatit. – Mika 6:8.

13. Jiisusip ‘isumakuluuteqannginnissamik’ siunnersuigami suna pivaa?

¹³ Matthæusi 6:34-mi Jiisusip ‘isumakuluuteqannginnissamik’ siunnersuutitsialaa atuarsinnaavarput. (Atuaruk). Tamatuma maleruarnissaa sapernarpasissinnaavoq. Jiisusilli suna pivaa? Daavip Paulusillu isumakuluuteqartarnerat sammereeratsigu Guutimut kiffartortup isumakulunngisaannarnissaa Jiisusip pisimanavianngilaa. Paarlattuanik Jiisusip ajoqersukkani pisariaqanngitsumik ingasattumilluunniit isumakulunnikkut ajornartorsiutit aaqqinneqarsinnaannginnerannik paasinninnissamut ikiorpai. Ullut tamaasa unamminiagassaqartarmat kristumiut ajornartorsiutigisimasamik siunissamiluunniit ajornartorsiutigiligassamik eqqarsaatiginerisigut isumakuluutiminnik amerlisitsinissartik mianersuutigisariaqarpaat. Jiisusip siunnersuutaa isumakuluppallaannginnissamut qanoq iluaqutigisinnaaviuk?

14. Daavitut qanoq isumakuluppallaarunnaarsinnaavit?

¹⁴ Ilaannikkut inuit siusinnerusukkut kukkussutigisimasatik isumakuluutigisarpaat. Allaat ukiorpassuit qaangiutereersut iliuuserisimasatik pillugit imminut pisuutingaartarput. Kunngi Daavi ilaannikkut kukkussutini pillugit nikallungangaartarpoq. Ima nassuerpoq: “Uummatima eqqissiveerunneranit nilliavunga.” (Tuss 38:4, 5, 9, 19) Tamatumani Daavip silatusaarluni Jehovap nallittussagaani  isumakkeerfigissagaanilu tatigilluinnarpaa. Guutillu isumakkeerfigigaani paasigamiuk Daavi nuannaalerpoq. – Tussiaat 32:1-3, 5 atuakkit.

15. (a) Daavi aamma qanoq ilinniarfigisinnaavarput? (b) Isumakuluppallaarunnaarumallutit susinnaavit? (Takuuk ungalusaq “ Isumakulunnermi siunnersuutitsialaat”).

¹⁵ Immaqa ilaanneeriarlutit pissutsit atukkatit isumakuluutigisarpatit. Assersuutigalugu Daavip Tussiaat 55 allakkamiuk toqutaanissani siooragaa. (Tuss 55:3-6) Isumakulunninili pissutigalugu Jehova tatigiunnaanngilaa. Ajornartorsiutiminut tunngatillugu Jehovamut ikioqqulluni kimigiiseraluarluni Daavip nammineq iliuuseqartariaqarnini pingaaruteqartoq nalunngilaa. (2 Sam 15:30-34) Daavi ilinniarfigisinnaavat. Isumakulunneq pissutigalugu sapilersutut misigilernak ajornartorsiut aaqqinniarlugu sapinngisannik iliuuseqariarlutit Jehovap isumagiumaaraatit tatigiuk.

16. Guutip atiata isumaa upperninnik qanoq nakussatsitsisinnaava?

¹⁶ Ilaannikkut kristumiup siunissami ajornartorsiutaalersinnaasut isumakuluutigisarpai. Sulili pinngitsut isumakuluutigisariaqanngilatit. Sooq? Amerlanertigut pissutsit ilimagisatsitut ajortigineq ajormata. Aamma eqqaamajuk Guutip pissutsit suulluunniit aqussinnaammagit. Ateq Jehova sunngorsinnaasutulluunniit isumaqartutut paasineqartarpoq. (2 Mos 3:14, NW) Taamaattumik Guutip inunnut siunertaasa tamarmik piviusunngorumaarnerat atiata isumaanit ersersinneqarmat siunissaq isumakuluutigisariaqanngilarput. Guutip aalajaatsut pilluaqqujumaarai aamma pisimasut, pissutsit maanna atuuttut siunissamilu pisussat pillugit isumakuluppallaarunnaaqqullugit ikiorumaarai qularinngissinnaavat.

17, 18. Isumakulunnermi oqaloqateqarluarneq qanoq iluaqutigisinnaaviuk?

¹⁷ Isumakulunnermi iluaqutigineqarsinnaasut sisamaat tassaavoq tatigisamik isertuarnani unneqqarissumillu oqaloqateqarneq. Aappavit, ikinngutigilluakkavit ilagiinniluunniit utoqqaanertap isumakuluutigisannik paasinnilluaqqullutit ikiorsinnaavaatit. “Isumakuluuteqarnerup inuup uummataa artorsaatissittarpaa, qiimmassaallunili  oqaaserisat nuannaalersittarpaat.” (Uss 12:25) Biibilimi aamma ima allassimavoq: “Isumalioqatigiittoqanngikkaangat pilersaarutit asuliinnartarput, amerlasuunilli siunnersuisoqarsimagaangat iluatsittarput.” – Uss 15:22.

¹⁸ Ilagiit ataatsimiittarneri isumakuluppallaannginnissamut aamma iluaqutigisarpavut. Sapaatit-akunneri tamaasa ataatsimiinnerni qatanngutitit ilinnik isumassuisut kajumissaarerusuttullu peqatigisarpatit. (Hebr 10:24, 25) Taamatut ‘kajumissaaqatigiinneq’ nakussatsissutigissallugulu eqqississutigissavat. – Rom 1:12.

19. Sooq qularinngissinnaaviuk Guutimut attaveqarnerit nakussatsissutigissallugu?

¹⁹ Isumakuluutip Jehovamut pisinnissaata pingaaruteqarluinnarnera Canadami utoqqaanertap paasivaa. Annilaangarujussuartarlunilu ilinniartitsisutut ilinniartunillu siunnersuisartutut sulinini pissutigalugu ulapittartorujussuuvoq. Nukittunissaminut suna iluaqutigaa? Jehovamut attaveqarnermi nakussatsinnissaa sunit tamanit sulissutiginerpaavaa. Aamma ikinngutaalluartut erloqinartorsiornermini ikiortigilluartarlugillu nuliani misigissutsiminik aniatitsivigisarpaa. Tamatuma saniatigut utoqqaanertaqataasa ilagiinnillu nakkutilliisup Jehovatut isiginnittaaseqaqqullugu ikiorpaat. Aamma nakorsap nappaatiminik paasinnilluarnissamut ikiormani qasuersaarnissamut timersortarnissamullu pilersaarusiorpoq. Piffissap ingerlanerani annilaangasarnini aqussinnaaleriartorpaa. Pissutsinut aqussinnaanngisaminut tunngatillugu Jehovap ikiorumaaraani tatigisarpaa.

20. (a) Isumakuluutivut qanoq Guutimut pisissinnaavavut? (b) Allaaserisap tulliani suna sammissavarput?

²⁰ Allaaserisami matumani Jehovamut qinunikkut aamma oqaasianik atuartarnikkut eqqarsaatiginneqqissaartarnikkullu isumakuluutitta taassumunnga pisinnissaasa pingaaruteqassusia paasivarput. Aamma paasivarput Jehovap anersaavanit illernartumit siulersortinneq, tatigisamik oqaloqateqarneq kristumiullu ataatsimiinnerini najuuttarneq pingaaruteqarluinnartut. Allaaserisami tulliuttumi Jehovap akissarsisinneqarnissamik neriuutissiinermigut qanoq ikioraatigut sammissavarput. – Hebr 11:6.