1, 2. Romamiut 5:12 qanoq iluaqutigisinnaavarput?

ROMAMIUT 5:12-imi allassimavoq: “Soorlu inukkut ataasiinnakkut ajorti silarsuarmut tikiuttoq ajortikkullu toqu tikiulluni, taamatut toqu inunnut tamanut annguppoq tamarmik ajortuliormata.” Allassimaffik taanna nalunngilluagarput inuit Biibili pillugu ilinniartikkaangatsigit atukulasarparput.

² Allassimaffik taanna atuakkami Biibilimi sorpiaat ajoqersuutigineqarpat?-mi arlaleriarluni atorneqarpoq. Qitornavut allallu kapitalinik 3-mik, 5-imik aamma 6-imik atuaqqissaaqatigigaangatsigit Romamiut 5:12 atuartarparput. Allassimaffik taanna atorlugu nunarsuup paratiisiunnginneranut, utertitsissummik pisariaqartitsinitsinnut toqusarnitsinnullu pissutaasut eqqartorsinnaavavut. Allassimaffilli taanna tamatta Jehovamut attaveqarnitta qujamasuutiginerulernissaanut, taassuma nuannaartinnissaata aalajangiusimanissaanut neriorsuutaatalu qilanaariuarnissaanut iluaqutigisinnaavarput.

3. Ajortiliunerput pillugu suna eqqaamasariaqarparput?

 ³ Ajoraluartumik tamatta ajortiliugatta ullut tamaasa kukkusarpugut. Jehovali nallittuisuuvoq. Naammalluinnanngitsuusugut nalunnginnamiuk isumakkeerfiginninnissamut piumassuseqarpoq. (Tuss 103:13, 14) Jiisusip paasitippaatigut ajortitsinnik isumakkeerfigineqaqqulluta Guutimut qinusassasugut. (Luk 11:2-4) Ajortuliat Guutip isumakkeersimasai eqqarsaatigiuartariaqanngilavut. Jehovap isumakkeerfiginnittarneranut pissutaasoq misissoriartigu.

4, 5. (a) Romamiut 5:12-imik paasinninnissamut suut iluaqutigaavut? (b) ‘Saammaanneq’ qanoq paasisariaqarpa?

⁴ Romamiunut allakkat, ingammik kapitali 6, Jehovap ajortitsinnik isumakkeerfiginnittarneranut pissutaasumik paasinninnissatsinnut iluaqutigaavut. Kapitali 3-mi allassimavoq ‘tamatta ajortuliortugut’. Taava Paulusi nangilluni nassuiaavoq: “Taama pineqartussaanngikkaluarlutik Guutip saammaanneranit iluartuutitaapput Kristusi-Jiisusikkut aniguisitaagamik.” (Rom 3:23, 24) Grækerit oqaasiat uani “saammaanneranit”-mik nutserneqarsimasoq akilerneqarnissamik piumasaqarnani pisassarinngisaraluamik ajunngisaarnermik isumaqarpoq.

⁵ Biibilimik ilisimatooq nassuiaavoq oqaaseq grækerisooq amerlanertigut Guutip Kristusillu inuiaat ajortimit toqumillu aniguisinniarlugit iliuuserisaannut innersuussutaasartoq. Taamaattumik grækerit oqaasiat ‘saammaannermik’ nutserneqartoq ‘pisassarinngisaraluamik ajunngisaarnermik’ isumaqarpoq. Guutip uagut pilluta iliuusii pisassarinngisaraluatsinnillu ajunngisaarnera maanna qanoq iluaqutigigipput siunissamullu neriuuteqalissutigigipput sammeriartigu.

6. Guutip pisassarinngisaraluamik ajunngisaarnera kikkut iluaqutigisinnaavaat, aamma qanoq?

⁶ “Inukkut ataasiinnakkut”, Adamikkut, ajorti toqulu silarsuarmut tikiupput. Taamaattumik “toqu inuup ataatsip unioqqutitsinera pissutigalugu taassumuuna ataasiinnakkut [naalagaalerpoq]”. Jehovalli pisassarinngisaraluamik ajunngisaarnermigut inuiaat tamaasa inukkut “ataasiinnarluinnakkut, tassa Jiisusi-Kristusikkut,” annannissamut periarfissippai. (Rom 5:12, 15, 17) “Inuup ataasiinnarluinnaap naalanneratigut inuit amerlasuut iluartunngorumaarput.” Taakkulu Jiisusikkut Kristusikkut naassaanngitsumik inuulernissartik qilanaarisinnaavaat. – Rom 5:19, 21.

7. Sooq Guutip ajunngisaarluni tunissutaa pisassarinngikkaluarparput?

⁷ Una eqqarsaatigiuk: Jehovap ernini utertitsissutitut tunniuttariaqanngikkaluarpaa. Ajortimilli toqumillu aniguisinniarluta pisassarinngisaraluatsinnik  ajunngisaarfigaatigut. Tamatta Guutimit Jiisusimillu ikiorneqarnissamut qinngaqqunnarpugut. Isumakkeerfigineqarnissamut naassaanngitsumillu inuuneqalernissamut periarfissimmatigut qujamasungaarpugut! Qanortoq Guutimut qujamasungaarnerput inooriaatsitsigut ersersittuarisigu.

8. Qanoq isiginnittaaseqarnaveersaassaagut?

⁸ Guuti ajortuliatsinnik, allaat ingasattunik, isumakkeerfiginninnissaminut piumassuseqarpoq. Jehovalli pisassarinngisaraluamik ajunngisaarnera ajortuliornissamut imalu eqqarsarnissamut utoqqatsissutitut atunngisaannassavarput: ‘Jehovap isumakkeerfigiumaarpaanga.’ Allaat apustilit nalaanni kristumiut ilaat taamatut isiginnittaaseqarput. (Judasi 4 atuaruk). Aamma uagut allanit sunnerneqarluta taamatut eqqarsartaaseqaleriartorsinnaanerput mianersuutigisariaqarparput.

9, 10. Paulusi allallu ajortimit toqumillu qanoq aniguisitaappat?

⁹ Paulusip erseqqissarpaa ima isiginnittaaseqarnerup eqqunngitsuunera: ‘Guuti paasinnittuuvoq. Ajortuliara isiginngitsuusaassavaa.’ Sooq? Paulusip allanneratut kristumiut ‘ajortimut [tunngatillugu] toqummata’. (Romamiut 6:1, 2 atuakkit). Tamanna qanoq paasisariaqarpa?

¹⁰ Guutip Paulusi kristumiullu siulliit allat utertitsissut tunngavigalugu ajortuliaannik isumakkeerfigai. Qitornarilerumallugit anersaamik illernartumik tanippai. Tanitat aalajaattuarunik Kristusi qilammi naalakkersueqatigissavaat. Paulusilli suli nunarsuarmi inuugaluartut ‘ajortimut [tunngatillugu] toqusutut’ allaatigai. Jiisusi toqutaanermi kingorna anersaatut toqujuitsutut makititaasoq assersuutitut atorpaa. “Toqu taassumunnga naalagaajunnaarpoq.” Tamatumunnga assingusumik kristumiut tanitat ‘ajortimut [tunngatillugu] toqusutut, Guutimulli Kristusikkut Jiisusikkut inuusutut’ imminnut isigisinnaapput. (Rom 6:9, 11) Pilerissusipiluminnit aqunneqarunnaaramik inuunerat allanngorluinnarpoq. Taamanimiilli sapinngisaminnik Guutimit iluarisaasumik inooriaaseqarniartuarput.

11. Nalitsinni kristumiut qanoq ‘ajortimut [tunngatillugu] toquppat’?

¹¹ Uagummi? Qanoq ‘ajortimut [tunngatillugu] toquvugut’? Siusinnerusukkut immaqa Jehovap iliuutsivut qanoq isumaqarfigigai nalugatsigu ajortulioqattaartarpugut. Taamani “minguttuussusermut inatsisaannermullu”, tassa “ajortimut”, inussiaataavugut. (Rom 6:19, 20) Guutilli qanoq inuunissarput kissaatigigaa Biibilimi paasigatsigu inuunitsinnik allanngueriarluta taassumunnga tunniulluinnarpugut kuisillutalu. Jehovamut naalakkusungaarlutalu taassuma iluarisaatut inoorusungaarpugut. ‘Ajortimut inussiaataajunnaarluta iluarnermut inussiaataalerpugut.’ – Rom 6:17, 18.

12. Tamatta sumik aalajangigassaqarpugut?

¹² Qanorli iliorniarluta nammineq aalajangersinnaavarput. Paulusi ima allappoq: “Timissinni toqusussaasumi ajorti naalagaajunnaarli timissi pilerissusii  maleqqunagit.” (Rom 6:12) Eqqarsaatit pilerissutsillu ajortut nakkaannarfiginiarlugit aqunniarlugilluunniit aalajangersinnaavugut. Imminut ima aperigit: ‘Pilerissusipiluit eqqarsaatigisangaarakkit ajortuliortarpunga? Imaluunniit ingerlaannaq puiorniapallattarpakka?’ Guutip pisassarinngisaraluamik ajunngisaarnera qujamasuutigilluinnarutsigu iluarisaatut sapinngisatsinnik iliorniartassaagut.

13. Sooq eqqortuliorsinnaalluta qularinngissinnaavarput?

¹³ Kristumiut siulliit nalaanni Korinthimiut ilaat tillittartut, arnaqatiminnoortarlutillu anguteqatiminnoortartut, allasiortartut, guutipilussiortartut imerajuttullu Jehova ilisimalerlugulu asaleramikku allanngorput. Iliuuserisarsimasatik kanngusuutigilerpaat. (Rom 6:21; 1 Kor 6:9-11) Romami kristumiut aamma tamatumunnga assingusumik allannguisariaqarmata Paulusip ima allaffigai: “Avatisiluunniit ajortimut atugassanngorteqinasigit iluaatsuliornermut sakkugitillugit, Guutimulli atugassanngortigitsi toqusimagaluarlutik uummartutut, avatisi Guutimut atorlugit iluarnermut sakkugitillugit.” (Rom 6:13) Eqqortuliorsinnaanerat Guutillu pisassarinngisaraluamik ajunngisaarneranik iluaqutiginnissinnaanerat Paulusip qularinngilaa.

14, 15. Imminut qanoq aperisariaqarpugut?

¹⁴ Ullumikkuttaaq qatanngutit ilaat Korinthimiutut inuuneqarsimapput. Jehovali ilisarisimaleramikku inuunerminnik allannguillutillu ‘minguiarneqarput uffarneqarlutik’. Jehova nuannaartikkumallugu tamatta inuunitsinnik allannguivugut. Maannalu Guutip pisassarinngisaraluamik ajunngisaarnerata qujamasuutiginera ersersittuarusupparput. Taamaattumik pilerissusipiluit akiortuarnissaat inuunittalu Jehovamut kiffartornermut atornissaa aalajangiusimavavut.

¹⁵ Taamaaliussagutta Korinthimiut ilaasa ajortuliaat ingasattut ingalassimasariaqarpavut. Ingasattumik ajortuliortarutta Guutimit pisassarinngisaraluatsinnik ajunngisaarfigineqarnissarput isumakkeerfigineqarnissarpullu naatsorsuutigisinnaanngilavut. Ajortulianulli ingasanngitsutut isigineqartunut tunngatillugu sapinngisatsinnik Jehovamut naalannissarput aamma aalajangiusimavarput? – Rom 6:14, 17.

16. Qanoq nalunngilarput ajortuliat Korinthimiunut allakkat siulliit 6:9-11 eqqaaneqartut saniatigut aamma allatigut ajortuliornaveersaartariaqarluta?

¹⁶ Apustili Paulusi eqqarsaatigiuk. Korinthimiunut allakkat siulliit 6:9-11 allaaserineqartutut ingasattumik ajortuliortannginnera qularinngissinnaavarput. Taamaattorli ajortuliortarnini ima nassuerutigaa: “Uinimmit pisuuvunga akigineqarsimallunga ajortimut kiffaalerlunga. Qanoq iliornikkami paasinngilakka. Iliuuseriumasaraluannik iliorneq ajorpunga uumigisannillu iliortarlunga.”  (Rom 7:14, 15) Tamatumannga erserpoq Paulusip iliuutsit allat ajortuliornertut isigisani sapinngisaminik iliuuserinaveersaartarai. (Romamiut 7:21-23 atuakkit). Maligassiaa ilaarlugu sapinngisatsinnik Jehovamut naalattuarisa.

17. Sooq unneqqarissoorusuppit?

¹⁷ Assersuutigalugu Jehova kiffartorfigissagutsigu unneqqarissuusariaqarnerput nalunngilarput. (Ussatit 14:5; Efesosimiut 4:25 atuakkit). Saatani ‘sallumut ataataasoq’ aamma Anania nulialu sallunertik pillugu toqusut assigerusunnginnatsigit salluneq ajorpugut. (Joh 8:44; ApS 5:1-11) Unneqqarikkumallunili sallunaveersaarneq naammanngilaq. Guutip pisassarinngisaraluamik ajunngisaarnera qamannga pisumik qujamasuutigigutsigu aamma allatigut unneqqarissuussaagut.

18, 19. Unneqqarissuuneq qanoq paasisariaqarpa?

¹⁸ Inuk sallunngikkaluarluni unneqqaserlussinnaavoq. Assersuutigalugu Jehovap Israelikkut oqarfigai: “Tillissanngilasi salluliussanasilu nunaqqatisilu ilumuunngitsuliorfiginagit.” Sooq taamaalioqqusaanngillat? Jehova ima  oqarpoq: “Illernartuussaasi uanga Naalagaq Guutersi illernartuugama.” (3 Mos 19:2, 11) Sallunngikkaluarluta allat ilumuunngitsumik uppertikkutsigit unneqqaserlussaagut.

¹⁹ Assersuutigalugu angutip ittuni suleqatiniluunniit “nakorsiassagami” soraajaartariaqarluni oqarfigai. Ilaquttanili ilagalugit aallajaarusukkami taama oqarpoq. Nakorsaataasivimmut aallipallattussaagami “nakorsiassanerarpoq”. Unneqqarippa imaluunniit allanik salloqittaava? Angutip allat ilumuunngitsumik uppertippai. Ilaannikkut inuit arlaannik perusutaqaramik imaluunniit pillaatiserusunnginnamik unneqqaserluttarput. Jehovali ima oqartoq naalapparput: ‘Sallussanngilasi.’ Romamiut 6:19-imi aamma allassimasut eqqarsaatigikkit: “[Avatisi] iluarnermut inussiaatinngortissavasi illernartitaalerlusi.”

20, 21. Guutip pisassarinngisaraluamik ajunngisaarnera qujamasuutigigutsigu suut ingalassimassavavut?

²⁰ Soorunami allasiorneq, aalakoorneq ingasattumillu ajortuliornerit allat ileqqorinngilavut. Tamatumali saniatigut Jehovap iluarinngisai suulluunniit ingalassimasarpavut. Assersuutigalugu kinguaassiuutitigut inuunerlunneq ingalassimaannarnagu aliikkutassat atoqatigiinnertallit ingalassimasarpavut. Aalakoorneq ingalassimaannarnagu malugisimaalernissarput tikillugu imerneq ajorpugut. Ussernartut taakkua akiornissaat sapernartissinnaagaluarlugu akiorsinnaavavut.

²¹ Paulusip allanneratut ima iliornissarput anguniagaraarput: “Timissinni toqusussaasumi ajorti naalagaajunnaarli timissi pilerissusii maleqqunagit.” (Rom 6:12; 7:18-20) Soorunami ajortuliornerit tamarluinnaasa ingalassimasinnaanngilavut. Ajortuliornerilli suulluunniit akiornerisigut Guutip Kristusillu pisassarinngisaraluatsinnik ajunngisaarnerat qujamasuutigingaarlugu ersersissavarput.

22. Jehovap pisassarinngisaraluatsinnik ajunngisaarnera qujamasuutigilluinnarutsigu qanoq akissarsisinneqarnissarput qilanaarisinnaavarput?

²² Jehovap ajortuliatsinnik isumakkeerfigereerlutalu isumakkeerfigiuarsinnaavaatigut. Pisassarinngisaraluatsinnik ajunngisaarfigisarmatigut qujamasungaarpugut! Taamaattumik ajortuuneragai, aamma allanit ajortutut isigineqanngikkaluartut, sapinngisatsinnik ingalassimaniartigit. Taamaaliorutta qanoq akissarsisinneqarnissarput qilanaarisinnaavarput? Paulusi allappoq: “Ajortimut kiffaajunnaarlusi Guutimut inussiaataalerassi inerititaqarpusi illernarsagaassutissanik inuunermik naassaanngitsumik naggateqartussanik.” – Rom 6:22.