MISIGISALIKKERSAARUT
Naalagaq malinniarlugu qimatsivunga
16-inik ukioqartunga ataatama ima oqarfigaanga: “Oqaluussiartorniaruit uteqqikkaluarina. Uteqqikkaluaruit niutit napissavakka.” Taava nuunniarlunga aalajangerpunga. Tassa Jiisusi, Naalagarput, malinniarlugu qimataqarnera siulleq.
SOOQ ataataga taama kamatsigaa? Atagu tusariassagit. 1929-imi juulip 29-anni, Filippinerini illoqarfeeqqat ilaanni Bulacanimiittumi, inunngorpunga. Aningaasaqarniarneq ajornakusoormat suuteqarpallaanngilagut. Inuusuttuaranngulersunga Japanimiut sakkutuuisa Filippinerit isaaffigimmassuk sorsuuttoqalerpoq. Illoqarfeerarpulli avinngarusimasuummat sorsunnermit toqqaannartumik sunnerneqanngilagut. Radioqarata fjernsyneqaratalu aviisiuteqanngilagut, taamaallaat inuit allat aqqutigalugit sorsunneq pillugu paasisaqartarpugut.
Qatanngutigiit arfineq-pingasuusuni angajullersaat tulleraannga, arfineq-pingasunillu ukioqartunga aataakkunnut nuuppunga. Katuuliugaluartugut aataga upperisarsiorneq pillugu oqaloqateqarumasarpoq ikinngutiminillu atuakkanik upperisarsiornermut tunngasunik pisarluni. Eqqaamavara atuagassiaaqqat tagalogitoortut, Afsløret, Beskyttelse aamma Sikkerhed, * Biibililu ilanngullugu uannut takutikkai. Biibilimik, ingammik iivangkiiliunik sisamanik, atuarnissara nuannaraara. Tamanna Jiisusip maligassiaanik malinninnissannut kajumississutigaara. – Joh 10:27.
NAALAKKAP MALINNISSAA ILINNIARPARA
Japanimiut sakkutuuisa 1945-mi Filippinerit qimappaat. Tamatuma nalaani angajoqqaama imminnut nooqquaannga, aatamalu taamaalioqqummanga nuuppunga.
1945-imi decembarimi Jehovap Nalunaajaasui illoqarfimmit Angatimeersut illoqarfeeqqatsinnut oqaluussiartorput. Nalunaajaasoq utoqqaq uagutsinnukarpoq Biibilimilu ‘ullussat kingulliit’ pillugit allassimasut nassuiarlugit. (2 Tim 3:1-5) Illoqarfeeqqamut qanittumiittumut Biibilimik atuaqqissaarnissamut qaaqquaatigut. Angajoqqaakka ilaanngikkaluartut uanga takkuppunga. Inuit 20-t missaat najuupput, ilaallu Biibili pillugu apeqquteqartarlutik.
Suna eqqartorneraat paaserpiannginnakku
ingerlaannarniarlunga aalajangerpunga. Naalagaaffilersaarummilli erinarsulerput. Erinarsugaat nuannareqigakku uninngaannarpunga. Erinarsornerup qinunerullu kingorna sapaammi Angatimi ataatsimiinnissamut tamatta qaaqqusaavugut.Ilaqutariit Cruzikkut angerlarsimaffiannut 8 kilometerisut ungasitsigisumut pisulluta ataatsimiigiarpugut. Inuit 50-it missaat katersuussimapput, allaat meeqqat mikisut Biibili pillugu apeqqutit akiuminaatsut akisinnaammatigit tupigusuutigaara. Arlaleriarlunga ataatsimiigiaqataareersunga Damian Santos, pioneriullunilu utoqqaanertaq borgmesteriunikoq, imminni unnueqquaanga. Unnuaq tamangajaat Biibili pillugu oqaloqatigiippugut.
Taamanikkut inuit Biibili pillugu tunngaviusunik ilinniartinneqareerlutik erniinnaq kuisittarput. Ataatsimiigiallattaalaareersunga aperineqarpugut: “Kuisikkusuppisi?” Akivunga: “Aap, kuisikkusuppunga.” Nalunngilara ‘Kristusi Naalagarput kiffartorfigerusullugu’. (Kol 3:24) Kuummi ungasinngitsumiittumi allalu, 1946-mi februaarip 15-ianni, kuisippugut.
Paasivara kristumiut kuisimasut Jiisusi ilaarlugu oqaluussisariaqartut. Ataatama oqaluussinissannut inuusuppallaarnerarpaanga, kuisinnerinnarlu oqaluussisalernissamik isumaqannginnerarlugu. Nassuiaappara Guutip naalagaaffia pillugu nutaarsiassamik nuannersumik oqaluussissutiginninnissarput Guutip piumasarigaa. (Matt 24:14) Guutimullu neriorsuutima eqqortittariaqarneranik oqarfigalugu. Taava aallaqqaasiutinni eqqaariikkattut ataataga siorasaarivoq. Aalajangiusimavaa oqaluussisarunnaartinniarlunga. Tassa Jehova kiffartorfiginiarlugu siullerpaamik qimatsisariaqarnera, imaluunniit pilliuteqartariaqarnera.
Ilaqutariit Cruzikkut Angatimi imminnut nooqquaannga. Panitsik nukarleq Nora uangalu pionerinngoqqulluta kajumissaarpaatigut. 1947-mi novembarip aallaqqaataanni marluulluta pioneritut aallartippugut. Nora illoqarfimmi allami pioneriuvoq, uangali Angatimiiginnarpunga.
QIMATSINISSAMUT PERIARFISSAQ ALLA
Ukiut marluk pionerioreerlunga Earl Stewart Betelimeersoq Angatimi illoqarfiup qeqqani inunnut 500-t sinnerlugit tusarnaartoralugit tuluttut oqalugiarpoq, uangalu oqaasii tagalogitut eqikkarlugit nutsertarpakka. Tassa ukiut ingerlanerini oqalugiaaterpassuit nutsikkama siullersaat. Ukiut arfineq-marluinnaat atuarsimagaluarlunga ilinniartitsisukka tuluttoortarput. Tagalogitut Biibililersaarutivut amerlanngimmata tuluttut aamma atuaqqissaartarpunga. Taamaalillunga tuluttut paasisinnaalerlungalu oqaluttaasinnaalerpunga.
Stewartip ilagiinnut eqqaavaa ajoqersuiartortitat 1950-mi New Yorkimi ataatsimeersuarneq “Teokratiip
ineriartornera”-nik qulequtalik peqataaffigiartorniaraat. Taamaattumillu immikkoortortaqarfik pionerinik angutinik ataatsimik marlunnilluunniit Betelimi ikiuuttussanik qaaqqusivoq. Qaaqqusaasunut ilaavunga. Aammaarlunga sungiussimasakka qimappakka, maanna Betelimut suliartorniarlunga.1950-imi juunip 19-ianni Betelimut apuuppunga. Beteli illorujussuuvoq nutaanngitsoq, nunataa hektarimik ataatsimik isorartussusilik orpinnit avatangerneqarsimasoq. Qatanngutit angutit kisimiittut qulit sinnerlugit tassani kiffartorput. Ullaaralaakkut iggavimmi ikiuuttarpunga. Qulingiluat missaanni errorsisarfimmi atisanik manissaasarpunga. Ualikkut aamma taakku suliarisarpakka. Ajoqersuiartortitat ataatsimeersuareerlutik uteraluartut Betelimiiginnarpunga. Qatanngutit peqqussutaat suugaluartulluunniit suliarisarpakka. Atuagassiat nassiussassat poortorlugit, atuagassiat pisartagalinnut apuunnissaat aaqqissorlugit aamma saaffiginnittarfimmi sullissisarpunga.
ILINNIARNIARLUNGA FILIPPINERIT QIMAPPARA
1952-imi qatanngutillu angutit arfinillit allat Filippineriniit Ilinniarfimmut Gileadimut, klassit 20-ssaannut, qaaqqusaavugut. Pissangaqaanga! USA-miitsilluta misigisarpassuaqarlutalu takusarpassuaqarpugut. Illoqarfeeqqamit sungiusimasannit inuuneq allaanerujussuuvoq.
Gileadimi ilinniartoqatikkalu
Assersuutigalugu atortorissaarutit takunikuunngisaannakkavut sungiunniartariaqarpavut. Sila allaat allaaneruvoq! Taamaallunga ullaakkut makillunga takuleriallariga silatinni suna tamarmi qaqortuinnaasoq. Tassa apummik takoqqaarnera. Kusanaqaaq, paasivarali nillertorujussuusoq!
Gileadimi ilinniartinneqarnera nuannaringaarakku allannguutit tamakku soqutaanngillat. Ilinniartitsisuvut pikkorissuupput, atuaqqissaarnissatsinnik misissueqqissaarnissatsinnillu ilinniartippaatigut. Gileadimi ilinniarneq ilumut Jehovamut attaveqarninnut nakussatsissutaavoq.
Soraarummeeratta New Yorkip illoqarfittaanut Bronximut utaqqiisaagallartumik specialpioneritut aallartitaavunga. 1953-imi juulimi Bronximi ataatsimeersuarnermut peqataavunga. Tamatuma kingorna Filippinerinut aallartitatut uterpunga.
ILLOQARFIUP ILORRISIMAARNARTUI QIMALLUGIT
Qatanngutit immikkoortortaqarfimmiittut ilagiinnik nakkutilliisunngortippaannga. Tamanna Jiisusi, Jehovap innuttaanik ikiuiniarluni illoqarfinnut ungasissumiittunut angalasartoq, ilaarnissaanut periarfissaqarnerulissutigaara. (1 Petr 2:21) Filippinerini qeqertat annersaasa, Luzonip, qeqqata nalaa annertooq nakkutilliisuuffigaara, nunap immikkoortui Bulacani, Nueva Ecija, Tarlaci kiisalu Zambales ilanngullugit. Illoqarfeeqqat ilaat tikeraarniarlugit Sierra Madre qaqqartuut angallavigisarpakka. Illoqarfinnut taakkununnga busseqanngimmat lastbilertut kullorsorfigisarpakka aperalugit qissiat assartuussaat qaavanni ilaasinnaanerlunga. Amerlanertigut akuersisarput, taamatulli angalaneq qasunartorujussuuvoq.
Ilagiinniittut amerlanersaat ikillutillu nutaajupput. Ataatsimiinnerit oqaluussinerillu pitsaanerusumik ingerlassinnaaqqullugit qatanngutit ikiorakkit qujamasoqaat.
Kingorna Bicoli tamaat nakkutilliisuuffigisussanngorpara. Sumiiffimmi tamatumani oqaluussisartoqatigeeqarpoq avinngarusimasuniittunik, tassani Nalunaajaasut tikinnikuunngisaat specialpionerinit oqaluussiffigineqartarput. Angerlarsimaffimmi ataatsimi anartarfituaq tassa nunami putoq marlunnik nikorfaffissanik qisuttalik. Qisuit nikorfavigisakka nakkarmata anartarfimmut nakkarpunga. Ullaakkorsioriarnissannut piareersarniarlunga sivisuumik imminut asaqqaartariaqarpunga!
Nakkutilliisutut kiffartortillunga Nora pioneritut aallarteqatiginikuusara eqqarsaatigilerpara. Tamatuma nalaani illoqarfimmi Dumaguetemi specialpioneriusoq tikeraarpara. Kingorna allaqatigiittalerpugut 1956-imilu katilluta. Katereerluta sapaatip-akunnera siulleq qeqertami Rapu Rapumi ilagiit tikeraarpavut. Tassani qaqqani portusuuni qaqqasiortariaqarlutalu isorartuumik pisuttariaqarpugut, aappariittulli qatanngutit ungasissumiittut tikeraartarneri nuannaarutigingaarparput!
BETELIMUT QAAQQUSAAQQINNEQ
Ukiut sisamangajaat ilagiinnik nakkutilliisutut kiffartoreerluta immikkoortortaqarfimmut qaaqqusaavugut 1960-imilu januaarimi aallartilluta. Qatanngutinik angutinik, Jehovap peqatigiissortaani annertuunik akisussaaffilinnik ukiorpassuit suleqateqarninni ilikkagaqangaatsiarpunga. Aamma Nora assigiinngiiaartunik suliassinneqartarpoq.
Ataatsimeersuarnermi cebuanotut oqalutsilerlunga oqalugiartunga
Filippinerini Jehovamut kiffartortut amerliartuinnarnerat Betelimit malinnaaffigalugu pilluaqqussutaavoq. Taamani inuusuttuullunga Betelimeeqqaarama nuna tamakkerlugu oqaluussisartut 10.000-t missaanniipput. Maanna Filippinerini oqaluussisartut 200.000-nit amerlanerupput, oqaluussinerlu tapersersorniarlugu qatannguterpassuit Betelimi kiffartorput.
Piffissap ingerlanerani Betelimik allisaanissaq pisariaqalerpoq. Immikkoortortaqarfimmik anginerusumik sanasinnaaniassagatta Siulersuisoqatigiinnit nunaminertamik illuliorfissamik ujaarleqquneqarpugut. Naqiterivimmik nakkutilliisorlu eqqaamiuvut illumiit illumut pulaaqattaarpavut aperisarlugit nunaminertaatitik tuniniarusunneraat. Arlaannaalluunniit tuniniaarusunngilaq, piginnittorlu ataaseq oqarpoq: “Kinamiut tuniniaaneq ajorput. Pisisarpugut.”
Qatanngutip Albert Schroederip oqalugiarnerani oqaluttaasunga
Ullulli ilaanni ilimaginngisatsinnik pisoqarpoq. Eqqaamiutta ilaat USA-mut nuulerami nunaminertaatini pisiarerusunneripput aperivoq. Taava eqqaamiorput alla nunaminertaatiminik tuniniaaniarluni aalajangerpoq, ilanilu eqqaminiittut taamaalioqqullugit kajumissaarlugit. Allaat angutip Kinamiut tuniniaasannginnerarlugit oqarnikup nunaminertaa pisiaraarput. Sivitsunngitsoq immikkoortortaqarfiup nuna pigisaa pingasoriaammik annerulerpoq. Jehovap tamanna piumasarisimagaa ilimagilluinnarpara.
1950-imi Betelimi sulisuni inuusunnersaavunga. Maanna nuliaralu utoqqaanersaavugut. Sumulluunniit aqqutissiiuukkaluaraanganga Naalagaq malittarsimagakku peqqissimissutissaqanngilanga. Angajoqqaama imminnit anisikkaluaraannga, Jehovap imminik asannittunik ilaqutariissuarnik tunivaanga. Ilumut upperaara Jehovap pisariaqartitatsinnik sunilluunniit tunisaraatigut, sumilluunniit suliassinneqaraluaraangatta. Jehovap ajunngisaarluni pilersuiuartarnera pillugu Noralu qujamasungaarpugut allallu Jehovamik misiliinissaannik kajumissaarlugit. – Mal 3:10.
Ilanngaaserisoq Matthæusi Levi Jiisusimik malinneqqulluni taassumannga qaaqquneqarpoq. Qanoq iliorpa? “Nikuillunilu tamaasa qimaannarlugit malippaa.” (Luk 5:27, 28) Aamma uanga Jiisusi malinniarlugu qimatsinissannik periarfissaqarsimavunga, allallu taamaaliornissaannik pilluaqqussutisinissaannillu qamannga pisumik kajumissaarusuppakka.
Filippinerini kiffartortuarsinnaanera nuannaarutigaara
^ par. 6 Jehovap Nalunaajaasuinit saqqummersinneqartut, pissarsiarineqarsinnaajunnaarsimasulli.