Atuartartut apeqqutaat
Naartunaveersaat spirali kristumiut atorsinnaavaat?
Aappariit kristumiut tamarmik aalajangissavaat ilerasuuteqaratik taanna atorsinnaanerlugu. Taamaaliorumallutik spirali qanoq sunniuteqartarnersoq tamannalu pillugu najoqqutassiat Biibilimiittut eqqarsaatigeqqissaartariaqarpaat.
Jehovap Adami Evalu, aamma kingusinnerusukkut Noa ilaqutaalu, ima peqquai: “Kinguaassiorlusi amerliartoritsi.” (1 Mos 1:28; 9:1) Kristumiut peqqussummik tamatuminnga maleruaanissaat Biibilimi allassimanngilaq. Taamaattumik aappariit tamarmik aalajangissavaat ilaqutariit amerlassusaat killilersimaarniarlugu qaquguluunniit meerartaarnissartik aalajangerniarlugu naartunaveersaatit atussanerlugit. Suut eqqarsaatigisariaqarpaat?
Kristumiut naartunaveersaatinik atuineq pillugu aalajangiinerit suulluunniit najoqqutassianik Biibilimeersunik tunngaveqartittariaqarpaat. Taamaattumik naartuersinneq naartunaveersaatitut atunngisaannassavaat. Kristumiut naartup inuunera piffissap ingerlanerani inunngortussaagaluaq kipitinneq ajorpaat. Naartuersinneq Biibilimi inuunermik ataqqinninnissaq pillugu allassimasunut akerliuvoq. (2 Mos 20:13; 21:22, 23; Tuss 139:16; Jer 1:5) Spiralimimmi atuineq?
The Watchtower maajip 15-iat 1979-imoortumi (qupp. 30-31) tamanna sammineqarpoq. Spiralit taamani nalinginnaasut amerlanerit plastikkiupput naartunaveersaatitut illissamut ikkunneqartartut. Allaaserisami nassuiarneqarpoq spirali taamaattoq qanorpiaq sunniuteqartartoq iluamik ilisimaneqanngitsoq. Ilisimatuut amerlasuut oqarput spiralip anisuup arnap mannissaanut pinissaa kinguaassaqalersitsinissaalu pitsaalisaraa. Mannissaq kinguaassaqalersinneqanngippat inuuneq nutaaq pilersinnaanngilaq.
Mannissalli ilaannikkut kinguaassaqalersinnaasarneranut uppernarsaateqarpoq. Mannissaq kinguaassaqaleqqammersoq mannissap aqqutaani ineriartulersinnaalluniluunniit illissamut pisinnaavoq. Illissamut piguni spiralip mannissaq kinguaassaqalersimasoq illissap ilumini ameraasaanut pitsaalisinnaavaa naartunermillu unitsitsilluni. Tamanna naartuersinnertut isigineqarsinnaavoq. Allaaserisaq ima naggaserneqarpoq: “Kristumiut eqqortuliorusuttut spiralimik atuinerup eqqortuuneranik eqqarsaatiginnittut inuunerup illernartuunerata ataqqinissaanik Biibilimi allassimasut tunuliaqutaralugit tamakku paasissutissat tunngavigalugit aalajangiissapput.” – Tuss 36:10.
1979-imili allaaserisap saqqummersinneqarneraniilli nakorsaanermik ilisimatusarnermi amerlasuutigut siuariartoqarsimavoq.
Maanna spiralit marluk pissarsiarineqarsinnaapput. Aappaa kanngussartaqarpoq ukiullu arlallit matuma siorna pissarsiarineqarsinnaalerluni. Aappaa hormonimik akoqarpoq ukiullu 20-t missaat matuma siorna tunisaalerluni. Spiralit taakku pillugit suut ilisimavavut?
Spirali kanngussartalik: Eqqaaneqareersutut anisuup illissakkut mannissamut piniarnera spiralit ajornartilertarpaa. Tamatuma saniatigut spiralit kanngussartaat anisuumut toqunartortaqarpoq. * Aamma spiralit taamaattut illissap ilumini ameraasaanut sunniuteqartarput.
Spirali hormonimik akulik: Spirali alla p-pillenut assingusumik hormonimik akoqarpoq. Spiralit taakkua sunniutaat spiralinut nutaanngitsunut assingupput, kisianni aamma illissami hormonimik pilersitsisarput. Tamanna pissutigalugu arnat ilaat mannissamik * Tamatuma saniatigut illissap paavata masaanik kinernerulersitsisarpoq, taamaalilluni anisooq utsummiit illissamut pisinnaannginniassammat.
kaanngartitsiunnaartarput. Soorunami mannissaq mannissaqarfimmit kaannganngikkuni kinguaassaqalersinnaanngilaq. Spiralit taakkua illissap ilumini ameraasaanik saannerulersitsisarput.Eqqaaneqareersutut spiralit taakku marluk illissap ilumini ameraasaanik allanngortitsisarpasipput. Mannissaq kinguaassaqalersimasoq immaqa illissamut ingerlaqqissaaq illissalli ilumini ameraasaanut nippussinnaanani. Tamanna naartunermik siusissukkut unitsitsissaaq. Ilisimatuulli isumaqarput qaqutiguinnaq taama pisoqartartoq aamma p-pillenik atuinermut atatillugu taamatut pisoqarsinnaasoq.
Taamaattumik qulakkeerlugu oqarsinnaanngilagut spirali kanngussartalik imaluunniit hormonimik akulik pissutigalugu mannissaq kinguaassaqalissanngitsoq. Spiralilli sunniutaat qulaani eqqaaneqartut tunngavigalugit ilisimatusarnikkut misissuinerit ersersippaat arnat spiralinik taamaattunik atuisut naartulertarnerat qaqutigoortoq.
Aappariit kristumiut spiralimik atuerusuttut tamanna pillugu nakorsaq oqaloqatigisinnaavaat. Spiralit qanoq ittut atorneqarsinnaanerat taakkualu nuliaasumut qanoq iluaqutissartaqarlutillu navianaateqartut nakorsap nassuiarsinnaavaa. Aappariit qanoq iliornissartik allamit, allaat nakorsamit, aalajangerneqassasoq naatsorsuutiginagulu akuerissanngilaat. (Rom 14:12; Gal 6:4, 5) Tamanna aappariittut namminneq aalajangertussaavaat. Guutimit iluarisaanissartik ilerasuuteqannginnissartillu anguniagarisariaqarpaat. – 1 Tim 1:18, 19; 2 Tim 1:3.
^ par. 8 England’s National Health Servicemit ilitsersuummi ima allassimavoq: “Arnap naartulinnginnissaa spiralinit kanngussartalinnit 99 procentimit annerusumik qulakkeerneqassaaq. Tassa ukiumi ataatsimi arnani 100-ni spiralimik atuisuni amerlanerpaamik ataaseq naartulertassaaq. Spiralip annikinnerusumik kanngussartallip sunniutaa annikinnerussaaq.”
^ par. 9 Spirali hormonimik akulik illissap ilumini ameraasaanik saannerulersitsisarmat ilaannikkut spirali taamaattoq arnanut katissimasunut katissimanngitsunullu sakkortuumik aaqartartunut atorneqartarpoq.