‘Guutimut neriugisaqarpunga’
‘Adami kingulleq anersaanngorpoq uumassuseqalersitsisoq.’ – 1 KOR 15:45.
1-3. (a) Upperisatta pingaarnerit ilaattut suna ilannguttariaqarparput? (b) Sooq makititsineq taama pingaaruteqartigaa? (Allaaserisap aallaqqaataani assiliaq takuuk).
UPPERISANNI ajoqersuutit pingaarnerpaat suunersut aperineqaruit qanoq akissavit? Qularnanngitsumik Jehovap pinngortitsisuunera uagutsinnullu inuunermik tunisisuunera akissutigissavat. Immaqalu eqqaassavat Jiisusi utertitsissutitut toqusoq upperalugu. Nunarsuarmi paratiisissaq, Guutip innuttaasa naassaanngitsumut inuuffigisassaat, aamma oqaluttuarissagunarpat. Upperisannili nuannarinerpaasavit ilagisaattut toqusunik makititsinissaq eqqaassaviuk?
2 Makititaanissap upperisatta pingaarnerpaat ilaattut ilanngunnissaanut pissutissaqarluarpugut, aamma annikilliornartussarsuarmi aniguinissarput nunarsuarmilu naassaanngitsumut inuunissarput neriuutigigaluarutsigu. Makititsinerup pingaaruteqassusia apustilip Paulusip ersersippaa ima allakkami: “Toqusunimmi makinnissaqanngippat Kristusissaaq toqusunit makissimassanngilaq.” 1 Korinthimiut 15:12-19 atuakkit). Jiisusilli makititaasimanera nalunngilarput. Makititsineq upperigatsigu juutit saddukiiarit, toqusut uummaqqissinnaanerannut akerliulluinnartut, assiginngilavut. Allanilluunniit illaruaatigineqaraluarutta Guutip toqusunik makititsisinnaaneranik upperinninnerput aalajangiusimavarput. – Mark 12:18; ApS 4:2, 3; 17:32; 23:6-8.
Jiisusi makititaasimanngikkaluaruni qilammi kunngiunavianngilaq, oqaluussinerpullu asuliinnaassaaq. (3 “Toqusut makinnissaannik” ajoqersuut “Kristusi pillugu ilinniaqqaagassat” ilaattut Paulusip allaatigaa. (Hebr 6:1, 2) Makititsinissaq upperalugu erseqqissarpaa. (ApS 24:10, 15, 24, 25) Guutip oqaasiani tunngaviusutut ajoqersuutit pingaarnernut ilaagaluartoq makititaanissaq pillugu atuaqqissaarnerusariaqarpugut. (Hebr 5:12) Sooq?
4. Makititsinissaq pillugu suut apeqqutaalerpat?
4 Inuit Biibili atuaqqissaartaleraangamikku itsaq toqusunit makitinneqarsimasut pillugit, soorlu Lazarusi pillugu, oqaluttuat amerlanertigut atuartarpaat. Aamma Aaperaap, Jobip Danielillu siunissami makititsisoqarumaarneranik upperinninnerat pillugu ilinniartarput. Makititaanissamik neriorsuutit ukiut hundredillit matuma siorna neriorsuutigineqaraluartut sooq upperineqarsinnaanerannik Biibili tunngavigalugu uppernarsaaqquneqaruit qanoq akissavit? Aamma siunissami qaqugu makititsisoqarnissaa pillugu Biibilimi allassimasoqarpa? Akissutit uppernikkut nakussatsissutigissavavut.
MAKITITAANEQ QANGALILI SIULITTUUTIGINEQARTOQ
5. Siullermik suna sammissavarput?
5 Inuup toqoqqammersup uummarteqqinneqarnera takorlooruminartinnerussagunarparput. (Joh 11:11; ApS 20:9, 10) Neriorsuutigineqarneraniilli ukiorpassuit, allaat ukiut hundredilikkuutaat, qaangiutereeraluartut makititsisoqarnissaa upperisinnaavarput? Inuk qangali qanittumiluunniit toqusimappat neriorsuut tamanna upperisinnaavarput? Makititsineq neriorsuutigineqarneraniit ukiut hundredillit qaangiutereeraluartut pisimasoq upperereerpat. Makititsineq sorleq pineqarpa? Tamannalu siunissami makititaasoqarnissaa pillugu neriuutinnut qanoq attuumassuteqarami?
6. Tussiaat 118 Jiisusimut qanoq eqquuppa?
6 Tussiaat 118, Daavimit allanneqarsimagunartoq, iluaqutigalugu makititsineq ukiorpassuit sioqqullugit siulittuutigineqareerluni pisimasoq sammilaariartigu. Tussiaammi tamatumani ima allaqqasoqarpoq: “Naalagaq, annaatsigut! ... Pilluaqqusaali Naalakkap aqqani tikiuttoq!” Ukiumi 33-mi nisanip qulingiluaanni Jiisusi Jerusalemimut qimulluni iseriartormat siulittuut tamanna Missiarsi pillugu inuit issuarpaat. (Tuss 118:25, 26; Matt 21:7-9) Tussiaat 118-imi ukiorpassuit sioqqullugit makititsinissaq pillugu qanoq siulittuuteqarami? Tussiaasiortoq aamma qanoq allannersoq maluginiaruk: “Ujarak illuliortut narrugisaat ujaraalerpoq teqeqquulluni tunngaviusoq.” – Tuss 118:22.
“Illuliortut” Missiarsi itigartippaat (Immikkoortoq 7 takuuk)
7. Juutit Jiisusi qanoq itigartippaat?
7 “Illuliortut” Missiarsimik itigartitsisut Luk 23:18-23) Aap, Jiisusip toquneranut aamma akisussaasuupput.
tassaapput juutit siuttui. Jiisusi soqutiginagulu Kristusitut akueriumanngilaat, itigartitsineralli suli ajornerujussuuvoq. Juuterpassuit Jiisusip toqutaanissaa piumasaraat. (Guutip Jiisusi makitippaa tassaalersillugu ‘ujarak teqeqquulluni tunngaviusoq’ (Immikkoortut 8 aamma 9 takukkit)
8. Jiisusi qanoq tassaalersinnava ‘ujarak teqeqquulluni tunngaviusoq’?
8 Jiisusi narrugineqarlunilu toqunneqarami qanoq tassaalersinnaava ‘ujarak teqeqquulluni tunngaviusoq’? Aatsaat makititaasimaguni tamanna pisinnaavoq. Nunaatilik naasorissaasuminut arlaleriarluni oqariartortitsilluni aallartitsisoq pillugu assersuusiorami Jiisusip tamanna erseqqissarpaa. Naggataatigut nunaatiliup nammineq ernermi tusarnaarneqarnissaa neriuutigalugu taanna aallartippaa. Ernerali naasorissaasunit toqunneqarpoq. Jiisusip tamanna oqaluttuareriarlugu siulittuut Tussiaat 118:22-miittoq issuarpaa. (Luk 20:9-17) Apustilip Petrusip allassimaffik taanna atorpaa juutit ‘siulersortaat, utoqqaanertaat allakkanillu ilisimasut Jerusalemimi katersuussimasut’ oqaluukkamigit. Eqqartorpaa ‘Jiisusi-Kristusi, Nazaretimiu, ilissi kikiattugarsi Guutilli toqusunit makitissimasaa’. Taava ima oqarpoq: “Jiisusi taannaavoq ujarak ilissinnit illuliortunit narrugisaasoq teqeqquullunili tunngaviusoq.” – ApS 3:15; 4:5-11; 1 Petr 2:5-7.
9. Tussiaat 118:22-mi maluginiarnartoq suna siulittuutigineqarpa?
9 Erseqqippoq siulittuut Tussiaat 118:22-mi allaatigineqarneraniit ukiut hundredellit qaangiutereersut eqquutissasoq. Missiarsi narrugisaallunilu toqunneqassaaq. Makititaassaarli tassaalissallunilu ujarak teqeqquulluni tunngaviusoq. Jiisusi makititaagami annaffissatuaalerpoq ‘inuit atermik allamik annaanneqaatissaminnik tunineqarsimanngimmata’. – ApS 4:12; Ef 1:20.
10. (a) Tussiaat 16:10-mi qanoq siulittuuteqarpa? (b) Sooq Tussiaat 16:10 Daavimut tunnganngila?
10 Makitinneqarnissaq pillugu allassimaffik alla sammilaariartigu. Ukiut tuusintillit qaangiummata taanna eqquuppoq. Makititaanissap siulittuutigineqarneraniit neriorsuutigineqarneraniilluunniit ukiorpassuit qaangiuttut eqquussinnaaneranik qularunnaassutigisariaqarparput. Tussiaat 16-imi Daavip oqaasii uku atuarpavut: “Toqusummi inaannut iginnianngilarma, ilinnut upperluartumut iliveq takutinnianngilat.” (Tuss ) Daavip nammineq toqunngisaannarnissani pinngilaa. Guutip oqaasiani erseqqippoq Daavi utoqqalillunilu toqusoq ‘siuaasamini qasuersaalersoq Daavillu Illoqarfiani ilineqarluni.’ ( 16:101 Kng 2:1, 10) Taava allassimaffik taanna kimut tunngassuteqarami?
11. Petrusip qanga Tussiaat 16:10 nassuiarpaa?
11 Daavip taama allanneraniit ukiut tuusintit sinnerlugit qaangiuttut Tussiaat 16:10 kimut tunnganersoq Petrusip nassuiarpaa. Jiisusip toqoreerneraniit makititaareerneraniillu sapaatip-akunnialui qaangiuttut juutit taakkualu upperisaannut ilanngussimasut tuusintillit najuunneranni Petrusi oqaluppoq. (Apustilit Suliaat 2:29-32 atuakkit). Daavip toqusimaneranik ilisaaneranillu eqqaasippai. Petrusi nangilluni oqarmat Daavip ‘siumut ilisimagaa eqqartorlugulu Kristusip toqusunit makinnissaa’, najuuttut arlaata isumaqataannginneranik Biibilimi allassimanngilaq.
12. Tussiaat 16:10 qanoq eqquuppa, makititaanissamillu neriorsuummut tunngatillugu sumik uppernarsaava?
12 Petrusip oqaatiginiakkani Daavip oqaasii Tussiaat 110:1-imiittut issuaramigit naqissuserpaa. (Apustilit Suliaat 2:33-36 atuakkit). Petrusip Allakkat atorlugit tunngavilersuinera inuppassuit Jiisusip ‘Naalagaallunilu Kristusiuneranik’ qularunnaarnissaminnut iluaqutigaat. Jiisusi toqusunit makititaammat Tussiaat 16:10-p eqquussimanera inuit nassuerutigaat. Kingusinnerusukkut aamma apustilip Paulusip illoqarfimmi Antiokiami Pisidiamiittumi juutit oqaluukkamigit uppernarsaat tamanna eqqaavaa. Uppernarsaat tamanna inuit tupigusuutigingaarpaat paasisaqarusunnerulissutigalugulu. (Apustilit Suliaat 13:32-37, 42 atuakkit). Aamma uagut makititaanissamik siulittuutit taakkua tutsuiginartuunerannik qularunnaassutigisariaqarparput, allaat neriorsuutigineqarneranniit eqquunnissaannut ukiut hundredellit qaangiutereeraluartut.
MAKITITAANISSAQ QAQUGU PISSAVA?
13. Makititaanissaq pillugu qanoq aperisinnaavugut?
13 Siulittuutigineqarneraniit ukiut hundredellit qaangiutereeraluartut makititaasoqarsinnaanera nalunagu tuppallernarpoq. Immaqali suli ilaat ima aperissapput: ‘Tamanna asasama takoqqinnissaanut sivisuumik utaqqinissannik isumaqarpa? Qaqugu makititsisoqassagami?’ Tassa apustilit ilaannik ilisimasaqannginnerat paasisinnaanngisaannillu pillugit Jiisusip oqarfigai. Sukumiinerusumik ‘piffissarititat nalunaaquttallunniit-akunneri Ataatap nammineq pissaanermigut aalajangigai ilisimasussaanngilaat’. (ApS 1:6, 7; Joh 16:12) Taamaattorli qaqugu makititaasoqarnissaanik paasissutissaqarpugut.
14. Jiisusip makititaanera siuliinit qanoq allaanerua?
14 Makititaaneq pingaarnerpaaq Biibilimi eqqaaneqartoq tassaavoq Jiisusip makititaanera. Taanna makititaasimanngikkaluarpat arlaannarpulluunniit asasami takoqqinnissaanik neriuuteqassanngikkaluarpoq. Jiisusip siornatigut makititaasimasut, soorlu Eliamit Elisamillu makititaasimasut, naassaanngitsumik inuunngillat. Toqoqqillutillu iliverminni pujoralanngorput. Jiisusili ‘toqusunit makissimavoq’ kingornalu ‘toqunaveerpoq. Rom 6:9; Saqq 1:5, 18; Kol 1:18; 1 Petr 3:18.
Toqu taassumunnga naalagaajunnaarpoq’. Qilammi ‘naassaanngilluinnartumik ittuinnartuuvoq’. –15. Sooq Jiisusi ‘inereqqaartutut’ taaneqarpa?
15 Jiisusip anersaatut qilammut makititaanera taamatut makititaasut pingaarnersaralugulu siullersaraat. (ApS 26:23) Aamma allat qilammi makititaassapput. Apustilini aalajaatsut qilammi naalakkersueqatigissallugit Jiisusip neriorsorpai. (Luk 22:28-30) Aatsaalli toqoreerunik taamatut akissarsissapput. Taava Jiisusitulli anersaajullutik makititaassapput. Paulusi allappoq ‘Kristusi toqusunit makissimasoq sinippaartuni inereqqaartuulluni’. Eqqaavaa allat makititaassallutillu qilaliassasut ima allakkami: “Kristusi inereqqaartuulluni, tikiutereerpallu [najuunnerani, NW] tulliullutik Kristusip pigisai.” – 1 Kor 15:20, 23.
16. Qilammi makititaanissap qaqugu piumaarneranik qanoq paasitinneqamisaarpugut?
16 Qilammi makititaanissap qaqugu piumaarneranik Paulusimit paasitinneqamisaarpugut. Kristusip najuunnerani tamanna pissaaq. Ukiorpassuit Jehovap Nalunaajaasuisa Biibili tunngavigalugu uppernarsartarsimavaat Kristusip ‘najuunnera’ 1914-imi aallartittoq. Suli “najuunnerani” inuuvugut, pissutsillu aaqqissuussaanerat ajortoq maanna atuuttoq naangajalerpoq.
17, 18. Kristusip najuunnerata nalaani tanitat ilaat sussappat?
17 Qilammi makititaanissaq pillugu Biibilimi sukumiisumik ima nassuiarneqarpoq: “Nalorneqqunngilassi sinippaartut pillugit ... Upperigatsigumi Jiisusi toqusoq toqusunillu makittoq, taava aamma Guutip sinippaartut ... ingerlatikkumaarpai taassumunnga ilagitillugit. ... Uagut inuusugut sulilu maaniilluta Naalakkap tikiunnissaanik [najuunnissaanik, NW] angumerinnikkumaartugut sinippaartunit siulliussannginnatta. Peqquserpalunneq ... [tutsiuppat] Naalagaq nammineq qilammit aqqarumaarpoq, Kristusimiillutillu toqusut siulliullutik makikkumaarput. Taava uagut inuusugut sulilu maaniittugut taakku ilagalugit nuissatigut aallarunneqarumaarpugut Naalagaq parsiarlugu silaannarmi, Naalagarlu najortuinnalissavarput.” – 1 Th 4:13-17.
18 Kristusip najuunnera aallartereersoq makititaaneq siulleq pivoq. Tanitat annikilliornartussarsuarmi suli inuusut ‘nuissatigut aallarunneqarumaarput’. (Matt 24:31) Tamanna qanoq isumaqarpa? ‘Nuissatigut aallarunneqartut’ ‘sinippaalissanngillat’, tassa sivisuumik toqungassanngillat. Toqugunilli allanngortitaassapput “imaaliallaannaq, uisorernerinnaq, qarlortaassuaq kingullermeerluni tutsiuppat”. – 1 Kor 15:51, 52.
19. “Toqusunit makititaanissaq ajunnginnerusoq” suua?
19 Nalitsinni kristumiut aalajaatsut amerlanerit tanitaanatillu Kristusip qilammi kunngioqatissaatut toqqagaanngillat. ‘Jehovalli ullussaa’, tassa silarsuup ajortup piuneerunneqarnissaa, qilanaaraat. Qaqugorpiaq tamanna pissanersoq kialluunniit ilisimanngilaa, qanillinerali uppernarsaatinit erserpoq. (1 Th 5:1-3) Guutip silarsuartaassaa pilersinneqarpat allatut ittumik makititaasoqassaaq. Taamanikkussamut inuit nunarsuarmi inuunissamut makititaassapput naammalluinnartunngornissamillu toqunngisaannarnissamik neriuuteqalissallutik. Tamanna tassaassaaq “toqusunit makititaanissaq ajunnginnerusoq”, itsarmi makititaasut kingusinnerusukkut toqoqqimmata. – Hebr 11:35.
20. Sooq makititaanissap torersumik aaqqissuussaanissaa upperisinnaavarput?
20 Biibilimi allassimavoq qilammi makititaasussat ‘tamarmik tulleriissusissartik malissagaat’. (1 Kor 15:23) Taamaammat aamma nunarsuarmi makititaanissap torersumik ingerlanissaa upperisinnaavarput. Immaqa ima apererusulissutigaarput: Qanittumi toqoqqammersut Kristusip ukiuni tuusintini naalakkersuinerata aallartinnerata nalaani makititaassallutillu asasaminnit nalunngisaminnit tikilluaqqusaassappat? Itsaq angutit aalajaatsut siulersuillaqqissut Guutip innuttaanik aaqqissueqataaniarlutik silarsuartaassami makitinneqajaassappat? Jehovamut kiffaasimanngitsunut qanoq pisoqassava? Qaqugu sumilu makitinneqassappat? Apeqquterpassuaqarsinnaavugut. Tamakkuli maanna isumakuluutigisariaqanngilavut. Qanoq pisoqassanersoq takujumaarparput. Jehovap qanoq iliornissaa takussallugu pissanganassaqaaq.
21. Suna neriuutigaajuk?
21 Tamanna nalliutinngikkallartillugu Jehovamut uppernerput nakussatsittuartariaqarparput. Taanna toqusimasut eqqaamaneqarumaarnerannik inuuleqqikkumaarnerannillu Jiisusi aqqutigalugu neriorsuivoq. (Joh 5:28, 29; 11:23) Jehovap toqusunik makititsinissaanut uppernarsaat alla tassaavoq Jiisusi oqarmat Aaperaat, Iisaaq Jaakulu ‘taassumunnga tamarmik inuusut’. (Luk 20:37, 38) Erseqqippoq pissutissaqarluarluta Paulusitulli ima oqarsinnaasugut: ‘Guutimut neriugisaqarpunga, tassa toqusut makikkumaartut.’ – ApS 24:15.