ATUAQQISSAAGASSAQ 51
Jehova qanoq ilisarisimalluartigaajuk?
“Atinnik ilisimannittut tatigaatsit, qimannaviannginnakkit ilinnik ujarlersut, Naalagaq.” – TUSS 9:11.
ERINARSUUT 2 Jehova ateraat
QILANAARTUUT *
1-2. Angelitop misigisaa qanoq ilinniarfigaarput?
ANGAJOQQAATIT Jehovamik Nalunaajaasuuppat? Taamaappat eqqaamajuk angajoqqaavit Jehovamut attaveqarnerat kingornussinnaanngikkit. Angajoqqaatit Guutimut kiffartortuugaluarpata kiffartortuunngikkaluarpataluunniit Jehovamut ikinngutaalernissat nammineq sulissutigisussaavat.
2 Qatanngutip angutip Angelitomik atillip misigisaa eqqarsaatigiuk. Ilaqutariinni Nalunaajaasuusuni peroriartoraluarluni inuusuttuaraalluni Guuti qanillugu misiginngilaq. Ima nassuerpoq: “Ilaquttannut maleruutiinnarlunga Jehovamut kiffartorpunga.” Angelitoli aalajangerpoq Guutip oqaasianik atuarnissamut eqqarsaatiginneqqissaarnissamullu piffissaqarnerusarniarluni, akulikinnerusumillu Jehovamut qinusalerpoq. Qanoq kinguneqartumik? Ima oqarpoq: “Paasivara Ataataga asasara, Jehova, aatsaat ilisarisimalerukku qanillisinnaallugu.” Tamanna ukuninnga apeqqutissaqalersitsivoq: Jehovamik ilisarisimannilluarneq taanna pillugu ilisimasaqarnermit qanoq allaanerua? Aamma Jehova qanoq ilisarisimalersinnaavarput?
3. Jehovamik ilisarisimannilluarneq taanna pillugu ilisimasaqarnermit qanoq allaanerua?
3 Jehovap aqqa aamma iliuuserisimasaasa oqaaserisimasaasalu ilaat ilisimagatsigit Jehova pillugu ilisimasaqarpugut. Jehovali ilisarisimallualerumallugu tamanna naammanngilaq.
Jehovap taassumalu pissusiisa nuannersut ilinniarnissaat piffissaqarfigisariaqarparput. Aatsaat taamaaliornikkut Jehovap oqalunnerminut iliuuseqarnerminullu pissutigisai paasiartulissavavut. Tamanna iluaqutigalugu nalilersinnaassavarput isummavut, aalajangiinivut iliuutsivullu taassuma iluarinerai. Jehovap uagutsinnut piumasaa paasereerutsigu paasisavut naapertorlugit iliuuseqartariaqarpugut.4. Biibilip inuttaanik misissuineq qanoq iluaqutigissavarput?
4 Jehovamut kiffartorusunnerput pissutigalugu inuit ilaasa illaruaatigisinnaavaatigut ataatsimiigiartaleruttalu akerlilersornerulerluta. Jehovali tatigigutsigu qimanngisaannassavaatigut. Taamaalilluta naassaanngitsumut Guutimik ikinnguteqarneq tunngavilissavarput. Jehova taama ilisarisimalluartigilersinnaavarput? Aap! Inuit naammalluinnanngitsut, soorlu Mosesip kunngillu Daavip, oqaluttuarisaanerannit tamanna erserpoq. Taakkua iliuusiisa sammineranni apeqqutit uku marluk akissutissarsissavavut: Jehova qanoq ilisarisimalerpaat? Aamma qanoq ilinniarfigisinnaavavut?
MOSESIP ‘TAKUSSAANNGITSOQ ISIGAA’
5. Mosesi suniarluni aalajangerpa?
5 Mosesi aalajangerpoq Guuti kiffartorfiginiarlugu. 40-t missaannik ukioqarluni Guutip innuttaanut, Israelikkunnut, ilanngunniarluni aalajangerpoq “Faraop paniata erneranik” taaneqaqqujunnaarluni. (Hebr 11:24) Mosesip akimasuujunini soqutiginngilaa. Israelikkunnut Egyptenimi inussiaasunut ilanngukkami Faraomit, naalakkersuisumit pissaanilimmit guutitut isigineqartumit, kamaanneqariaannaalerpoq. Upperluartuussusia! Jehova tatigaa. Tatiginninneq taamaattoq naassaanngitsumut taassumunnga qanimut ikinngutaanissamut tunngaviuvoq. – Uss 3:5.
6. Mosesi qanoq ilinniarfigisinnaavarput?
6 Tamanna qanoq ilinniarfigisinnaavarput? Mosesi aalajangerpoq Guuti kiffartorfiginiarlugu. Uagummi? Guuti kiffartorfiginiarlugu taassumalu innuttaanut ilanngunniarluta aalajangissaagut? Immaqa Guutimut kiffartorniarluta pilliuteqartariaqarpugut Jehovamillu ilisarisimanninngitsunit akerlilersorneqalersinnaalluta. Ataatarpulli qilammiusoq tatigigutsigu taassumannga tapersersorneqarnissarput naatsorsuutigisinnaavarput!
7-8. Mosesi suut pillugit ilinniartuarpa?
7 Mosesi Jehovap pissusii pillugit ilinniartuarpoq piumasaatullu iliortuarluni. Assersuutigalugu inuiaat Israelikkut aniguisinneqarnissaanni siulersueqquneqarami imminut tatiginnginnami Jehova oqarfigisaqattaarpaa piukkunnartutut misiginani. Guutip Mosesi misiginneqatigalugu ikiorpaa. (2 Mos 4:10-16) Taamaalilluni Mosesip eqqartuussut kimittooq Faraomut tusarliussinnaalerpaa. Aamma Jehovap Israelikkut aniguisillugillu Farao taassumalu sakkutuui Immami Aappalaartumi toqutikkamigit qanoq pissaaneqartiginera Mosesip takuaa. – 2 Mos 14:26-31; Tuss 136:15.
8 Israelikkut Egyptenimit aniguisinneqareerlutik naammagittaalliortuarput. Mosesilli malugaa Jehovap inussiaataanermit aniguisitaminik nikalluussiuissusia. (Tuss 78:40-43) Mosesip qinnuigimmani Jehovap isummani allanngortippaa, tamatumanilu qanoq maniguutsiginera Mosesip paasivaa. – 2 Mos 32:9-14.
9. Hebræerit 11:27 naapertorlugu Mosesip Jehova qanoq attaveqarfigilluartigaa?
9 Egyptenimit aniguinermik kingorna Mosesip Jehova attaveqarfigilluangaaramiuk Hebræerit 11:27 atuaruk). Qanoq qanitsigisumik attaveqatigiinnerat Biibilimi ima allaatigineqarpoq: “Naalagaq Mosesilu imminnut kiinarsillutik oqaloqatigiittarput soorlu inuup inoqanni oqaloqatigisaraa.” – 2 Mos 33:11.
Ataatani qilammiusoq takusinnaallugulusooq ippaa. (10. Jehova ilisarisimallualerumallugu susariaqarpugut?
10 Tamanna qanoq ilinniarfigisinnaavarput? Jehova ilisarisimallualerumallugu taassuma pissusii pillugit ilinniaannarnata aamma piumasaatut iliortariaqarpugut. Ullumikkut Jehovap piumasaraa inuit tamalaat annaanneqassasut sallusuissullu pillugu eqqorluartumik ilisimasaqalissasut. (1 Tim 2:3, 4) Guutip piumasaatut iliornermut ilaavoq Jehova pillugu allanik ilinniartitsineq.
11. Jehova pillugu allanik ilinniartitsigaangatta taanna qanoq ilisarisimalluarnerulertarparput?
11 Jehova pillugu allanik ilinniartitsigaangatta taanna ilisarisimalluarnerulertarparput. Assersuutigalugu imminik ilisarisimannilerusuttunut siulersoraangatigut taassuma misiginneqataanera uppernarsisarparput. (Joh 6:44; Luk 8:15) Guutip pissaanera takusarparput taassuma oqaasiata sunniisinnaassuseqarneratigut atuaqqissaaqatigisartakkatta eqqunngitsunik ileqqoqarunnaarlutik inuttut pissuseq nutaaq pissuserileriartoraangassuk. (Kol 3:9, 10) Guutillu nikalluussiuitsuunera uppernarsisarparput inuppassuit oqaluussiffigisartakkatsinniittut imminik ilisarisimannilernissamut annaanneqarnissamullu periarfissittuarmagit. – Rom 10:13-15.
12. Mosesimik allakkat aappaat 33:13-imi ersersinneqartutut Mosesip suna qinnutigaa, aamma sooq?
12 Mosesip Jehovamut attaveqarnini pingaartittuarpaa. Mosesi Guutip aqqa tunaaralugu tupinnartuliortareerluni Jehova ilisarisimanerulerumallugu ataqqinnittumik taassumunnga ikioqquvoq. (2 Mosesi 33:13 atuaruk). Taama qinugami 80-it sinnerlugit ukioqaraluarluni nalunngilaa Ataatani qilammiusoq asannittoq pillugu suli ilinniagassarpassuaqarluni.
13. Guutimik ikinnguteqarnerput pingaartillugu qanoq ersersissinnaavarput?
13 Tamanna qanoq ilinniarfigisinnaavarput? Qanorluunniit sivisutigisumik Jehovamut kiffartorsimagaluarutta taassumunnga attaveqarnerput pingaartittuartariaqarparput. Guutimik ikinnguteqarnerput pingaartillugu ersersissinnaavarput qinunikkut oqaloqatigisarneratigut.
14. Guuti pillugu ilikkagaqarnerussagutta sooq qinuneq pingaaruteqarpa?
14 Qanimut ikinnguteqarusukkuit qanikkusutat attaveqarfigikulasariaqarpat. Taamaattumik Guutimut qinukulasarnikkut taassumunnga qanilligit eqqarsaativit qanoq ittulluunniit taassumunnga aniatinnissaat annilaangaginngisaannarlugu. (Ef 6:18) Krista, Tyrkiami najugalik, ima oqarpoq: “Jehovamut qinunikkut eqqarsaatinnik annissuiffigigaangakku ikiuineralu malugigaangakku taanna asanerulerlugulu tatiginerulertarpara. Qinnutinnik akisisarnerata takusinnaanera iluaqutigalugu Jehova ataatagisutut ikinngutigisutullu ippara.”
ANGUT JEHOVAP UUMMATAATA ILUARISAA
15. Kunngi Daavi pillugu Jehova qanoq oqarpa?
15 Kunngip Daavip angajoqqaavi nunaqqataalu Guutimik pallorfiginnittuupput. Ilaquttamili upperisarsiornikkut ileqquinik maleruaaneq naammaginagu nammineq Guutimut attaveqarniarluni iliuuseqarpoq. Jehovallu Daavi asangaakkani ima taavaa: “Angut uummatima iluarisaa.” ApS 13:22) Daavip Jehova qanoq taama attaveqarfigillualertigaa?
(16. Pinngortitanik qimerluuisarnermigut Jehova pillugu Daavip suut ilikkarpai?
16 Daavip pinngortitat Jehova pillugu ilinniarfigai. Daavip inuusuttuulluni nalunaaquttap-akunnerpassuini ataatami savaatai silami paarisarpai. Immaqa taamanili Jehovap pinngortitai eqqarsaatigeqqissaartalerpai. Assersuutigalugu unnuakkut qilak isigitillugu ulloriarpassuarnik qimerluuisarnermigut tamakkuninnga Pinngortitsisup pissusiinik paasinnittarpoq. Tamanna ima allannissaminut killitsissutigaa: “Qilaap oqaluttuaraa Guutip naalannassusia, qilaanngusaasap nalunaarutigaa assaasa piliaat.” (Tuss 19:2, 3) Inuup qanoq pinngortitaanera eqqarsaatigigaangamiuk Jehovap ilisimassusersua takusarpaa. (Tuss 139:14) Daavip pinngortitat eqqarsaatigeqqissaaramigit paasivaa Jehovamut sanilliulluni qanoq mikitigaluni. – Tuss 139:6.
17. Pinngortitanik eqqarsaatiginneqqissaartarneq qanoq iluaqutigissavarput?
17 Tamanna qanoq ilinniarfigisinnaavarput? Pinngortitat soqutigisakkit. Silarsuarmi nuannersumiiginnarnak Jehovap pinngortitai alutorsarfigisakkit! Pinngortitat avatangiisinniittut – naasut, uumasut inuillu – maluginiartakkit Jehovalu pillugu qanoq ilinniarfigisinnaanerlugit eqqarsaatigalugu. Taamaaliornikkut Ataatarput asannittoq pillugu ullut tamaasa paasisarpassuaqartassaatit. (Rom 1:20) Tamannalu Jehovamik asanninnerujartuinnassutigissavat.
18. Tussiaat 18-imi ersersinneqartutut Daavip suna nalunngilaa?
18 Daavip nalunngilaa Jehovap ikiortaraani. Assersuutigalugu paasivaa Jehovamit ikiorneqarluni løveq nanorlu ataatami savaataanik saassussisut toqukkini. Sorsuttartorsuaq Goliati ajorsartikkamiuk Jehovap imminik siulersuinera takulluarsinnaavaa. (1 Sam 17:37) Kunngimillu Saulimit sinngasumit qimaagami paasivaa Jehovap aniguisikkaani. (Tuss 18:1) Angut makitasooq isumaqassagaluarpoq nammineersimalluni. Daavilli maniguukkami Jehovap ikiuinera miserratiginngilaa. – Tuss 138:6.
19. Daavi qanoq ilinniarfigisinnaavarput?
19 Tamanna qanoq ilinniarfigisinnaavarput? Jehovamut ikioqqusarnitta saniatigut paasiniartariaqarparput qanoq qaqugukkullu ikiortarneraatigut. Maniguukkutta pisinnaasatta killeqarnerat nalussanngilarput, takusinnaalluassavarpullu nammineerluta iliuuserisinnaanngisatsinnut tunngatillugu Jehovap ikioraatigut. Jehovap ikiuinera malugigaangatsigu taassumunnga qaninnerusumik attaveqalertarpugut. Isaac, Fijimi najugalik ukiorpassuarni Jehovamut kiffartortoq, tamatuma ilumoorneranik uppernarsaasinnaavoq. Ima oqarpoq: “Inuunera eqqarsaatigigaangakku takusinnaasarpara Biibilimik atuaqqissaartalerninniit ulloq manna tikillugu Jehovap qanoq ikiortaraanga. Taamaattumik Jehova tatigilluinnarpara.”
20. Daavip Guutimut attaveqarnera qanoq ilinniarfigisinnaavarput?
20 Daavip Jehovap pissusii ilaartarpai. Jehovap pissusiminik ilaarsisinnaatilluta pinngortippaatigut. (1 Mos 1:26) Jehovap pissusiinik ilisimasaqarnerujartortilluta ilaarnerujartorsinnaalissavarput. Daavip Ataatani qilammiusoq ilisarisimalluaramiuk allanik pinnittarnermini ilaarsinnaavaa. Assersuuteqariarta. Batseba allasiorfigalugu uialu toqutaatillugu Daavi Jehovamut ajortulioraluartoq Jehova aalajangerpoq Daavi nallittorniarlugu. (2 Sam 11:1-4, 15) Sooq? Daavi Jehovamik ilaarsilluni inoqatiminik nallittuisarmat. Daavi Jehovamut attaveqarluarnini pissutigalugu tassaalerpoq Israelimi kunngit asaneqarnerpaat ilaat, Jehovallu Israelimi kunnginut allanut maligassaalluartuunerarpaa. – 1 Kng 15:11; 2 Kng 14:1-3.
21. Efesosimiut 4:24 aamma 5:1 naapertorlugit ‘Guuti maligassarigutsigu’ qanoq kinguneqassava?
21 Tamanna qanoq ilinniarfigisinnaavarput? ‘Guuti maligassarisariaqarparput.’ Taamaaliorutta imminut iluaquserlutalu taanna ilisarisimallualissavarput. Pissusivut taassuma pissusiinut naleqqussarutsigit ersersissavarput taassumunnga qitornaalluta. – Efesosimiut 4:24; 5:1 atuakkit.
JEHOVA PILLUGU ILINNIARNEQ
22-23. Jehova pillugu paasisavut naapertorlugit iliuuseqarutta qanoq kinguneqassava?
22 Soorlu sammereeripput, pinngortitat qimerloornerisigut Biibilillu atuarneratigut Jehova pillugu paasisaqarsinnaavugut. Biibili immikkuullarissuuvoq Guutimut aalajaallutik kiffartortunik ilaarsinnaasatsinnik, soorlu Mosesimik Daavimillu, oqaluttuarpassualik. Jehova iliuuseqareerpoq, maannalu illit iliuuseqartariaqarputit. Sapinngisannik Jehova ilisarisimalluarnerulertuaruk.
23 Jehovap “suliai inuit ilaannaasumik paasisinnaavaat”, taamaattumik taanna pillugu ilinniartuarsinnaavugut. (Oqal 3:11, Testamentitoqaq) Pingaarnerpaarli tassaanngilaq Jehova pillugu qanoq ilisimasaqartiginersugut, tassaavorli ilisimasavut qanoq atornerivut. Paasisavut naapertorlugit iliuuseqarutta Ataatarpullu asannittoq ilaarniartarutsigu taassuma qanilliartortuassavaatigut. (Jaak 4:8) Biibili aqqutigalugu neriorsoqqissaarpaatigut imminik ujarlersut qimanngisaannassallugit.
ERINARSUUT 88 Ilinniartinnga aqqutigeqqusannik
^ imm. 5 Inuppassuit Guutip piunera upperaat, ilisarisimanngilaalli. Jehovamik ilisarisimannilluarneq qanoq paasisariaqarpa, taassumunngalu attaveqarluarneq pillugu Mosesi kunngilu Daavi qanoq ilinniarfigisinnaavavut? Allaaserisami matumani apeqqutit taakku akineqarput.