‘Qujaniartaritsi’
ILLIT qujamasuttutut imminut isigisarpit? Tamatta immikkut tamanna eqqarsaatigisariaqarparput. Biibilimi siulittuutigineqarpoq nalitsinni inuppassuit ‘qujasuitsuussasut’. (2 Tim 3:2) Inuit ilaat tamanut piginnaatitaaffeqarsorisarput, soorlulusooq tamanik piginnittussaatitaallutik. Misigipput allat tunniussaat pillugit qujamasuttariaqaratik. Isumaqataassagunarputit inuit taamaattut ilagissallugit kajuminnarpallaarneq ajormat.
Akerlianilli Jehovap kiffai ima kajumissaarneqarput: ‘Qujaniartaritsi.’ Tassa ‘qanorluunniit atugaqaraluarutta qujasassaagut.’ (Kol 3:15; 1 Th 5:18) Aammami qujamasuttuuneq uagutsinnut iluaqutaavoq. Tamatumunnga assigiinngitsut pissutaapput.
QUJAMASUTTUUNEQ OQIMAAQATIGIISSAARTUMILLU IMMINUT ISIGINEQ
Qujamasuttuunermik ineriartortitsinissamut pissutaasut ilagaat qujamasunnerup imminut isumalluartumik isiginnittaaseqalersitsisinnaanera. Inuk qujasartoq imminut naammagisimaartuuvoq, qujaffigisaalu aamma iluarusuttarpoq. Sooq qujamasuttuuneq namminermut qujaffigineqartumullu ajunngitsumik kinguneqartarpa? Una eqqarsaatigeriaruk: Allat illit pillutit iliuuseqarniarpata, tamanna ilinnik naleqartitsinerannik ersersitsinnginnerpa? Asavaatsit. Taamatut isumagineqarnerit imminut naammagisimaarnermik kinguneqassaaq. Ruthimut taama pisoqarsimanera ilimanarpoq. Boazip Ruthi ajunngitsumik pissusilersorfigaa. Qularnanngitsumik Ruthip taamatut pineqarnini nuannaarutigisimassaqaa. – Ruth 2:10-13.
Pingaarnerusumik Guutimut qujamasuttuusariaqarpugut. Qularnanngitsumik anersaakkut timikkullu tunissuterpassui tunissutigiuartagaalu ilaannikkut eqqarsaatigisarpatit. (5 Mos 8:17, 18; ApS 14:17) Guutip ajunngitsuunera sivikitsuinnarmik eqqarsaatigiinnarnagu pilluaqqussuterpassuit Guutip ilinnut asasannullu tunniuttagai eqqarsaatigeqqissaartakkit. Pinngortitsisivit tukkortuunera eqqarsaatigeqqissaartarukku taassuminnga pingaartitsinerulissaatit, qanorlu asatigalutillu pingaartitsigigaatit ersarinnerulissaaq. – 1 Joh 4:9.
Jehovap tukkortuunera pilluaqqussutaalu eqqarsaatigeqqissaaraangakkit ajunngitsuunera pillugu qujaffigisaruk. (Tuss 100:4, 5) Oqartoqarsimavoq “qujamasunnermik ersersitsineq nuannaarnerulersitsisartoq”.
QUJAMASUTTUUNEQ INUNNIK QANINNERULERSITSISARPOQ
Qujamasuttuunerup iluaqutissartaasa ilaat alla tassaavoq ikinngutigiinnermik ineriartortitsisarnera. Tamatta pingaartinneqartutut misigissalluta pisariaqartipparput. Inuk ajunngitsuliornera pillugu qamannga pisumik qujaffigigukku immissinnut qaninnerulissaasi. (Rom 16:3, 4) Aamma inuit qujamasuttut ikiuiumatunerusarput. Ajunngisaarfigineqaraangamik maluginiartarpaat namminerlu akisillutik ajunngisaarnissamut kajumississutigisarlugu. Aap, allanik ikiuisarneq pilluarnermik kinguneqartarpoq. Jiisusi assingusumik ima oqarpoq: “Tunisineq pilluarnarneruvoq tigusinermit.” – ApS 20:35.
University of Californiami qujamasunneq pillugu misissuinermi siulersuisut ilaat Robert Emmons ima oqarsimavoq: “Qujamasuttuussagutta paasisariaqarparput immitsinnut pinngitsoorsinnaanata. Allanut tunisisarpugut ilaannikkullu tunineqartarluta.” Tassa inuuinnarumalluta pilluarumallutalu inuit allat assigiinngitsorpassuartigut pisariaqartippavut. Assersuutigalugu nerisassanik tunineqarsinnaavugut napparsimaleruttaluunniit ikiorneqarsinnaalluta. (1 Kor ) Inuup qujamasuttup inuit allat pilluni iliuuserisaat pingaartittarpai. Illimmi? Allat ilinnut iliuuserisaat pillugit qujamasunnerit ersersittarpiuk? 12:21
QUJAMASUNNEQ ISUMALLUARTUUNERLU
Qujamasuttuunermik ineriartortitsineq aamma isumalluartumik isiginnittaaseqalernissannut iluaqutigisinnaavat. Eqqarsaativut immikkoortitertarpavut. Tamanna pissutigalugu avatangiisinni pisut aalajangersimasut pingaartinnerusinnaavatit allalli eqqarsaatigivallaarnagit. Qujamasukkuit ajunngitsut isiginiarnerulissavatit ajornartorsiutaasinnaasullu pinnagit. Qujamasunneruguit ajunngitsut amerlanerusut takusinnaanerulissavatit, tamannalu ilutigalugu qujamasunnerulissaatit. Inuunermut qujamasuttumik isiginnittaaseqaruit apustilip Paulusip kajumissaarutaa una malissinnaalissavat: “Naalakkami tipaatsuttuinnaritsi!” – Fil 4:4.
Qujamasuttuuneq nikallornartunik misigissuseqalinnginnissamut iluaqutigissavat. Qujamasuttuugaanni sinnganeq, aliasunneq, uumissuinerlu pakkersimaaruminarnerusinnaapput, ilaa? Inuit qujamasuttut aamma pigisanik pingaartitsivallaanngillat. Pigisaminnik naammaginnittuusarput pigisaqarnerulernissarlu anguniagarisarnagu. – Fil 4:12.
QANOQ PILLUAQQUNEQARTIGISUTIT EQQARSAATIGIUK!
Kristumiuugavit ilisimavat ulluni kingullerni erloqinartut nalaattakkatit aqqutigalugit Saatanip nikallortinniarsarissagaatit. Naammagittaallioqqajaalissaguit nuannaarutigissavaa. Taamatut pissuseqaleruit nutaarsiassamik nuannersumik tusarliussinerit sunniuteqarluarnavianngilaq. Qujamasuttuunerli aamma Guutip anersaavata inerititai ataqatigiipput. Assersuutigalugu Guutip uagutsinnut tunniussai ajunngitsut nuannaarutigaavut siunissamilu neriorsuutai upperalugit. – Gal 5:22, 23, NW.
Jehovap innuttaanut ilaagavit qujamasunneq pillugu allaaserisami matumani allassimasut qularnanngitsumik isumaqatigaatit. Taamaattorli nalunngilat qujamasuttuuneq isumalluartuunerlu pissuseriumallugit imaannaanngitsuusoq. Tamannali nikallussutigeqinagu. Qujamasuttuuneq ilikkarsinnaavat! Qanoq? Illit inuuninni qujamasuutigisinnaasatit ullut tamaasa eqqarsaatiginiartakkit. Tamanna ileqquliukkukku qujamasuttuuneq pissuseriartuaalissavat. Taava inuunermi ajornartorsiutinik isumakuluuteqartuaannartunut naleqqiullutit nuannaarnerulissaatit. Guutip allallu iliuuserisartagai nuannersut ilinnut qiimmassaataasut eqqarsaatigisakkit. Immaqa allattortalersinnaavatit. Ulloq taanna qujamasuutigisatit marluk pingasulluunniit allakkit.
Ilisimatuut ilaasa paasisimavaat akuttunngitsumik qujamasunnermik ersersitsisarneq qaratsap suleriaasianut sunniuteqarsinnaasoq isumalluarnerusumik eqqarsaateqalernissamik kinguneqartumik. Inuk qujamasuttoq nuannaartuuvoq. Taamaattumik pilluaqqussutit eqqarsaatigisakkit, misigisat nuannersut inuuninni puioqinagit, qujamasuttuunissat sungiusartaruk! Suut ajunngitsut pissusissamisoortutut isigiinnarnagit Jehova ‘qutsavigisaruk ajunngitsuummat’. Aap, ‘qanorluunniit atugaqaraluaruit qujasarit’. – 1 Nal 16:34; 1 Th 5:18.