Atuartartut apeqqutaat
Saatanip Eva oqarfigigamiuk orpik ajunngitsumik ajortumillu ilisimalersitsisoq neriffigippagu toqunavianngitsoq tarnermik toqujuitsumik ajoqersuut ullumikkut nalinginnaasoq pivaa?
Ilimananngilaq. Diaavulup Eva oqarfiginngilaa orpiup Guutip neriffigeqqunngisaata paarnaanik neriguni taamaallaat timikkut toqussasoq ilaalu takussaanngitsoq (ullumikkut tarnermik toqujuitsumik taaneqartartoq) inuuinnarluni arlaannut ingerlaqqikkumaartoq. Pulateriaarsuk aqqutigalugu Saatanip Eva oqarfigaa orpik neriffigiguniuk ‘toqussanngivissoq’. Tassa oqaatigimisaarpaa inuuinnassasoq nunarsuarmilu Guutimit aqunneqarani inuuneq pitsaanerusoq nuannaarutigissagaa. – 1 Mos 2:17; 3:3-5.
Tarnermik toqujuitsumik ajoqersuut eqqunngitsoq ullumikkut ajoqersuutigineqartartoq Edenimi aallaaveqarsimanngippat taava qanga ajoqersuutigineqartalerpa? Qulakkeerlugu oqaatigisinnaanngilarput. Nalunngilarpulli pallorfiginninnerit eqqunngitsut tamarmik Noap nalaani ulersuaqarmat suujunnaarsinneqartut. Noa ilaqutaalu – pallorfiginnittut ilumoortut – ulersuarmi annattutuaammata ajoqersuutit eqqunngitsut atorneqarunnaarput.
Taamaattumik inuup tarningata ingerlaqqittarneranik ajoqersuut ulersuup kingorna ajoqersuutigineqartalersimassaaq. Ilimanarpoq taamani Guutip Babelimi oqaatsit ilatsimmagit inuillu ‘nunarsuarmut tamarmut siammarmata’ tarnermik toqujuitsumik ajoqersuut nunarsuarmi tamarmi ajoqersuutigineqartalersimassasoq. (1 Mos 11:8, 9) Ajoqersuutip eqqunngitsup qanga aallartissimanera ilisimanngikkaluarlugu uagut nalunngilarput Saatani Diaavulu, ‘sallumut ataataasoq’, ajoqersuummut tamatumunnga tunuliaqutaasoq siammarterneqarnissaanillu kissaateqartoq. – Joh 8:44.