1. Sulineq pil­lugu inup­pas­suit qanoq isumaqar­pat?

IL­LIT nunagisan­ni inuit amerlanersaasa sulineq qanoq isumaqarfigaat? Nunar­pas­suar­ni inuit aatsaat taama suleruloor­tigisar­put. Inuit sulival­laar­tar­tut qasuersaar­nis­sar­tik, ilaqut­tatik anersaak­kul­lu pisariaqar­titatik pif­fis­saqarfigiuminaatsit­tar­paat. (Oqal 2:23) Inuil­li al­lat sulerusus­suseqar­natik sulin­ngin­nis­samut utoq­qatsis­sutis­sarsior­tar­put. – Uss 26:13, 14.

2-3. Jehova Jiisusilu sulinermut tun­ngatil­lugu qanoq maligas­siuip­pat?

² Inup­pas­suit sulinermut eq­qun­ngitsumik isigin­nit­taasian­nit Jehova Jiisusilu al­laanerul­luin­nar­tumik isigin­nit­taaseqar­put. Nalun­ngilar­put Jehovap sulineq nuan­narigaa. Taman­na Jiisusip ima erseq­qis­sar­paa: “Ataataga suliuarmat uangat­taaq sulivunga.” (Joh 5:17) Guutip suliar­pas­sui eq­qarsaatigik­kit. As­sersuutigalugu in­ngilit, nunarsuaq avataarsualu pin­ngor­tip­pai. Aam­ma pin­ngor­titarsuarmi alianaatsumi inuuf­figisatsin­ni Guutip pin­ngor­titsisimaneranut up­per­narsaater­pas­suaqar­poq. Tus­siaasior­toq ima oqar­poq: “Amerlangaar­put pin­ngor­titatit, Naalagaq! Pin­ngor­tip­patit tamaasa ilisimasuul­lutit. Nunarsuaq pin­ngor­titan­nik ulik­kaar­poq.” – Tuss 104:24.

³ Jiisusip Ataatani ilaar­paa. Guutip “qilak aalajaatsumik tun­ngavilermagu” Er­neq, ilisimas­sutsitut kinaas­susilik­katut al­laatigineqar­toq, “tatigisaatut” ikiuup­poq. (Uss 8:27-31) Kingusin­nerujus­suak­kut Jiisusi nunarsuarmiil­luni maluginiar­nar­tunik suliaqar­poq. Jehovap sulias­siis­sutai nerisas­samisut isigai, suliaanil­lu up­per­narsineqar­poq Guutimit aal­lar­titaasoq. – Joh 4:34; 5:36; 14:10.

4. Jehova Jiisusilu qasuersaar­tar­neq pil­lugu qanoq ilin­niarfigisin­naavavut?

 ⁴ Jehovap Jiisusil­lu sulil­luar­nermut tun­ngatil­lugu maligas­siuinerat isumaqar­pa qasuersaar­tariaqar­tan­ngitsugut? Naamerluin­naq. Jehova qasun­ngisaan­narami qasuersaar­tariaqan­ngilaq. Biibilimili al­las­simavoq Jehova qilak nunalu pin­ngor­tereerlugit ‘qasuersaar­toq suliaqar­nani’. (2 Mos 31:17) Taman­na isumaqarunar­poq suliun­naaral­larluni suliani Jehovap nalerisimaarutigigai. Jiisusil­lu nunamiin­nermini suleruloor­taraluarluni qasuersaar­nis­sani ikin­ngutiminil­lu nereqateqar­nis­sani pif­fis­saqarfigisar­pai. – Matt 14:13; Luk 7:34.

5. Suna ajor­nakusoor­tis­sin­naavar­put?

⁵ Biibilimi kajumis­saar­neqar­pugut sulineq nuan­naarutigisas­sagip­put. Guutip in­nut­tai eqiasut­tuunatik suliumatuujusariaqar­put. (Uss 15:19) Im­maqa ilaqut­tatit pilersor­niarlugit sulif­feqar­putit. Kristusil­lu ajoqersugaasa tamarmik nutaarsias­saq nuan­nersoq oqaluus­sis­sutigisus­saavaat. Naam­mat­tumil­li qasuersaar­tar­nis­sat pisariaqar­poq. Sulinerup, oqaluus­sinerup qasuersaar­nerul­lu naam­mat­tumik pif­fis­saqarfiginis­saat ilaan­nik­kut ajor­nakusoor­tit­tar­piuk? Qanoq sulitigis­sanerluta qanorlu qasuersaar­tigis­sanerluta qanoq nalilersin­naavar­put?

6. Markusi 6:30-34 qanoq erser­pa Jiisusi sulinermut qasuersaar­nermul­lu eq­qor­tumik isigin­nit­taaseqar­toq?

⁶ Sulinermut eq­qor­tumik isigin­nit­taaseqar­nis­saq pingaaruteqar­poq. Kun­ngi Salomo isumas­sarsisin­neqarluni ima al­lap­poq: “Suut tamarmik aalajangersimasumik pif­fis­saligaap­put.” Ilaatigut eq­qaavai ik­kus­suineq, sananeq, qianeq, il­lar­neq, qitin­neq iliuuserisar­tak­kal­lu al­lat. (Oqal 3:1-8) Erseq­qip­poq sulineq qasuersaar­nerlu inuunermi pingaaruteqar­tuusut. Jiisusip sulineq qasuersaar­nerlu eq­qor­tumik isigin­nit­taaseqarfigai. Ilaan­ni apustilit oqaluus­sereerlutik uteramik ulapin­nermik ‘al­laat nerinis­samut pif­fis­saqan­ngil­lat’. Jiisusi ima oqar­poq: “Inoqan­ngitsumut ilagisinga; taak­kuin­naal­lusi tas­sani qasuersaatsiarsin­naavusi.” (Markusi 6:30-34 atuakkit). Jiisusi ajoqersuk­kal­lu ilaan­nik­kut kis­saatigigaluarlugu qasuersaan­ngitsoor­tar­put, Jiisusil­li nalun­ngilaa qasuersaar­tariaqarlutik.

7. Sabbati pil­lugu paasisavut qanoq iluaqutigisin­naavavut?

⁷ Ilaan­nik­kut qasuersaar­tariaqar­tar­pugut ul­luin­narsiutaasunil­lu al­lan­nguisariaqarluta. Taman­na erser­poq Guutip itsaq in­nut­taminut aaq­qis­suus­saanit, tas­sa sapaatit-akun­neri tamaasa sabbatisior­tar­nis­samik peq­qus­sum­mit. Mosesip inatsisai maleruar­tus­saan­ngik­kaluarlugit sabbati pil­lugu al­las­simasut ilin­niarfigisin­naavavut. Tamatumani paasisavut iluaqutigalugit sulinermut qasuersaar­nermul­lu eq­qor­tumik isigin­nit­taaseqar­nerluta nalilersin­naavar­put.

8. Mosesimik al­lak­kat aap­paat 31:12-15 naaper­torlugit sabbatisior­nermut suna siuner­taava?

⁸ Biibilimi al­las­simavoq Guuti “ul­luni” arfinilin­ni pin­ngor­titsereerluni nunarsuarmut tun­ngatil­lugu suliani unitsik­kal­larai. (1 Mos 2:2) Jehovali sulineq nuan­naringaaramiuk al­latigut suliuar­poq. (Joh 5:17) “Ul­lut” arfineq-aap­pas­saan­ni qasuersaar­nini najoq­qutas­siis­sutigalugu Israelik­kut oqarfigai sabbatimi qasuersaar­tas­sasut. Oqar­poq Israelik­kul­lu akun­nermin­ni sabbati nalunaaqutaasoq. Ul­loq taan­na “qasuersaaq­qis­saarfiusas­saaq tas­saagami Naalak­kamut il­ler­nar­titaq”. (2 Mosesi 31:12-15 atuakkit). Suleq­qusaan­ngin­neq tamanut, aam­ma meeq­qanut,  inus­sianut al­laal­lu nersutaatinut, atuup­poq. (2 Mos 20:10) Anersaak­kut it­tunut sam­misaqar­nerunis­samut periarfis­saavoq.

9. Jiisusip nalaani sabbati pil­lugu eq­qun­ngitsumik qanoq isigin­nit­taaseqar­toqar­pa?

⁹ Sabbati Guutip in­nut­taanut iluaqutaavoq; Jiisusil­li nalaani up­perisarsior­nik­kut siut­tor­pas­suit sabbatik­kut iliuuserisin­naasat pil­lugit sukan­nersunik inatsisilior­put. Sabbatimi karrer­taqarfin­nik nutsuineq nap­parsimasumil­lu ajorun­naarsitsineq iner­teq­qutaanerar­paat. (Mark 2:23-27; 3:2-5) Taman­nali Guutip eq­qarsar­taasianut naaper­tuutin­ngitsoq Jiisusip tusaarusut­tunut erseq­qis­sar­paa.

10. Jiisusip sabbatimut isigin­nit­taasia pil­lugu Mat­thæusi 12:9-12 qanoq ilin­niarfigaavut?

¹⁰ Jiisusip ajoqersugaasalu juutiusut Mosesip inatsisai maleruar­tus­saagamik­kit sabbati nal­lius­sisar­paat. * Jiisusil­li oqaatsimigut iliuutsimigul­lu ersersip­paa sabbatisior­tar­nermi ingasaas­siniar­toqas­san­ngitsoq ajun­ngitsulior­neril­lu iner­teq­qutaan­ngitsut. Erseq­qis­sumik ima oqar­poq: “Sabbatimi ajun­ngitsulior­nis­saq ajor­nar­titaan­ngilaq.” (Matthæusi 12:9-12 atuakkit). Ajun­ngitsulior­nerit sabbati pil­lugu inatsim­mik unioq­qutitsinerusorin­ngilai. Guuti pingaarutilim­mik pis­suteqarluni in­nut­tani sabbatisior­taq­quai, pis­sutaasorlu taman­na paasil­luarsimal­lugu Jiisusip iliuutsimigut ersersip­paa. Guutip in­nut­taasa ul­luin­nar­ni suliatik unitsik­kal­larlugit anersaak­kut it­tut sam­minerusin­naavaat. Jiisusi ilaqut­tamini peroriar­tor­nermini sabbati anersaak­kut it­tunut ator­tarsimas­savaat.  Taman­na nalun­ngilar­put Jiisusi, il­loqarfim­mi peroriar­torfim­mini Nazaretimiit­toq, pil­lugu ima al­las­simam­mat: “Sabbataagaa pisar­nermisut synagogimut iser­poq, nikuip­porlu atuaajumal­luni.” – Luk 4:15-19.

11. Sulinermut tun­ngatil­lugu kina Jiisusimut maligas­siuil­luar­pa?

¹¹ Josefip Jiisusi sanasutut ilin­niar­til­lugulu Guutip sulinermut isigin­nit­taasia pil­lugu ilin­niar­tip­paa. (Matt 13:55, 56) Josefilu inoquter­pas­suani pilersor­niarlugit suleruloor­tar­toq Jiisusip takusarsimas­savaa. Soqutiginar­porlu kingusin­nerusuk­kut Jiisusip ajoqersuk­kaminut ima oqar­nera: ‘Sulisoq akis­sarsisus­saavoq.’ (Luk 10:7) Aap, Jiisusip suleruloor­neq sungiusimavaa.

12. Tamaviaarluni sulineq pil­lugu Biibilimi qanoq al­las­simasoqar­pa? Al­las­simaf­fin­nik as­sersuuteqarit.

¹² Aam­ma apustili Paulusi suliumatuujuvoq. Jiisusip aq­qa ilin­niar­titsis­sutaalu pil­lugit nalunaajaanis­saq pingaar­ner­tut sulias­saraa. Im­minul­li pilersor­niarluni sulivoq. Kimul­luun­niit ‘naner­tuutaajumanani’ ‘tamaviaaqaluni ul­luk­kut un­nuak­kul­lu sulisar­nera’ Thes­salonikamiunit ilisimaneqar­poq. (2 Th 3:8; ApS 20:34, 35) Paulusip sulisar­nini eq­qaagamiuk tupilior­tuunini pisimasin­naavaa. Korinthimiik­kami Akvila Priskil­lalu inisimaf­figisani ‘tupilior­tuusut suleqatigisar­pai’. Paulusip ‘ul­luk­kut un­nuak­kul­lu sulinera’ isumaqan­ngilaq unin­ngiivil­luni suliuar­toq. Tupilior­tutut suliani unitsit­tar­pai, soorlu sabbatik­kut. Ul­lormi tamatumani juutinut nalunaajaanis­saminut periarfis­saqar­tar­poq, taak­kut­taarmi sabbatimi sulineq ajor­put. – ApS 13:14-16, 42-44; 16:13; 18:1-4.

13. Paulusi qanoq ilin­niarfigisin­naavar­put?

¹³ Apustili Paulusi maligas­saal­luar­poq. Im­minut pilersor­niarluni sulisariaqaraluarluni “Guutip saam­maan­neranik iivangkiiliumik nalunaajaatigin­nin­neq” peqataaf­figin­ngitsoorusun­ngilaa. (ApS 20:24; 2 Kor 11:23) Al­lat aam­ma oqaluus­sisaq­qul­lugit kajumis­saar­pai. Akvila Priskil­lalu ‘Kristusi-Jiisusimi suleqatiminik’ taavai. (Rom 12:11; 16:3) Paulusip Korinthimiut ima kajumis­saar­pai: “Tamaviaarlusi Naalagaq kif­far­tuus­siuk.” (1 Kor 15:58; 2 Kor 9:8) Al­laat Jehovap apustili Paulusi isumas­sarsisil­lugu ima al­latsip­paa: ‘Suliuman­ngitsoq aam­ma neris­san­ngilaq.’ – 2 Th 3:10.

14. Jiisusip Johan­nesi 14:12-imi oqaasii qanoq isumaqar­pat?

¹⁴ Nalitsin­ni suliaq pingaar­ner­paaq tas­saavoq oqaluus­sineq ajoqersugan­ngor­titsior­tor­nerlu. Jiisusil­lu siulit­tuutigaa ajoqersuk­kami nam­mineq suliaminit an­nerusunik suliaqas­sasut! (Johannesi 14:12 atuaruk). Taama oqarami isumaqan­ngilaq taak­ku tupin­nar­tulior­tas­sasut. Isumaqar­porli ajoqersugai sumiif­fin­ni amerlanerusuni, inun­nut amerlanerusunut sivisunerusumil­lu oqaluus­sis­sasut.

15. Im­minut qanoq aperisariaqar­pugut, aam­ma sooq?

¹⁵ Sulif­feqaruit im­minut ima aperigit: ‘Sulil­luar­tar­tutut sulif­fin­ni ilisimaneqar­punga? Pif­fis­saq eq­qorlugu sapin­ngisan­nil­lu pitsaaner­paamik suliak­ka naam­mas­sisar­pak­ka?’ Apeq­qutit taak­ku angersin­naaguk­kit sulisitsisun­nit tatigineqas­sagunar­putit. Aam­ma suleqativit Guutip naalagaaf­fia pil­lugu tusarlius­samik tusar­naarusun­nis­saat ilimanar­nerus­saaq. Oqaluus­sinermut ilin­niar­titsinermul­lu tun­ngatil­lugu im­minut ima aperigit: ‘Oqaluus­sisar­tutut eqiasuitsutut ilisimaneqar­punga? Pulaaq­qaar­nis­samut piareersarluar­tar­punga? Inuit soqutigin­nit­tut pulaaq­qipal­lat­tar­pak­ka? Oqaluus­seriaatsit as­sigiin­ngitsut peqataaf­figisar­pak­ka?’ Apeq­qutit  taak­ku angersin­naaguk­kit oqaluus­sinerit nuan­naarutigis­savat.

16. Jiisusip apustilil­lu qasuersaar­nermut isigin­nit­taasiat nalitsin­ni inup­pas­suit isigin­nit­taasian­nit qanoq al­laanerua?

¹⁶ Jiisusip nalun­ngilaa nam­mineq apustilil­lu ilaan­nik­kut qasuersaar­tariaqarlutik. Taamanik­kul­li ul­lumik­kul­lu inup­pas­suit angum­mut pisuumut Jiisusip as­sersuusiarisaanut as­singup­put. Angut taan­na im­minut ima oqarfigivoq: “Eq­qasuutaarup­putit, neril­lutil­lu imer­niarit inuul­luataarlutil­lu!” (Luk 12:19; 2 Tim 3:4) Taas­suma qasuersaar­neq inuul­luar­niutil­lu pingaar­ner­paatip­pai. Jiisusil­li apustilil­lu im­min­nut iluarusutsin­nis­saq inuunermin­ni pingaar­ner­paatin­ngilaat.

17. Sulin­ngin­nitsin­ni pif­fis­sar­put qanoq ator­tar­par­put?

¹⁷ Ul­lumik­kut sulin­ngin­nitsin­ni qasuersaagin­narata al­lanut oqaluus­sil­luta ataatsimiin­ner­nilu najuul­luta ajun­ngitsulior­nik­kut Jiisusi ilaar­niar­tar­par­put. Ajoqersugan­ngor­titsior­tor­neq ataatsimiin­neril­lu pingaar­til­luin­naratsigit sapin­ngisar­put tamaat aalajangersimasumik peqataaf­figisar­pavut. (Hebr 10:24, 25) Al­laat angalagaluaraangat­ta pisar­nitsitut ataatsimiigiar­tar­pugut sumiik­kaluaraangat­talu Biibili pil­lugu naapitavut oqaloqatiginiar­tarlugit. – 2 Tim 4:2.

18. Kun­ngit­ta Kristusip soq­quaatigut?

¹⁸ Qujamasun­naqaaq kun­ngit­ta Kristusip ar­tuk­katsin­nik piumaf­figineq ajormatigut aam­ma sulinermut qasuersaar­nermul­lu eq­qor­tumik isigin­nit­taaseqar­nis­satsin­nik ikior­tarmatigut! (Hebr 4:15) Kis­saatigaa naam­mat­tumik qasuersaar­tas­sasugut. Aam­ma kis­saatigaa timik­kut pisariaqar­titavut piumal­lugit sulil­luar­tas­sasugut ajoqersugan­ngor­titsior­tor­nermilu nuan­nersumi peqataasas­sasugut. Al­laaserisami tul­liut­tumi sam­mis­savar­put naak­kit­taatsumik inus­siaataanitsin­nit aniguisin­niarluta Jiisusi qanoq iliorsimasoq.