1. Jehovap inuuneq naas­saan­ngitsoq pil­lugu neriorsuutaa eqqarsaatigigutsigu qanoq sun­ner­neqaatigis­savar­put?

 JEHOVA neriorsuivoq imminut naalat­tut naas­saan­ngitsumik inuus­sasut. (Rom 6:23) Neriorsuut taanna eqqarsaatigeq­qis­saarutsigu Jehova asanerungaalis­savar­put. Eqqarsaatigeriaruk: Ataatatta qilam­miusup asangaaramisigut naas­saan­ngitsumik inuunis­samik periarfis­sip­paatigut taas­suman­nga avis­saan­ngisaan­naq­qul­luta.

2. Inuuneq naas­saan­ngitsoq pil­lugu neriorsuut qanoq iluaqutigaar­put?

² Inuuneq naas­saan­ngitsoq pil­lugu Guutip neriorsuutaa maanna misilin­neqar­nitsinni piner­tusaar­nis­samut iluaqutigaar­put. Allaat akeq­qanit toqun­niar­neqarutta Jehovamut aalajaat­tuas­saagut. Sooq? Ilaatigut nalun­ngin­natsigu Jehovamut aalajaal­luta toqugutta toqoq­qin­ngisaan­nar­nis­samik neriuuteqar­til­luta makitik­kumaaraatigut. (Joh 5:28, 29; Kor 1. 15:55-58; Hebr 2:15) Sooq naas­saan­ngitsumik inuusin­naal­luta upperisin­naavar­put? Tun­ngavilersuutit ilaat sam­meriar­tigit.

3. Sooq upperil­luin­narsin­naavar­put Jehovap naas­saan­ngitsumik inuutis­sin­naagaatigut? (Tus­siaat 102:13, 25, 28)

³ Nalun­ngilar­put Jehovap naas­saan­ngitsumik inuuin­nar­tis­sin­naagaatigut, taan­naavormi inuunerup pilerfia nam­minerlu piujuaan­nar­tus­saal­luni. (Tuss 36:10) Jehovap piujuaan­narsimanera piujuaan­nar­nis­saalu pil­lugu Biibilimi allas­simaf­fiit ilaat sam­meriar­tigit. Tus­siaat 90:2-mi Jehova pil­lugu allas­simavoq: “Guutiuvutit naas­saan­ngil­luin­nar­tumik.”  Tus­siaat 102-mi assingusumik allas­simasoqar­poq. (Tussiaat 102:13, 25, 28 atuakkit). Pruf­fiitilu Habak­kuki Ataatar­put qilam­miusoq pil­lugu ima allap­poq: “Naalagaq, ittuin­narsiman­ngin­ner­pit itsarujus­suarmiilli? Guutiga iller­nar­toq, toqusus­san­ngor­teqinatigut [toqunavianngilatit, NW]!” – Hab 1:12.

4. Jehovap piujuaan­narsimanera paasiuminaatsik­kutsigu sooq isumakuluutigis­san­ngilar­put? Nas­suiaruk.

⁴ Jehovap naas­saan­ngitsumik piujuaan­narsimanera paasiuminaatsip­piuk? (Es 40:28) Inup­pas­suit paasiuminaatsit­tar­paat. Guuti pil­lugu Elihu oqar­poq: “Ukiuisa amerlas­susii kisis­saan­ngil­lat.” (Job 36:26) Paasiuminaatsitaqaraangat­tali imaan­ngilaq paasiuminaatsitar­put eqqun­ngitsuusoq. Assersuutigalugu qaamanerup maligaasai paasiuminaatsik­katsigit imaappa piun­ngitsuusut? Soorunami naamik. Taamatut­taaq imaas­sin­naavoq uagut inuusugut Jehovap piujuaan­narsimanera piujuaan­nar­nis­saalu paasil­luan­ngisaan­nas­sagigut. Taman­nali isumaqan­ngilaq Guuti naas­saan­ngitsuun­ngitsoq. Uagut paasisin­naasagut paasisin­naan­ngisagullu Pin­ngor­titsisup pisin­naasaanik kil­liliin­ngil­lat. (Rom 11:33-36) Inuit takusin­naasaat tamarmik – ilaatigut seqineq ulloris­sallu – piun­ngik­kal­larmatali Jehova piusimavoq. Upperisin­naavar­put Jehovap ‘nuna pin­ngor­tin­ngik­kal­laramiuk pis­saas­sutsimigut qilallu isivitin­ngik­kal­laramiuk’ piusimanera. (Jer 51:15; ApS 17:24) Naas­saan­ngitsumik inuusin­naanitta upperinis­saanut pis­sutaasoq alla sam­meriar­tigu.

5. Inuit siul­liit qanoq neriuutis­sin­neqaraluar­pat?

⁵ Jehovap nunarsuarmi pin­ngor­titai uumas­susil­lit tamarmik kil­lilim­mik uumas­suseqarsin­naatitaap­put. Jehovap inuit kisiisa toqun­ngisaan­nar­nis­saan­nik periarfis­sip­pai. Adamili mianersoq­quaa: “Orpik ajun­ngitsumillu ajor­tumillu ilisimalersitsisoq nerif­figis­san­ngilat, nerif­figigaluaruk­kumi toqus­saatit!” (Mos 1. 2:17) Adami Evalu Jehovamut naalas­simasuugunik toqusimas­san­ngik­kaluar­put. Ilimanar­poq pif­fis­sap ingerlanerani Adamik­kut “orpim­mit inuunar­tumit” nerisin­naatitaalersimas­sagaluar­tut. Nerisin­naatitaalersimasuugunik toqunatik naas­saan­ngitsumik inuunis­sar­tik qulak­keersimas­sagaluar­paat. b – Mos 1. 3:22.

6-7. (a) Aamma sooq oqarsin­naavugut inuit toqusariaqan­ngitsutut pin­ngor­titaasut? (b) Sunis­sat qilanaaraajuk? (Assit takuk­kit).

⁶ Soqutiginar­poq ilisimatuut ilaasa paasisimagaat inuunermi matumani ilik­karsin­naasatsin­niit amerlanerungaar­tunik qarasatsinni  paasis­sutis­sar­pas­suaqarsin­naasoq. Atuagas­siami 2010-moor­tumi allas­simavoq paasis­sutis­sat 2,5 mil­lionit gigabytes qaratsatsin­niis­sin­naasut. Paasis­sutis­sar­pas­suit taakku nalunaaqut­tap-akun­nerini 3 mil­lionini (ukiut 300-t sin­nerlugit) fjer­nsynik­kut isigin­naagas­sianik immius­sani paasis­sutis­satut amerlatigip­put. (Scientific American Mind) Imaas­sin­naavorlu qarasar­put tamatuman­nga anner­tunerungaar­tumik eqqaaman­nis­sin­naasoq. Erseq­qip­poq Jehovap qarasar­put ukiuni 70-ini 80-iniluun­niit ilik­karsin­naasatsin­niit amerlanerungaar­tunik paasis­sutis­sar­pas­suaqarsin­naatil­lugu pin­ngor­tik­kaa. – Tuss 90:10. 

⁷ Aam­mami Jehovap inuuin­narusus­suseqar­til­luta pin­ngor­tip­paatigut. Biibilimi allas­simavoq Guutip ‘naas­saan­ngis­suseq inuit uum­mataan­niitis­simagaa’. (Oqal 3:11, q.a.i.) Taamaat­tumik toqu akeq­qatut taasar­par­put. (Kor 1. 15:26) Perulun­nar­tumik nap­paateqalerutta tamanna akueriin­nas­savar­put? Naamik, nakorsias­saagut katsorsaatis­saqar­pallu katsorsar­til­luta. Aap, inuuin­nar­nis­sar­put sapin­ngisatsin­nik qulak­keer­niar­tar­par­put. Asasatsin­nillu, inuusut­tuugaluar­tumik utoq­qaagaluar­tumil­luun­niit, toqusoqaraangat sivisuumik aliasuutigingaar­tar­par­put. (Joh 11:32, 33) Pin­ngor­titsisitta asan­nit­tup ilik­kagaqar­tuarsin­naatil­lutalu inuuin­narusus­suseqar­til­luta pin­ngor­tik­kamisigut soorunami naas­saan­ngitsumik inuunis­sar­put ajor­narun­naarsis­savaa. Naas­saan­ngitsumilli inuusin­naanitta upperinis­saanut amerlanerusunik tun­ngavis­saqar­poq. Jehovap aal­laq­qaam­mut siuner­taminik allan­nguisiman­ngin­nera upper­narsar­niarlugu itsaq nalitsin­nilu iliuusiisa ilaat sam­meriar­tigit.

8. Jehovap uagutsin­nut siuner­tani naam­mas­siumaaraa sooq upperil­luin­narsin­naavar­put? (Esaja 55:11)

⁸ Adami Evalu ajor­tuliormata kinguaavisa toqu kingor­nup­paat. Taamaak­kaluar­toq Jehovap siuner­tani allan­ngor­tin­ngilaa. (Esaja 55:11 atuaruk). Inuit upperluar­tut naas­saan­ngitsumik inuunis­saat suli siuner­taraa. Siuner­tani naam­mas­siumal­lugu Jehovap iliuusii neriorsuutaalu pis­sutigalugit taama isum­mersin­naavugut.

9. Guutip suna neriorsuutigaa? (Danieli 12:2, 13)

⁹ Jehova neriorsuisimavoq toqusut makitik­kumaarlugit naas­saan­ngitsumillu inuunis­saan­nik periarfis­sil­lugit. (ApS 24:15; Tit 1:1, 2) Angutip aalajaatsup Juubip qularin­ngilaa Jehovap toqusimasunik makititsinis­sani qilanaarigaa. (Job 14:14, 15, NW) Pruf­fiitip Daanialip nalun­ngilaa inuit naas­saan­ngitsumik inuunis­samik periarfis­sin­neqarlutik makitin­neqarumaar­tut. (Tuss 37:29; Danieli 12:2, 13 atuakkit). Juutit Jiisusip nalaani inuusut aamma nalun­ngilaat Jehovap kif­fani aalajaatsut naas­saan­ngitsumik inuuneqalersis­sin­naagai. (Luk 10:25; 18:18) Jiisusip neriorsuut tamanna eqqar­tor­tuar­paa, nam­minerlu Ataataminit makititaavoq. – Mat 19:29; 22:31, 32; Luk 18:30; Joh 11:25.

10. Itsaq toqusunit makititsinerit sumut upper­narsaataap­pat? (Assiliaq takuuk).

¹⁰ Jehovap Inuunermik Tunisisuusup inuit uum­mar­teq­qis­sin­naavai. Jehovap pruf­fiiti Elia uil­lar­nerup Zareptamiup erneranik makititsisin­naan­ngor­tip­paa. (Kng 1. 17:21-23) Kingusin­nerusuk­kut arnap Shunemimiup ernera pruf­fiitip Eliisap Guutip ikiuineratigut makitip­paa. (Kng 2. 4:18-20, 34-37) Makititsinerit taakku allallu Jehovap inun­nik makititsinis­samut pis­saaneqar­neranut upper­narsaataap­put. Jiisusip nunarsuarmiin­nermini Ataataminit taamaalior­nis­samut pis­saaneqar­titaal­luni upper­narsar­paa. (Joh 11:23-25, 43, 44) Maanna Jiisusi qilam­miil­luni ‘qilammi nunarsuarmilu oqar­tus­saas­susermik tamarmik’ tunineqarsimavoq. Taamaat­tumik ‘toqusut ilivermiit­tut’ naas­saan­ngitsumik inuunis­samik periarfis­sin­neqarlutik makititaanis­saat pil­lugu neriorsuut eqquutitis­sin­naavaa. – Mat 28:18; Joh 5:25-29.

11. Uter­titsis­sutitut akiliut qanoq iluaqutigisin­naavar­put?

¹¹ Sooq Jehovap ernermi asasami anniangaarluni toqunis­saa akueraa? Jiisusip tamanna akivaa ima oqarami: ‘Guutip inuit asangaaramigit Ernituani tun­niup­paa kinaluun­niit taas­sumun­nga upper­toq suujun­naarsin­neqar­nani naas­saan­ngitsumik inooq­qul­lugu.’ (Joh 3:16) Guutip ajor­tuliatsin­nik isumak­keerfigineqarsin­naaq­qul­luta ernini uter­titsis­sutitut tun­nium­magu naas­saan­ngitsumik inuusin­naavugut. (Mat 20:28) Guutip siuner­taa pingaarutilik tamanna apustilip Paulusip ima nas­suiar­paa: “Angut ataaseq aqqutigalugu toqusoqar­taler­neratut angut ataaseq aqqutigalugu toqusut makitin­neqas­sap­put. Soorlu Adami pis­sutigalugu inuit tamarmik toqusar­tut, taamatut­taaq Kristusi pis­sutigalugu tamarmik uum­maq­qis­sap­put.” – Kor 1. 15:21, 22.

12. Jehovap siuner­tani qanoq naam­mas­sis­savaa?

¹² Jiisusip ilin­niar­titani Guutip kun­ngeqarfiata tikiun­nis­saa piumasaatalu nunarsuarmi pinis­saa qin­nutigisaq­qul­lugit ilin­niar­tip­pai. (Mat 6:9, 10) Guutip siuner­taraa inuit nunarsuarmi naas­saan­ngitsumik inuus­sasut. Tamanna naam­mas­siumal­lugu ernini Mis­siarsiusoq kun­ngin­ngor­tis­simavaa. Guutip inuit 144.000-t nunarsuarmit katersugai piumasaata naam­mas­sineqar­nerani Jiisusip suleqatigis­savai. – Saqq 5:9, 10.

13. Maanna Jehova suleriva, illillu susariaqar­pit?

 ¹³ Jehovap maanna “inup­par­pas­suit” katersor­pai Kun­ngeqarfim­minilu innut­taasus­satut ilin­niar­til­lugit. (Saqq 7:9, 10; Jaak 2:8) Nunarsuarmi avis­saar­tuuf­fiusumi sorsuf­fiusumilu inuugaluarlutik inuuneq uumis­suiner­taqan­ngivis­soq sulis­sutigisar­paat. Taak­kualu iliuutsimik­kut ersersip­paat ‘panatik saf­fioreersimal­lugit assal­latserum­mut savis­saliaralugit’. (Mika 4:3) Toqoraaf­fiungaar­tumik sorsoqataanatik Guuti ilumoor­toq siuner­taalu ilin­niar­titsis­sutigaat inuit “inuunivik” nas­saarinias­sam­mas­suk. (Tim 1. 6:19) Guutip kun­ngeqarfia tapersersoramikku ilaqut­tamin­nit akerlilersor­neqarsin­naap­put aningaasatigul­luun­niit annaasaqarlutik, pisariaqar­titamin­nilli amigaateqaq­qunagit Jehovap ikius­savai. (Mat 6:25, 30-33; Luk 18:29, 30) Paasis­sutis­sat taakku Guutip kun­ngeqarfiata piviusuuneranut Jehovallu piumasaanik naam­mas­sisitsiuar­nis­saanut upper­narsaataap­put.

14-15. Toqup suujun­naarsin­neqar­nis­saanik Jehovap neriorsuutaa qanoq eqquutitin­neqas­sava?

¹⁴ Jiisusip qilammi Guutip kun­ngeqarfiani kun­ngiusup Jehovap neriorsuutai tamaasa eqquutitis­savai. (Kor 2. 1:20) 1914-imiilli Jiisusip akeq­qani ajugaaf­figisaler­pai. (Tuss 110:1, 2) Kun­ngeqatigisanilu qanit­tuk­kut nunarsuarmi inuit ajor­tut tamaasa suujun­naarsil­lugit ajugaal­luin­nas­sap­put. – Saqq 6:2.

 ¹⁵ Jiisusip ukiuni tuusintini naalak­kersuinermini toqusimasut makitis­savai Jehovamullu naalat­tut tamaasa naam­mal­luin­nar­tun­ngor­nis­saan­nut ikiorlugit. Inaarutaasumik misilin­neqar­nerup kingorna Jehovap naaper­tuil­luar­tutut isigisaasa “nuna kingor­nutis­savaat najugaqas­sal­lutillu tas­sani naassaanngitsumik”. (Tuss 37:10, 11, 29) “Akerarlu kingul­leq, toqu, suujun­naarsin­neqas­saaq.” – Kor 1. 15:26.

16. Jehovamut kif­far­tor­nitsin­nut suna kajumis­sis­sutaaner­paas­sava?

¹⁶ Sam­meriik­katsitut naas­saan­ngitsumik inuunis­samik neriuuter­put Guutip oqaasiani tun­ngaveqarluar­poq. Neriuuter­put ulluni kingul­lerni erloqinar­torsiorfiusuni mak­kunani ilumoorfigin­nit­tuar­nis­samut iluaqutigisin­naavar­put. Jehovamilli iluarisaas­sagutta inuuin­narusus­suseq kisiat kajumis­sis­sutigis­san­ngilar­put. Jehovap Jiisusillu ilumoorfigiuar­nis­saanut pis­sutaasoq pingaar­ner­paaq tas­saavoq taak­kunin­nga asan­ningaar­ner­put. (Kor 2. 5:14, 15) Asan­nin­ner­put kajumis­sis­sutigalugu Jehova Jiisusilu ilaarusup­pagut neriuuter­pullu allanut oqalut­tuarerusul­lugu. (Rom 10:13-15) Nam­minis­sarsior­tuun­ngin­neq tuk­kor­tuunerlu ilik­karutsigit Jehovap naas­saan­ngitsumik ikin­ngutigerusulis­savaatigut. – Hebr 13:16.

17. Tamatta immik­kut suna akisus­saaf­figaar­put? (Matiusi 7:13, 14)

¹⁷ Naas­saan­ngitsumik inuuneq misigis­saviuk? Jehovap tamatumin­nga periarfis­sip­paatit. Aalajanger­tariaqar­putilli inuunermut aqqutik­koor­tuarumal­lutit. (Matiusi 7:13, 14 atuakkit). Naas­saan­ngitsumik inuuneq qanormita issava? Tamanna allaaserisap tul­liani sam­mis­savar­put.