ATUAQQISSAAGASSAQ 50
“Paratiisimeeqatigiumaarparma”
“Ullumi ilumut oqarfigaakkit: Paratiisimeeqatigiumaarparma.” – LUK 23:43.
ERINARSUUT 140 Naassaanngitsumik inuusinnaavutit!
QILANAARTUUT a
1. Jiisusi toqunngitsiarluni pinerluttumut saniminiittumut qanoq oqarpa? (Lukkarsi 23:39-43)
JIISUSI pinerluttullu marluk saniminiittut toqungajalerlutik anniarput. (Luk 23:32, 33) Pinerluttut taakku marluullutik Jiisusimik mitaatiginnimmata erserpoq Jiisusip ilinniartitarinngikkai. (Mat 27:44; Mak 15:32) Aappaatali isummani allanngortippaa. Ima oqarpoq: “Jiisusi, Kunngeqarfinnut piguit eqqaaginga.” Jiisusillu oqarfigaa: “Ullumi ilumut oqarfigaakkit: Paratiisimeeqatigiumaarparma.” (Lukkarsi 23:39-43 atuakkit). Imaassinnaavoq pinerluttup “Qilaap kunngeqarfia” pillugu tusarliussaq tusarsimagaa, Jiisusimilli malinnittunngorsimanngilaq. (Mat 4:17) Aamma Jiisusi oqanngisaannarpoq pinerluttoq taanna Guutip kunngeqarfianut pissasoq. Jiisusip nunarsuarmi paratiisissaq eqqartorpaa. Sooq taama oqarsinnaavugut?
2. Sooq ilimanarpa pinerluttoq juutiusimasoq?
2 Pinerluttoq allamik isumataartoq juutiugunarpoq. Taanna pinerluttoqatiminut ima oqarpoq: “Illit taassumatut eqqartuunneqaraluarlutit Guuti mianerinngilluinnarpiuk?” (Luk 23:40) Juutit Guuti ataaseq guutisiorfigisarpaat, allamiulli guuterpassuit upperaat. (Mos 2. 20:2, 3; Kor 1. 8:5, 6) Pinerluttut juutiusimanngitsuugunik aperisoq immaqa ima aperisimassagaluarpoq: “Guutit mianerinngilluinnarpigit?” Aammami Jiisusi “savat tammarsimasut inuiaqatigiinnut Israalikkunnut ilaasut” pillugit aallartitaavoq, allamiunuunngitsoq. (Mat 15:24) Guutip Israalikkut paasitissimavai toqusut makitikkumaarlugit. Pinerluttup allamik isumataartup tamakku nalunngissimasinnaavai, oqaasiinillu erserpoq ilimagigaa Jehovap kunngeqarfimmini kunnginngortitassani Jiisusi toqusunit makitikkumaaraa. Neriuutigisimagunarpaa Guutip aamma makitikkumaaraani.
3. Jiisusip paratiisi eqqartormagu pinerluttup suna eqqarsaatigisimassavaa? Nassuiaruk. (Mosesimik 1. 2:15)
3 Pinerluttoq allamik isumataartoq juutiusimaguni Adami Evalu aamma Paratiisi Jehovap taakkununnga pinngortitaa pillugit ilisimasaqarsimassaaq. Taamaattumik ilimanarpoq pinerluttup upperisimassagaa paratiisi Jiisusip eqqartugaa nunarsuarmi naatsiiviussasoq alutornartoq. – Mosesimik 1. 2:15 atuaruk.
4. Jiisusip pinerluttumut oqaasii suup eqqarsaatiginissaanut kajumississutigissavagut?
4 Jiisusip pinerluttumut oqaasii paratiisimi inuunissap qanoq ikkumaarnerata eqqarsaatiginissaanut kajumississutigissavagut. Aamma kunngip Saalumuup naalakkersuinerani pissutsit toqqissisimanartut misissornerisigut paratiisissaq pillugu ilikkagaqarsinnaavugut. Biibilimi allassimavoq Jiisusi Saalumuumit annerusoq. Taassuma naalakkersueqatigisaasalu nunarsuarmi pissutsit nuanningaartunngortissavaat. (Mat 12:42) Erseqqippoq ‘savat allat’ paratiisimi naassaanngitsumik inuunissamut qanoq piukkunarsarsinnaanerlutik soqutigisariaqaraat. – Joh 10:16.
PARATIISIMI INUUNISSAQ QANOQ ISSAVA?
5. Paratiisimi inuunissaq qanoq takorloortarpiuk?
5 Paratiisimi inuunissaq takorlooraangakku suut eqqarsaatigisarpigit? Immaqa naatsiivissuaq, naatsiivimmut Edenimut assingusoq, takorloortarpat. (Mos 1. 2:7-9) Immaqa eqqaavat Guutip innuttai pillugit pruffiitip Mikap siulittuutaa una: “Tamarmik eqqissillutik inuussapput viinnequtaatimik figenequtaatimillu ataanni.” (Mika 4:3, 4) Aamma naammattorsuarnik nerisassaqarnissaa pillugu Biibilimi allassimaffinnik eqqaasaqarunarputit. (Tuss 72:16; Es 65:21, 22) Tassa immaqa naatsiivimmi alutornangaartumi mamartunik nerisassarpassualimmiillutit takorloorpat. Silaannarik naasullu tipigissut naamavatillusooq. Ilaquttatit ikinngutitillu – aamma makititaasimasut – illarpalaartut tusaasutullusooq ippatit. Tamakkorpassuit kissaataannaanngillat, upperilluinnarsinnaavammi tamarmik piviusunngorumaartut. Aamma nunarsuarmi paratiisimi nuannersunik suliassaqassaagut.
6. Paratiisissami sulerissaagut? (Assiliaq takuuk).
6 Jehovap suliatsinnik nuannaarutiginnittussatut pinngortippaatigut. (Oqal 2:24) Kristusip ukiuni tuusintini naalakkersuinerani suliassaqangaassaagut. Annikilliornartorsuarmit aniguisut makititaasullu millionillit atisat nerisassallu pisariaqartissavaat ineqartariaqarlutillu. Tamakkuninnga isumaginninnissaq nuannersuussaaq. Adamip Evallu nunamik naggorissaanermik suliassinneqarnerattut uagut nunarsuup paratiisinngortinnissaanik immikkut suliassinneqassaagut. Aamma ilinniartitsinissarput qanoq nuannertigissanersoq takorlooruk. Makititaasut millionillit Jehovamik siunertaanillu ilisimasaqarpianngitsut ilinniartinneqassapput. Upperluartullu Jiisusip nunarsuarmiinnera sioqquterujussuarlugu inuusimasut toqunermik kingorna qanoq pisoqarsimaneranik ilinniartinneqassapput.
7. Suna upperilluinnarsinnaavarput, aamma sooq?
7 Paratiisimiilerutta amigaateqarnatalu pissutsit aaqqissuulluagaallutillu toqqissisimanartuussapput. Sooq tamanna upperilluinnarsinnaavarput? Jehovap Ernermi naalakkersuinerani inuuneq qanoq ikkumaartoq ersersereermagu. Kunngip Saalumuup naalakkersuineranik oqaluttuaq atuarutsigu suna ersersinniarneraa paasissavarput.
KUNNGIP SAALUMUUP NAALAKKERSUINERA QILANAARTUUTAAVOQ
8. Tussiaat 37:10, 11, 29-milu allassimasut qanoq eqquuppat? (Atuagassiami matumani “Atuartartut apeqqutaat” takuuk).
8 Kunngip Daavip isumassarsisitaalluni silatuumik aalajaatsumillu kunngeqalerpat inuuneq qanoq ikkumaartoq allaatigaa. (Tussiaat 37:10, 11, 29 atuakkit). Paratiisissaq eqqartoraangatsigu Tussiaat 37:11 atuartarparput, taamaaliornissatsinnullu pissutissaqarluarpugut. Jiisusimmi qaqqami oqalugiarnermini allassimaffik taanna issuaramiuk paasinarsisippaa siunissami eqquukkumaartoq. (Mat 5:5) Daavilli allataasa aamma takutippaat kunngip Saalumuup nalaani inuuneq qanoq issanersoq. Saalumuup Israalimi kunngiunerani Guutip innuttai ‘nunami immummik tungusunnitsuummillu kuuttumi’ toqqissilluinnarlutik pigissaarlutillu inuupput. Guuti ima oqarsimavoq: “Inatsisikka maleruarussigit … nunami eqqissineqartitsissaanga. Eqqissillusi qasuersaartassaasi annilaartitsisussaqarnasi.” (Mos 3. 20:24; 26:3, 6) Saalumuut kunngiutillugu neriorsuutit taakku eqquupput. (Nal 1. 22:9; 29:26-28) Jehovalu neriorsuivoq inuit ajortut ‘peeruttussaasut’. (Tuss 37:10) Tassa Tussiaat 37:10, 11, 29-milu allassimasut itsaq eqquupput siunissamilu eqquukkumaarlutik.
9. Saalumuup naalakkersuinera pillugu Sabap dronningia qanoq oqarpa?
9 Saalumuup naalakkersuinerani Israalikkut toqqissillutik pigissaarlutillu inuupput. Tamannalu Sabap dronningiata tusaamaleramiuk nammineq uppernarsiumallugu nunamit ungasissumiit Jerusalemmiliarpoq. (Kng 1. 10:1) Saalumuup kunngeqarfia takoreerlugu ima oqarpoq: “Uannut oqaluttuarineqartut maanna takusama affaannilluunniit inornerupput! … Pilluarput kunngikkormiortatit sukkulluunniit ilinnik kiffartuussisartut ilisimassutsinnillu tusartartut.” (Kng 1. 10:6-8) Saalumuulli naalakkersuinerani pissutsit Jehovap ernermi, Jiisusip, naalakkersuinerani inunnik pilluaqqusiumaarneranut qilanaartuutaannaapput.
10. Jiisusip Saalumuumit annerunera qanoq paasisariaqarpa?
10 Jiisusi Saalumuumit anneruvoq, tassa sutigut tamatigut piukkunnarneruvoq. Saalumuut angutaavoq naammalluinnanngitsoq Guutip innuttaanik ajornartorsiortitsisunik ingasattumik eqqunngitsuliortartoq. Jiisusili kunngiuvoq naammalluinnartoq kukkuneq ajortoq. (Luk 1:32; Hebr 4:14, 15) Saatanimit misilinneqangaartaraluarluni Guutimut aalajaattuarpoq. Kristusi ajortuliunngisaannassalluni ilumoorfiginnitsimilu ajoqutigisinnaasaannik iliuuseqanngisaannassalluni takutereerpaa. Allamik pitsaanerusumik kunngeqarsinnaanngilagut.
11. Jiisusip kikkut ikiortigissavai?
11 Jiisusip naalakkersueqatimilu 144.000-t inuit isumassussavaat Jehovallu nunarsuarmut siunertaa piviusunngortillugu. (Saqq 14:1-3) Jiisusip naalakkersueqatai nunarsuarmi inuugallaramik misilinneqangaartarsimagamik nunarsuarmi inuusunik paasinnittuullutillu misiginneqatiginnissinnaassapput. Sulerissappat?
TANITAT SULERISSAPPAT?
12. 144.000-t Jehovamit sunik suliassinneqassappat?
12 Jiisusip naalakkersueqataasalu suliassaat Saalumuup suliaaniit annertunerungaarput. Kunngip Saalumuup nunami ataatsimi inuit millionillit isumagisussaavai. Guutilli kunngeqarfiani naalakkersuisut inuit milliardillit nunarsuarmi tamarmi najugaqartut isumassorneqarneranni ikiuutaassapput. Taama Jehovamit suliassinneqarnerat ataqqinaataavoq!
13. Jiisusip naalakkersueqatai pingaarutilimmik sumik akisussaaffeqassappat?
13 144.000-t Jiisusitulli kunngiullutillu palasiussapput. (Saqq 5:10) Moorsisip inatsisaasa atuunneranni Israalikkut timikkut anersaakkullu peqqissuunissaat palasit pingaarnertut akisussaaffigaat. Moorsisip inatsisai tassaammata “ajunngitsut nalliuttussat tarraat” isummersinnaavugut Jiisusip naalakkersueqatai Guutip innuttaasa timikkut anersaakkullu pisariaqartitaannik isumaginneqataassasut. (Hebr 10:1) Kunngiullutillu palasiusut taakkua Guutip kunngeqarfiani innuttaasut nunarsuarmiittut qanoq attavigisassaneraat nalugallarparput. Nalunngilarpulli Jehova qanorluunniit aaqqissuissagaluarpat paratiisissami nunarsuarmiittut pisariaqartitamissut ilitsersorneqarumaartut. – Saqq 21:3, 4.
‘SAVAT ALLAT’ PARATIISIMI INUUSINNAAJUMALLUTIK SUSARIAQARPAT?
14. ‘Savat allat’ aamma ‘savarpannguit’ qanoq ataasioqatigiippat?
14 Jiisusip naalakkersueqatissani ‘savarpannguanik’ taavai. (Luk 12:32) Inuit eqimattat allat ‘savanik allanik’ taavai. Eqimattat taakku marluk tassaapput savaatit ataatsit ataasioqatigiittut. (Joh 10:16) Tamarmik suleqatigiillualereerput nunarsuullu paratiisinngortinneqarnerani suleqatigiissallutik. Soorunami taamanikkussamut ‘savarpannguit’ qilammiissapput, ‘savallu allat’ nunarsuarmi naassaanngitsumik inuunissaq neriuutigissavaat. ‘Savalli allat’ paratiisimi inuunissamut piukkunnarsiumallutik maanna iliuuseqartariaqarput.
15. (a) ‘Savat allat’ qanoq Kristusip qatanngutai suleqatigisarpaat? (b) Qatanngut angut assimiittoq qanoq ilaarsinnaaviuk?
15 Pinerluttoq allamik isumataartoq Kristusip pilliutaanik qujamasuutiginninnerminik ersersitsinissaminut suli periarfissaqarani toquvoq. Uagulli ‘savanut allanut’ ilaasugut periarfissarpassuaqarpugut. Jiisusi oqarpoq inuit qatanngutiminik pinnittarnerat tunngavigalugu eqqartuukkumaarlugit. (Mat 25:31-40) Jiisusip qatanngutaasa tanitat ajunngitsuliorfiginerisigut ersersittarparput Jiisusi asallugu. Kristusip qatanngutai tapersersorsinnaavagut oqaluussineranni inuillu malinnittunngoqqullugit ilinniartitsineranni kajumingaarluta ikiornerisigut. (Mat 28:18-20) Taamaattumik Biibilimik misissueqqissaarnermi atorneqartartut taakkua pilersitaat, soorlu atuagaq Naassaanngitsumik pilluarsinnaavutit!, atorluarusuttarpagut. Suli Biibilimik ilinniartitaqanngikkuit sapinngisamik amerlanerpaat Biibilimik pikkorissarnermik neqeroorfigisinnaavatit.
16. Qanoq paratiisimi inuunissamut maanna piareersarsinnaavugut?
16 Jehovap piumasaraa inuit paratiisimi inuusussat aalajangersimasumik pissuseqassasut, maannangaarlu iluarisaatut pissuseqalereersinnaavugut. Oqaatsitsigut iliuutsitsigullu unneqqarissuunissarput ileqqutsigullu oqimaaqatigiissaarinissaq maanna sulissutigisinnaavagut. Aamma Jehova, aapparput uppeqatigullu ilumoorfigisinnaavagut. Silarsuarmi ajortumi matumani Jehova naalakkutsigu paratiisimi naalannissaa ajornannginnerussaaq. Aamma suliaqarnissamut pikkorissarnitsigut pissuserineqartussallu allat ineriartortinnerisigut paratiisimi inuunissamut piareersarluta takutittarparput. Takuuk allaaserisaq “‘Nunarsuarmik kingornussinissamut’ piareeqqavit?” atuagassiami matumaniittoq.
17. Siornatigut ajortuliagut artorsaatigisariaqarpagut? Nassuiaruk.
17 Aamma siornatigut ingasattumik ajortuliagut pissutigalugit pisuusutut misigiunnaarniartariaqarpugut. Soorunami utertitsissutitut akiliut ‘piaaraluta ajortuliortarnissamut’ utoqqatsissutigissanngilarput. (Hebr 10:26-31) Ingasattumilli ajortuliorsimanerput ilumoorluta peqqissimissutigigutsigu, Jehovamut utoqqaanertanullu ikioqqusimagutta allannguisimaguttalu qularinngissinnaavarput Jehovap isumakkeerfigilluinnarsimassagaatigut. (Es 55:7; ApS 3:19) Jiisusip farisiiarinut oqaasii uku eqqaamakkit: “Tikiuppungami inuit naapertuilluartut pinnagit ajortuliortartulli peqqissimeqqullugit.” (Mat 9:13) Utertitsissutitut akiliut ajortuliatsinnik tamanik isumakkeerfiginnilluinnartitsisinnaavoq.
PARATIISIMI NAASSAANNGITSUMIK INUUSINNAAVUTIT
18. Pinerluttoq Jiisusip saniani toqusoq qanoq apererusussaviuk?
18 Paratiisimi pinerluttoq taamani Jiisusimik oqaloqatiginnittoq oqaloqatigalugu takorloorsinnaaviuk? Marluullusi Jiisusip pilliutaa qujamasuutigingaarlugu oqaatigissagunarparsi. Aperisinnaavat Jiisusip inuunerani nalunaaquttap-akunneri kingulliit qanoq issimanersut kissaatinilu Jiisusip akimmagu qanoq misiginersoq. Taassumalu immaqa aperissavaatit Saatanip silarsuaata ulluini kingullerni inuuneq qanoq issimanersoq. Inuit taassumatut ittut Guutip oqaasianik misissueqatiginissaat nuannissaaq! – Ef 4:22-24.
19. Sooq paratiisimi inuuneq pikkunaanngisaannassava? (Saqqaani assiliaq takuuk).
19 Paratiisimi inuuneq pikkunaanngisaannassaaq. Ikinngutigerusulikkatsinnik naapitaqartuaannassaagut siunertaqarluartumillu suliassaqartuaannassalluta. Qilanaarnarnerpaavorlu Ataatatta qilammiusup ullut tamaasa ilisarisimalluarnerulernissaa pilersitaasalu nuannaarutiginissaat. Aamma Jehova pinngortitaalu pillugit ilikkagaqartuaannarsinnaavugut. Inuunerput sivitsoriartortillugu Guuti asanerujartussavarput. Jehovap Jiisusillu paratiisimi naassaanngitsumik inuunissamik neriorsormatigut qujamasungaarpugut!
ERINARSUUT 22 Guutip naalagaaffia nunamut tikiulli!
a Paratiisimi inuunissaq qanoq issanersoq takorluukulaviuk? Eqqarsaatigisarnera qiimmaallannarpoq. Jehovap qanoq siunissaqartikkaatigut eqqarsaatigiuarutsigu paratiisissaq allanut oqaluttuarerusungaalissavarput. Allaaserisaq manna iluaqutigalugu Jiisusip paratiisissamik neriorsuutaa upperinerulissavarput.
b ASSIMI MALUGISASSAT: Qatanngut angut makititaasunik ilinniartitseqataarusuttoq maanna ilinniartitsisalereersoq.