1. Kristumiut angutit susariaqarpat?

 KUNNGIP Daavip Salomo ima ilitsersorpaa: “Nukittusaarit angutitullu takutillutit!” (Kng 1. 2:1-3) Kristumiut angutit nalitsinni taamaaliorsin­naapput Guutip inatsisaasa Biibilimilu najoqqutassiat maleruar­nerisigut. (Luk 2:52) Sooq qatanngutit angutit inuusuttut anersaakkut inersimal­luartun­ngornissaat pingaaruteqarpa?

2-3. Sooq qatanngutit angutit inuusuttut anersaakkut inersimal­luartun­ngornissaat pingaaruteqarpa?

² Kristumiut angutit ilaqutariinni ilagiinnilu pingaarutilinnik akisussaaf­feqartarput. Qatanngut angut inuusut­tuusutit qularnan­ngitsumik eqqarsaatiginikuusimassavat siunissami sunik akisussaaf­feqalersin­naanerlutit. Immaqa piffissaq tamaat kiffartor­tunngorusupputit, imaluunniit ilagiinni kiffartor­tunngorusupputit utoqqaaner­tanngorusul­lutillu. Aamma imaassinnaavoq nuliartaarusuttutit meerartaarusul­lutillu. (Ef 6:4; Tim 1. 3:1) Akisussaaf­feqarnermi iluatsitsissaguit anersaakkut inersimal­luartuusariaqarputit. b

³ Anersaakkut qanoq inersimal­luartun­ngorsinnaavit? Pingaarutilinnik piginnaaneqar­tariaqarputit. Siunissami akisussaaf­feqaler­nissannut maannakkut qanoq piareersarsinnaavit?

4. Maligas­saalluartut kikkut ilaarsin­naavigit? (Aamma assiliaq takuuk).

⁴ Maligas­saalluartut ilaakkit. Maligas­saalluartut Biibilimi oqaluttuarineqartut angutit inuusuttut ilaarsin­naasaat amerlaqaat. Taakkua Guuti innuttaalu asavaat akisussaaf­fitillu naammas­silluarlugit. Aamma illit ilaqutariinni ilagiinnilu angutit anersaakkut inersimal­luartut maligas­saalluartut ilaarsin­naavatit. (Hebr 13:7) Aamma Jiisusi Kristusi maligas­saalluar­nerpaajuvoq. (Pet 1. 2:21) Maligas­saalluartut taakkua misissor­neranni nuannersunik sunik pissuseqarnersut maluginiartaruk. (Hebr 12:1, 2) Eqqarsaatigiullu taakku qanoq ilaarsin­naanerlugit.

5. Eqqarsarsin­naassutsimik qanoq ineriar­tortitsisinnaavit, aamma sooq tamanna pingaaruteqarpa? (Tussiaat 119:9)

⁵ Eqqarsarsin­naassutsimik ineriar­tortitsigit. (Uss 3:21) Angut silatusaartoq iliuuseqan­nginnermini eqqarsarluaq­qaartarpoq. Taamaattumik eqqarsarsin­naassutsit ineriar­tortillugulu sungiusartaruk. Sooq pingaaruteqarpa? Angutit inuusuttut amerlanersaat misigis­sutsiminnit isummaminnillu aqunneqar­tarmata. (Uss 7:7; 29:11) Aamma filmini internetimilu sammineqar­tartunit sunnertin­neqangaartarput. Eqqarsarsin­naassutsimik qanoq ineriar­tortitsisinnaavit? Najoqqutassiat Biibilimeersut ilinniakkit, eqqarsaatigiullu sooq iluaqutaasarnersut. Jehovallu iluarisaatut aalajangiiumallutit najoqqutassiat taakku maleruartakkit. (Tussiaat 119:9 atuaruk). Piginnaaneq pingaarutilik tamanna ineriar­tortikkukku anersaakkut inersimal­luartun­ngornissannut iluaqutigissavat. (Uss 2:11, 12; Hebr 5:14) Maanna sammeriartigu qatanngutinut arnanut pissusilersornermi aamma atisalersoriaatsimut isikkoris­sariaatsimullu tunngatillugu aalajangiiniarnermi eqqarsarsin­naassuseq qanoq iluaqutigissagit.

6. Qatanngutip angutip inuusuttup eqqarsarsin­naassuseq arnanik ataqqin­ninnissamut qanoq iluaqutigissavaa?

⁶ Eqqarsarsin­naassuseq arnanik ataqqin­ninnissamut iluaqutigissavat. Qatanngut angut  inuusuttoq uppeqatiminik arnamik peeraqalerusus­sinnaavoq, tamannalu eqqunngitsulior­nerunngilaq pissusis­samisoorlunilu. Qatanngulli angut inuusuttoq silatusaartoq oqaatsikkut iliuutsikkullu arnamut katikkusun­ngisaminut qaninniarujoor­navianngilaq. (Tim 1. 5:1, 2) Aamma peeraqaruni arnaatini tusaamanerlugaalersik­kusunnginnamiuk kisimeeqatigin­ngisaan­nassavaa. – Kor 1. 6:18.

7. Qatanngutip angutip inuusuttup atisalersoriaaseq isikkoris­sariaaserlu pillugit aalajangiiniar­nermini eqqarsarsin­naassuseq qanoq iluaqutigissavaa?

⁷ Angutip inuusuttup atisalersoriaatsiminut isikkoris­sariaatsiminullu tunngatillugu aamma ersersis­sinnaavaa eqqarsarsin­naassutsini ineriar­tortissimallugu. Atisat mutit inunnit Jehovamik ataqqin­ninngitsunit atoqatigiin­nikkulluunniit eqqunngitsulior­tartunit aalajangersar­neqartarput. Taamaattumik atisaliaat attuumaval­laarlutillu angutinik arnarpalulersitsisin­naapput. Angut inuusuttoq anersaakkut inersimal­luartun­ngorusuttoq qanoq atisaqas­sanerluni aalajangiinialeraangami najoqqutassanik Biibilimeersunik maleruaarusullunilu ilagiinni maligas­saalluartunik ilaarserusuttarpoq. Apeqqutit uku eqqarsaatigisin­naavatit: ‘Atisalersoriaatsikkut ersersit­tarpara isumakkut peqqissuullunga allanillu ataqqin­nittuullunga? Inuit allat atisalersoriaasera takullugu Guutimut kiffartor­tuunera paasigunikku tupigusussappat?’ (Kor 1. 10:31-33; Tit 2:6) Angut inuusuttoq silatusaartoq uppeqatiminit Ataataminillu qilammiusumit ataqqineqartarpoq.

8. Qatanngut angut inuusuttoq qanoq tatiginar­tunngorsinnaava?

⁸ Tatiginartuugit. Angutip inuusuttup tatiginartuusup akisussaaffini eqiasuilluni isumagisarpai. (Luk 16:10) Jiisusi maligas­saalluar­nerpaajusoq eqqarsaatigiuk. Jehovap suliareqqusai artornaraluarpataluunniit eqiasuilluni peqqissaarlunilu naammas­sisarpai. Inuit – ingammik ilinniartitani – asavai, taakkulu pillugit inuunini tunniuppaa. (Joh 13:1) Jiisusi ilaarlugu akisussaaffitit naammas­siniarlugit ilungersorit. Qanoq iliussanerlutit nalornis­sutigigukku maniguullutit misilit­tagaqar­nerusunut ikioqqugit. Eqiasuitsuugit. (Rom 12:11) “Inuit pinnagit Jehovali pillugu” akisussaaffitit naammas­siniartakkit. (Kol 3:23) Tamatta kukkusaratta maniguullutit kukkussutitit nassuerutigisakkit. – Uss 11:2.

9. Sooq qatanngut angut inuusuttoq inuunermi iluaqutigisin­naasaminik piginnaasaqassava?

⁹ Anersaakkut inersimal­luartun­ngussaguit piginnaanerit inuunermi iluaqutigil­luarsin­naasatit pisariaqar­tissavatit. Taakku iluaqutigalugit ilagiinni akisussaaffitit isumagil­luarsin­naassavatit, imminut pilersor­niarlutit ilaquttatil­luunniit pilersor­niarlugit aningaasarsiorsin­naassaatit inunnullu allanut attaveqarluarsin­naassallutit. Piginnaanerit taakkua ilaat pingaarutillit sammeriartigit.

10-11. Sooq pitsaassava qatanngutip angutip inuusuttup atuarneq allannerlu pikkorif­figilerpagit? (Tussiaat 1:1-3) (Aamma asseq takuuk).

 ¹⁰ Atuarneq allannerlu pikkorif­figilikkit. Biibilimi allassimavoq Guutip oqaasianik ullut tamaasa atuartartoq eqqarsaatigin­neqqissaar­tartorlu iluatsitsisarlunilu pilluartuusoq. (Tussiaat 1:1-3 atuakkit). Guutip oqaasia angutip ullut tamaasa atuartaruniuk Jehovap eqqarsartaasia ilinniassavaa, tamannalu eqqarsarluar­nissaminut naliliisin­naassuseqar­nissaminullu iluaqutigissavaa. (Uss 1:3, 4) Angutit Biibilimik maleruaal­luarsinnaasut ilagiinni pisariaqar­tinneqarput. Sooq?

¹¹ Angutit Biibili tunngavigalugu ilinniar­titsilluarlutillu siunnersuil­luarsinnaasut ilagiin­niittunut iluaqutaangaarput. (Tit 1:9) Atuarneq allannerlu pikkorif­figilerukkit ataatsimiinnerni oqalugiaatit akissutillu uppeqativit iluaqutigisin­naasaat uppernikkullu nakussatsis­sutigisin­naasaat piareersarsin­naalissavatit. Aamma nammineq misissueq­qissaar­tillutit imaluunniit ataatsimiinnerni ataatsimeersuar­nernilu oqalugiaatinut tusarnaar­tillutit eqqaamarusutannik allattuisarsin­naalissaatit. Allattukkatit uppernikkut nakussatsis­sutigisin­naassavatit taakkulu iluaqutigalugit allat qiimmas­sarsinnaalis­sallugit.

12. Tusarnaarluarneq inussiar­nersumillu oqalunneq qanoq ilikkar­neqarsin­naappat?

¹² Tusarnaarluarneq inussiar­nersumillu oqalunneq pikkorif­figilikkit. Tusarnaarluartup allat isumaat misigis­susiilu paasilluartarpai. (Uss 20:5) Inuk qanoq eqqarsarnersoq nipaatigut, kiinaatigut ussersor­neratigullu paasineqarsin­naammat taakkua eqqumaf­figinissaat ilinnias­savatit. Aatsaat inunnik peqateqartaruit ilinniarsinnaavat. Tamatigut atortoris­saarutit elektroniskiusut atorlugit, soorlu emailikkut allatigul­luunniit allaqatigiinnikkut, inuit attavigisarukkit kiinarsillugit attaviginissaat sapernar­tinnerussavat. Taamaattumik inuit kiinarsillugit oqaloqatiginis­saannut periarfis­sarsiortarit. – Joh 2. 12.

13. Angutip inuusuttup aamma suna ilinniassavaa? (Timuutiusimut 1. 5:8) (Aamma asseq takuuk).

¹³ Imminut pilersorneq ilinniaruk. Anersaakkut inersimal­luartoq imminut pilersorsin­naassallunilu ilaquttaminik pilersuisin­naassaaq. (Timuutiusimut 1. 5:8 atuaruk). Nunat ilaanni angutit inuusuttut ataatamik ilaquttamil­luunniit allap suliffiani suliaqar­nissaminnik ilinniar­tinneqartarput. Nunani allani angutit inuusuttut nammineq pilersorsin­naaqqullugit ilinniagaqar­tinneqartarput. Qanorluunniit atugaqaraluaruit ilinniagaqaruit aningaasarsiornissat ajornan­nginnerulissaaq.  (ApS 18:2, 3; 20:34; Ef 4:28) Sullarissuugit, aallarnik­katillu naammas­sisakkit. Allat tamanna maluginiassavaat pikkoris­sutullu isigissallutit. Aamma suliffit­taarnissat ajornan­nginnerussaaq suliffivillu annaannginnissaa ilimanar­nerussalluni. Pissuserineqartussat piginnaanerillu sammeriikkagut aamma siunissamut piareersarninni iluaqutigis­savatit.

14. Qatanngut angut inuusuttoq piffissaq tamaat kiffartor­tunngor­nissaminut qanoq piareersarsinnaava?

¹⁴ Piffissaq tamaat kiffartorneq. Anguterpassuit anersaakkut inersimal­luartut inuusun­nerminni piffissaq tamaat kiffartulersimapput. Pionerin­ngoruit inunnik assigiin­ngitsunik suleqateqarneq silatusaarlutillu aningaasanik atuineq ilikkas­savatit. (Flp 4:11-13) Piffissaq tamaat kiffartornermut piareersarumallutit ikiorti-pionerin­ngorsin­naavutit. Ikiorti-pionerit amerlasuut piffissap ingerlanerani pionerin­ngortarput. Pionerin­ngoruit piffissaq tamaat kiffartoriaatsinik allanik, soorlu sanaartoqataanissamik Betelimiluunniit kiffartor­nissamik, periarfis­saqalissaatit.

15-16. Qatanngut angut inuusuttoq ilagiinni kiffartor­tunngorumalluni utoqqaaner­tanngorumallunilu susinnaava?

¹⁵ Ilagiinni kiffartorneq utoqqaaner­taanerluunniit. Qatanngutit angutit tamarmik uppeqatitik ikiorumallugit utoqqaaner­tanngor­nissartik anguniagarisariaqarpaat. Biibilimi ima allassimavoq: “Angut nakkutil­liisunngorusuttoq ajunngitsumik anguniagaqarpoq.” (Tim 1. 3:1) Utoqqaaner­tanngorusuttoq ilagiinni kiffartor­tunngoq­qaassaaq. Ilagiinni kiffartortut assigiin­ngitsutigut utoqqaanertat ikiortarpaat. Utoqqaanertat ilagiinnilu kiffartortut maniguullutik uppeqatitik kiffartuut­tarpaat aallussil­luarlutillu oqaluus­sisarlutik. Qatanngutit angutit inuusuttut piumasaqaatinik eqqortitsisut 17-inik ukioqalereersimagunik ilagiinni kiffartor­tunngorsin­naapput. Ilagiinnilu kiffartortut piumasaqaatinik eqqortitsisut 20-nik ukioqalereersimagunik utoqqaaner­tanngorsin­naapput.

¹⁶ Ilagiinni kiffartortunut utoqqaaner­tanullu piumasaqaatit Biibilimi allassimapput. Taakkulu eqqortin­niarlugit Jehova, ilaquttatit ilagiin­niittullu asasariaqarpatit. (Tim 1. 3:1-13; Tit 1:6-9; Pet 1. 5:2, 3) Piumasaqaatit sulissutigiumallugit susinnaavit? Immikkut misissorluarlugit paasiniarluakkit. Aamma eqqortik­kumallugit Jehovamut qinunikkut ikioqqusarit. c

17. Qatanngut angut inuusuttoq ilaqutariinni ittuunis­saminut qanoq piareersarsinnaava? (Aamma asseq takuuk).

 ¹⁷ Nuliaqarneq ilaqutariinnilu ittuuneq. Jiisusip oqarneratut angutit anersaakkut inersimal­luartut ilaat aalajangerput aappaqaler­niarnatik. (Mat 19:12) Nuliaqaler­niarlutilli aalajangerukku uiusutut ilaqutariinnilu ittuusutut akisussaaf­feqalissaatit. (Kor 1. 11:3) Jehovap piumasaraa uiusup nuliami timikkut, misigis­sutsikkut anersaakkullu pisariaqartitai isumagissagai. (Ef 5:28, 29) Pissuserineqartussat piginnaanerillu sammeriikkagut, soorlu eqqarsarsin­naassuseq, arnanik ataqqin­nittuuneq tatiginar­tuunerlu, uiulluar­nissannut iluaqutigis­savatit. Taava ilaqutariinni ittuusutut akisussaaf­feqarnissannut piareersimalissaatit.

18. Qatanngut angut inuusuttoq ataataal­luarnis­saminut qanoq piareersarsinnaava?

¹⁸ Meeraqarneq. Aappariit ilaat meerartaartarput. Illit meerartaaruit qanoq ataataal­luarsinnaavit? Jehova ilinniarfigingaarsinnaavat. (Ef 6:4) Inuit tusaatillugit Jehovap ernini, Jiisusi, oqarfigaa asallugu akueralugulu. (Mat 3:17) Meeraqaleruit meeqqatit asanerartakkit. Ajunngitsuliaat pillugit nersualaartakkit. Ataataasut Jehovamik ilaarsisut meeqqatik anersaakkut inersimal­luartun­ngornis­saannut ikiortarpaat. Taamatut akisussaaf­feqaler­nissannut piareersarsin­naavutit ilaquttatit ilagiin­niittullu oqaatsikkut iliuutsikkullu asanninnermik qujamasun­nermillu ersersitsivigisar­nerisigut. (Joh 15:9) Taamaalioruit uiulluar­nissannut ataataal­luarnis­sannullu iluaqutigissavat aamma Jehovamit, ilaquttannit ilagiin­niittunillu pingaar­tinneqangaas­sallutit.

19-20. Qatanngut angut inuusuttoq anersaakkut inersimal­luartun­ngorumalluni sussava? (Saqqaani asseq takuuk).

¹⁹ Qatanngut angut inuusut­tuusutit, anersaakkut inersimal­luartun­ngorumallutit iliuuseqar­tariaqarputit. Maligas­saalluartut ilaakkit, eqqarsarsin­naassutsimik ineriar­tortitsigit, tatiginartuugit, inuunermi atorluarsin­naasannik piginnaaneqalerit siunissamullu piareersarlutit.

²⁰ Imaassinnaavoq misigisutit sulissutigisariaqakkatit sapernarpal­laartut. Sapinngilatilli! Eqqaamajuk Jehovap ikiorusungaaraatit. (Es 41:10, 13) Aamma uppeqativit ikiorusup­paatsit. Anersaakkut inersimal­luartun­ngoruit pilluarlutillu nalerisimaassaatit. Qatanngut angut inuusut­tuusutit, asavatsigit. Qanortoq anersaakkut inersimal­luartun­ngorniarnerit Jehovamit pilluaq­quneqarli. – Uss 22:4.