1. Anersaakkut inersimasun­ngorumalluta susariaqarpugut?

 MEERAQ peroriar­tupallattarpoq. Inersimasun­ngornissani sulissutiginaguluunniit alliartorpoq. Anersaakkulli inersimasun­ngornissaq sulissutigineqar­tariaqarpoq. b (Kor 1. 13:11; Hebr 6:1) Anersaakkut inersimasun­ngorumalluta nammineq Jehovamut attaveqarluar­tariaqarpugut. Kristumiutut pissuserineqar­tussanik ineriar­tortitsiumalluta, piginnaasaqalerumalluta siunissamilu akisussaaf­feqaler­nissamut piareersarumalluta Jehovap anersaava illernartoq pisariaqar­tipparput. – Uss 1:5.

2. Mosesimik allakkat siulliit 1:27 sumik ilinniarfigaarput, allaaserisamilu matumani suna sammissavarput?

² Jehovap angut arnarlu pinngortippai. (Mosesimik 1. 1:27 atuaruk). Ersarippoq angutit arnallu timikkut assigiin­ngitsuusut, allatigulli aamma assigiin­ngillat. Assersuutigalugu Jehovap angutit arnallu assigiin­ngitsunik akisussaaf­filerpai. Taamaattumik assigiin­ngitsunik piginnaaneqarlutillu pissuserineqar­tussanik ineriar­tortitsissapput. (Mos 1. 2:18) Allaaserisami matumani sammissavarput arnat inuusuttut anersaakkut inersimal­luartun­ngorumallutik suut sulissutigisariaqaraat. Allaaserisami tulliuttumi sammissavarput angutit suut sulissutigisariaqaraat.

3-4. Arnat inuusuttut maligas­saalluartunik kikkunnik ilaarsisin­naappat? (Aamma assiliaq takuuk).

³ Arnarpassuit Jehovamik asannittut taassumunngalu kiffartortut Biibilimi allaatigineqarput. (Allaaserisat “Uppersusiat maliguk”  jw.org-imiittut takukkit). Allaaserisami matumani allassimaffimmi najoqqutarineqartumi allassimasutut ‘ileqquminnik aqutsisin­naapput sutigullu tamatigut aalajaallutik’. Nalitsinnilu ilagiinni arnat anersaakkut inersimal­luartut amerlaqaat, taakkulu inuusuttut ilinniarfigil­luarsin­naavaat.

⁴ Arnaasutit inuusuttoq, arnat maligas­saalluartut nalunngisatit kikkut ilaarsin­naavigit? Pissusii nuannersut maluginiartakkit. Eqqarsaatigiuk taakkunatut qanoq pissuseqarsin­naanerlutit. Immikkoortuni tulliuttuni anersaakkut inersimal­luartut pissuserisariaqagaat pingaarutillit pingasut sammissavagut.

5. Sooq maniguunneq arnanut anersaakkut inersimal­luartunut pingaaruteqarluinnarpa?

⁵ Anersaakkut inersimal­luarumalluni maniguunneq pingaaruteqarluinnarpoq. Arnaq maniguuttoq Jehovamut inunnullu attaveqarluartarpoq. (Jaak 4:6) Assersuutigalugu arnap Jehovamik asannittup siulersuinermut najoqqutassiaq Jehovamit pilersin­neqartoq maniguulluni malikkusuppaa. (Kor 1. 11:3) Najoqqutassiaq tamanna ilagiinni ilaqutariinnilu atuuppoq. c

6. Arnat inuusuttut maniguunnermut tunngatillugu Rebekka qanoq ilinniarfigisin­naavaat?

⁶ Rebekkap maligassiaa eqqarsaatigiuk. Arnaavoq silassorissoq aalajangeriataal­laqqissorlu, nalunngilaalu qaqugukkut qanorlu iliuuseqas­sanerluni. (Mos 1. 24:58; 27:5-17) Aammali ataqqin­nittuuvoq piumaffigineqaraangamilu naalattarluni. (Mos 1. 24:17, 18, 65) Rebekkatut maniguut­tuuguit Jehovallu siulersuisutut akisussaaf­filigai naalakkukkit ilaquttannut ilagiinnullu maligas­saalluassaatit.

7. Arnat inuusuttut Esteri ilaarlugu qanoq anneruniajuitsuusin­naappat?

⁷ Anersaakkut inersimal­luartut aamma anneruniajuissuseq pisariaqar­tippaat. Biibilimi allassimavoq ‘anneruniajuitsut ilisimas­suseqartut’. (Uss 11:2, NW) Esteri arnaavoq  Guutimut aalajaalluni kiffartortoq anneruniajuitsorlu. Taamaattumik dronningin­ngornini makitasuun­nguutiginngilaa. Ilaquttami imminit utoqqaanerusup Mordokajip siunnersuutaa maleruarpaa. (Est 2:10, 20, 22) Illittaaq siunnersor­tissarsiortaruit siunnersor­neqarnittullu iliortaruit anneruniajuitsuullutit ersersis­sinnaavat. – Tit 2:3-5.

8. Arnap atisalersoriaatsimut isikkoris­sariaatsimullu tunngatillugit silatusaartumik aalajangiinis­saminut qanoq anneruniajuissuseq iluaqutigisinnaavaa? (Timuutiusimut 1. 2:9, 10)

⁸ Esterip anneruniajuitsuunini aamma allatigut ersersippaa. Taanna “pinnersuuvoq”, imminulli malugeq­qusaarneq ajorpoq. (Est 2:7, 15) Arnat kristumiut Esteri qanoq ilaarsin­naavaat? Ilaatigut Timuutiusimut allakkat siulliit 2:9, 10-milu tamanna erseqqis­sarneqarpoq. (Atuakkit). Apustilip Paulusip kristumiut arnat siunnersorpai atisaat anneruniajuitsuunermik isumakkullu peqqissuunermik ersersitsissasut. Grækerit oqaasiinit Paulusip atugaanit erserpoq arnaq kristumiu allat isumaat misigis­susiilu innimigalugit ippinnaatsumik atisalersoriaaseqassasoq. Arnat anersaakkut inersimal­luartut atisalersoriaatsimikkut anneruniajuitsut tulluusimaarutigaagut!

9. Abigajili sumik ilinniarfigisin­naavarput?

⁹ Arnat anersaakkut inersimal­luartut aamma naliliisin­naassuseq ineriar­tortittariaqarpaat. Naliliisin­naassuseq suua? Tassaavoq eqqortumik eqqunngitsumillu immikkoor­titsisinnaaneq silatusaar­tumillu aalajangiisinnaaneq. Abigajili assersuutigeriartigu. Uia aalajangiinerluppoq inoqutaasunut tamanut ilungersunartumik kinguneqarsin­naasumik. Abigajili ingerlaannaq iliuuseqarpoq. Naliliil­luarnera inuppassuit annassutigaat. (Sam 1. 25:14-23, 32-35) Naliliisin­naassuseqarutta nalunngis­sinnaavarput qaqugukkut oqalussanerluta qaqugukkullu nipangersimas­sanerluta. Aamma naleqquttumik inuttut soqutigin­ninnermik ersersitsinissamut iluaqutigaarput. – Tes 1. 4:11.

10-11. Atuarneq allannerlu pikkorif­figilerukkit ilinnut allanullu qanoq iluaqutaassava? (Aamma asseq takuuk).

¹⁰ Arnaq kristumiu assigiin­ngitsunik pikkorif­feqartariaqarpoq. Meeraanermi ilikkakkami ilaat inuunini naallugu iluaqutigisin­naasarpai. Piginnaanerit ilaat sammeriartigit.

¹¹ Atuarneq allannerlu pikkorif­figilikkit. Kulturit ilaanni arnat atuarnermik allannermillu ilinniar­nissaat pingaar­tinneqanngilaq. Piginnaanerilli taakku kristumiunut tamanut pingaar­tuupput. d (Tes 1. 4:11) Taamaattumik atuarnermik allannermillu ilinniar­nissannut  sunaluunniit unissutigis­sanngilat. Sutigut iluaqutigissaviuk? Suliffis­sarsinissamut suliffivillu annaanngin­nissaanut iluaqutigissavat. Aamma Guutip oqaasianik misissuineq ilinniar­titsinerlu pikkorif­figinerulis­savatit. Pingaar­nertullu, Biibilimik atuarnikkut eqqarsaatigin­neqqissaar­nikkullu Jehovamut qaninnerulissaatit. – Jos 1:8; Tim 1. 4:15.

12. Ussatit 31:26 sumik ilinniarfigaajuk?

¹² Tusarnaarluarneq inussiar­nersumillu oqalunneq pikkorif­figilikkit. Tamanna kristumiunut pingaaruteqarpoq. Jaakup ima siunnersorpaatigut: “Kinaluunniit tusaaniapal­lattassaaq, oqalunniapal­lattassanngilaq.” (Jaak 1:19) Allat tusarnaarluaraangakkit ‘qamannga pisumik misigin­neqataanerit’ ersersittarpat. (Pet 1. 3:8) Oqaluttup oqaasii misigis­susiiluunniit paasilluan­ngikkukkit aperisarit. Oqalulin­nginninni eqqarsaq­qaartarit. (Uss 15:28) Ima eqqarsarsin­naavutit: ‘Oqaasissakka ilumoorlutillu qiimmaal­lannarpat? Ataqqin­nittumik inussiar­nersumillu qanoq oqaatigisin­naavakka?’ Arnat anersaakkut inersimal­luartut tusarnaarluartartut inussiar­nersumillu oqaluttartut ilinniarfigikkit. (Ussatit 31:26 atuaruk). Oqaloriaasiat maluginiartaruk. Tusarnaarluarneq inussiar­nersumillu oqalunneq pikkorif­figilerukkit allanut attaveqarluar­nerulissaatit.

13. Angerlarsimaffimmik isumaginninneq qanoq pikkorif­figilersin­naaviuk? (Aamma asseq takuuk).

¹³ Angerlarsimaffimmik isumaginninneq ilinniaruk. Sumiiffip­passuarni arnat angerlarsimaffimmik isumagin­nittuunerusarput. Immaqa anaanat qatanngul­luunniit arnaq alla ilinniarfigisinnaavat. Qatanngut arnaq Cindymik atilik ima oqarpoq: “Sulilluarnerup nuannersortaanik anaanama ilinniar­timmanga qujamasungaarpunga. Iganeq, eqqiaaneq, mersorneq pisiniarfilerinerlu ilinniarakkit inuuninni Jehovamullu kiffartornermi iluaqutigaara. Anaanama aamma inoroorsaar­nissannik ilinniar­timmanga qatanngutit angutit arnallu nuannersut maligas­siuisut ilisarisimalerpakka.” (Uss 31:15, 21, 22) Arnaq eqiasuitsoq, inoroorsaartoq angerlarsimaf­fimmillu isumagin­nilluarsinnaasoq ilaquttaminut ilagiinnullu nuannaarutaasarpoq. – Uss 31:13, 17, 27; ApS 16:15.

14. Crystal qanoq ilinniarfigaajuk, sunalu pingaar­tissaviuk?

¹⁴ Imminut pilersorneq ilinniaruk. Kristumiut tamarmik imminut pilersorsin­naanerup naammagin­ninnerullu ilinniar­nissaat pingaar­tissavaat. (Tes 2. 3:7, 8) Qatanngut arnaq Crystalimik atilik ima oqarpoq: “Atuarfimmi fagit kingusin­nerusukkut iluaqutigisin­naasakka suut qinissanerlugit aalajangiiniarninni angajoqqaama ikiorpaannga. Ataatama kajumis­saarpaanga fagi naatsorsuuserinermut tunngasoq qineqqullugu tamannalu ilikkarakku assut iluaqutigisimavara.” Piginnaanerit suliffeqar­niarnermut iluaqutaasinnaasut saniatigut aamma silatusaarlutit aningaasanik atuinermik  aqutsisinnaaneq ilinniaruk. (Uss 31:16, 18) Pisariaqan­ngitsumik akiitsoqar­naveersaaruit pigisannillu naammagin­nittaruit anguniakkat anersaakkut ittut pingaar­tinnerusin­naassavatit. – Tim 1. 6:8.

15-16. Qatanngutit arnat aappaqan­ngitsut sooq qujamasuutigingaarpagut? (Makkorsi 10:29, 30)

¹⁵ Kristumiutut pissuserineqartussat piginnaanerillu pingaarutillit ineriar­tortikkukkit siunissami iluaqutigis­savatit. Siunissaq pillugu piareersaatigisin­naasannik assersuuteqariarta.

¹⁶ Aalajangersin­naavutit aappaqan­ngikkal­larniarlutit. Aappaqan­ngitsuunermut assigiin­ngitsunik pissuteqar­toqarsinnaavoq. Arnat ilaat Jiisusip oqaatigisaatut aalajangerput aappaqar­niarnatik, peroriar­torfigisaminni aappaqarneq nalingin­naagaluartoq. (Mat 19:10-12) Qularis­sanngilat Jehovap Jiisusillu kristumiut aappaqan­ngitsut naleqar­tittaraat. Qatanngutit arnat aappaqan­ngitsut sumiikkaluaraangamil­luunniit ilagiinnut sunniuteqarluartarput. Inuit allat asagamikkit soqutigigamikkillu taakkununnga anersaakkut qatanngutaasarlutillu anaanaasarput. – Makkorsi 10:29, 30 atuakkit; Tim 1. 5:2.

17. Qatanngut arnaq inuusuttoq piffissaq tamaat kiffartor­tunngor­nissaminut maanna qanoq piareersarsinnaava?

¹⁷ Piffissaq tamaat kiffartor­tunngor­niarlutit aalajangersin­naavutit. Nunarsuaq tamakkerlugu oqaluus­sinermi arnarpassuit suliaqangaartarput. (Tuss 68:12) Illit piffissaq tamaat kiffartor­tunngor­nissannut maanna pilersaarusiorsinnaavit? Pioneritut, sanaartoqataasutut Betelimiluunniit kiffartor­tunngornissat anguniagarisinnaavat. Anguniakkat pillugu qinusarit. Piffissaq tamaat kiffartortut oqaloqatigisakkit, paasiniarullu taamatut kiffartor­tunngorumallutit susariaqar­nersutit. Taava piviusorsiorlutit pilersaarusiorit. Piffissaq tamaat kiffartor­tunngoruit Jehovamut kiffartornermi iliuuseqar­nerunissamut nuannersorpas­suarnik periarfis­saqalissaatit.

18. Sooq qatanngut arnaq aappartaar­nissani eqqarsaatigiguniuk silatusaar­tariaqarpa? (Aamma asseq takuuk).

¹⁸ Aappartaar­niarlutit aalajangersin­naavutit. Pissuserineqartussat piginnaanerillu sammisimasagut aamma aappariinnermi iluaqutigis­savatit. Soorunami aappartaarnissat eqqarsaatigigukku silatusaarlutit eqqarsaatigin­neqqissaar­tariaqarputit. Taamatummi aalajangiineq inuunermi pingaar­nerpaasut ilagaat. Eqqaamajuk uigilerumaakkat ilinnut niaquussammat.  (Rom 7:2; Ef 5:23, 33) Taamaattumik apeqqutit uku eqqarsaatigikkit: ‘Kristumiuua anersaakkut inersimal­luartoq? Anersaakkut ittut inuunermini salliuttarpai? Silatusaarluni aalajangiisarpa? Kukkussutini nassuerutigisarpai? Arnanik ataqqin­nittuua? Anersaakkut, timikkut misigis­sutsikkullu isumassorluarsin­naavaanga? Akisussaaffini isumagil­luartarpai? Assersuutigalugu ilagiinni sunik suliaqartarpa, qanorlu isumagisarpai?’ (Luk 16:10; Tim 1. 5:8) Eqqaamajullu uiulluarsin­naasumik aappartaarusukkuit illit aamma nuliaal­luarnissannut piareersar­tariaqarlutit.

19. Sooq nuliaasup ‘ikiortaasutut’ allaatigineqarnera ataqqinaataava?

¹⁹ Biibilimi nuliaal­luartoq uiminut ‘ikiortaasutut’ allaatigineqarpoq. (Mos 1. 2:18) Taamatut allaatigineqarnera nikassaataava? Naamik, ataqqinaataavoq. Biibilimimi Jehova ‘ikiortaasutut’ allaatigineqarajuppoq. (Tuss 54:6; Hebr 13:6) Nuliaasup uini tapersersoruniuk ikiortaal­luassaaq. Assersuutigalugu uiusup ilaqutariinnut tunngasunik aalajangigai iluatseq­qullugit nuliaasoq iliuuseqangaarsinnaavoq. Jehovalu asagamiuk aappariin­nermillu aaqqissuussinera tapersersorusukkamiuk uimi ajunngitsumik isigineqar­tuarnissaa sulissutigisarpaa. (Uss 31:11, 12; Tim 1. 3:11) Jehovamik asannin­nerulernikkut aamma ilaquttannik ilagiin­niittunillu ikiuisarnikkut nuliaal­luarnissannut piareersarsin­naavutit.

20. Anaanaal­luartup angerlarsimaffini qanoq nuannersuutis­sinnaavaa?

²⁰ Anaanan­ngorsin­naavutit. Uitaareeruit immaqa meerartaassaasi. (Tuss 127:3) Taamaattumik qanoq anaanaal­luarsin­naassanerlutit eqqarsaatiginissaa pitsaassaaq. Pissuserineqartussat piginnaanerillu allaaserisami matumani sammisimasagut nuliaal­luarnissannut anaanaal­luarnis­sannullu iluaqutigis­savatit. Asannit­tuuguit, inussiar­nersuuguit naammagit­tartuuguillu angerlarsimaffiit nuannersuutissavat meeqqatillu asaneqartutut toqqissisimasutullu misigitis­sallugit. – Uss 24:3.

21. Qatanngutit arnat pillugit qanoq misigivugut, aamma sooq? (Saqqaani assiliaq takuuk).

²¹ Qatanngutit arnaasusi, Jehovamut kiffartornermi iliuutsisi pillugit asavassi. (Hebr 6:10) Pissuserineqartussat nuannersut piginnaanerillu inuit amerlasuut iluaqutigisaat ineriar­tortittuarpasi aamma siunissami akisussaaf­figilersin­naasassinnut piareersar­tarlusi. Jehovap peqatigiis­sortaani naleqangaarpusi!