ILLIT tunissuterpassuit Jehovameersut nuannaarutigisarunarpatit, aamma tunissutit taakku qanoq atussanerlugit nammineq aalajangiisin­naatimmatit qujamasuutigigunarpat. Biibilimi ersersin­neqarpoq viinni tunissutaasoq Guutimeersoq. Allaat allassimavoq ‘viinni inuusunut qiimmas­saataasartoq’. (Oqal 10:19; Tuss 104:15) Takusimas­sagunarpalli inuit ilaat imigassamik ajornar­torsiuteqalersimasut. Aamma kulturini assigiin­ngitsuni imigassaq pillugu assigiin­ngitsunik isumaqar­toqartarpoq. Imigassaq pillugu kristumiut qanoq silatusaartumik aalajangiisin­naappat?

Qanorluunniit kultureqaraluarluta inuit isumaat pinnagu Guutip isumaa siunnersuutaalu naapertorlugit aalajangiisarutta inuunitsinni pilluaatigis­savarput.

Immaqa maluginiarsimassavat inuppassuit akulikitsumik ingasat­tumillu aalakoor­nartortalinnik imertartut. Ilaat qasuersaaser­niarlutik imertarput. Allat ajornar­torsiutitik eqqarsaatigerusunnagit imertarput. Aamma allat isumaqarput imigassar­torujus­suartartut nukittuujusut.

Kristumiulli Pinngor­titsisiminnit asannittumit silatuumit siunnersor­neqartarput. Assersuutigalugu imerpal­laarsimanerup kingunipilui pillugit ilisimatip­paatigut. Ussatit 23:29-35 aalakoortup taassumalu ajornar­torsiutaasa takorlooruminartumik allaatigineqarneri atuarsimas­sagunarpatit. a Danielip, Europami utoqqaanertap, Jehova taassumalu siunnersuutai ilikkan­ngikkal­laramigit inuunerisimasani eqqaavaa. Ima oqarpoq: “Imigassar­torpallaartarama ajortumik aalajangiisarpunga misigisapiluillu misigis­sutsikkut ikeqalersip­paannga, tamannalu suli nanertuutigisarpara.”

Kristumiut imigassaq pillugu qanoq silatusaartumik aalajangiisin­naappat? Aalajangiiniar­nitsinni iliuuseqar­niarnitsinnilu Guutip isiginnit­taasiatut isiginnit­taaseqar­tariaqarpugut.

Imigassaq pillugu Biibilimi qanoq allassimasoqarnersoq aammalu sooq inuit ilaat imigassar­tortarnersut sammeriartigu.

Ingasaas­sinngitsumik aalakoor­nartutorneq Biibilimi assuarineqanngilaq. Viinnisulaarneq nuannersutut allaatigineqarpoq. Ima allassimasoqarpoq: “Nuannaarlutit nerisassatit neriniakkit ilorrisimaarlutillu viinnisugassat imerlugu.” (Oqal 9:7) Pisut ilaanni Jiisusi Jehovamullu kiffartortut aalajaatsut allat viinnisortarput. – Mat 26:27-29; Luk 7:34; Tim 1. 5:23.

Biibilimi ingasaas­sinngitsumik aalakoor­nartutorneq assuarineqan­ngikkaluartoq aalakoorneq assuarineqarpoq. Paatsuugas­saanngitsumik allassimavoq: “Viinnimik aalakuus­sanngilasi.” (Ef 5:18) Aamma allassimavoq ‘imerajuttut, Guutip kunngeqarfia kingornutis­sanngikkaat’. (Kor 1. 6:10) Ersarippoq imerpal­laarneq aalakoornerlu Jehovap assuaril­luinnarai. Inunnut avatangiisitsin­niittunut maleruutiin­narnata Guutip iluarisaatut aalajangiisarpugut.

Ilaat isumaqarput aalakuulin­nginnamik imigassar­tungaatsiarsin­naallutik. Tamannali ulorianarpoq. Biibilimi paasitin­neqarpugut angut (arnarluunniit) ‘viinnisungaarnermut inussiaataasoq’ mianersuaal­liorujus­suarsinnaasoq Jehovamullu ajortuliorluni. (Tit 2:3, q.a.i.; Uss 20:1) Jiisusip allaat mianersoq­qussutigaa imerpal­laartoq silarsuassamut nutaamut isinngitsoorsinnaasoq. (Luk 21:34-36) Taavami kristumiup imigassar­tornermut tunngatillugu ajornar­torsiutaalersinnaasut misigiumanagit suna iluaqutigisinnaavaa?

Imigassaq pillugu aalajangiiniaraangatta kulturitsinni amerlanerus­suteqartut iliuuserisartagaat naapertorlugit aalajangiiniarutta ulorianarpoq. Nerisassat imigassallu pineqar­tillugit kristumiut silatusaarlutik Jehovap iluarisaatut iliortarput. Biibilimi ima eqqaasin­neqarpugut: “Nerinermi, imernermi qanorluunniillu iliornermi Guuti sutigut tamatigut ataqqinarsisit­tassavarsi.” (Kor 1. 10:31) Apeqqutit Biibilimilu najoqqutassiat eqqarsaatigisassat aajuku:

Allanut iluareq­qusaarlunga imigassar­tortarpunga? Biibilimi allassimavoq: “Amerlanerusut iliornerannut ... maleruutiin­nassanngilatit.” (Mos 2. 23:2) Tassani Jehovap Israalikkut mianersoqquai inunnut iluarin­ngisaminut maleruutiin­naqqunagit. Aamma uagutsinnut kristumiuusunut tamanna siunnersuutitsialaavoq. Inuit allat imigassaq pillugu isiginnit­taasiannut aalajangigaannullu naleqqus­sartarutta Jehovamut taassumalu najoqqutas­siaanut ungasil­lisinnaavugut. – Rom 12:2.

Sapiinniakujullunga imertarpunga? Kulturit ilaanni akulikitsumik imigassar­tortarneq imerujus­suartarnerlu nalingin­naallunilu akuerineqarpoq. (Pet 1. 4:3) Korintimiunut allakkat siulliit 16:13-imi qanoq kajumis­saarneqartugut maluginiaruk: “Eqqumagitsi, uppernikkut aalajaagitsi, sapiigitsi, pissatsigitsi.” Pissatsik­kumalluni imigassaq aalakoor­nartortalik iluaqutaassava? Naamerluinnaq. Imigassaq sanngiil­lisitsilluni inuup eqqarsarsin­naassusianut iliuusiinullu sunniutipiloqartarpoq. Tassa imigassar­torpallaarneq sapiitsuunermut ersiutaanani sianiitsuunermut ersiutaavoq. Esaja 28:7-imi allassimavoq viinnisorpal­laartut ‘uppeqqajaalersut immiamit napaqqalaarlutillu’.

Eqqortumik iliornissamut sapiissuseq Jehovamin­ngaanneersuuvoq. Eqqortulius­saguttalu eqqumallutalu uppernikkut aalajaat­tariaqarpugut. (Tuss 18:33) Taamaaliorsin­naavugut anersaakkut eqqumajuarnikkut Jehovamullu attaveqar­nitsinnut akornutaasinnaasut ingalas­simanerisigut. Jiisusi Jehovamut attaveqarluarpoq, sapiissuseqarlunilu eqqortulior­nissani aalajangiusimagamiuk inuppas­suarnit ataqqisaavoq.

 Ajornar­torsiutikka puiorniarlugit imigassaq qimarravigisarpara? Tussiaasiortoq ima allappoq: “Eqqarsaatima eqqissiviil­liortileraangannga [illit, Jehova,] tuppallersaanerpit nuannaalersit­tarpaanga.” (Tuss 94:19) Ajornar­torsiutitit annertusival­laalerpata imigassaq qimarraviginagu Jehova ikiortis­sarsiariuk. Jehovamut qinukulasarneq sunniuteqangaartarpoq. Aamma amerlasuut ilagiinni ikinngutitik anersaakkut inersimal­luartut siunnersior­tarpaat. Inuup imigassar­tortarnini ajornar­torsiutiminik aaqqiiniarluni eqqortumik iliuuseqar­nissaraluaminut sanngiil­lissutigisinnaavaa. (Hos 4:11) Daniel, siuliani eqqaaneqareersoq, oqaluttuarpoq: “Ernumanermik imminullu pisuutinnermik unamminiagaqarpunga. Taakku puiorniarlugit imertarpunga, ajornar­torsiutikkali alliartuinnarput. Ikinngutaaruppunga imminullu ataqqiun­naarlunga.” Danielip suna naggataatigut iluaqutigaa? Ima oqarpoq: “Paasilerpara Jehovamut ikiortis­sarsior­tariaqarlunga, imigassamuun­ngitsoq. Jehova ikiortigalugu kiisami ajornar­torsiutikka qaangerpakka.” Allaat ajornar­torsiutigut qaanger­neqarsin­naanngitsutut isikkoqaraluartut Jehova ikiorniarluta piareersimajuaannarpoq. – Flp 4:6, 7; Pet 1. 5:7.

Ilaannikkut imigassar­tortaruit apeqqutit uku atorlugit imminut nalilersorsin­naavutit: ‘Imigassar­tortarnera ilaquttama imaluunniit ikinngutigil­luakkama ernumagisarpaat?’ Taamaappat tamanna nammineq eqqumaf­figinngisannik ajornar­torsiuteqaleriar­torninnut ersiutaasinnaavoq. ‘Imigassar­tornerusalersimavunga?’ Ileqqoq tamanna pinngitsuuisin­naajunnaariar­tornermut ersiutaasinnaavoq. ‘Ullualunni sivisunerusumil­luunniit imigassar­tunngitsoorsin­naanngilanga?’ Taava imaassinnaavoq ileqquliutilerit imaluunniit pinngitsuuisin­naajunnaalersutit. Ajornar­torsiut tamanna qaanger­niarlugu katsorsaasumit ikiorneqarnissat pisariaqalersinnaavoq.

Imigassar­tortarneq ajornar­torsiuterpas­suaqalersitsisin­naammat kristumiut ilaasa iminngil­luinnar­nissartik aalajangiusimavaat. Allat mamarin­nginnamikku imigassartorneq ajorput. Illit ilagisar­takkavit ilaat imigassar­torniarnani aalajangersimappat  uparuarnagu inussiar­nersumik ataqqin­ninnerit ersersis­sinnaavat.

Immaqa paasisimavat imigassar­tortarnerit killilersorukku silatusaar­nerussasoq. Imaluunniit aalajangersin­naavutit qanoq akuttutigisumik imigassar­tussanerlutit, soorlu sapaatip-akunneranut ataasiarlutit imaluunniit aalajangersin­naavutit nerinermi immannguaannaq iggisis­saqarniarlutit. Ilaasa sunik imigassar­tussanerlutik killilersimavaat. Assersuutigalugu ilaat aalajangersimapput kimittuunik imaluunniit kimittuunik akulinnik imigassar­torniarnatik, immaqali ingasaas­sinngitsumik viinnisor­niarlutik imaluunniit immiaarar­torniarlutik. Inuup qanoq imigassar­tortigis­sanerluni aalajangereersimaguniuk killiliussami qaangin­nginnissaa ajornan­nginnerutissavaa. Kristumiup anersaakkut inersimal­luartup taama killiliisimanini aalajangiusiman­ninninilu kanngusuutigis­sanngilaa.

Imigassamut tunngatillugu aalajanger­niaraangatta allat misigissusaat aamma eqqarsaatigisas­savagut. Romamiut 14:21-mi ima allassimavoq: “Qatanngutit naakkiuteqqunagu neqitun­ngikkuit, viinnisun­ngikkuit naakkius­sutigisin­naasaanil­luunniit iliuuseqan­ngikkuit ajunngin­neruvoq.” Tamanna qanoq maleruarsin­naaviuk? Qatanngutinnut asanninnerpit ersersin­neratigut. Misigiguit imigassartoruit allamut naakkius­sutaasinnaasoq imigassar­tortaraluarlutit pisumi tassani imigassar­tunngin­nissannut asanninnerit pissutaatis­sinnaaviuk? Taamaalioruit ersersissavat allat ataqqillugit asallugillu aamma nammineq iluaqutissat pinnagu taakkua iluaqutissaat pingaartikkit. – Kor 1. 10:24.

Aamma pisortat imigassamut tunngatillugu inatsiseqarput. Soorunami kristumiut tamakku maleruassavaat. Imaassinnaavoq aatsaat aalajangersimasunik ukioqaleruit imigassar­torsinnaatitaasutit imaluunniit imigassar­torsimatillutit biilinik allanil­luunniit motoorilinnik atuinissat inerteq­qutaasoq. – Rom 13:1-5.

Jehovap nuannersorpas­suarnik tunissuteqarfigisimavaatigut. Taakkulu qanoq atussanerlugit nammineq aalajangiisin­naatippaatigut, ilaatigut suna nerissanerlugu sunalu imissanerlugu. Qanortoq nammineq aalajangiisin­naatitaanerput Ataatatta qilammiusup iluarisaatut atorisigu.