1. Sooq oqarsin­naavugut Aaperaat neriuuteqar­nissaminut pissutis­saqarluartoq?

 JEHOVAP ikinngunni Aaperaat neriorsorpaa kinguaassaa aqqutigalugu nunarsuarmi inuiaat tamarmik pilluaq­quneqarumaartut. (Mos 1. 15:5; 22:18) Guutimut upperluar­tuugami Aaperaap upperil­luinnarpaa Guutip neriorsuutaata piviusun­ngorumaarnera. Kisianni Aaperaat 100-nik ukioqarluni Saaralu 90-inik ukioqarluni suli ernertaarsiman­ngillat. (Mos 1. 21:1-7) Biibilimili allassimavoq Aaperaap ‘neriuut tunngavigalugu inuiaqatigiip­passuarnut ataatan­ngornissani upperigaa’. (Rom 4:18) Iisaamillu ernertaarmat kiisami neriuutigisaa piviusun­ngorpoq. Sooq Aaperaat taama upperluartigaa?

2. Sooq Aaperaap qularin­ngilluinnarpaa Jehovap neriorsuutaa piviusun­ngorumaartoq?

² Aaperaap Jehova ilisarisimal­luaramiuk qularin­ngilluinnarpaa Guutip neriorsuineratut pisoqarumaartoq. (Rom 4:21) Jehovap Aaperaat iluaraa upperneralu pissutigalugu naapertuil­luartutut isigalugu. (Jaak 2:23) Romamiut 4:18 naapertorlugu Aaperaat upperlunilu neriuuteqarpoq. Neriuut pillugu apustilip Paulusip eqqartugai Romamiut kapitali 5-imi allassimasut maanna sammeriartigit.

3. Neriuut pillugu Paulusi qanoq nassuiaava?

³ Paulusi nassuiaavoq sooq upperisin­naagipput ‘neriuut pakatsisitsineq ajortoq’. (Rom 5:5) Aamma paasitip­paatigut  neriuutitta piviusun­ngorumaarnera qanoq upperinerulersin­naagipput. Romamiut 5:1-5 sammitillugit siunissaq pillugu neriuut qanoq piffissap ingerlanerani upperinerulersimagit eqqarsaatigiuk. Paasissavarput neriuutitsinnik upperin­ninnerput maanna qanoq nakussatsis­sinnaaneripput. Neriuut nuanningaartoq pakatsisitsineq ajortoq Paulusip eqqartugaa sammeqqaariartigu.

4. Romamiut 5:1, 2-milu suna allaatigineqarpa?

⁴ Romamiut 5:1, 2 atuakkit. Paulusi ilagiinnut Romamiittunut taama allappoq. Qatanngutit tassaniittut Jehova Jiisusilu pillugit ilinniar­tinneqarsimapput, uppernertik ersersis­simavaat kristumiun­ngorlutillu. Taamaattumik ‘upperneq pissutigalugu Guutimit naapertuil­luartuutitaapput’ anersaamillu illernartumik taninneqarlutik. Aap, qularutigin­ngisaminnik nuanningaar­tumillu neriuuteqalersimapput.

5. Tanitat qanoq neriuuteqarpat?

⁵ Kingusin­nerusukkut Paulusip kristumiut Efesossimiittut allaffigai neriuutaat Guutimeersoq pillugu. ‘Illernartunik’ taallugit allappoq “kingornus­sissasut”. (Ef 1:18) Aamma Kolossimiunut allakkami sumi akissarsisin­neqassanersut paasitippai. Allaffigai ‘qilammi neriuummik pissarsias­saqartut’. (Kol 1:4, 5) Tassa kristumiut tanitat anersaatut naassaan­ngitsumik qilammiit­tussatut makitin­neqarnissartik Kristusilu ilagalugu kunngiunissartik neriuutigaat. – Tes 1. 4:13-17; Saqq 20:6.

6. Qatanngut angut tanitaq neriuutini pillugu qanoq oqarpa?

⁶ Kristumiut tanitat neriuutertik tamanna qujamasuutigingaarpaat. Taakkua ilaata, qatanngutip Frederick Franzip, neriuutini qanoq misigis­suseqarfiginerlugu 1991-imi ima oqaatigaa: “Neriuuterput qularnaal­luinnarpoq, savarpan­nguanullu ilaasut 144.000-t tamarmik takorloorsiman­ngisaan­nakkatut  annertutigisumik neriuutaat piviusun­ngussaaq.” Taanna ukiorpassuarni Guutimut aalajaalluni kiffartorsimasoq aamma ima oqarpoq: “Neriuut tamanna suli naleqangaar­tipparput. Piviusun­ngornis­saanullu utaqqinerput sivitsoriar­tortillugu neriuutitsinnik pingaar­titsinerujar­tortarpugut. Utaqqineq imminut akilersinnaavoq, ukiuniluunniit millionini utaqqis­sagaluarutta. Neriuuterput aatsaat taama erligitigaara.”

7-8. Jehovamut kiffartortut amerlanersaat qanoq neriuuteqarpat? (Romamiut 8:20, 21)

⁷ Nalitsinni Jehovamut kiffartortut amerlanersaat allamik neriuuteqarput. Aaperaatulli Guutip kunngeqarfianit naalakkersor­neqarlutik nunarsuarmi naassaan­ngitsumik inuunissartik neriuutigaat. (Hebr 11:8-10, 13) Paulusi aamma neriuut taanna pillugu allappoq. (Romamiut 8:20, 21 atuakkit). Siunissaq pillugu Biibilimi neriorsuutigineqartut paaseqqaarakkit suna qilanaarinerpaaviuk? Ajortulior­tarunnaarlutit naammal­luinnar­tunngornissat? Imaluunniit nunarsuarmi paratiisiusumi asasavit toqukkut annaasimasavit takoqqin­nissaat? Guutimit neriuuteqalersin­neqaravit nuannersorpassuit qilanaarisin­naavatit.

⁸ Naassaan­ngitsumik qilammiin­nissamik nunarsuarmiin­nissamil­luunniit neriuuteqarnerput apeqqutaatinnagu neriuutitta nuanningaartup nuannaarutiginissaanut pissutis­saqarluarpugut. Neriuuterpullu suli upperinerulersin­naavarput. Paulusip tamatuminnga nassuiaanera sammeriartigu. Neriuut pillugu allatai sammitillugit tamatuma piviusun­ngornissaa upperinerulis­savarput.

9-10. Paulusip misigisaatut kristumiut suna ilimagisin­naavaat? (Romamiut 5:3) (Aamma assit takukkit).

⁹ Romamiut 5:3 atuaruk. Maluginiaruk annikil­liorneq neriuummik upperin­ninnerulersitsisinnaasoq. Jiisusimik malinnittut tamarmik annikil­liortitaanissartik ilimagisin­naavaat. Paulusi assersuutigisin­naavarput.  Taanna Tessaluunikamiunut ima allappoq: “Najoral­larassi oqarfigisarpassi annikil­liortarumaarluta, nalunngisas­situllu taama pisoqarpoq.” (Tes 1. 3:4) Korintimiunullu ima allappoq: “Qatanngutit, ... annikil­liortitaanerput pillugu ilisimatik­kusuppassi. ... Toqunissarput qulariun­naaraluarparput.” – Kor 2. 1:8; 11:23-27.

¹⁰ Aamma nalitsinni kristumiut arlaatigut annikil­liortitaanissartik ilimagisin­naavaat. (Tim 2. 3:12) Illimmi, Jiisusi upperalugulu ilaarakku annikil­liortitaavit? Imaassinnaavoq kammalaatinnit ilaquttannillu illaruaatigineqartutit ajortumil­luunniit pineqarlutit. Sutigut tamatigut unneqqaris­suugavit suliffinni ajornar­torsiorpit? (Hebr 13:18) Imaluunniit neriuutit pillugu oqaluus­sigavit oqartus­saasunit akerlilersor­neqarpit? Qanorluunniit annikil­liortitaas­sagaluarutta Paulusi allappoq nuannaas­sasugut. Sooq?

11. Sooq misilin­neqarnerni tamani pinertusaar­nissarput aalajangiusimas­savarput?

¹¹ Annikil­liornermi nuannaarsin­naavugut nalunngin­natsigu pissuserineqar­tussamik pingaarutilimmik ineriar­tortitsisin­naalluta. Romamiut 5:3-mi allassimavoq “annikil­liorneq pinertusaar­nissamut iluaqutaasartoq”. Kristumiut tamarmik misilin­neqartarput, taamaattumik misilin­neqarnerni tamani pinertusaar­nissarput aalajangiusimasariaqarparput. Pinertusaarutta aatsaat neriuutigisarput misigis­savarput. Naajartortussat qaarsumut tuttut Jiisusip oqaluttuarigamigit inuit eqqarsaatigisimasai assigerusun­ngilagut. Taakku tusakkaminnik nuannaarlutik akuerseriarlutik ‘annikil­liuleramik malersor­neqaleramil­luunniit upperin­nikkunnaarput’. (Mat 13:5, 6, 20, 21) Akerlilersor­neqarneq misilin­neqarnerlu imaannaan­ngitsuullunilu nuanniippoq, taakkunanili pinertusaarneq iluaqutis­sartaqarpoq. Tassa qanoq?

12. Misilin­neqarnerni pinertusaarneq qanoq iluaqutigisarparput?

¹² Misilin­neqarnerni pinertusaarneq qanoq iluaqutigisin­naaneripput Jaakup ima allaatigaa: “[Pinertusaar­tuarnikkut] imminut ilinniar­tilluarussi inorsarfeqarnasi sutigut tamatigut pissuseris­suullusilu peqqissuussaasi.” (Jaak 1:2-4) Pinertusaarneq siunertaqartoq Jaakup pivaa. Tassa pinertusaarneq iluaqutigalugu naammagittarneq, upperneq, Guutimik tatiginninneq pissuserineqar­tussallu allat ineriar­tortissin­naavatit. Pinertusaarnerli aamma allamik iluaqutis­sartaqarpoq.

13-14. Pinertusaarnerput Jehovap qanoq isigaa, tamannalu qanoq iluaqutigaarput? (Romamiut 5:4)

¹³ Romamiut 5:4 atuaruk. Paulusi allappoq pinertusaarneq “akuerisaanissamut” iluaqutaasartoq. Tassa pinertusaaruit Jehovamit iluarisaassaatit. Imaanngilaq ajornar­torsiornerit Jehovap nuannaarutigigaa, aalajaal­lutilli pinertusaarnerit nuannaarutigaa. Qiimmaal­lannaqaaq nalunagu pinertusaarnikkut Jehova nuannaar­tissinnaagatsigu! – Tuss 5:13.

¹⁴ Eqqaamajuk Aaperaat misilin­neqarnerni pinertusaarami Jehovamit iluarisaasoq. Jehovap ikinngutimisut naapertuil­luartutullu isigaa. (Mos 1. 15:6; Rom 4:13, 22) Uaguttaaq taama isigineqarsin­naavugut. Kiffartor­nitsinni qanoq suliaqar­tiginerput qanorlu akisussaaf­feqartiginerput apeqqutaatinnagu aalajaalluta pinertusaaratta Guutip iluarisarpaatigut. Aamma pissutsit atukkagut qanoq ikkaluarpataluunniit qanorluunniillu ukioqaraluarutta piginnaaneqaraluarut­taluunniit tamatta pinertusaarsin­naavugut. Maanna misilin­neqarnermi Jehovamut  aalajaallutit pinertusaarpit? Taamaappat Jehova nuannaar­tikkakku tuppallersaatigisinnaavat. Guutimit iluarisaalluta nalunngin­natsigu neriuuterput uagutsinnut piviusuunerulissaaq.

15. Romamiut 5:4, 5-imilu Paulusi qanoq allappa, sunalu apeqqutaalerpa?

¹⁵ Paulusip nassuiaaneratut misilin­neqarnermi pinertusaarutta Jehovamit iluarisaassaagut. Maluginiaruk Paulusi nangilluni ima allammat: “[Akuerisaaneq] neriuuteqalersitsisarpoq. Neriuullu pakatsisitsineq ajorpoq.” (Rom 5:4, 5) Versit siuliini Romamiut 5:2-mi Paulusi allappoq kristumiut Romamiut ‘Guutimit alutornarsisin­neqarnis­saminnik neriuuteqartut’. Kristumiut taakku neriuuteqareerpata soormi taava Paulusip neriuut eqqaaqqippaa?

16. Neriuut qanoq upperilersimavarput? (Aamma assit takukkit).

¹⁶ Tamanna akissutis­sarsiumallugu una eqqarsaatigiuk: Biibilimi neriuut nuanningaartoq tusaqqaarakku qanoq misigivit? Nunarsuarmi paratiisiusumi qaqugorsuarmut inuunissaq nuannaringaaraluarlugu piviusun­ngornissaa immaqa aallaqqaammut upperiuminaatsippat. Kisianni Jehova Biibilimilu neriorsuutit pillugit ilinniar­nerujar­tortillutit neriorsuutip piviusun­ngornissaa qulariun­naariartorpat.

17. Imermut morsutsitaanitta kingorna neriuut inuunitsinni qanoq sunnerneqaatiginerusarparput?

¹⁷ Imermut morsutsitaanerpit kingorna ilikkagaqar­nerullutillu anersaakkut inersimal­luarnerujar­toravit neriuutip piviusun­ngornissaa suli upperinerulerpat. (Hebr 5:13–6:1) Romamiut 5:2-4 allaatigineqartut misigisimagunarpatit. Assigiin­ngitsutigut misilin­neqarnerni pinertusaarputit Guutimillu iluarisaanerit misigalugu. Guutimit asaneqarlutillu iluarineqartutit nalunnginnakku neriorsuutigineqartut piviusun­ngornissaasa upperinis­saannut pissutis­saqarluar­neruvutit.  Maannalu neriuut qularin­ngivillugu qujamasuutiginerulersimavat inuuninnilu sunnerneqaatigingaar­tarlugu. Sutigut tamatigut, soorlu ilaquttannut pissusilersorninnut, aalajangiiniarninnut piffissamillu atuisarninnut, sunniuteqartarpoq.

18. Jehovap qanoq qularun­naarsip­paatigut?

¹⁸ Paulusi neriorsuivoq Guutimit iluarisaasut neriuutaat piviusun­ngorumaartoq. Sooq tamanna qularutis­saanngila? Qularnaveeqqut Guutimeersoq Paulusip ima allaatigaa: “[Neriuut] pakatsisitsineq ajorpoq, Guutimmi anersaaq illernartoq uagutsinnut tunniussani atorlugu asanninnini uummatitsinnut kuivaa.” (Rom 5:5) Jehovamit neriuutis­sinneqaravit piviusun­ngornissaa upperil­luinnarsinnaavat.

19. Neriuutinnut tunngatillugu suna qularis­sanngiliuk?

¹⁹ Jehovap Aaperaamut neriorsuutaa taassuminngalu iluarin­ninnera ikinngutimisullu isiginninnera eqqarsaatigeq­qissaaruk. Aaperaap neriuutigisaa piviusun­ngorpoq. Biibilimi ima allassimavoq: “Aaperaap naammagit­tarluni utaqqereerluni neriorsuut taanna pissarsiaraa.” (Hebr 6:15; 11:9, 18; Rom 4:20-22) Aap, pakatsisin­neqanngilaq. Illittaaq aalajaakkuit upperil­luinnarsinnaavat neriuutigisattut akissarsisin­neqarumaartutit. Pivisun­ngornissaa nalunnginnakku nuannaarsin­naavutit, pakatsisin­neqarnaviarnak! (Rom 12:12) Paulusi allappoq: “Qanortoq Guutip neriuuteqalersitsisup tatigigassinni nuannaarnermik eqqissinermillu ulikkaarilisi. Aap, qanortoq anersaap illernartup pissaanerata ikiuineratigut neriuuteqangaaritsi.” – Rom 15:13.