1. Aaperaap upperneranut tunngatillugu suna eqqarsaatigisin­naavarput?

 INUPPASSUIT Aaperaat pillugu tusagaqarsimapput, amerlanersaasali ilisimasaqarfigival­laanngilaat. Kisianni illit Aaperaat pillugu ilisimasaqangaarputit. Assersuutigalugu nalunngilat Biibilimi allassimasoq Aaperaat ‘uppertunut tamanut ataataasoq’. (Rom 4:11) Immaqa eqqarsarputit: ‘Aaperaatulli uppertigisin­naavunga?’ Aap, taamaas­sinnaavutit.

2. Sooq Aaperaap maligassiaa misissus­savarput? (Jaaku 2:22, 23)

² Aaperaatulli uppersuseqalersin­naavugut maligas­siaanik misissuinikkut. Aaperaat sutigut tamatigut Guutimut naalakkami nunamut ungasissumut nuuppoq, ukiorpassuarni tuperni najugaqarpoq ernermilu asasami Iisaap pilliutiginissaanut piumassuseqarluni. Taamaalior­nermigut upperluar­tuunini ersersippaa. Uppernini iliuutsinilu pissutigalugit Jehova nuannaar­tillugulu ikinngutigilerpaa. (Jaaku 2:22, 23 atuakkit). Jehovap kissaatigaa tamatta – aamma illit – taama pilluaq­quneqas­sasugut. Taamaattumik Jehovap Paulusi Jaakulu isumassarsisillugit Aaperaat pillugu allatsippai. Aaperaap maligassiaa Romamiunut allakkani kapitali 4-mi Jaakumillu allakkani kapitali 2-mi allaatigineqartoq sammeriartigu. Kapitalini taakkunani Aaperaat pillugu pingaarutilimmik allassimasoqarpoq.

3. Paulusip Jaakullu Biibilimi allassimaffik sorleq issuarpaat?

 ³ Paulusi Jaakulu marluullutik Mosesimik allakkat siulliit 15:6 issuarlugu ima allapput: “Aaperaat Jehovamut upperami naapertuil­luartuutitaavoq.” (Rom 4:3; Jaak 2:23) Guutimit naapertuil­luartuutitaaneq isumaqarpoq taassumannga iluarisaallunilu pisuunngitsutut isigineqarneq. Guutip inuk ajortilik naammal­luinnan­ngitsorlu pisuunngitsutut isigisin­naammagu tupinnaq! Illittaaq naapertuil­luartuutitaarusus­sagunarputit. Taamaas­sinnaavutillumi. Qanoq taamaat­toqarsin­naanersoq paasiumallugu Aaperaat sooq naapertuil­luartutut isigineqarsimanersoq sammeriartigu.

4. Sooq inuit naapertuil­luartuunissaat ajornarpasippa?

⁴ Romamiunut allakkamini Paulusi allappoq inuit tamarmik ajortiliusut. (Rom 3:23) Taavami Guutip qanoq iluaralutalu naapertuil­luartutut isigisin­naavaatigut? Tamatuma akissutaa kristumiut paasinias­sammassuk Paulusip Aaperaat eqqartorpaa.

5. Suna tunngavigalugu Aaperaat Jehovamit naapertuil­luartuutitaava? (Romamiut 4:2-4)

⁵ Aaperaat Kaanaanimi najugaqar­tilluni Jehovamit naapertuil­luartuutitaavoq. Sooq Jehovap Aaperaat naapertuil­luartutut isigaa? Imaanngilaq Aaperaat Moorsisip inatsisaanik maleruaammat. (Rom 4:13) Inatsisimmi taakku aatsaat ukiut 400-t tamatuma kingorna Israalikkunnut tunniun­neqarput. Taavami suna tunngavigalugu Aaperaat Guutimit naapertuil­luartuutitaava? Jehovamit ajunngisaangaarfigineqarluni uppernini pissutigalugu naapertuil­luartuutitaavoq. – Romamiut 4:2-4 atuakkit.

6. Sooq inuk ajortilik Jehovamit naapertuil­luartuutitaasinnaava?

⁶ Paulusi allappoq Guutimut uppertoq ‘uppernini pissutigalugu naapertuil­luartuutitaasartoq’. (Rom 4:5) Nangillunilu ima allappoq: “Iliuutsini pissutiginagit Guutimit naapertuil­luartuutitaasup pilluarnera Daavip ima eqqartorpaa: ‘Pilluarput inatsisaatsutut iliuuseqarnertik pillugu isumakkeerfigineqarlutillu ajortuliaminnik matoorif­figineqartut. Pilluarpoq ajortuliani pillugit Jehovamit naatsorsuusiorfigineqan­ngitsoq.’” (Rom 4:6-8; Tuss 32:1, 2) Guutip imminut uppertut ajortuliaat matoortarpai. Ajortuliatik pillugit Jehovamit naatsorsuusiorfigineqan­nginnamik isumakkeerfigineqarluinnarput. Uppernerat pissutigalugu Guutip pisuunngitsutut naapertuil­luartutullu isigai.

7. Sooq oqarsin­naavugut itsaq Guutimut kiffartortut naapertuil­luartuusut?

⁷ Aaperaat, Daavi Guutimullu kiffartortut aalajaatsut allat naapertuil­luartuutitaagaluarlutik suli ajortiliupput. Upperneralli pissutigalugu Guutip pisuunngitsutut isigai, inunnit Guutimik upperin­ninngitsunit allaanerul­luinnarput. (Ef 2:12) Paulusip allakkamini erseqqissarpaa Guutimut ikinngutaal­luarusukkaanni upperneq pisariaqarluinnartoq. Aaperaap Daavillu uppernertik pissutigalugu Guuti ikinngutigaat. Uaguttaaq uppernerput pissutigalugu ikinngutigisin­naavarput.

8-9. Paulusip Jaakullu allataat pillugit inuit ilaat kukkusumik sumik isummersimappat, aamma sooq?

⁸ Ukiuni hundredilik­kuutaani uppernerup iliuutsillu pingaaruteqarnerat kristumiuunerartuni oqallisigineqartarpoq. Palasit ilaasa ilinniar­titsissutigaat inuup annaanneqarumalluni naalagaq Jiisusi Kristusi  upperiin­nassagaa. Immaqa una tusarnikuuat: “Jiisusi upperfigigukku annaanneqassaatit.” Immaqa allaat ilaasa Paulusip oqaasii uku issuarpaat: ‘[Inuk] iliuutsini pissutiginagit Guutimit naapertuil­luartuutitaavoq.’ (Rom 4:6) Allalli oqartarput sumiiffinnut upperisarsioqatigiinnit illernar­tuusorineqar­tunukaruit ajunngitsulior­taruillu imminut annaassin­naasutit. Taakkua immaqa Jaaku 2:24 issuarpaat: “Inuup uppernini kisiat pissutiginagu iliuutsinili pissutigalugit naapertuil­luartuutitaasarpoq.”

⁹ Assigiin­ngitsunik isumaqar­toqarnera pissutigalugu Biibilimik ilisimatusartut ilaat isummersimapput Paulusi Jaakulu upperneq iliuutsillu pillugit isumaqatigiin­ngitsut. Palasit ilaat naapertorlugit Paulusi isumaqarpoq inuk uppernini kisiat pissutigalugu naapertuil­luartuutitaasinnaasoq Jaakuli isumaqartoq inuk ajunngitsuliani pissutigalugit naapertuil­luartuutitaasinnaasoq. Upperisarsiornermik ilisimatusartoq oqarpoq Jaakup Paulusi isumaqatigin­ngikkaa paasinngikkaalu sooq Paulusip uppernerinnaq naamman­neraraa. Paulusili Jaakulu marluullutik Jehovamit isumassarsisin­neqarput. (Tim 2. 3:16) Taamaattumik assigiin­ngitsunik nassuiaateqar­nerannut pissutis­saqarluarsimassaaq. Tamannalu paasisin­naavarput versit ataqatigiinnerat misissorutsigu.

10. Iliuutsit suut pingaarnertut Paulusip eqqartorpai? (Romamiut 3:21, 28) (Aamma assiliaq takuuk).

¹⁰ Iliuutsit Paulusip Romamiunut allakkamini kapitali 3 aamma 4-mi eqqartugai suuppat? Pingaarnertut “inatsisinik maleruaaneq” pivaa, tassa inatsisit Moorsisikkut Israalikkunnut tunniun­neqartut malillugit iliorneq pivaa. (Romamiut 3:21, 28  atuakkit). Paulusip nalaani kristumiut juutiusut ilaasa Moorsisip inatsisaasa tassanilu iliuusereq­quneqartut atuukkun­naarsin­neqarnerat akueriuminaatsik­kunarpaat. Taamaattumik Paulusip Aaperaat eqqartorpaa uppernarsarumallugu “inatsisinik maleruaaneq” tunngaviginagu inuk Guutimit naapertuil­luartuutitaasartoq. Uppernerli tunngavigalugu taamaat­toqartarpoq. Tamanna nalunagu tuppallernarpoq paasigatsigumi Guutimut Kristusimullu upperutta Guutimit iluarisaasin­naalluta.

11. Jaakup iliuutsit suut pivai?

¹¹ Iliuutsit Jaakumit allakkani kapitali 2-mi allaatigineqartut tassaan­ngillat “inatsisinik maleruaaneq” Paulusip eqqartugaa. Kristumiut iliuuserisartagaat Jaakup pivai. Taama iliuuseqar­nermigut kristumiup uppernarsartarpaa Guuti ilumut upperinerlugu. Iliuutsit marluk Jaakup eqqartugai assersuutigeriartigit.

12. Jaakup uppernerup iliuutsillu ataqatigiinnerat qanoq nassuiarpaa? (Aamma assiliaq takuuk).

¹² Assersuummi siullermi Jaaku nassuiaavoq kristumiut kinaassusersior­naveersaassasut. Angut pisuumut inussiar­nisaartoq piitsumullu inussiar­niitsoq assersuutigalugu tamanna erseqqissarpaa. Jaaku inerniliilluni allappoq angut taamaattoq uppertuuneraraluarluni iliuutsimigut ersersikkaa uppertuunani. (Jaak 2:1-5, 9) Assersuutit aappaanni qatanngutinik angutinik arnanil­luunniit atisassaaleqisunik takunnittoq ikiuinngitsorli Jaakup eqqartorpaa. Ikiuinngitsup uppertuuneraraluarluni iliuuseqan­nginnami uppernarsarpaa uppernini iluaqutaan­ngitsoq. Jaakup allaatigisaatut “iliuuseqarnani upperneq toqungavoq”. – Jaak 2:14-17.

13. Jaakup uppernikkut iliuuseqarnerup pingaaruteqassusia qanoq erseqqissarpaa? (Jaaku 2:25, 26)

 ¹³ Jaakup Raahabbip maligas­saalluarnera eqqartorpaa, taassumami uppernini iliuutsimigut ersersippaa. (Jaaku 2:25, 26 atuakkit). Jehovap Israalikkunnik ikiuisarnera pillugu tusagaqarsimavoq. (Jos 2:9-11) Isertortumik alapernaarsuisut Israalikkuusut marluk navianar­torsiortut Raahabbip toqqornis­saannut ikioramigit uppernini iliuutsimigut ersersippaa. Taamaattumik arnaq taanna Israalik­kuunngitsoq naammal­luinnan­ngitsorlu Aaperaatulli naapertuil­luartuutitaavoq. Uppernikkut iliuuseqarnerup pingaaruteqassusia pillugu Raahabbi ilinniarfigaarput.

14. Sooq oqarsin­naavugut Paulusip Jaakullu allataat imminnut akerliun­ngitsut?

¹⁴ Paulusip Jaakullu tamarmik immikkut upperneq iliuutsillu pillugit nassuiaariaaseqarlutik assigiin­ngitsut erseqqis­sarpaat. Paulusip kristumiut juutiusut paasitippai Moorsisip inatsisaanik maleruaanikkut Jehovamit naapertuil­luartuutitaasin­naanngitsut. Jaakullu erseqqissarpaa kristumiut tamarmik ajunngitsulior­nermikkut uppernertik ersersit­tassagaat.

15. Uppernerput iliuutsikkut qanoq ersersis­sinnaavarput? (Aamma assit takukkit).

¹⁵ Jehova oqanngilaq naapertuil­luartuutitaas­sagutta Aaperaap iliuusii ilaaqqis­saartariaqarigut. Uppernerput assigiin­ngitsorpas­suartigut ersersis­sinnaavarput. Ilagiinni nutaat tikilluaq­qusinnaavagut, uppeqatigut ikiortariallit ikiorsin­naavagut ilaquttatsinnullu ajunngitsuliorsin­naalluta, iliuutsit taakku tamaasa Guutip iluarisarpai. (Rom 15:7; Tim 1. 5:4, 8; Joh 1. 3:18) Aamma uppernerput  pingaarutilitsigut ersersis­sinnaavarput aallussil­luarluta nutaarsiassanik nuannersunik oqaluus­sisarnikkut. (Tim 1. 4:16) Jehovap neriorsuutaasa eqquukkumaar­nerannik maleruaq­qusaasalu pitsaanerpaajunerannik upperin­ninnerput tamatta iliuutsikkut ersersis­sinnaavarput. Taamaalioruttalu upperil­luinnarsin­naavarput Guutimit naapertuil­luartuutitaas­sallutalu ikinngutigineqas­salluta.

16. Aaperaap suna neriuutigalugulu upperaa?

¹⁶ Aaperaat pingaarutilimmik allamik ilinniarfigisin­naavarput. Romamiunut allakkani kapitali 4-mi paasivarput neriuuteqarneq qanoq pingaaruteqar­tigisoq. Jehova neriorsuivoq Aaperaakkut ‘inuiaqatigiip­passuit’ pilluaq­quneqarumaartut. Aaperaap neriuutigisaa nuanningaarami! (Mos 1. 12:3; 15:5; 17:4; Rom 4:17) Aaperaalli 100-nik ukioqarluni Saaralu 90-nik ukioqarluni suli ernertaarsiman­ngillat. Taama utoqqalitigisimagamik ernertaar­nissaat ajornarpasis­sinnaavoq. Aaperaap uppernera misilin­neqaraluartoq “neriuut tunngavigalugu inuiaqatigiip­passuarnut ataatan­ngornissani upperaa”. (Rom 4:18, 19) Neriuutigisaalu piviusun­ngorpoq Iisaamik ernertaarmat. – Rom 4:20-22.

17. Qanoq nalunngilarput Guutimit naapertuil­luartuutitaasin­naallutalu ikinngutigineqarsin­naasugut?

¹⁷ Aaperaatulli Guutimit naapertuil­luartuutitaasin­naallutalu ikinngutigineqarsin­naavugut. Paulusip tamanna ersersippaa ima allakkami: “[Oqaaseq] ‘naapertuil­luartuutitaavoq’ Aaperaat kisiat pillugu allanneqarnani aamma uagut pilluta allanneqarpoq, uaguttaarmi Jiisusimik Naalakkatsinnik toqusunit makititsisoq upperigatsigu naapertuil­luartuutitaas­sagatta.” (Rom 4:23, 24) Aaperaatulli uppernitta iliuutsittalu saniatigut neriuuteqarnerput pingaaruteqarpoq. Paulusip Romamiunut allakkamini kapitali 5-imi neriuuterput eqqartorpaa, tamannalu allaaserisami tulliuttumi sammissavarput.