1-2. Meeqqap upperisarput Biibilimik tunngavilik apeqquserpagu angajoq­qaajusut qanoq qisuariassappat?

 MEEQQAMIK perorsaaneq piffissar­tornarlunilu suliarujussuuvoq. Angajoq­qaajuguit nersualaar­neqassaatit meeqqavit uppernera nakussatsin­niarlugu ilungersoravit. (Mos 5. 6:6, 7) Peroriar­tortilluni meeqqap upperisarput Biibilimik tunngavilik, ilaatigut ileqqoris­saarneq pillugu Biibilimi najoqqutassiat, apeqquser­talersinnaavai.

² Meeqqavit taamatut apeqqusiinera immaqa isumakuluutigissavat eqqarsarlutit Guuti Biibililu upperival­laarunnaarsimagai. Meerarli ineriar­tornermini upperisat nammineq upperilis­saguniuk apeqquteqar­tariaqarpoq. (Kor 1. 13:11) Taamaattumik annilaangasariaqan­ngilatit. Apeqqusiisarnera eqqarsar­taatsiminik ineriar­tortitsinissaanut ikiuunnissamut periarfissattut isigisarsinnaavat.

3. Allaaserisami matumani suut sammissavagut?

³ Allaaserisami matumani sammissavarput angajoqqaat meeqqatik qanoq ikiorsin­naagaat ukununnga tunngatillugu: (1) Meeqqap uppernerminik ineriar­tortitsinissaa, (2) ileqqoris­saarneq pillugu Biibilimi najoqqutassianik pingaar­titsinissamik ineriar­tortitsinissaa, aamma (3) upperisaminik illersuinissaa. Kiisalu sammissavarput meeqqap apeqqusiinera sooq iluaqutaasartoq aamma angajoqqaat upperisarput eqqartorumallugu sulerisarsin­naanersut.

MEEQQAT UPPERNERMINIK INERIAR­TORTITSINISSAANUT IKIORUK

4. Meeqqap suut qularisinnaavai, aamma sooq?

⁴ Angajoqqaat kristumiut nalunngilaat Guutimut upperneq kingornun­neqarneq ajortoq. Illit meeqqavillu Jehovamut upperneq  inunnguuserin­ngilarsi. Taamaattumik immaqa meeqqat qulalerluni ima aperisinnaavoq: ‘Guuteqarnera qanoq nalunngis­sinnaavara? Biibilimi allassimasut ilumoorpat?’ Biibilimili kajumis­saarneqarpugut eqqarsarsin­naassuserput atussagipput ‘sunullu tamanut tunngatillugu eqqortoq paasiniar­tassagipput’. (Tes 1. 5:21; Hebr 5:14) Meeqqat uppernerminik ineriar­tortitsinissaanut qanoq ikiorsin­naaviuk?

5. Angajoqqaat meeqqatik Biibilimik upperin­ninneruler­nissaannut qanoq ikiorsin­naavaat? (Romamiut 12:2)

⁵ Meeqqat nammineerluni Biibilimik misissuinissaanut kajumissaaruk. (Romamiut 12:2 atuaruk). Meeqqat apeqquteqaraangat takutit­tarsinnaavat nammineq qanoq akissutis­sarsiorsin­naanersoq. Assersuutigalugu Jehovap Nalunaajaasuisa ujarliutaat takutis­sinnaavat. Qulequtaq “Biibili” qupperiarlugu qulequtaaraq “Guutimit isumassarsiarititaasoq” meeqqap misissoruniuk uppernarsisinnaavaa Biibili tassaagin­nanngitsoq inuit atuakkiaat tassaasorli ‘Guutip oqaasia’. (Tes 1. 2:13) Assersuutigalugu itsaq Assyriami illoqarfik Nineve pillugu paasissutis­sarsiorsinnaavoq. Biibilimik isornar­torsiuisut ilaat isumaqar­nikuupput illoqarfik taanna piusiman­ngisaannartoq. Kisianni 1850-ikkunni Ninevep illukui nassaarineqarmata Biibilimi oqaluttuarineqartup ilumoornera uppernarsineqarpoq. (Sef 2:13-15) Ninevep piujunnaar­nissaanik Biibilimi siulittuutit eqquussimanerat pillugu paasisaqarumalluni atuarsinnaavaa Napasuliaq Alapernaarsuiffimmi novembari 2021-moortumi allaaserisaq “Nalunngiliuk?” Biibililersaarutitsinni allassimasut qinerlerfissiani allani allassimasunut sanillius­sinnaavai. Taamaalilluni nammineq paasisinnaavaa Biibilimi allassimasut tunngavis­saalluartuusut.

6. Angajoqqaat meeraq eqqarsarsin­nnaassutsiminik ineriar­tortitsinissaanut qanoq ikiorsin­naavaat? Assersuuteqarit. (Aamma asseq takuuk).

⁶ Meeqqat eqqarsarsin­naassutsiminik ineriar­tortitsinissaanut ikioruk. Angajoqqaat Biibilimut Guutimullu upperneq pillugu meeqqaminnik oqaloqateqar­nissamut periarfis­sarsiorsin­naapput. Assersuutigalugu katersugaasivik, naatsiivissuaq imaluunniit Jehovap Nalunaajaasuisa immikkoor­tortaqarfianni saqqummersitsineq takornariarsin­naavarsi. Imaluunniit Biibilip ilumoornera uppernarsar­niarlugu katersugaasivimmi saqqummersitaq Biibilip nalaaneersoq assimi videumiluunniit takutis­sinnaavat. Immaqa Meshap ujarattaa ukiunik 3.000-inik pisoqaatigisoq eqqartorsin­naavarsi. Tassani Jehovap aqqa allassimavoq. Ujarattaq taanna Frankrigimi Parisimi katersugaasivimmi Louvremi katersugaataavoq. Kiisalu Jehovap Nalunaajaasuisa qullersaqarfianni Warwickimi, New Yorkimiittumi, saqqummersitsinermi  assinga takuneqarsinnaavoq. Meshap ujarattaani Moabikkut kunngiat, Mesha, oqaluttuarpoq qanoq Israalimut pikitsitsisimalluni. Tassani allassimasut aamma Biibilimi allaatigineqarput. (Kng 2. 3:4, 5) Meeqqap tamanna nammineq misissoruniuk Biibilimi allassimasut ilumoor­nerannut uppernarsaatit takussavai tamannalu uppernikkut nakussatsis­sutigis­sallugu. – Nalunaarsuutit 2. 9:6 takuuk.

7-8. (a) Pinngor­titarsuarmi ilusilersukkat kusanartut qanoq ilinniarfigisin­naavagut? Assersuuteqarit. (Aamma asseq takuuk). (b) Meeqqap Pinngor­titsisoqar­neranik uppernera nakussatsin­niarlugu qanoq apeqquteqarsin­naavugut?

⁷ Meeqqat pinngortitat alutornartut eqqarsaatiginis­saannut kajumissaaruk. Asimiik­kaangassi pinngortitani ilusilersukkat assigiiaartut kusanartut eqqartor­tarsinnaavasi. Sooq? Taakku silassorissumik ilusilersuisoqar­neranut uppernarsaataammata. Assersuutigalugu ilusilersukkat ilaat imusimasutut qiterminniit alliartortutut isikkoqarput. Taakku qinnikaartumik taaneqarsinnaasut ilisimatuut ukiorpassuarni misissorsimavaat. Ilisimatooq Nicola Fameli nassuiaavoq pinngortitami ataatsimi, soorlu naasumi, qinnikaartut kisinneqaraangata kisitsisit tulleriiaartut aalajangersimasut maluginiar­neqarsin­naasartut. Kisitsisit tulleriiaat taakku Fibonaccimik taaneqartarput. Sumi tamani, soorlu galakseni, uillup qaleruaani, naasut pilutaanni aamma naasut kaavequtituut sikkersuini, qinnikaartumik isikkullit takuneqarsin­naapput. a

⁸ Immaqa meeqqat pinngortitami ilusilersukkat allat pillugit atuarfimmi ilinniassaaq. Assersuutigalugu nittaallat geometriimut naapertuuttumik ilusilersugaapput, tamannalu fraktalimik taaneqartarpoq. Fraktalimik ilusillit aamma pinngortitani allani takuneqarsin­naapput. Kiali ilusilersukkat kusanartut taakku torersumik ilusilersorpai? Kia pinngortitap inatsisai atuutilersippai? Meeqqap tamakku eqqarsaatigeq­qissaarunigit qularnan­ngitsumik Guutip tamanik pinngor­titsisuunera upperinerulissavaa. (Hebr 3:4) Perorneruguni aamma paasilissavaa Guutip inatsisai nammineq naalassallugit. Ima aperisinnaavat: “Guutip pinngor­tissimagunisigut qanoq pilluar­nartumik inooriaaseqarsin­naanersugut siunnersus­sanngin­nerpaatigut?” Taava eqqaasinnaavat Guutip Biibili aqqutigalugu nassuiaak­kaatigut qanoq pilluarsin­naasugut.

ILEQQORIS­SAARNEQ PILLUGU BIIBILIMI NAJOQQUTASSIANIK PINGAAR­TITSINEQ INERIAR­TORTIGUK

9. Sooq meeqqap Biibilimi najoqqutassiat apeqqusersinnaavai?

⁹ Meeqqavit ileqqoris­saarneq pillugu Biibilimi najoqqutassiat apeqquserpagit paasiniarsariuk  sooq taamatut apeqquteqarnersoq. Suut eqqunngitsuunerannut Biibilimi allassimasunut isumaqataanngila? Imaluunniit allanik oqaloqateqaraangami upperisani qanoq illersus­sanerlugit nalusarpaa? Pissutaasoq suugaluarpal­luunniit atuakkap Naassaan­ngitsumik pilluarsin­naavutit! misissor­neratigut meeqqat Jehovamut naalannerup iluaqutaaneranik paasinnin­nissaanut ikiorsinnaavat. b

10. Meeqqat Jehovamut ikinngutaal­lualernissaanut ikiorniarlugu susinnaavit?

¹⁰ Meeqqat Jehovamik qanimut ikinnguteqarusuler­nissaanut ikioruk. Biibilimik misissuisar­nissinni meeqqat qanorpiaq eqqarsarnersoq paasiumallugu atuakkami Naassaan­ngitsumik pilluarsin­naavutit!-mi apeqqutit assillu atorluartakkit. (Uss 20:5) Assersuutigalugu ilinniagassaq 8-mi Jehova tassaanerar­neqarpoq ikinngut asannittoq illersor­niarlutalu iluaqutigisin­naasatsinnik siunnersuisoq. Johannesimit allakkat siulliit 5:3 eqqartoriarlugu ima aperisinnaavat: “Nalunngin­natsigu Jehova ikinngutaal­luartuusoq siunnersuutai qanoq isiginnit­taaseqarfigis­savagut?” Apeqqut tamanna meeqqavit Jehovap asanninnini pissutigalugu siunnersuisar­neranik paasinnin­nissaminut iluaqutigissavaa. – Es 48:17, 18.

11. Meeqqat Biibilimi najoqqutassianik maleruaanissap iluaqutaaneranik paasinnin­nissaanut qanoq ikiorsin­naaviuk? (Ussatit 2:10, 11)

¹¹ Eqqartorsiuk Biibilimi najoqqutassianik maleruaaneq qanoq iluaqutaatigisoq. Biibilimi atuaraangassi imaluunniit ullormut allassimaffik eqqartoraangassiuk ilaqutariittut Biibilimi najoqqutassiat qanoq iluaqutigisimallugit eqqartor­tarsiuk. Assersuutigalugu meeqqavit eqiasuitsuuneq unneqqaris­suunerlu qanoq iluaqutaatigisut paasisimavaa? (Hebr 13:18) Aamma Biibilimi najoqqutassiat timikkut misigis­sutsikkullu iluaqutaanerat nassuiarsinnaavat. (Uss 14:29, 30) Meeqqavit siunnersuutinik Biibilimeersunik maleruaanerup iluaqutaanera paasiguniuk taakkuninnga inuunermini maleruaanissaa ilimanar­nerulissaaq. – Ussatit 2:10, 11 atuakkit.

12. Ataataasup ernini Biibilimi najoqqutassiat iluaqutaanerannik paasinnin­nissaanut qanoq ikiorpaa?

¹² Ataataq Frankrigimiu, Steve, nassuiaavoq nulianilu ernertik inuusuttuaraq, Ethan, Jehovap asannilluni siunnersuineranik paasinnin­nissaanut qanoq ikiorsimallugu: “Ima aperivarput: ‘Sooq Jehovap kissaatigaa inatsit taanna naalassagipput? Tamatumannga qanoq erserpa asagaatigut? Najoqqutassiaq tamanna maleruan­ngikkutsigu qanoq kinguneqassava?’” Taamatut oqaloqatigiit­tarnerit iluaqutigalugit Ethanip Jehovap najoqqutassiai nammineq maleruarusulerpai. Steve ima oqarpoq: “Anguniagaraarput Ethanip Biibilimi siunnersuutit inuit siunnersuutaannit pitsaanerungaarnerat paasillualissagaa.”

13. Angajoqqaat meerartik Biibilimi najoqqutassianik maleruaanissaanut qanoq ikiorsin­naavaat? Assersuuteqarit.

¹³ Meeqqat Biibilimi najoqqutassianik maleruaanissaanut ikioruk. Assersuutigalugu meeqqat atuarfimmi atuakkamik aalajangersimasumik atuaqquneqarpoq. Atuakkami tamatumani pineqartut tassaasin­naapput Jehovap uumigisaanik iliortut, soorlu kinguaas­siuutitigut inuunerluttut nakuuser­tulluunniit. Iliuuserineqartullu ajunngitsutut atuakkami allaatigineqarput. Meeqqat kajumis­saarsinnaavat iliuutsit taakku Biibilimi najoqqutassianut sanilliuteq­qullugit. (Uss 22:24, 25; Kor 1. 15:33; Flp 4:8) Meeqqavit taamaalior­nermigut paasisinnaavaa Jehovamut naalanneq qanoq iluaqutaatigisoq. Atuagarlu qanoq isumaqarfiginerini atuarfimmi ilinniar­titsisumit atuaqatiminil­luunniit  aperineqaruni upperisani pillugu nassuiaasinnaavoq.

MEEQQAT UPPERNERMINIK ILLERSUINISSAANUT IKIORUK

14. Kristumiup inuusuttup sammisaq suna nassuiaruminaatsis­sinnaavaa, aamma sooq?

¹⁴ Kristumiut inuusuttut upperisaminnik nassuiaanissartik ernumas­sutigisin­naavaat. Atuarfimmi pinngoriar­tuaarsimanermik ilinniar­titsissut eqqartor­neqaraangat tunuarsimaarsin­naapput. Sooq? Immaqa ilinniar­titsisut tamanna ilumoortutut saqqummiut­tarpaat. Angajoq­qaajuguit, meeqqat upperisaminik sapiilluni qularnanilu nassuiaanissaanut qanoq ikiorsin­naaviuk?

15. Kristumiup inuusuttup upperisami ilumoor­tuuneranut suna qularun­naassutigisinnaavaa?

¹⁵ Meeqqat upperisaminut tunngatillugu qularun­naarnissaanut ikioruk. Meeqqavit Pinngor­titsisoqar­neranik upperisani kanngusuutigisariaqanngilaa. (Tim 2. 1:8) Sooq? Uumassusillit nalaatsor­nerinnakkut piulersimanerat ilisimatoorpassuit aamma upperin­ngilaat. Uumassusillit sananeqaataasa tupinnangaartumik katitigaanerat pissutigalugu ilisimatuut taakku isumaqarput silassorissumik pinngor­titsisoqarsimassasoq. Taamaattumik pinngoriar­tuaarsimanermik ilinniar­titsissut, nunarpassuarni atuarfinni ilinniar­titsissutigineqartartoq, akuerisin­naanngilaat. Uppeqatitta Pinngor­titsisoqar­neranik upperin­ninnerminnik qularun­naassutigisimasaat meeqqavit misissorunigit uppernerminut nakussatsis­sutigisinnaavai. c

16. Angajoqqaat meeqqatik Pinngor­titsisoqar­neranik upperin­ninnerminnik illersuinis­saannut qanoq ikiorsin­naavaat? (Petrusimit 1. 3:15) (Aamma asseq takuuk).

¹⁶ Meeqqat Pinngor­titsisoqar­neranik upperin­ninnerminik illersuinissaanut piareersaqatigiuk. (Petrusimit 1. 3:15 atuaruk). Pinngor­titsineq pinngoriar­tuaarsimaneraanerlu pillugit allaaserisat jw.org-imiittut misissorsin­naavasi. Eqqartorsiuk Pinngor­titsisoqarnera allanut qanoq sunniuteqar­nerpaamik nassuiar­neqarsin­naanersoq. Eqqaasiguk kimilluunniit assortueqateqar­tariaqan­ngitsoq. Atuaqatiminut tusarnaarumasumut paasiuminartumik tunngavilersuinissaanut kajumissaaruk. Assersuutigalugu atuaqatit ilaat oqarsinnaavoq: “Takusin­naasakka kisiisa upperaakka, Guutilu takunngisaan­narpara.” Kristumiu inuusuttoq  ima akisinnaavoq: “Takorlooruk asimi pisuttuar­tillutit illu takoriataarit. Suminngaanneerpa? Illumik sanasoqarsimassaaq, ilaa? Illu sanasoqarnermut uppernarsaataammat nunarsuarput uumassusillillu tamarmik aamma silassorissumik pilersitsisoqar­neranut uppernarsaataasimassapput!”

17. Angajoqqaat meeqqatik Biibili pillugu allanut oqaluus­sinissamut periarfis­sarsior­nissaannut qanoq ikiorsin­naavaat? Assersuuteqarit.

¹⁷ Meeqqat Biibili pillugu allanut oqaluus­sinissamut periarfis­sarsior­nissaanut kajumissaaruk. (Rom 10:10) Upperisaq pillugu oqaluussineq nipilersornermik ilinniarnermut assersuun­neqarsinnaavoq. Aallaqqaammut nipilersukkat nalunan­ngitsut ilinniar­neqartarput. Sungiusaqat­taarnikkut pikkoris­sisoqartarpoq. Tamatumunnga assingusumik kristumiu inuusuttoq aallaqqaammut oqaaseqalaarnikkut upperisani pillugu oqaluus­sisalersinnaavoq. Assersuutigalugu atuaqatini ima aperisinnaavaa: “Nalunngiliuk ilisimatuut pinngor­titamiittunik ilaarsillutik ilusilersuisartut? Video soqutiginartoq takutilaarlara.” Videut Ilusilersugaava?-mik qulequtallit ilaat takutereerlugu ima oqarsinnaavoq: “Ilisimatooq pinngor­titamiittumik ilaarsilluni sanagami nersorneqarpat kinamita pinngor­titamiittoq pillugu nersorneqassava?” Taamatut oqaaseqalaar­nermigut oqaluussippat immaqa atuaqataa paasisaqarumanerulissaaq.

MEEQQAVIT UPPERNERA NAKUSSATSITTUARUK

18. Angajoqqaat meeqqamik Guutimut uppernerat qanoq nakussatsit­tuarsin­naavaat?

¹⁸ Inuit amerlanerit Jehova upperin­ngilaat. (Pet 2. 3:3) Taamaattumik illit angajoq­qaajuguit, meeqqat Biibilimik misissueqatigigaangakku Guutip oqaasianik najoqqutas­siaanillu pingaar­titsineruler­nissamut iluaqutigisin­naasaanik misissuisar­nissaanut kajumis­saartaruk. Jehovap pinngor­titaasa tupinnartut eqqartor­nerisigut uppernerminik eqqarsarsin­naassutsiminillu ineriar­tortitsinissaanut ikioruk. Biibilimi siulittuutinik eqquussimasunik paasinnin­nissaanut ikioruk. Pingaarnertut, meeqqat qinoqatigisaruk qinnuttarlugulu. Taamaaliortaruit nalussanngilat meeqqavit uppernera nakussatsin­niarlugu ilungersornerit Jehovap pilluaq­qussagaa. – Nal 2. 15:7.