1-2. Susoqar­tillugu qullilisarpugut?

 TAMATTA inuunitta ilaanni qullilisarpugut, ilaannikkut nuannaarnerup pianik. Immaqa immikkut pisoqar­tillugu qullilisimassaatit – soorlu meerartaaravit, nuannersunik eqqaasaqaravit ikinngutin­nilluunniit sivisuumik takusiman­ngisannik naapitsigavit.

² Amerlaner­tigulli qamuuna aliasunnermik peqquteqarluta qiasarpugut – soorlu pakatsisin­neqarujus­suarsimagutta, napparsimalersimagutta, sivisuumik anniaateqarsimagutta asasatsin­nilluunniit toqusoorsimagutta. Taama pisoqar­tillugu Jerusalemmi Babylon­nimiunit piuneerun­neqarmat Jeremiap misigisaatut misigisin­naasarpugut. Ima oqarpoq: “Qulliikka isinnit kuuinnarput … qulliikka isinnit kuuttuarput taamaat­tuassal­lutillu.” – Upp 3:48, 49.

3. Jehova innuttani aliasuk­kaangata qanoq misigisarpa? (Mosesimik 2. 3:7)

³ Jehovap inuunitsinni qullilinigut tamaasa arajutsisimanngilai. Biibilimi paasitin­neqarpugut sutigut tamatigut aliasuk­kaangatta naluneq ajoraa qiallutalu ikioqqugaangatta tusaasaraatigut. (Tuss 34:16) Kisianni Jehovap isigiin­narnatalu tusaaginnarneq ajorpaatigut. Angajoqqaatut asannittutut meeqqani qiasut takugaangamigit aliasuutigingaartarpaa ikiupal­lakkusut­tarlugillu. – Mosesimik 2. 3:7 atuaruk.

4. Biibilimi oqaluttuarineqartut iluaqutigalugit Jehova pillugu qanoq ilikkagaqarsin­naavugut?

 ⁴ Jehovap oqaatsimini paasitip­paatigut kiffani qiagaangata qanoq misigisar­nerluni qanorlu ikiortar­nerlugit. Assersuutigalugu Hannap, Daavip Hizkiallu misigisaat ilinniarfigisin­naavagut. Sunik aliasuuteqarsimappat? Jehovap qanoq ikiorpai? Aamma aliasun­nitsinni, pakatsisin­neqarnitsinni neriuutaarut­tutullu misiginitsinni maligas­siuinerat qanoq tuppallersaatigisin­naavarput?

ALIASUNNERUP PIANIK QULLILINEQ

5. Hannap misigissusai oqaluttuarikkit.

⁵ Hanna arlalinnik peqquteqarluni aliasulluni qiasarsimavoq. Uia allamik nuliaqarpoq, Peninnamik atilimmik. Hannalu taassumannga uumissor­neqarpoq. Tamatumalu saniatigut meerartaarsin­naanngilaq Peninnalu arlalinnik meeraqarluni. (Sam 1. 1:1, 2) Hannap meerartaarsin­naannginnera pillugu Peninnap illaruaatigisarpaa. Illit taamatut pineqarsimasuuguit qanoq misigisimas­sagaluarpit? Hanna aliasungaarami ‘qiavoq neriumananilu’, aap, ‘isumatsas­simaqaaq’. – Sam 1. 1:6, 7, 10.

6. Hanna tuppallersar­neqarumalluni qanoq iliorpa?

⁶ Hanna tuppallersar­neqarumalluni qanoq iliorpa? Iluaqutigisaasa ilagaat tupermut guutisiorfim­mukartarnera. Tassani, toqqup guutisiorfiup silarliata isaariaata eqqaaniugunartoq, Jehovamut ‘qinuvoq nipituumik qiaatigaluni’. Ima qinnuigaa: ‘Kiffavit arnap erloqinera takujuk eqqaamal­lungalu.’ (Sam 1. 1:10b, 11) Hannap Jehova qinunikkut misigis­sutsiminik aniatitsivigaa. Jehovap panimmi asasami manittorluni qianera takullugu anniaatigisimassaqaa!

7. Hanna Jehovamut qinoreerami qanoq tuppallersar­neqarpa?

⁷ Hanna Jehovamut uummammiugisaminik aniatitsereerami palasiunermit Elimit oqarfigineqarpoq qinnutaa Jehovamit akineqarumaartoq. Hanna qanoq misigiva? Biibilimi allassimavoq: “Taava qimaguppoq. Kingumut nerisalerpoq isikkualu aliasup­palukkun­naarluni.” (Sam 1. 1:17, 18) Pissutsit atugai allanngun­ngikkaluartut Hanna oqiliallappoq. Misigis­sutsikkut nanertuutigisani Jehovamut tunniuppai. Jehovallu misigissusai paasivai, qinnutai tusarpai kingusin­nerusukkullu meerartaarsin­naanngor­tillugu. – Sam 1. 1:19, 20; 2:21.

8-9. Sooq ataatsimiigiar­tarnissarput pingaaruteqarpa? (Hebræerit 10:24, 25) (Aamma asseq takuuk).

⁸ Ilinniagassartaa. Erloqinar­torsiungaarpit aliasuutigilikkannik? Immaqa ilaquttat ikinngutigil­luakkal­luunniit toqukkut annaasimagakku aliasupputit. Taamaat­toqartillugu kisimiik­kusuttarneq pissusis­samisoorpoq. Hannali eqqarsaatigeriaruk. Tupermut guutisiorfim­mukartarnini tuppallersaatigaa.  Illittaaq, ajoraluaraangavil­luunniit, ataatsimiigiar­tarnikkut tuppallersar­neqarsin­naavutit. (Hebræerit 10:24, 25 atuakkit). Ataatsimiinnerni allassimaffiit tuppallernartut tusarnaaraangatsigit Jehovap ikiortarpaatigut eqqarsaatigut nuanniitsut nuannersunik taarserlugit. Misigis­sutsigut ajunngin­nerulertarput naak pissutsit allanngun­ngikkaluartut.

⁹ Ataatsimiik­kaangatta uppeqatitta isumassuil­lutillu asanninnerat misigisarparput. Tamannalu qiimmaal­laatigisin­naavarput ingerlariaq­qissinnaallutalu. (Tes 1. 5:11, 14) Qatanngut angut specialpioneriusoq nuliaminik annaasaqarsimanini pillugu ima oqarpoq: “Suli qiasaqaanga. Ullut ilaanni teqeqqumut ingiinnarlunga qiasarpunga. Ataatsimiit­tarnigulli tuppallersaataasaqaat. Qatanngutima nuannersunik oqarfigigaangaminnga ataatsimiin­nernilu akigaangamik anniaatiga annikil­lisittarpaat. Ataatsimiigian­nginninni qanorluunniit aliasutsigigaluaruma isumakulul­lungalu taakaniik­kaangama pitsaaneruler­tarpunga.” Ataatsimiigiaraangatta Jehovap uppeqatigut atorlugit tuppallersarsin­naavaatigut.

10. Misigis­sutsikkut annikil­liuuteqar­nitsinni Hanna qanoq ilaarsin­naavarput?

¹⁰ Hannap uummammiugisaminik Jehovamut aniatitsinini iluaqutigeqaa. Illittaaq Jehovamut ‘isumakuluutitit tamaasa milorius­sinnaavatit’ tatigalugulu tusarumaaraatit. (Pet 1. 5:7) Qatanngutip arnap uimi tillinnianit aallaasersortunit toqutaanera aliasuutigingaarlugu misigis­sutsini ima oqaluttuarai: “Misigisimavunga qamuuna sequmeq­qallunga aaqqeqqin­naviarnangalu. Ataatannulli asanningaartumut Jehovamut qinugaangama eqqissinerujus­suarmik tunineqartutut misigisarpunga. Ilaannikkut eqqarsaatima oqaatiginissaat nalusarpakka, malugisarparali Jehovap paasigaanga. Ajorluin­naraangama qamuuna eqqissinermik tuneqqullunga kimigiiserfigisarpara. Kingornalu eqqarsaatikkut misigis­sutsikkullu oqilial­larujus­suartarpunga, ullorlu anigorsin­naalertarpara.” Annikil­liuuteqarninni Jehova isumakuluutinnik aniatitsivigigaangakku qularis­sanngilat qullitit takugaangamigit attortil­luinnartartoq anniaatitillu paasilluin­nartarai. Pissutsit atukkatit allanngun­ngikkaluartut Jehovap tuppallersarsin­naavaatit eqqissisil­lutillu. (Tuss 94:19; Flp 4:6, 7) Aalajaat­tuarnerillu pillugu akissarsisis­savaatit. – Hebr 11:6.

PAKATSISIN­NEQARNERUP PIANIK QULLILINEQ

11. Daavi ajortumeer­niarneqar­nermini qanoq misigiva?

¹¹ Daavi aqqusaagarpas­suaqarpoq aliasuutigilik­kaminik. Allanit akeqqersimaarfigineqarpoq, allaat tatigisaminit ilumoorfigineqarun­naarpoq ajoquser­niarneqarlunilu. (Sam 1. 19:10, 11; Sam 2. 15:10-14, 30) Erloqinar­torsior­nermini ima allappoq: “Anersaarulunnermit qasuleqaanga, unnuat tamaasa innanngaviga masatserpara qullinnik, siniffiga masammik pitartillugu.” Sooq taama misigiva? Nangilluni ima allappoq: “Amerlaqimmata akeqqakka.” (Tuss 6:7, 8) Daavip ajortumeer­niarneqarnini qullilis­sutigisarpai.

12. Daavip suna upperil­luinnarpaa? (Tussiaat 56:9)

¹² Aqqusaagarpassuani imaannaan­ngikkaluaqisut nalunngil­luinnarpaa Jehovap asagaani. Jehova pillugu allappoq: “Qiasarnera tusarsimavaa.” (Tuss 6:9) Pisumi allami Daavip taalliarpalaartuliai Tussiaat 56:9-mi atuarsin­naavagut. (Atuaruk). Jehovap isumassuingaarnera kusanarluin­nartumik  allaatigaa. Daavip takorloorpaa qullini Jehovap imiisivimmut katersortarai atuakkamul­luunniit allattor­tarlugit. Daavip upperil­luinnarpaa anniaatini Jehovap malugigai eqqaamal­lugillu. Nalunngilaa aqqusaakkani Jehovap arajutsineq ajorai aamma naluneq ajoraa inuttut qanoq sunniuteqar­tarnersut.

13. Pakatsisin­neqarsimagutta suna tuppallersaatigisin­naavarput? (Aamma asseq takuuk).

¹³ Ilinniagassartaa. Illit tatigisannit pakatsisin­neqaravit erloqinar­torsiorpit? Immaqa aliasupputit peeqqavit tassangaannaq peerariun­naarmatit imaluunniit aapparpit qimammatit. Imaassin­naavorluunniit qaniginerpaasavit ilaat Jehovamut kiffartorun­naarsimasoq. Qatanngutip angutip nuliami allasiorsimalluni qimammani qanoq misiginerluni ima oqaluttuaraa: “Tupaqqaqaanga susoqar­nerneranillu paasisimasaqan­ngilluin­narlunga. Naleqan­ngitsutut misigisimavunga, nikallungal­lungalu kamaqqavunga.” Pakatsisin­neqarsimaguit Jehovap ilinnik sumigin­naanngisaan­narnera eqqaamagukku tuppallersaatigisinnaavat. Qatanngut angut nangilluni ima oqarpoq: “Paasilerpara inuit pakatsisitsisartut Jehovali tassaasoq Qaarsorput. Qanorluunniit pisoqaraluarpat ikiortuaan­nassavaatigut. Imminummi ilumoortut imminiin­ngisaannarpai.” (Tuss 37:28) Aamma eqqaamajuk Jehovap ilinnut asanninnera inuit asannin­neranniit annerungaarmat. Tatigisamit pakatsisin­neqarneq annernaraluaqisoq Jehovap ilinnut asanninnera allanngor­navianngilaq. (Rom 8:38, 39) Pingaarnertut eqqaamasassaq: Qanorluunniit pineqarsimagaluaruit Jehovap asajuas­savaatit.

14. Tussiaat 34:19-imi sumik qularun­naarsin­neqarpugut?

¹⁴ Pakatsisin­neqarutta Daavip oqaasii Tussiaat 34:19-imi allassimasut tuppallersaatigisin­naavagut. (Atuaruk). Qinerlerfissiaq naapertorlugu “sequmis­simasumik uummatillit” misigisin­naapput ajunngitsumik sumilluunniit neriuutis­saqaratik. Taamatut misigisut Jehovap qanoq ikiortarpai? Angajoqqaap asannittup meeqqani aliasuttoq eqitaassavaa tuppallersarlugulu. Taamatuttaaq Jehovap pakatsisin­neqarsimatilluta sumigin­narneqarsimatil­lutaluunniit sequmeq­qagaangatta qanittarpaatigut tuppallersar­niarlutalu ikiorniarluta piareersimasarluni. Aamma naleqan­ngitsutut misigigaangatta qilanaarutis­sarpassuatsinnik misilin­neqarnitsinni iluaqutigisin­naasatsinnik tunisarpaatigut. – Es 65:17.

 NERIUUTAARUTTUTUT MISIGINERUP PIANIK QULLILINEQ

15. Hizkia sumik aqqusaagaqarpa qissatigisaminik?

¹⁵ Juudami kunngi Hizkia 39-nik ukioqarluni katsorsar­neqarsin­naanngitsumik nappaateqalerpoq. Jehovap pruffiiti Iisaaja nalunaariar­tortippaa Hizkia nappaatiminik toqujumaartoq. (Kng 2. 20:1) Neriuutis­saqanngitsutut isikkoqarpoq. Hizkia taama paasitin­neqarami aliasungaarluni nipituumik qiavoq. Jehovamut qamannga pisumik ikioqqulluni qinuvoq. – Kng 2. 20:2, 3.

16. Hizkiap qinnutaa Jehovap qanoq akivaa?

¹⁶ Hizkiap qinnutaa Jehovap killitsis­sutigingaarpaa imalu akillugu: “Qinnutit tusarpara, qullitit takuakka, ajorunnaar­tissavakkillu.” Iisaaja aqqutigalugu Jehovap neriorsorpaa inuunera sivitsorumaarlugu Jerusalemmilu Assyriamiuniit annaakkumaarlugu. – Kng 2. 20:4-6.

17. Perulun­nartumik nappaateqar­nitsinni Jehovap qanoq ikiortarpaatigut? (Tussiaat 41:4) (Aamma asseq takuuk).

¹⁷ Ilinniagassartaa. Perulun­nartumik nappaateqarpit neriuutaarut­tutullu misigalutit? Qanoq innerit Jehovamut oqaluttuariuk, qiagaluaruil­luunniit aamma ajunngilaq. Biibilimi neriorsor­neqarpugut ‘Ataatap qamannga pisumik nallittuisup Guutillu sutigut tamatigut tuppallersaasup’ misilin­neqarnitsinni tamani tuppallersarumaaraatigut. (Kor 2. 1:3, 4) Naatsorsuutigin­ngilarput Jehovap ajornar­torsiutigut tamaasa massakkut peerumaarai, naatsorsuutigisin­naavarpulli ikiorumaaraatigut. (Tussiaat 41:4 atuaruk). Jehovap anersaani atorlugu nukissatsinnik, ilisimas­susermik qamuunalu eqqissinermik pisariaqar­titatsinnik tunisarpaatigut. (Uss 18:14; Flp 4:13) Aamma siunissami nappaataarutivin­nissamik neriuutis­siinermigut napatit­tarpaatigut. – Es 33:24.

18. Erloqis­suteqaraangavit Biibilimi allassimaffimmik sumik tuppallersaateqartarpit? (Ungalusaq “ Oqaatsit tuppallernartut” takuuk).

¹⁸ Hizkia Jehovap oqaasianik tuppallersar­neqarpoq. Uaguttaaq taamaaliorsin­naavugut. Erloqinar­torsior­nitsinni Jehovap oqaasii Biibilimiittut tuppallersaatigalugillu iluaqutigisin­naavagut. (Rom 15:4) Qatanngut arnaq Afrikap kitaanin­ngaaneersoq kræfteqalerami qiakulasarsimavoq. Ima oqaluttuarpoq: “Allassimaffik aalajangersimasoq Esaja 26:3-mi allassimasoq tuppallersaatigingaar­tarpara. Naak misilin­neqarnitsinni pissutsit aqussin­naanngik­kaluarlutigit allassimaffimmi qularun­naarsin­neqarpunga Jehovap eqqissisis­sinnaagaatigut taamaalillutalu misilin­neqarnitsinni qisuariarnigut aqussin­naalerlugit.” Erloqinar­torsioraangavit, allaallu neriuutaaruttutut misigigaangavit, allassimaffimmik aalajangersimasumik tuppallersaateqartarpit?

19. Siunissami pisussat suut qilanaarisin­naavagut?

 ¹⁹ Ullut naggaterpiaanni inuuvugut, pissutsillu ajornerulis­sammata aliasuuteqar­neruler­nissarput naatsorsuutigisin­naavarput. Kisianni Hannamut, Daavimut Hizkiamullu pisut sammereeratsigit paasivarput Jehovap aliasuutigut takusarai sunnerneqaatigisarlugillu. Taamaattumik erloqinar­torsioraangatta uummammiugisagut tamaasa Jehovamut qinunikkut aniatit­tartigit. Imminut mattutin­ngisaannarta, qatanngutigullu asannittut ilagiin­niittut ilagisartigit. Aamma Biibilimi allassimasut tuppallersaatigiuartigit. Aalajaalluta pinertusaar­tuarutta Jehovap akissarsisik­kumaarpaatigut. Neriorsuinermisut aliasunnerup, pakatsisin­neqarnerup neriuutaarut­tutullu misiginerup pianik qulliit tamaasa isitsinnit allarter­nissaat qilanaaraa! (Saqq 21:4) Taamanik­kussamut taamaallaat nuannaarnerup pianik qullilisassaagut.