1. Biibilip nalaani inuusimasunut iffiaq-qaqortoq qanoq pingaaruteqartigiva?

 BIIBILIP nalaani inuit pingaarnertut iffiaq-qaqortoq inuussutigisarpaat. (Mos 1. 14:18; Luk 9:3) Biibilimi ilaannikkut ‘nerisassanik’ allassimasoqaraangat oqaaseq taanna nutsiin­navillugu ‘iffiamik-qaqortumik’ isumaqartarpoq. (Mat 6:11, q.a.i.) Jiisusi iffiat-qaqortut atorlugit marloriarluni tupinnar­tuliorpoq. (Mat 16:9, 10) Taakkua ilaat Johannesip iivangkiiliuani kapitali 6-imi allaatigineqarpoq. Oqaluttuaq tamanna sammitillugu nalitsinni qanoq ilinniarfigisin­naallugu paasiniariartigu.

2. Qanoq pisoqar­tillugu inuit tuusintillit nerisassanik pisariaqar­titsilerpat?

² Sivisuumik oqaluus­sereerlutik Jiisusip apustilini umiatsiaamik Galiliiap Tasersuata akianukaqatigai qasuersaarsin­naanias­sagamik. (Mak 6:7, 30-32; Luk 9:10) Avinngarusimasumut illoqarfiup Betsaadap eqqaaniittumut apuupput. Inuppassuilli tamanna tusaramikku Jiisusi naapigiar­niarlugu ornippaat. Guutip kunngeqarfia pillugu oqaluus­sinermigut napparsimasunillu ajorunnaarsitsinermigut Jiisusip taakku asannilluni piffissaqarfigai. Kisianni ualimmat Jiisusip ilinniar­titaasa isumakuluutigaat inuppassuit taakku qanoq nerisas­saqarsin­naanersut. Imaassinnaavoq ilaat tamuasarissanik nassartut, amerlanerilli nunaqarfin­nukartariaqarput nerisas­sarsiniarlutik. (Mat 14:15; Joh 6:4, 5) Jiisusi qanoq iliorpa?

 JIISUSIP NERISITSINERMIK TUPINNARTULIAA

3. Jiisusip apustilit qanoq oqarfigai? (Asseq takuuk).

³ Jiisusip apustilit ima oqarfigai: “Ingerlasariaqan­ngillat, ilissi nerisas­saannik tuniniarsigit.” (Mat 14:16) Tamannali ajornarpasippoq. Angutit tassaniittut 5.000-iupput, arnallu meeqqallu ilanngun­neqarpata imaassinnaavoq inuit 15.000-t missaat nerisas­sinneqar­tariaqartut. (Mat 14:21) Andariarsi ima oqarpoq: “Una nukappiaraq tallimanik iffianik-qaqortuuteqarpoq suaasiassanik iffiukkanik aalisagaateqarlunilu marlunnik. Taakkuli inuppas­suarnut naammaq­qajanngillat.” (Joh 6:9) Iffiat-qaqortut suaasiassanik iffiukkat piitsunit nerineqartarput, aalisakkallu tarajor­tigaasimas­sagunarput panertitaal­lutillu. Nerisassalli nukappiaqqap nassatai inuppas­suarnut taakkununnga soorunami naamman­ngillat!

4. Johannesi 6:11-13 qanoq ilinniarfigaagut? (Aamma assit takukkit).

⁴ Jiisusip inuit inoroorsaarfigerusuk­kamigit oqarfigai eqimattak­kuutaarlutik ivikkanut issaassasut. (Mak 6:39, 40; Johannesi 6:11-13 atuakkit). Taava iffiat-qaqortut aalisakkallu pillugit Ataatani qutsavigaa. Taamaalior­nermigut ersersippaa Guuti tassaasoq nerisassanik pilersitsisoq tamannalu qujamasuutigalugu. Sumiikkaluarut­taluunniit – kisimiitsilluta imaluunniit allat najuutsillugit – nerinngin­nitsinni Guutimut qujasarneq aamma uagutsinnut pingaaruteqarpoq. Jiisusip nerisassat issiasunut agguaan­neqarnissaat isumagaa. Inuillu naammatsillutik neripput. Jiisusip sinneruttut igineqan­nginnissaat kissaatigigamiuk kingusin­nerusukkut  nerineqarsin­naaqqullugit ilinniartitani katersueqquai. Taamaalilluni maligas­sippaatigut qanoq nerisassat atortul­luunniit silatusaartumik atorneqarsinnaasut. Illit angajoq­qaajuguit oqaluttuaq tamanna atorlugu meeqqatit qinunermik, inoroorsaarnermik tukkortuunermillu ilinniar­tissinnaavatit.

5. Jiisusip tupinnar­tuliaanik takunnittut qanoq iliorusuppat, Jiisusili qanoq iliorpa?

⁵ Inuit Jiisusip tupinnartuliai ilinniar­titseriaasialu ajasoorutigaat. Nalunngin­namikku Moorsisip siulittuutigigaa Guuti pruffiitimik immikkut ittumik aallartitsissasoq eqqarsaatigigunarpaat Jiisusi taannaanersoq. (Mos 5. 18:15-18) Isumaqarunarput Jiisusi naalakkersuisuul­luarsinnaasoq, allaat Israalimi tamarmi nerisassanik pilersitsisinnaasoq. Taamaattumik Jiisusi kunngin­ngortin­niarpaat. (Joh 6:14, 15) Jiisusip tamanna akuerigaluaruniuk juutit Romamiunit naalakkersuif­figineqartut politikkikkut illersus­sagaluarpai. Taamaaliorusun­ngilarli. Qimariarlugit kisimiilluni qaqqamukarpoq. Allanit tatineqaraluarluni politikkimut akuliuk­kusunngil­luinnarpoq. Tamanna uagutsinnut ilinniagassaavoq pingaarutilik!

6. Jiisusip maligas­siaatut qanoq iliorsin­naavugut? (Aamma asseq takuuk).

⁶ Soorunami inuit piumaffiginavian­ngilaatigut tupinnar­tuliornikkut nerisitsis­sasugut napparsimasunillu ajorunnaarsitsis­sasugut, aamma kunngin­ngortin­niarnavian­ngilaatigut.  Imaassin­naavorli qinersinissamut politik­kerimul­luunniit tapersersuinissamut peqataaq­qulluta kimigiiserfigigaatigut. Jiisusilli maligassiaa ersarippoq. Politikkimut akuliunneq ajorpoq, allaallu ima oqarpoq: “Kunngeqarfiga nunarsuarmeersuunngilaq.” (Joh 17:14; 18:36) Kristumiuugatta Jiisusip eqqarsariaasia iliuusiilu ilaarusuppagut. Uagut Guutip kunngeqarfia tapersersorparput, oqaluus­sissutigisarparput tikiunnissaalu qinnutigisarlugu. (Mat 6:10) Jiisusip tupinnar­tuliornikkut nerisitsinera aamma allanik ilikkagaqarfigisin­naavarput.

‘JIISUSIP IFFIAT-QAQORTUT ATORLUGIT ILIUUSIATA PINGAARUTEQASSUSIA’

7. Jiisusi qanoq iliorpa, apustilillu tamanna qanoq isumaqarfigaat? (Johannesi 6:16-20)

⁷ Inuit nerisin­neqareernerata kingorna apustilit Kapernaamut umiatsiamik aallarput, Jiisusilu inuit imminik kunngin­ngortitsiniaraluartut qimallugit qaqqamut majuarpoq. (Johannesi 6:16-20 atuakkit). Apustilit tasersuarmiitillugit anorersualerlunilu mallersorsuan­ngorpoq. Taava Jiisusip immap qaavatigut pisulluni ornippai. Aamma Petrusi oqarfigaa tasersuup qaavatigut pisoqqullugu. (Mat 14:22-31) Jiisusi umiatsiamut ikimmat qatsorpoq. Apustilit tamanna tupigusuutigingaarlugu oqarfigaat: “Ilumut Guutip erneraatit.” a (Mat 14:33) Malunnarpoq Jiisusip tupinnar­tuliornikkut inupparpassuit nerisereermagit taamatut oqaaseqan­ngimmata. Aatsaat Jiisusi tasersuup qaavatigut pisoreermat apustilit taamatut isummerput. Maluginiaruk Makkorsi qanoq allattoq: “[Apustilit] assut tupigusupput, Jiisusimmi iffiat-qaqortut atorlugit iliuusiata pingaaruteqassusia paasinngin­namikku suut tamaasa iluamik paasinngilaat.” (Mak 6:50-52) Aap, paasinngilaat Jiisusi Jehovamit qanoq annertutigisumik pissaaneqalersin­neqartoq. Tamatuma kinguninngua Jiisusip nerisitsinermik tupinnar­tuliani eqqaagamiuk ilinniartitani pingaarutilimmik ilinniartippai.

8-9. Sooq inuit Jiisusi ujarpaat? (Johannesi 6:26, 27)

⁸ Aqaguani inuit sumiiffimmut nerisas­sinneqarfigisaminnut uterput. Kisianni Jiisusi apustilillu peqanngitsut paasigamikku Jiisusi ujarniarlugu umiatsiarlutik Kapernaamukarput. (Joh 6:22-24) Inuit Guutip kunngeqarfia pillugu ilikkagaqar­nerorusukkamik taamaaliorpat? Naamik. Timikkut pisariaqar­titatik pingaar­nerpaatippaat. Sooq taama oqarsin­naavugut?

⁹ Kapernaap eqqaani inuit Jiisusi nanimmassuk qanoq pisoqartoq maluginiaruk. Jiisusip oqarfigai nerisin­neqarusuin­narlutik orniguttut. Naak iffianik-qaqortunik ‘naammatsillutik’ nerigaluartut Jiisusi oqarpoq tamanna ‘nerisassaasoq asiusartoq’. Taamaattumik ‘nerisassaq naassaan­ngitsumik inuuneqalersitsisartoq’ pillugu sulisaq­qullugit kajumis­saarpai. (Johannesi 6:26, 27 atuakkit). Jiisusi oqarpoq Ataatani tamatuminnga pilersuiumaartoq. Kisianni naassaan­ngitsumik inuuneqalersitsisumik nerisas­saqarnera inuit eqqumiis­sorisimassavaat! Sunaagami, qanorlu pineqarsin­naagami?

10. Inuit ‘Guutip akuerisaatut suliumallutik’ susariaqarpat?

¹⁰ Juutit taakkua paaserusuppaat naassaan­ngitsumik inuuneqalersitsisumik nerisas­saqarumallutik susariaqar­nerlutik. Immaqa isumaqarput Moorsisip inatsisai maleruar­tariaqarlugit. Jiisusilli ima oqarfigaat: “Guutip akuerisaatut suliumallusi aallartitaa upperisariaqarparsi.” (Joh 6:28, 29) Jiisusip aamma  siusinnerusukkut eqqaavaa inuk naassaan­ngitsumik inuussaguni Guutip aallartitaanut uppertuusariaqartoq. (Joh 3:16-18, 36) Aamma kingusin­nerusukkut eqqartorpaa suna naassaan­ngitsumik inuuneqalis­sutigisin­naaneripput. – Joh 17:3.

11. Qanoq erserpa juutit nerisas­saqarnissartik pingaar­nerpaatikkaat? (Tussiaat 78:24, 25)

¹¹ Juutit taakkua akueriuman­ngilaat Jiisusi upperisariaqarlugu. Ima aperivaat: “Upperinias­sagatsigit takusas­satsinnik qanoq tupinnar­tuliussavit?” (Joh 6:30) Taava eqqaavaat Moorsisip nalaani Guutip innuttani mannanik tunisarai. (Neh 9:15; Tussiaat 78:24, 25 atuakkit). Erserpoq nerisas­sinneqar­nissartik suli eqqarsaatigigaat. Jiisusilu oqarmat Guutip ‘nerisassanik ilumoortunik’ – naassaan­ngitsumik inuuneqalersitsisunik – qilammit tunigai aperinngilaat tamanna qanoq isumaqarnersoq. (Joh 6:32) Timikkut pisariaqar­titatik pingaar­nerpaatik­kamikkit Jiisusip anersaakkut ittut pillugit ilinniar­titsissutigisaa tusaruman­ngilaat. Tamanna qanoq ilinniutigaarput?

PINGAAR­NERPAATITARPUT

12. Jiisusip qanoq erseqqissarpaa suna pingaar­nerpaajusoq?

¹² Johannesi kapitali 6 ilinniutigalugu paasivarput anersaakkut pisariaqar­titagut pingaar­nerpaajusut – tassa Guutimut naalanneq taassumunngalu attaveqarluarnerput pingaar­nerpaatis­savarput. Jiisusip Saatanimit misilin­neqarnermini tamanna erseqqissarpaa. (Mat 4:3, 4) Aamma qaqqami oqalugiar­nermini oqarpoq anersaakkut pisariaqar­titagut eqqumaf­figissagigut. (Mat 5:3) Taamaattumik imminut ima aperisin­naavugut: ‘Inooriaatsinnit erserpa Jehovamut attaveqarnera timikkut pisariaqar­titannit pingaar­nerutillugu?’

13. (a) Sooq mamarsarneq eqqunngitsulior­nerunngila? (b) Suna mianersuutigis­savarput? (Korintimiunut 1. 10:6, 7, 11)

¹³ Soorunami timikkut pisariaqar­titagut qinnutigisin­naavagut nuannaarutigalugillu. (Luk 11:3) Biibili naapertorlugu nerineq, imerneq sulinerlu inunnut nuannaarutaasarput, taakkumi ‘Guutimit pisuupput’. (Oqal 2:24; 8:15; Jaak 1:17) Taamaattorli tamakku inuunermi pingaar­nerpaatis­sanngilagut. Tamatumunnga tunngatillugu Paulusip kristumiunut allagai ilinniarfigisin­naavagut. Itsaq Israalikkut inoqajuitsumi qaqqallu Siinaajip eqqaani iliuusaat allaatigigamigit kristumiut mianersoq­qullugit allaffigai ‘ajoqutaasunik pilerigisaqas­sanngitsut’. (Korintimiunut 1. 10:6, 7, 11 atuakkit). Israalikkut piumatuujullutik nerrersummata nerisassat Jehovap tupinnar­tuliornikkut tunniussai ‘ajoqutaalerput’. (Mos 4. 11:4-6, 31-34) Aamma nersuteeraasaliap kuultiusup guutisiorfiginerani nerillutik imerlutillu festerput. (Mos 2. 32:4-6) Israalikkut migisigisaat atorlugu Paulusip kristumiut ukiumi 70-imi Jerusalemmip suujunnaarsitaanissaata nalaani inuusut mianersoqquai. Uagut silarsuup ajortup suujunnaarsitaanissaata nalaani inuugatta Paulusip mianersoq­qussutaa pimoorut­tariaqarparput.

14. Paratiisimi nerisassat pillugit Biibilimi qanoq allassimasoqarpa?

¹⁴ Jiisusip ‘nerisassat ullumi pisariaqar­titagut’ eqqartoramigit aamma Guutip piumasaa siunissami ‘qilammi nunarsuarmilu eqquunnissaa’ eqqartorpaa. (Mat 6:9-11) Taamanik­kussamut nerisassagut qanoq issasoraagit? Biibilimi ersersin­neqarpoq mamartunik nerisas­saqarumaarnissaa Guutip isumagiumaaraa. Esaja 25:6-8 naapertorlugit Jehovap kunngeqarfiata aqutsinerani nunarsuaq nerisassanik mamarluin­nartunik ulikkaassaaq. Tussiaat 72:16-mi ima siulittuutigineqarpoq:  “Karrit naammangaartut nunami naasimassapput, qaqqat qaanni aalataarumaarput.” (Testamentitoqaq 1990-imi naqitigaq) Karrit taakku atorlugit mamarisannik iffiornissat imaluunniit nerisassat misilin­nikuunngisavit iganissaat qilanaaraajuk? Aamma viinnequtit ikkussukkavit inerititaannik nerinissat qilanaarisinnaavat. (Es 65:21, 22) Kisimiin­navianngilatillu. Kikkut aamma tamakku nuannaarutigissavaat?

15. Toqusunit makitin­neqartussat qanoq ilinniar­tinneqassappat? (Johannesi 6:35)

¹⁵ Johannesi 6:35 atuaruk. Inuit nerisassanik Jiisusip pilersitaanik nerisut eqqarsaatigikkit. Immaqa taakkua ilaat naapissavatit! Imaassinnaavoq taakkua ilarpassui, allaat taamani Jiisusimut uppertuun­ngitsut, toqusunit makititaassasut. (Joh 5:28, 29) Makititaagunilli Jiisusip oqaasii uku qanorpiaq isumaqartut paasisariaqarpaat: “Uanga nerisas­saavunga naassaan­ngitsumik inuuneqalersitsisartoq. Kinaluunniit uannukartoq kaanngisaan­nassaaq.” Jiisusip utertitsis­sutitut pilliutaa, tassa Jiisusip taakku pillugit inuunini tunniukkaa, upperisariaqarpaat. Taamanik­kussamut makititaasut meeqqallu paratiisimi inunngorumaartut Jehova taassumalu siunertaa pillugit ilinniar­tinneqassapput. Tamakkuninnga ilinniar­titseqataanissarput qilanaarnaq! Aap, Jehova pillugu paratiisimi illinniar­titsisarnissaq nerisarnermit pilluar­narnerungaassaaq.

16. Allaaserisap tulliani suna sammissavarput?

¹⁶ Johannesi kapitali 6-p ilaannaa sammivarput. Jiisusili ‘inuuneq naassaan­ngitsoq’ pillugu suli amerlanerusunik oqaaseqarpoq. Oqaasii taamani juutit eqqumaf­figisariaqaraluarpaat, nalitsinnilu uaguttaaq eqqumaf­figisariaqarpagut. Taamaattumik allaaserisap tulliani Johannesi kapitali 6 nangillugu sammissavarput.