1. Inuuneq naassaan­ngitsoq qanoq isumaqarfigineqartarpa?

 INUPPASSUIT sivisuumik inuunissartik kissaatigigamikku peqqissuuniartarput. Nalunngilaalli timersor­taraluarlutik peqqinnar­tunillu nerisaraluarlutik utoqqaliar­tornissartik toqunis­sartillu pinngitsoor­tissinnaanagu. Immaqa isumaqarput inuuneq naassaan­ngitsoq piviusorsior­nerorpasin­ngitsoq. Jiisusilli inuuneq naassaan­ngitsoq inunnut periarfissatut eqqartorpaa, assersuutigalugu Johannesi 3:16-imi aamma 5:24-mi.

2. Johannesi kapitali 6-imi inuuneq naassaan­ngitsoq pillugu qanoq allassimasoqarpa? (Johannesi 6:39, 40)

² Jiisusip iffianik-qaqortunik aalisak­kanillu inuppas­suarnut pilersitsinera tupinnar­tuliaavoq. a Aqaguanili inupparpassuit Kapernaamut, Galiliiap Tasersuata eqqaanut, malinnaasut tupaallaatigisaannik oqarfigai, tassa toqusut makitik­kumaarlugit naassaan­ngitsumillu inuuneqarsinnaasut. (Johannesi 6:39, 40 atuakkit). Tamanna illit ikinngutinnut ilaquttannullu toqukkut qimagus­simasunut qanoq isumaqarnersoq eqqarsaatigeriaruk. Jiisusimit qularun­naarsin­neqarputit toqusut makitin­neqarsin­naanerannik aamma illit asasavillu naassaan­ngitsumik  inuuneqarsin­naanissassinnik. Johannesimilli allakkat kapitali 6-imi versini tulliuttuni Jiisusip oqaasii inuppassuit paasiuminaatsippaat. Taakku sammeriartigit.

3. Johannesi 6:51 naapertorlugu Jiisusi imminut pilluni qanoq oqarpa?

³ Inuppassuit Jiisusimit tupinnar­tuliornikkut nerisassanik tunineqarnermik kingorna eqqaavaat siuaasatik mannanik Jehovamit nerisas­saqartin­neqartut. Nalunngilaat Allakkani Illernartuni mannat “qilaap timiusaanik” taaneqartut. (Tuss 105:40; Joh 6:31) Mannat pillugit eqqartuilluni Jiisusip pingaarutilimmik ilinniar­tilerpai. Itsaq Guutip innuttani tupinnar­tuliornikkut mannanik pilersoraluarai naggataatigut toqupput. (Joh 6:49) Jiisusili ‘nerisassatut ilumoortutut qilammeersutut’ imminut taavoq oqarlunilu ‘nerisas­saalluni naassaan­ngitsumik inuuneqalersitsisartoq’. (Joh 6:32, 33, 35) Itsaq mannanit allaassutigisani pingaarutilik ima oqaatigaa: “Uanga nerisas­saavunga inuussutaasoq qilammit aqqartoq. Tamatuminnga nerisoq naassaan­ngitsumik inuussaaq.” (Johannesi 6:51 atuaruk). Juutilli tusarnaartut tamanna paatsoorpaat. Paasinngilaat Jiisusi sooq oqartoq ‘nerisas­saalluni’ qilammit aqqartoq mannanit pitsaanerusoq. Taavali Jiisusip oqarfigai: ‘Nerisassaq tunnius­sassara tassaavoq timiga.’ Suna pivaa? Tamanna paasissallugu pingaaruteqarpoq, akissutaanimmi paasissagatsigu asasagullu qanoq naassaan­ngitsumik inuuneqalersin­naanersugut.

NERISASSAASOQ INUUNEQALERSITSISARTOQ AAMMA TIMAA

4. Sooq ilaasa Jiisusip oqaasii uissuum­missutigaat?

⁴ Tusarnaartut ilaasa uissuum­missutigaat Jiisusi oqarmat nerisassaat tassaasoq timini inuit inooqqullugit pilliutigisassani. Eqqarsarnerpat Jiisusip kissaatigigaa inuttuumasuussasut? (Joh 6:52) Jiisusi taakkua uissuum­missutigisaannik ima oqarpoq: “Inuup Ernerata timaa nerinngik­kussiuk aavalu iminngik­kussiuk inuuneqas­sanngilasi.” – Joh 6:53.

5. Qanoq nalunngilarput Jiisusip ilumut timiminik nerinissaq aamminillu imernissaq pinngikkaa?

⁵ Nooap nalaani Guutip inuit aammik nereqqunngilai. (Mos 1. 9:3, 4) Israalik­kunnullu inatsisimini tamanna aamma peqqussutigaa. Kinaluunniit aammik nerisoq “piiagaassaaq”, tassa toqutaassaaq. (Mos 3. 7:27) Jiisusip juutit ilinniartippai Guutip inatsisai naalassagaat. (Mat 5:17-19) Taamaattumik ilimanan­ngivippoq timimi taakkunannga nerineqarnissaa aammilu imerneqarnissaa piumasarigaa. Taamatulli tupaallan­nartumik oqaaseqar­nermigut Jiisusip ilinniar­titsissutigaa inuit qanoq naassaan­ngitsumik inuuneqalersin­naanersut. – Joh 6:54.

6. Qanoq nalunngilarput Johannesi 6:53-imi Jiisusi assersuusiortoq?

⁶ Ersarippoq Jiisusi assersuusiortoq, soorlu siornatigut arnamik Samaariamiumik oqaloqateqar­nermini taamaaliortoq. Taanna ima oqarfigaa: “Kinaluunniit imermik uanga tunniussannik imertoq imerusuleq­qinngisaan­nassaaq, imerli tunniussara taassumani puilasun­ngussaaq naassaan­ngitsumik inuuneqalersitsisoq.” (Joh 4:7, 14) b Jiisusi isumaqanngilaq arnaq Samaariamiu puialasumit immikkoorluin­nartumit imermik imiinnaruni naassaan­ngitsumik inuuneqalissasoq. Taamatuttaaq imaanngilaq Kapernaami inuppassuit tusarnaartut Jiisusip timaa nerigunikku  aavalu imerunikku naassaan­ngitsumik inuuneqalissasut.

PISUMI ALLAMI ASSINGUSUMIK OQAASEQARTOQ

7. Johannesi 6:53-imi Jiisusip oqaasii pillugit ilaat qanoq oqarpat?

⁷ Upperisarsiortut ilaat oqarput Johannesi 6:53-imi Jiisusi nassuiaasoq Naalakkap unnukkorsior­titsinerani qanoq iliortoqas­saneranik, unnummimi tamatumani assingusumik oqaaseqarmat. (Mat 26:26-28) Oqarput eqqaaniaanermi najuuttut tamarmik iffiamik-qaqortumik viinnimillu tamanut ingerlaar­tinneqartunik pissasut. Tamanna ilumoorpa? Paasissallugu pingaaruteqarpoq ukiummi tamaasa nunarsuaq tamakkerlugu inuit millionillit ilagaluta eqqaaniaaqataasarmata. Pisimasup Johannesi kapitali 6-imi allaatigineqartup Naalakkallu unnukkorsior­titsinerata assigiin­ngissutaat sammeriartigit.

8. Pisimasut marluk ilaatigut sunik assigiin­ngissuteqarpat? (Aamma assit takukkit).

⁸ Pisimasut taakkua assigiin­ngissutaat ilaat marluk sammilaariartigit. Siullertut, Jiisusi qanga sumiillunilu Johannesi 6:53-56 allaatigineqartutut oqaaseqarpa? Ukiumi 32-mi Galiliiami. Tassa Jerusalemmimi Naalakkap unnukkorsior­titsineranik pilersitsinera ukiup ataatsip missaanik sioqqullugu. Aappaattut, kikkut oqaluuppai? Tusarnaartut  amerlanersaasa nerisassanik tunineqarnertik anersaakkut ittunik ilinniar­tinneqar­nerminniit soqutigineruaat. (Joh 6:26) Jiisusillu oqaasii paasiuminaatsik­kamikkit upperiun­naarpaat. Allaat ilinniar­titaasa ilaasa malikkun­naarpaat. (Joh 6:14, 36, 42, 60, 64, 66) Ukiup ataatsip missaa qaangiuttoq ukiumi 33-mi Jiisusip Naalakkap unnukkorsior­titsineranik pilersitsinerani najuuttut allaanerul­luinnarput. Unnummi tamatumani Jiisusip apustilini aalajaatsut aqqanillit najorpai. Taakkua Jiisusip ilinniar­titsissutigisaasa ilaat paasilluan­ngikkaluarlugit upperil­luinnarpaat Jiisusi Guutip ernerigaa qilammiillu aqqartoq. (Mat 16:16) Jiisusip ima nersualaarpai: ‘Ilissi misilin­neqarninni najortuarpassinga.’ (Luk 22:28) Assigiin­ngissutit marluinnaat taakkua ersersippaat Jiisusip Johannesi 6:53-imi nassuiar­nianngikkaa Naalakkap unnukkorsior­titsinerani qanoq iliortoqas­sanersoq. Aammali allanik uppernarsaateqarpoq.

ILINNUT SUNNIUTEQARNERA

9. Naalakkap unnukkorsior­titsinerani Jiisusip oqaasii eqimattanut sorlernut tunngatin­neqarpat?

⁹ Naalakkap unnukkorsior­titsinerani Jiisusip apustiliminut iffiaq-qaqortoq seernarsaateqan­ngitsoq tunniuppaa timiminullu assersuutaanerarlugu. Taava viinni tunniuppaa oqarfigalugillu ‘aamminut isumaqatigiissummik atuutsitsilersussamut assersuutaasoq’. (Mak 14:22-25; Luk 22:20; Kor 1. 11:24) Isumaqatigiissut pillugu oqaasii pingaaruteqangaarput. Jiisusip ‘isumaqatigiissummik nutaamik’ taavaa, Jehovallu isumaqatigiis­suteqarfigisai tassaapput “inuiaqatigiit Israalikkut”, tassa Guutip kunngeqarfiani Jiisusip naalakkersueqatigisassai kisimik. (Hebr 8:6, 10; 9:15) Taamani apustilit tamatuma isumaanik tamakkiisumik paasinnin­ngillat, anersaamilli illernartumik taninneqar­tussaapput isumaqatigiis­summullu nutaamut ilaalerlutik. – Joh 14:2, 3.

10. Jiisusip Galiliiami inuppas­suarnut oqaasii taavalu Naalakkap unnukkorsior­titsinerani oqaasii qanoq assigiin­ngissuteqarpat? (Aamma asseq takuuk).

¹⁰ Naalakkap unnukkorsior­titsinerani Jiisusip oqaasii inunnut killilimmik amerlas­susilinnut, ‘savarpan­nguanik taaneqartunut’, atuupput. Taakkununnga ilaasut siulliit tassaapput apustilit aalajaatsut taamani unnummi tamatumani inimeeqatigisai. (Luk 12:32) Taakku allallu kingusin­nerusukkut ‘savarpan­nguanut’ ilaalersut assersuutinik marlunnik – iffiamik-qaqortumik viinnimillu – ilangiisus­saapput. Taakku tassaapput Jiisusip qilammeeqatigisassai. Naalakkap unnukkorsior­titsinerani Jiisusip apustiliminut oqaasii inunnut amerlan­ngitsunut atuupput, Galiliiamili oqaasii inuppas­suarnut atuullutik.

11. Galiliiami Jiisusip oqaasiinit qanoq erserpa inuppassuit pisinnaasaat pineqartoq?

¹¹ Ukiumi 32-mi Galiliiami Jiisusip oqaluussai amerlanerit nerisas­saminnik perusuinnarput. Jiisusilli paasitin­niarsarai nerisassanit pingaaruteqangaar­nerusoqartoq taakkua inuunermik naassaan­ngitsumik neriuuteqalis­sutigisin­naasaannik. Allaat oqarfigai toqusut ullormi kingullermi makitin­neqarsinnaasut naassaan­ngitsumillu inuusin­naallutik. Toqqakkat ikittuinnaat pisinnaasaat, soorlu Naalakkap unnukkorsior­titsinerani eqqartugaa, maanna Johannesi kapitali 6-imi eqqartunngilaa. Galiliiamiilluni kikkut tamarmik periarfissaat eqqartorpaa. Ima oqarpoq: “Tamatuminnga nerisoq naassaan­ngitsumik inuussaaq.  Nerisassarlu tunnius­sassara tassaavoq timiga inuit inooqqullugit pilliutigisassara.” – Joh 6:51. c

12. Naassaan­ngitsumik inuuneqalerumagaanni suna pisariaqarpa?

¹² Jiisusi isumaqarpa inuit tamarluinnarmik naassaan­ngitsumik inuussasut? Naamik, ‘nerisut’, tassa Jiisusimut uppertut, kisimik taama ajunngisaarfigineqarumaarput. Nalitsinni kristumiuunerartut ilarpassui oqartarput Jiisusi upperfigalugu Annaassisumillu taasarlugu. (Joh 6:29) Tamannali naammanngilaq. Galiliiami Jiisusimut uppertun­ngortut ilaasa taanna qimappaat. Sooq?

13. Jiisusip malinnittaasa ilumoortut uppernertik qanoq ersersippaat?

¹³ Taamani inuppassuit kissaatigisamissut pineqar­tuartillutik Jiisusi malippaat. Tupinnar­tuliornikkut ajorunnaarsin­neqarnissartik, nerisassanik akeqanngitsunik tunineqar­nissartik tusarusutaminnillu ilinniar­tinneqar­nissartik kissaatigaat. Jiisusili taakkua timikkut pisariaqar­titaannik matussusiiniaan­narnani qanoq iliortariaqar­nerannik ilinniar­titsiumalluni nunarsuarmukarpoq. Jiisusip ‘imminukaqquai’, tassa Jiisusimut tusarnaar­nermikkut ilinniar­titsissutaanullu tamanut naalannermikkut ersersitsisin­naapput Jiisusimik malinnit­tuullutik ilumoortut. – Joh 5:40; 6:44.

14. Jiisusip timaanik aavanillu iluaqutigin­nikkumalluta susariaqarpugut?

¹⁴ Jiisusip inuppas­suarnut erseqqissarpaa  uppertuusariaqartut. Timiminik aamminillu pilliutigin­ninnermigut taakkua naassaan­ngitsumik inuuneqaler­nissaat ajornarun­naarsik­kumaarlugu ilinniartippai. Tamatuminnga upperinninneq taamani juutinut pingaaruteqarluinnarpoq, uagutsinnullu aamma taamaappoq. (Joh 6:40) Tassa Jiisusip oqaasii Johannesi 6:53-imi allassimasut isumaqarput taassuma pilliutaata utertitsis­sutaaneranik upperin­nittariaqartugut naassaan­ngitsumik inuujumalluta. Inuillu killeqan­ngitsumik amerlas­susillit taama periarfis­sinneqarput. – Ef 1:7.

15-16. Johannesi kapitali 6-imi pingaarutilinnik sunik paasisaqarpugut?

¹⁵ Johannesi kapitali 6-imi tamatsinnut pingaarutilinnik qiimmaal­lannartunillu paasisaqarpugut. Ersarippoq Jiisusi inunnik isumassuingaartoq. Galiliiami napparsimasunik ajorunnaarsitsivoq, Guutip kunngeqarfia pillugu ilinniar­titsivoq pisariaqar­tumillu nerisas­saqartitsilluni. (Luk 9:11; Joh 6:2, 11, 12) Pingaar­nerusumilli ilinniar­titsissutigaa ‘nerisas­saalluni naassaan­ngitsumik inuuneqalersitsisartoq’. – Joh 6:35, 48.

¹⁶ Jiisusip ‘savanik allanik’ taasai ukiumoortumik Naalakkap unnukkorsior­titsinerani iffiamik-qaqortumik viinnimillu ilangiineq ajorput. (Joh 10:16) Taamaak­kaluartorli Jiisusip utertitsis­sutitut pilliutaanik upperin­ninnermikkut taassuma timaanik aavanillu iluaqutiginnipput. (Joh 6:53) Taavami iffiamik-qaqortumik viinnimillu ilangiisut? Taakku taamaalior­nermikkut ersersitsipput isumaqatigiissummut nutaamut ilaallutik Kunngeqarfimmilu qilammiittumi naalakkersuinis­saminnik neriuuteqarlutik. Tassa tanitaagaluarutta savanul­luunniit allanut ilaagaluarutta Johannesi kapitali 6-imi oqaluttuaq uagutsinnut isumaqar­torujussuuvoq. Paasivarpummi naassaan­ngitsumik inuujumalluta tamatta Jiisusip utertitsis­sutitut pilliutaanik upperin­nilluin­nartariaqarluta.