Apustilip Paulusip utoqqaaner­taqatini Timuutiusi ima allaffigaa: “Guutip, Kristusip Jiisusip inngilillu toqqakkat saavanni ilumoorlunga peqquakkit siumut isummereernak kinaassusersiornallu ilitsersuutinik taakkuninnga maleruaaq­qullutit.” – Tim 1. 5:21.

Toqqakkat anersaajusut taakku tassaasin­naanngillat tanitat 144.000-t. Paulusi Timuutiusimut allammat tanitanik qilammut suli makititaasoqanngilaq. Apustilit tanitallu allat suli anersaan­ngunnginnamik tassaasin­naanngillat ‘inngilit toqqakkat’. – Kor 1. 15:50-54; Tes 1. 4:13-17; Joh 1. 3:2.

‘Inngilit toqqakkat’ aamma tassaasin­naanngillat inngilit Nooap nalaani naalanngitsut. Taakkumi Saatanimut ililiupput anersaapilun­ngorlutillu Jiisusimut akeraasut. (Mos 1. 6:2; Luk 8:30, 31; Pet 2. 2:4) Siunissami itinersuarmut ukiuni 1.000-ni parnaarun­neqassapput, kingornalu Saatani peqatigalugu suujunnaarsin­neqassapput. – Juud 6; Saqq 20:1-3, 10.

Taamaattumik ‘inngilit toqqakkat’ Paulusip eqqartugai tassaasimassapput inngilit qilammiittut ‘Guutip aamma Kristusip Jiisusip’ suleqataat.

Inngileqarpoq tuusintilip­passuak­kuutaanik aalajaatsunik. (Hebr 12:22, 23) Isumaqas­sanngilagut Jehovap inngilit tamarluinnaasa assigiimmik suliassikkai. (Saqq 14:17, 18) Assersuutigalugu inngili ataasiinnaq peqquaa Assyriamiut 185.000-t toqoqqullugit. (Kng 2. 19:35) Inngilit ‘ajortuliornermut pissutaasunik tamanik inatsisinillu unioqqutitsisunik [Jiisusip] Kunngeqarfianit peersinissamik’ suliassin­neqartut amerlasin­naapput. (Mat 13:39-41) Imaassin­naavorlu inngilit allat tanitanik katersuinissamut suliassin­neqartut. (Mat 24:31) Suli allat peqquneqarput ‘paareqqulluta ingerlavigisas­satsinni tamani’. – Tuss 91:11; Mat 18:10; aamma takukkit Matiusi 4:11; Lukkarsi 22:43.

Ilimanarpoq ‘inngilit toqqakkat’ Timuutiusimut allakkat siulliit 5:21-mi eqqaaneqartut ilagiinnik isumassuinermi ikiuisussatut suliassin­neqartut. Versit ataqatigiinnerini utoqqaanertat akisussaaf­fimminnik qanoq isumagin­nittussaanerannik ilagiinnillu ataqqineqar­tariaqar­nissaannik Paulusi ilitsersuivoq. Allappoq utoqqaanertat ‘siumut isummereer­natillu kinaassusersior­tuussan­ngitsut’ aamma eqqarsarluaq­qaarlutik aalajangiissasut. Taava Paulusip ilitsersuutimi maleruar­nissaannut pingaarutilimmik pissutis­saqartippai. Allappormi utoqqaanertat “Guutip, Kristusip Jiisusip inngilillu toqqakkat saavanni” uppeqatiminnik kiffartuussisut. Tassa inngilit ilaat ilagiinnik ikiuisussatut suliassin­neqarput, assersuutigalugu Guutip kiffaanik sernissuisarput, oqaluus­sinermi ikiuuttarput maluginiar­takkatillu Jehovamut nalunaarutigisarlugit. – Mat 18:10; Saqq 14:6.