Nalitsinni Guutip innuttai kimit siulersorneqarpat?
“Eqqarsaatiginiarsigit siulersortisi.” – HEBR 13:7.
1, 2. Jiisusip qilaliarnerata kingorna apustilit suna eqqarsaatigisimassavaat?
APUSTILIT Uuliap Qaqqaaniitillutik naalagartik ikinngutertillu, Jiisusi, qilaliartitaasoq nuissallu akornanni ersigunnaartoq isiginnaarpaat. (ApS 1:9, 10) Ukiut marluk missaanni Jiisusimit ilinniartinneqarlutillu kajumissaarneqarlutillu siulersorneqarput. Maannali peeruppoq. Qanoq iliussappat?
2 Jiisusip qilaliannginnermini ajoqersukkani ima oqarfigai: “[Nalunaajaasigissavassi] Jerusalemimi Judæamilu tamarmi Samariamilu nunarsuullu isua tikillugu allaat.” (ApS 1:8) Tamanna qanoq naammassisinnaassagamikku? Guutip anersaavanit illernartumit ikiorneqarumaarnerannik Jiisusip neriorsorpai. (ApS 1:5) Kiali nunarsuaq tamakkerlugu oqaluussineq siulersussallugulu aaqqissuutissavaa? Apustilit nalunngilaat Jehovap itsaq Israelikkut siulersorniarlugit angutit atorai. Taamaattumik Jehova siulersuisumik nutaamik toqqaassanersoq eqqarsaatigisimassavaat.
3. (a) Jiisusip qilaliarnerata kingorna apustilit aalajaatsut pingaarutilimmik sumik aalajangiippat? (b) Apeqqutit suut allaaserisami matumani akissutissarsissavavut?
ApS 1:15-26) Sooq tamanna taakkununnga Jehovamullu pingaaruteqarpa? Ajoqersukkat paasigamikku apustilit aqqaneq-marluusariaqartut. * Jiisusip apustilit toqqarpai Guutillu innuttaasa akornanni pingaarutilerujussuarmik akisussaaffilerlugit. Sumik akisussaaffilerpai, aamma Jehovamit Jiisusimillu qanoq piareersarneqarpat? Nalitsinni tamatumunnga assingusumik qanoq aaqqissuussaqarpa? ‘Siulersortivut’, pingaartumik inussiaq aalajaallunilu silatooq, qanoq ‘eqqarsaatigisinnaavavut’? – Hebr 13:7; Matt 24:45.
3 Jiisusip qilaliarnerata kinguninngua ajoqersukkat Allakkat Illernartut atuaqqissaareerlugit Guutimullu ikioqqullutik qinoreerlutik Judasimut Iskariotimut taartitut Matthiasi apustilit aqqaneq-aappaattut toqqarpaat. (JIISUSIP SIULERSUISOQATIGIIT SIULERSORPAI
4. Apustilit Jerusalemimilu utoqqaanertat allat qanoq akisussaaffeqarpat?
4 Ukiumi 33-mi piinsip ulluani apustilit kristumiut ilagiivinik siulersuilerput. Biibilimi allassimavoq ‘Petrusi aqqanillit taakku ilagalugit sassartoq’ inuppassuillu sallusuissutinik inuunermik annaassissutaasinnaasunik ajoqersulerlugit. (ApS 2:14, 15) Taakkunannga amerlasuut kristumiunngorput. Tamatuma kingorna taakkua kristumiunngorlaat ‘apustilit ajoqersuinerat aalajangerfigaat’. (ApS 2:42) Apustilit ilagiit aningaasaqarnerannik aqutsineq akisussaaffigaat. (ApS 4:34, 35) Aamma Guutip innuttai ajoqersortarlugillu qinnuttarpaat ima oqarlutik: “[Uagut] nammineq pisarnitsitut qinoqatigiittarneq oqaaserlu kiffartuutigissavavut.” (ApS 6:4) Aamma kristumiut misilittagaqarluartut sumiiffinni oqaluussiffigineqarnikuunngitsuni oqaluusseqqullugit aallartittarpaat. (ApS 8:14, 15) Kingusinnerusukkut utoqqaanertat tanitat allat apustilit peqatigalugit ilagiinnik siulersueqataalerput. Siulersuisoqatigiittut ilagiit tamaasa ilitsersulerpaat. – ApS 15:2.
Kristumiut siulliit Jehovap Jiisusi aqqutigalugu siulersuisoqatigiinnik aqutsinera nalunngilaat
5, 6. (a) Siulersuisoqatigiit anersaamit illernartumit qanoq pissatsinneqarpat? (Allaaserisap aallaqqaataani assiliaq takuuk). (b) Siulersuisoqatigiit inngilinit qanoq ikiorneqarpat? (c) Siulersuisoqatigiit Guutip oqaasianit qanoq ilitsersorneqarpat?
5 Kristumiut siulliit Jehovap Jiisusi aqqutigalugu siulersuisoqatigiinnik aqutsinera nalunngilaat. Tamanna qanoq qularinngissinnaagamikku? Siullertut, siulersuisoqatigiit anersaamit illernartumit pissatsinneqarput. (Joh 16:13) Kristumiut tanitat tamarmik anersaamik illernartumik tunineqarput, pingaartumilli apustilit Jerusalemimilu utoqqaanertat nakkutilliisutut akisussaaffiup isumaginissaanut pissatsinneqarput. Assersuutigalugu ukiumi 49-mi siulersuisoqatigiit anersaamit illernartumit ilitsersorneqarlutik kipineqarneq pillugu aalajangigaqarput. Aalajangigaat ilagiinnit maleruarneqarpoq. Tamannalu pissutigalugu “uppernerminni nakussatsitaasarput ullullu tamaasa amerliartorlutik”. (ApS 16:4, 5) Kipineqarneq pillugu ilagiinnut allakkanit paasivarput siulersuisoqatigiit Guutip anersaavanit najorneqarlutillu pissuserineqartussanik, soorlu asanninnermik uppernermillu, ersersitsisartut. – ApS 15:11, 25-29; Gal 5:22, 23.
6 Aappaattut, siulersuisoqatigiit inngilinit ikiorneqarput. Assersuutigalugu inngilip Corneliusi oqarfigaa apustili Petrusi ujaqqullugu. Corneliusi ilaqutaalu kipineqarnikuunngikkaluarlutik Petrusimit oqaluussiffigineqareerlutik anersaamik illernartumik tunineqarput. Corneliusi taamaalilluni juutiunngitsuni siullerpaalluni kristumiunngorpoq. Apustilit qatanngutillu angutit allat tamanna tusaramikku Guutip piumasaa akueraat kristumiunngorlaallu kipineqanngitsut ilagiinnut tikilluaqqullugit. (ApS 11:13-18) Tamatumannga erserpoq oqaluussineq siulersuisoqatigiinnit aqunneqartoq inngilit tapersersortuaraat. (ApS 5:19, 20) Pingajuattut, siulersuisoqatigiit Guutip oqaasianit ilitsersorneqarput. Angutit taakkua kristumiut upperisaat ilagiinnillu siulersuineq pillugu pingaarutilinnik aalajangiiniarnermi Allakkat Illernartut atortarpaat. – ApS 1:20-22; 15:15-20.
7. Sooq oqarsinnaavugut Jiisusip kristumiut siulliit siulersorai?
7 Siulersuisoqatigiit ilagiinnut oqartussaassuseqaraluartut kristumiut paasivaat Jiisusi Kristusi Siulersuisoralugu. Tamanna qanoq nalunngilarput? Apustili Paulusi allappoq Kristusip ‘ilaat apustilinngortikkai’. Aamma allappoq Kristusi ilagiinnut ‘niaquusoq’, tassa Siulersuisuusoq. (Ef 4:11, 15) Aamma apustilit nuimasut ilaata atianik taaguuteqaratik ‘ajoqersukkat kristumiunik taaneqartalerput’. (ApS 11:26) Paulusip nalunngilaa apustilit angutillu allat siulersuisut Biibili tunngavigalugu ilinniartitsissutaannik maleruaanissaq pingaaruteqartoq. Allaat Paulusi ima allappoq: “Ilisimaqquarali angutip kialuunniit Kristusi niaqorimmagu.” Matumani aamma siulersuisoqatigiinnut ilaasortat tamarmik pineqarput. Taava Paulusi ima nangippoq: ‘Kristusip niaqua Guutiuvoq.’ (1 Kor 11:2, 3) Ersarippoq Jehovap Ernini, Kristusi Jiisusi, ilagiinnik siulersuisutut toqqaraa.
“TAMANNA INUUP ASSAATA PILIARINNGILAA”
8, 9. Qatanngut Russell pingaarutilimmik sumik akisussaaffeqarpa?
8 1870 aallarnerfigalugu Charles Taze Russellip ikinngutaasalu ilaasa Biibilimut naapertuuttumik Guutimik pallorfiginnittalerput allallu taamaaliorsinnaaqqullugit ikiorlugit. Inunnik assigiinngitsorpassuarnik oqaasilinnik ikiuineq tamatumunnga ilaavoq. Taamaattumik 1884-imi Zion’s Watch Tower Tract Society pisortatigoortumik pilersinneqarpoq qatanngullu Russell præsidentinngorluni. * Taassuma Biibili atuaqqissaartarpaa oqaluffiillu allat ilinniartitsissutaat soorlu ataasiullunilu pingasuussutsip tarnillu toqujuitsuunerata Biibilimi eqqaaneqannginnerisa oqaatigisarnissaat annilaangatiginagu. Paasivaa Kristusi takussaanani utissasoq aamma “Guutimik nalusunut piffissarititaasut” 1914-imi naassasut. (Luk 21:24) Qatanngutip Russellip allat sallusuissutinik taakkuninnga ilinniartinniarlugit piffissani, nukini aningaasaatinilu atortarpai. Jehovap Jiisusillu qatanngut Russell oqaluttuarisaanermi piffissami pingaarutilimmi siulersuisutut atoraat ersarippoq.
9 Qatanngutip Russellip inunnit immikkut ittumik pineqarnissani kissaatiginngilaa. 1896-imi allappoq angutit akisussaaqatinilu nersorneqarusunnatik. Immikkut ittumik taaguuteqarusunnatillu eqimattat allat atiminnik taaguuteqarnissaat kissaatiginngilaat. Kingusinnerusukkut ima oqarpoq: “Tamanna inuup assaata piliarinngilaa.”
“Inussiaq aalajaallunilu silatooq” tassaavoq Siulersuisoqatigiit qatanngutinik angutinik tanitanik amerlanngitsunik ilaasortalik
10. (a) Qanga Jiisusip “inussiaq aalajaallunilu silatooq” toqqarpaa? (b) Nassuiaruk qanoq paasinarsisoq Siulersuisoqatigiit Watch Tower Society-mit allaanerusoq.
10 1919-imi, ukiut pingasut qatanngutip Russellip toqunerata kingorna, Jiisusip “inussiaq aalajaallunilu silatooq” toqqarpaa. Suna siunertaralugu? Ajoqersukkani “piffissaq eqqorlugu nerisassaannik tunisaqqullugit”. (Matt 24:45, NW) Ukiunilu taakkunani qatanngutit angutit tanitat amerlanngitsut Brooklynimi, New Yorkimiittumi, Jiisusip ajoqersugaanut anersaakkut nerisassanik pilersuisalerput. Oqaaseq “siulersuisoqatigiit” 1940-p kingorna Biibililersaarutitsinni atorneqartalerpoq. Taamani siulersuisoqatigiit aamma Watch Tower Bible and Tract Society-p siulersuisui imminnut attuumassuteqarput. 1971-imili erseqqissarneqarpoq Siulersuisoqatigiit Watch Tower Society-mit, inatsisilerinermut tunngatillugu suliaqartarfimmit, allaanerusoq. Taamanimiilli qatanngutit angutit tanitat ingerlatsivimmi pisortaanngikkaluarlutik Siulersuisoqatigiinnut ilaasortanngorsinnaanngorput. Ukiuni kingulliunerusuni qatanngutit angutit akisussaasut ‘savanut allanut’ ilaasut ingerlatsivimmi ingerlatseqatigiiffinnilu allani Guutip innuttaasa atortagaanni pisortatut kiffartortalerput. Tamatuma kingunerisaanik Siulersuisoqatigiit Biibili tunngavigalugu ilitsersuineq siulersuinerlu aallulluarnerusinnaalerpaat. (Joh 10:16; ApS 6:4) Napasuliaq Alapernaarsuiffik juulip 15-iat 2013-imoortumi nassuiarneqarpoq “inussiaq aalajaallunilu silatooq” tassaasoq Siulersuisoqatigiit qatanngutinik angutinik tanitanik amerlanngitsunik ilaasortalik.
11. Siulersuisoqatigiit qanoq aalajangiisarpat?
11 Siulersuisoqatigiinnut ilaasortat sapaatit-akunneri tamaasa ataatsimiinnermi eqimattatut pingaarutilinnik aalajangiisarput. Taamatut ataatsimiinneq qanimut attaveqarluarnissamut ataasioqatigiinnissamullu iluaqutigisarpaat. (Uss 20:18) Siulersuisoqatigiinnut ilaasortat allanit ilaminnit pingaarnerunngillat, taamaattumik ukiut tamaasa qatanngutit paarlakaajaallutik ataatsimiinnerni taakkunani aqutsisuusarput. (1 Petr 5:1) Periuseq tamanna aamma Siulersuisoqatigiit ataatsimiititaliaanni arfinilinni atorneqarpoq. Siulersuisoqatigiinnut ilaasortat inuttut ataasiakkaatut qatanngutiminnik siulersuisutut misiginatik kiffaapput anersaakkut nerisassanik pisariaqartitsisut inussiallu ilitsersuutaanik maleruaasut.
“KINAAVAMI INUSSIAQ AALAJAALLUNILU SILATOOQ?”
12. Apeqqutit suut akissutissarsissavavut?
12 Siulersuisoqatigiit isumassarsisinneqarneq ajorlutillu naammalluinnanngitsuupput. Biibilimik nassuiaanerminni peqatigiissortanilluunniit siulersuinerminni kukkusinnaapput. Assersuutigalugu Jehovap Nalunaajaasuisa ujarliutaat-ni qulequtaaqqap “Paasinnittaatsitsinnik erseqqissaaneq”-up ataani Biibilimik paasinnittaatsitta allanngortinneqarnerannik allattorsimaffik takuneqarsinnaavoq. Jiisusi oqanngilaq inussiaq aalajaatsoq anersaakkut nerisassanik naammalluinnartunik pilersuissasoq. Taamaattumik Jiisusip apeqqutaa una qanoq akissavarput: “Kinaavami inussiaq aalajaallunilu silatooq?” (Matt 24:45, NW) Qanoq uppernarsisinnaavarput Siulersuisoqatigiit tassaasut inussiaq aalajaatsoq? Apustilit nalaanni siulersuisoqatigiit iluaqutigisartagaat pingasut sammeriartigit.
13. Siulersuisoqatigiit anersaamit illernartumit qanoq ikiorneqarpat?
13 Siulersuisoqatigiit anersaamit illernartumit ikiorneqartarput. Sallusuissutit Biibilimeersut siornatigut paasineqarsimanngitsut paasinissaannut Siulersuisoqatigiit anersaamit illernartumit ikiorneqartarput. Assersuutigalugu upperisanik allanngortitsinerit allattorsimaffiat siusinnerusukkut eqqaaneqartoq eqqarsaatigiuk. Inuup kialuunniit ‘Guutip itissusii’ taakku nammineq paasisinnaanagillu nassuiarsinnaanngilai. (1 Korinthimiut 2:10 atuaruk). Siulersuisoqatigiit apustilip Paulusip allanneratut misigipput: ‘Tamakku oqaluutigaavut oqaatsit inuit ilisimassusiata uatsinnut ajoqersuutigisaat atornagit, kisianni oqaatsit anersaap uatsinnut ajoqersuutigisai atorlugit.’ (1 Kor 2:13) Ukiuni hundredilinni eqqunngitsumik ajoqersuisoqartareersoq anersaakkullu taarsiortoqareersoq sooq 1919-imiilli Biibili paasilluarnerujartuinnarparput? Guutip anersaaminik illernartumik ikiuisimanera tamatumunnga pissutaasutuaavoq!
14. Saqqummersitat 14:6, 7-ilu naapertorlugit nalitsinni Siulersuisoqatigiit Guutillu innuttai inngilinit qanoq ikiorneqarpat?
14 Siulersuisoqatigiit inngilinit ikiorneqarput. Siulersuisoqatigiit nunani tamalaani oqaluussisartut 8 millioninit amerlanerusut ilitsersornissaannik akisussaafferujussuaqarput. Sooq suliaq tamanna taama iluatsilluartigaa? Inngilit tapersersuinerat pissutaasut ilagaat. (Saqqummersitat 14:6, 7 atuakkit). Oqaluussisartut inummut ikioqqulluni Guutimut qinoqqammersumut inngilinit siulersorneqarsimanerannik assersuutissarpassuaqarpoq! Sumiiffinni akerlilersuisoqangaarfiusuni allaat ajoqersukkat amerliartorput. Inngilit taamaallaat ikiuinerisigut tamanna aamma iluatsissinnaavoq.
15. Siulersuisoqatigiit kristumiuunerartut siulersuisuinit qanoq allaaneruppat? Assersuuteqarit.
15 Siulersuisoqatigiit Guutip oqaasianit ilitsersorneqarput. (Johannesi 17:17 atuaruk). 1973-imi pisut eqqarsaatigikkit. Vagttårnet septembarip aallaqqaataannoortumi “inuk tupamik pinngitsuuisinnaanngitsoq kuisissinnaanersoq” apeqqutigineqarpoq. Tamanna najoqqutassiat Biibilimeersut atorlugit akineqarpoq, akissutaalu imaappoq: Naamik! Vagttårnet-imi allassimaffiit arlallit innersuussutigineqarput nassuiarneqarlunilu inuk pujortartarunnaarusunngitsoq ilaajunnaarsinneqartariaqartoq. (1 Kor 5:7; 2 Kor 7:1) Allassimavoq najoqqutassiaq tamanna qutsissoq inunnit pinnani “Guutimit, oqaatsini allassimasut aqqutigalugit oqaaseqartartumit, pisuusoq”. Upperisarsiornikkut peqatigiiffiit allat ilaasortamik Guutip oqaasianik tatiginninnissaq sapernartikkaangassuk Guutip oqaasia maleruaqqissaarneq ajorpaat. USA-mi upperisarsiorneq pillugu atuakkami saqqummeqqammersumi ima allassimavoq: “Kristumiut siulersuisuisa ilaasortaminnit inuiaqatigiinnillu amerlanerusunit tapersersorneqarnerunissartik siunertaralugu ajoqersuutitik upperisanut isumanullu akulikitsumik naleqqussartarpaat.” Siulersuisoqatigiilli inuit amerlanerusut iluarisaannit ilitsersortinneq ajorput. Guutilli oqaasianit ilitsersortittarput, tamannalu nalitsinni Jehovap innuttaminik siulersuisuuneranut uppernarsaataavoq.
“EQQARSAATIGINIARSIGIT SIULERSORTISI”
16. Ilaatigut Siulersuisoqatigiit qanoq eqqarsaatigisinnaavavut?
16 Hebræerit 13:7 atuaruk. Biibilimi allassimavoq ‘siulersortivut eqqarsaatigissagivut’. Ilaatigut taamaaliorsinnaavugut Siulersuisoqatigiit qinnuttarnerisigut. (Ef 6:18) Anersaakkut inuussutissanik pilersuineq, nunarsuaq tamakkerlugu oqaluussinermik siulersuineq aningaasallu peqatigiissortatsinnut tunissutigineqartunik isumaginninneq akisussaaffippassuisa ilagaat. Taamaattumik qinnunneqakulasarnissartik pisariaqartippaat!
17, 18. (a) Siulersuisoqatigiit ilitsersuutaat qanoq maleruartarpavut? (b) Oqaluussinitsigut Siulersuisoqatigiit Jiisusilu qanoq tapersersortarpavut?
17 Aamma ilitsersuutit malittarisassallu maleruarnerisigut Siulersuisoqatigiit eqqarsaatigisinnaavavut. Siulersuisoqatigiit Biibililersaarutit, ataatsimiinnerit ataatsimeersuarnerillu aqqutigalugit ilitsersortarpaatigut. Aamma ilagiinnik nakkutilliisunik, utoqqaanertanik toqqaasartunik, toqqaasarput. Ilagiinnik nakkutilliisut utoqqaanertallu Siulersuisoqatigiinnit malittarisassiat maleruarnerisigut taakkuninnga eqqarsaatiginninnertik ersersittarpaat. Aamma tamatta Siulersuisutta, Jiisusip, angutit nalitsinni atortagaasa naalannerisigut taassuminnga ataqqinninnerput ersersittarparput. – Hebr 13:17.
18 Sapinngisatsinnik oqaluusseqataasarnitsigut Siulersuisoqatigiit aamma eqqarsaatigisinnaavavut. Hebræerit 13:7-imi siulersuisut uppernerannik ilaarseqqullugit kristumiut kajumissaarneqarput. Siulersuisoqatigiit nutaarsiassap nuannersup aallussilluarlutik oqaluussissutigineratigut uppersuseqangaarnertik ersersippaat. Suliami pingaarutilimmi tamatumani qatanngutivut taakku tapersersortarpavut? Taamaaliortarutta Jiisusip ima oqarnera nuannaarutigissavarput: “Ukununnga qatanngutima minnerpaat ilaannut iliuuserisasi uannut iliuuserisimavasi.” – Matt 25:34-40.
19. Sooq Siulersuisutta, Jiisusip, malinnissaa aalajangiusimaviuk?
19 Jiisusip qilammut uterami ajoqersukkani sumiginnanngilai. (Matt 28:20) Nalunngilaa nunarsuarmiinnermini anersaaq illernartoq, inngilit Guutillu oqaasia siulersuinissamut iluaqutigalugit. Inussiaq aalajaatsoq aamma taamatut ikiortarpaa. Siulersuisoqatigiit “Savaaraq,” Jiisusi, “sumulluunniit aallaraangat malittarpaat”. (Saqq 14:4) Taamaattumik Siulersuisoqatigiit ilitsersuutaat maleruaraangatsigit Siulersuisorput, Jiisusi, malittarparput. Qanittukkut taassuma inuunermut naassaanngitsumut siulersussavaatigut. (Saqq 7:14-17) Inuup siulersuisup tamanna neriorsuutigisinnaanngilaa!
^ par. 3 Jehovap kissaatigigunarpaa apustilit aqqaneq-marluk tassaassasut Jerusalemimi nutaami ‘ujaqqat aqqaneq-marluk tunngaviusut’. (Saqq 21:14) Taamaattumik apustilit aalajaatsut toqusut nutaanik taarserneqartariaqanngillat.
^ par. 8 1955-imiit ingerlatsivik taanna Watch Tower Bible and Tract Society of Pennsylvania-tut ilisimaneqalerpoq.