Utertitsissut – ‘Ataatamit tunissut naammalluinnartoq’
‘Tunissutit ajunngitsut naammalluinnartuusullu tamarmik Ataatamit pisarput.’ – JAAK 1:17.
1. Utertitsissut pissutigalugu suut nuannersut ajornarunnaarpat?
JIISUSIP utertitsissutitut pilliutaa pilluaqqussuterpassuarnik periarfissiivoq. Assersuutigalugu Adamip kinguaavi naapertuilluarnermik nuannarisaqartut tamarmik siunissami Guutip ilaqutariissortaanut ilaalersinnaapput. Aamma naassaanngitsumik pilluarluta inuunissaq qilanaarisinnaavarput. Tamatuma saniatigut utertitsissut qilammiittut nunamiittullu tamarmik pingaartitaannut attuumassuteqarpoq. – Hebr 1:8, 9.
2. (a) Qilammi nunamilu pingaaruteqangaartut suut Jiisusip qinunermini ilannguppai? (Allaaserisap aallaqqaataani assiliaq takuuk). (b) Allaaserisami matumani suut eqqartussavavut?
2 Jiisusip ukiut marluk toqunissani sioqqullugu ajoqersukkani ima qinusarnissamik ilinniartippai: “Ataatarput qilanniittutit! Aqqit illernartitaali, naalagaaffiit tikiulli, piumasat qilammisut nunamissaaq pili.” (Matt 6:9, 10) Utertitsissut Jehovap aqqanik illernarsisitsinermut, Guutip naalagaaffiata naalakkersuineranut Guutillu piumasaata pinissaanut qanoq attuumassuteqarnersoq misissoriartigu.
“AQQIT ILLERNARTITAALI”
3. Jehovap aqqa sumik ersersitsiva, Saatanillu Jehovap aqqa qanoq nikanarsarpaa?
3 Jehovap aqqata illernarsisinneqarnissaa Jiisusip siullerpaatut qinnutigaa. Jehovap aqqa kinaassusianik ersersitsivoq. Qilammi nunamilu pissaaneqarnerpaallunilu naapertuilluarnerpaavoq. Jiisusip Jehova aamma ‘Ataatatut illernartutut’ taavaa. (Joh 17:11) Jehova illernartuugami iliuusii inatsisiliaalu tamarmik illernartuupput. Edenimili Saatanip peqqusersusaarluni Guutip inunnut najoqqutassianik aalajangersaasinnaanera apeqquserpaa. Jehova pillugu salluliorlunilu aqqa nikanarsarpaa. – 1 Mos 3:1-5.
4. Guutip aqqa Jiisusip qanoq illernarsisittarpaa?
4 Jiisusilli Jehovap aqqa ataqqingaarlugulu sapinngisaminik illernarsisinniartarpaa. (Joh 17:25, 26) Qanoq? Pissusilersoriaatsimigut ilinniartitseriaatsimigullu Jiisusip allat Jehovap najoqqutassiaasa eqqortuunerannik piumasaatalu suulluunniit uatsinnut iluaqutaanerannik paasinninnissaannut ikiortarpai. (Tussiaat 40:9-11 atuakkit). Allaat Saatani pissutigalugu naalliulluni toqugaluarluni Jiisusi ilumoorfiginnittuarpoq. Inuup naammalluinnartup Jehovamut naalalluinnarsinnaanera uppernarsarpaa.
5. Jehovap aqqa qanoq illernarsisissinnaavarput?
5 Jehovap aqqa ataqqillutigu qanoq ersersissinnaavarput? Pissusilersoriaatsitsigut. Jehovap illernartuussasugut piumasaraa. (1 Petrusi 1:15, 16 atuakkit). Tassa taanna kisiat pallorfigisariaqarlugulu uummatikkut iluunngarluta naalattariaqarparput. Allaat malersorneqaraluarluta Jehovamit ilinniartinneqarnitsitut sapinngisatsinnik iliorniartarpugut. Jehovap najoqqutassiai malillugit inuunitsigut taassuma aqqa ataqqinarsisittarparput. (Matt 5:14-16) Inatsisai pitsaasuusut Saatanilu sallutuujusoq uppernarsartarpavut. Naammalluinnanngitsuugatta kukkusarpugut. Kukkugaangattali peqqissimisarpugut sapinngisatsinnillu Jehovap aqqanut nikanarsaataasumik iliuuseqarnaveersaartarluta. – Tuss 79:9.
6. Sooq naammalluinnanngitsuugaluartugut Jehovap naapertuilluartuutissinnaavaatigut?
6 Tanitanut ‘savanulluunniit allanut’ ilaagaluarutta utertitsissut upperigutsigu Jehovap ajortitsinnik isumakkeerfigissavaatigut. Imminut tunniulluinnartut pallorfiginnitsimisut akuerisarpai. Kristumiut tanitat ernermisut naapertuilluartuutittarpai ‘savallu allat’ ikinngutimisut naapertuilluartuutittarlugit. (Joh 10:16; Rom 5:1, 2; Jaak 2:21-25) Taamaattumik allaat maannakkut utertitsissut tunngavigalugu Ataatarput attaveqarfigilluarsinnaallugulu taassuma aqqa illernarsisissinnaavarput.
“NAALAGAAFFIIT TIKIULLI”
7. Utertitsissut tunngavigalugu pilluaqqussutit suut ajornarunnaarpat?
7 Qinnummi najoqqutassami Jiisusi ima oqarpoq: “Naalagaaffiit tikiulli.” Utertitsissut Guutip naalagaaffianut qanoq attuumassuteqarpa? Guutip naalagaaffiani Jiisusi 144.000-llu inuiannit toqqakkat naalakkersuissapput. Utertitsissut tunngavigalugu inuit taakku qilammut makitinneqarsinnaanngorput. (Saqq 14:1) Kunnginngussallutillu palasinngussapput Jiisusi peqatigalugu ukiuni 1.000-ni nunamut naalakkersuisussat. Piffissami tamatumani Jehovap Naalagaaffik atorlugu nunarsuaq paratiisinngorteqqissallugulu inuit naammalluinnartunngornissaannik ikiussavai. Naggataatigut Jehovap qilammi nunamilu kiffai ilaqutariittut ataasioqatigiilissapput. (Saqq 5:13; 20:6) Jiisusip Saatani ajornartorsiutillu pilersissimasai tamaasa suujunnaarsissavai. – 1 Mos 3:15.
8. (a) Jiisusip ajoqersukkani Guutip naalagaaffiata pingaaruteqassusianik paasinninnissaannut qanoq ikiorpai? (b) Naalagaaffimmik tapersersuinerput qanoq ersersittarparput?
8 Jiisusip ajoqersukkani Guutip naalagaaffiata pingaaruteqassusianik paasinninnissaannut ikiorpai. Qanoq? Kuisissimatsiaannarluni “Guutip naalagaaffianik” nutaarsiassaq nuannersoq Jiisusip sumiikkaluaraangamiluunniit oqaluussissutigisalerpaa. (Luk 4:43) Aamma ajoqersukkani ‘nunarsuup isua tikillugu allaat’ nalunaajaaqquai. (ApS 1:6-8) Nalitsinni Naalagaaffimmik oqaluussisoqarneratigut inuit utertitsissut pillugu paasisaqarsinnaallutillu Guutip naalagaaffiani innuttanngornissamut periarfissaqarput. Tanitat nunarsuaq tamakkerlugu oqaluussinermik ikiornerisigut Naalagaaffik ilumoorfiginnilluta tapersersorlugu ersersittarparput. – Matt 24:14; 25:40.
‘PIUMASAT PILI’
9. Sooq Jehovap inunnut siunertaata eqquunnissaa upperilluinnarsinnaavarput?
9 Jehovap piumasaata pinissaa Jiisusip qinnutigigamiuk suna pivaa? Jehova oqatsiaannaraangami oqaasii tamatigut piviusunngortuaannarput. (Es 55:11) Saatanip pikitsitsinermigut Jehova unitsissinnaanngilaa. Jehovap nunarsuaq sumik siunertaqarfigaa? Nunarsuaq Adamip Evallu kinguaavinik naammalluinnartunik ulikkaassasoq kissaatigaa. (1 Mos 1:28) Adami Evalu qitornaatsuullutik toqusimagaluarunik Guutip taakkua qitornaannik nunarsuup ulikkaarnissaanik siunertaa eqquunnavianngikkaluarpoq. Taamaattumik qitornartaarnissaat Jehovap akueraa. Uppernermik ersersitsisut utertitsissut tunngavigalugu naammalluinnartunngornissamut naassaanngitsumillu inuulernissamut periarfissaqarput. Jehovap inuit asagamigit siunertamisut pilluarluta inuussasugut kissaatigaa.
10. Toqusimasut utertitsissut qanoq iluaqutigissavaat?
10 Inuimmi milliardillit Jehovamik ilisarisimannilernissamut periarfissaqaratik toqusimasut? Jehovap inuit inuussasut kissaatigigamiuk utertitsissut tunngavigalugu toqusimasut makiteqqissavai. Taamaalillutik Jehovap ilisarisimalernissaanut naassaanngitsumillu inuunissamut periarfissaqalissapput. (ApS 24:15) Jehova tassaavoq inuunerup puilaffia. Inuit toqusimasut makiteqqikkunigit Jehova taakkununnga Ataatanngussaaq. (Tuss 36:10) Qinnummi najoqqutassami Jiisusi oqarpoq Jehova tassaasoq ‘Ataatarput qilanniittoq’. (Matt 6:9) Jehovap Jiisusi toqusunik makititsinermut tunngatillugu pingaarutilimmik akisussaaffilerpaa. Jiisusi ima oqarpoq: “Uanga makissutaallungalu inuussutaavunga.” – Joh 6:40, 44; 11:25.
11. Guutip ‘inuppassuit’ sumik siunertaqarfigai?
11 Inuup kialuunniit Jehovap ajunngisaarnera iluaqutigisinnaavaa, Jiisusimi ima oqarpoq: “[Guutip] piumasaanik iliortoq tassaavoq qatanngutiga angut qatanngutigalu arnaq anaanagalu.” (Mark 3:35) Guutip kissaatigaa inuppassuit inuiaqatigiinnit naggueqatigiinnillu inuiannillu immikkut oqaasilinnit tamanit pisut imminut pallorfiginnittunngussasut. Taakku ‘inuppassuartut amerlangaaramik kisinneqarsinnaanngitsutut’ allaatigineqartut utertitsissut upperalugulu Guuti naalakkusuppaat. Guuti unnersiutigalugu ima oqarput: “Annassut Guutitsinnit issiavissaarsuarmi issiasumit Savaaqqamillu pivoq.” – Saqq 7:9, 10.
12. Jiisusip qinnutaani Jehovap inunnut siunertaa pillugu qanoq ilikkagaqarpugut?
12 Jiisusip qinnummi najoqqutassiaani Jehova taassumalu inunnut siunertaa pillugu ilikkagaqangaarpugut. Siullertut, sapinngisatsinnik Jehovap aqqa illernarsisinniartariaqarlugulu Jehova ataqqinarsisinniartariaqarparput. (Es 8:13) Jiisusip utertitsissutitut pilliutaa, annaanneqarnissamut periarfissiisoq, aamma Guutip aqqanik ataqqinarsisitsivoq. Aap, Jiisusip atia “Jehova Annassutaavoq”-mik isumaqarpoq. Aappaattut, Jehovap Naalagaaffik aqqutigalugu utertitsissutip iluaqutissartai tamaasa inunnut naalattunut atuutilersissavai. Pingajuattut, Jehovap piumasaata eqquunnissaanut sunaluunniit akornutaasinnaanngitsoq upperilluinnarparput. – Tuss 135:6; Es 46:9, 10.
UTERTITSISSUT QUJAMASUUTIGALUGU ERSERSIGUK
13. Kuisinnikkut suna ersersittarparput?
13 Utertitsissut qujamasuutigalutigu pingaartumik ersersissinnaavarput Jehovamut tunniulluinnarnikkut kuisinnikkullu. Taamaaliornikkut ersersittarparput utertitsissut upperalugu aamma ‘Jehovap pigigaatigut’. (Rom 14:8) Kuisinnikkut Jehova qinnuigisarparput ‘ilerasuuteqannginnermik’ tuneqqulluta. (1 Petr 3:21) Jehovap qinnutigisarput tamanna akisarpaa Jiisusip aava kuisaq tunngavigalugu ajortitsinnik isumakkeerfigaluta. Qularinngilluinnarparpullu neriorsuutiminik tamanik tuniumaaraatigut. – Rom 8:32.
14. Sooq Jehovap allanik asanneqquaatigut?
14 Jehova asanningaarnini tunngavigalugu iliuuseqartuaannarpoq. Kissaatigaa pallorfiginnitsimi asaqatigiinnikkut ilaassagaanni. (1 Joh 4:8-11) Inunnut asannittulioraangatta ‘Ataatatsinnut qilanniittumut qitornaarusulluta’ ersersittarparput. (Matt 5:43-48) Inassutit annersaat siullersaallu tassaavoq Jehovamik asanninnissaq, tullialu tassaavoq allanik asanninnissaq. (Matt 22:37-40) Ilaatigut Guutip naalagaaffia pillugu nutaarsiassamik nuannersumik oqaluussinitsigut inoqatitsinnik asanninnerput ersersittarparput. Jehovap allanik, pingaartumik qatanngutitsinnik, asanninnissamik peqqussutaa naalakkaangatsigu, taassuminnga asanninnerput ‘naammatsittarpoq’. – 1 Joh 4:12, 20.
UTERTITSISSUT TUNNGAVIGALUGU JEHOVAMIT PILLUAQQUSSUTIT
15. (a) Maanna Jehovamit pilluaqqussutit suut pisarpavut? (b) Siunissami sunik pilluaqquneqassaagut?
15 Jehovap utertitsissummik upperinninnerput tunngavigalugu ajortitta ‘piiarneqarnissaannik’ neriorsorpaatigut. Ajortitsinnik isumakkeerfigilluinnarsinnaavaatigut. (Apustilit Suliaat 3:19-21 atuakkit). Siusinnerusukkut sammisatsitut utertitsissut tunngavigalugu Jehovap inuit ilaat, tanitat, qilammi ernerilersinnaanngorpai. (Rom 8:15-17) ‘Savanut allanut’ ilaasut ilaquttaminut nunarsuarmiittunut ilannguteqqullugit kajumissaarpai. Taakku naammalluinnartunngoreerunik naggammik misilinneqassapput. Imminik ilumoorfiginnippata Jehovap aamma taakku qitornavissiartaarissavai. (Rom 8:20, 21; Saqq 20:7-9) Jehovap qitornani tamaasa asajuassavai. Utertitsissutip iluaqutissartai naassaanngitsumik atassapput. (Hebr 9:12) Jehovap tunissummik tamatuminnga erlinnangaartumik tunivaatigut, tamatuminngalu kimilluunniit arsaarneqarsinnaanngilagut.
16. Utertitsissut aniguinissamut qanoq iluaqutigaarput?
16 Ilumoorlutik peqqissimisut Jehovap ilaqutaanut ilaaleqqinniartut Diaavulup akornusersinnaanngilai. Jiisusi “ataasiaammik” toquvoq. Utertitsissut akilerneqareerpoq. (Hebr 9:24-26) Adamip toqu uatsinnut ingerlateqqippaa, Jiisusilli pilliutaa pissutigalugu naassaanngitsumik inuuneqalissaagut. Utertitsissut tunngavigalugu Saatanip silarsuaanit toqumillu siooranermit aniguisinneqarsinnaavugut. – Hebr 2:14, 15.
17. Jehovap asanninnera qanoq isumaqarfigaajuk?
17 Guutip neriorsuutai eqquuttuaannarput. Pinngortitami inatsisiliaasa allanngunngisaannarnerattut Jehova allanngunngisaannarpoq. Jehovap pakatsisinngisaannassavaatigut. (Mal 3:6) Inuunermik tunissummik tuniinnarnata asavaatigut. “[Guutip] uatsinnut asannissusia ilisimavarput upperalugulu. Guuti tassaavoq asanninneq.” (1 Joh 4:16) Neriorsuutai piviusunngortuaannarput. Qanittukkut nunarsuaq paratiisinngussaaq alianaatsoq. Inuit tamarmik Jehova ilaassallugulu asaqatigiissapput. Taamanikkussamut qilammi nunarsuarmilu kiffai tamarmik ima oqassapput: “Naalannaat unnersiutiginnissullu ilisimassuserlu qujaniullu ataqqinaallu pissaanerlu nakuussuserlu Guutitta pigai naassaanngilluinnartumik. Amen!” – Saqq 7:12.