MISIGISALIKKERSAARUT
Maligassaalluartut ilinniarfigigakkit pilluaqqussutissarsiffigeqaara
INUUSUTTUULLUNGA oqaluussineq sapernartippara. Inersimasunngorama suliassanik naammassisinnaanngissorisannik suliakkerneqartalerpunga. Maanna oqaluttuarissavara annilaangasarnerma qaangernissaanut maligassaalluartut qanoq iluaqutigisimanerlugit taamaalillungalu ukiuni 58-ini piffissaq tamaat kiffartorninni pilluaqqussuterpassuit misigisinnaasimallugit.
Canadami nunap ilaani Quebecimi franskisut oqaluttoqarfiusumi illoqarfimmi Quebec Citymi inunngorpunga. Angajoqqaama Louisip aamma Zéliap asannittumik perorsarpaannga. Ataataga inuttut tunuarsimaartuuvoq atuarnerlu nuannarisaralugu. Uanga allanneq nuannarisarigakku siunissami tusagassiortunngorusuppunga.
Aqqaneq-marluk missaannik ukioqartunga ataatama suleqataa Rodolphe Soucy taassumalu ikinngutaa uagutsinnut pulaarput. Taakku Jehovamik Nalunaajaasuupput. Nalunaajaasut pillugit ilisimasaqarpianngilanga upperisaallu soqutigivallaarnagu. Apeqqutitsinnulli Biibili atorlugu akilluartarnerat alutorisarpara. Angajoqqaama tamanna aamma ajasoorutigaat, taamaattumik Biibilimik atuaqqissaaqatigineqartarnissarput akueraarput.
Tamatuma nalaani katuullit atuarfianni atuartuuvunga. Biibilimik atuaqqissaartarninni ilikkakkannik atuaqatikka ilaannikkut oqaluttuuttarpakka. Naggataatigut ilinniartitsisut, aamma palasiusut, tamanna paasivaat. Ilinniartitsisut ilaata oqaatsinnik assortuinermini Biibili atorlugu uppernarsaanani atuaqatikka tamaasa tusaatillugit pikitsitsisuunerarpaanga. Pisimasoq nuanniikkaluartoq uannut iluaqutaaginnarpoq paasigakku atuarfiup upperisarsiornermik ajoqersuutaa Biibilimut naapertuutinngitsoq. Aamma paasivara atuarfik uannut tulluartuunngitsoq. Angajoqqaama akuersineratigut atuarfimmut allamut nuuppunga.
OQALUUSSINERMIK NUANNARINNILERNEQ
Biibilimik atuaqqissaaqatigineqartaraluarlunga matumiit matumut oqaluussineq merserigakku anersaakkut siumukarniaaluusaarpunga. Ilagiit katuullit taamani pissaaneqangaarput oqaluussinitsinnillu sakkortuumik akerlilersuillutik. Maurice
Duplessis, Quebecimi ministeriuneq, oqaluffimmik tapersersuisuuvoq. Taanna tapersersortigalugu inuppassuit Nalunaajaasunik malersuisuupput, allaat saassuttarlugit. Taamani oqaluussiniaraanni sapiissuseqarluinnartariaqarpoq.Qatanngut John Rae, ilinniarfimmi Gileadimi klassit qulingiluaanni naammassisimasoq, annilaangasarnerma qaangernissaanut iluaqutigeqaara. John misilittagaqarluartoq, saamasuullunilu maniguuttuuvoq. Qaqutigoortumik oqaatsitigut siunnersortarpaanga, maligassaalluarnerali ilinniarfigingaartarpara. John franskisut oqalunnissani sapernartittarpaa, taamaattumik oqaluusseqatigikulasarpara oqaatsitigullu ikiortarlugu. Johnip ilagisarnera sallusuissutip aalajangiunnissaanut iluaqutigaara. Nalunaajaasut naapeqqaarnerannit ukiut qulit qaangiuttullu 1951-imi maajip 26-anni kuisippunga.
Quebec Citymi ilagiinni ikikkaluarluta amerlanersavut pioneriupput. Taakkua maligassaalluarnerisa pionerinngornissannut killippaannga. Taamani Biibili kisiat atorlugu matumiit matumut oqaluussisarpugut. Biibililersaarutaateqannginnatta Biibili atorluartariaqartarparput. Taamaattumik sallusuissut illersorniarlugu Biibilimik atuillaqqinnerulerniarsariuarpunga. Inuilli amerlasuut Biibili ilagiinnit katuullinit akuerineqarsimanngitsoq atuarumaneq ajorpaat.
Simone Patry, qatanngut arnaq aalajaatsoq ilageeqatigisara, 1952-imi katippara. Montrealimut nuuppugut, ukiorlu ataaseq qaangiutiinnartoq panipput, Lise, inunngorpoq. Naak katinnissarput sioqqutilaarlugu pioneritut unikkaluarlunga ilaqutariittut ilagiit tamakkiisumik tapersersorsinnaaniassagatsigit pilimanianngitsumik inuunerput attatiinnarniarsaraarput.
Ukiut qulit qaangiuttullu pioneritut kiffartoqqilernissara pimoorullugu eqqarsaatigeqqittalerpara. 1962-imi Betelimi Canadamiittumi utoqqaanertanut Naalagaaffimmut Kiffartornermik Ilinniarfik qaammammik ataatsimik sivisussuseqartoq peqataaffigigakku qatanngut Camille Ouellette ineqatigaara. Naak meeraqaraluarluni Camillep oqaluussinermik aallussilluartuunera ajasoorutigaara. Taamanikkut Quebecimi meeqqamik perorsaajutigaluni pioneriuneq qaqutigoortuuvoq, taamaattorli Camillep tamanna anguniagarivaa. Ineqatigiinnitta nalaani kajumissaarpaanga periarfissakka eqqarsaatigissagikka. Qaammatialunnguit qaangiutiinnartut paasivara pioneritut
kiffartoqqilersinnaallunga. Taamatut aalajangernera silatusaarnerunersoq ilaasa apeqqusertarpaat, oqaluussinermili iliuuseqarnerorusullunga ilungersornikka Jehovap pilluaqqujumaarai tatigigakku tamakku uniffiginngilakka.QUEBEC CITYMUT SPECIALPIONERITUT UTERNEQ
1964-imi Simonelu peroriartorfitsinni Quebec Citymi specialpioneritut kiffartulerpugut. Ukiut arlallit tassaniippugut. Piffissami tassani siornatigutulli malersugaanngikkaluarluta suli akerlilersorneqartarpugut.
Arfininngornerit ilaanni ualikkut, Quebec Cityp silatinnguani illoqarfeeqqami Sainte-Mariemi politiimit tigusaavunga. Akuersissuteqarnanga illumiit illumut oqaluussigama politeeqarfiliaappaanga isertitsivimmullu parnaarullunga. Kingusinnerusukkut eqqartuussisumut mersernartumut, Baillargeonimik atilimmut, sassartinneqarpunga. Aperivaanga kina eqqartuussivimmi illersuisorissaneriga. Ateq Glen How, * angut Nalunaajaasoq illersuisoq ilisimaneqarluartoq, taagakku aarleritsalluni akivoq: “Ajja, taannaanngitsoq!” Taamani Glen How Jehovap Nalunaajaasuinik illersuisutut tusaamaneqarluartuuvoq. Sivitsunngitsoq eqqartuussivimmiit nalunaarfigineqarpunga unnerluussutit taamaatiinnarneqartut.
Quebecimi akerlilersorneqarnerput pissutigalugu ataatsimiittarfissatsinnik tulluartumik attartorniarneq ajornakusooqaaq. Taamaallaat biilinut inissiisarfik kiassaateqanngitsoq ilagiitsinnut angivallaanngitsumut pissarsiaraarput. Ukiuunerani issittaqqimmat kiassaat uuliatortoq atorneqartarpoq. Ataatsimiinnissaq akunnialuit sioqqullugu kiassaat ungullugu katersuuttarpugut misigisanik qiimmassaataasinnaasunik avitseqatigiinniarluta.
Ukiut ingerlaneranni oqaluussinermi angusaqarluarsimaneq takullugu nuanneqaaq. 1960-ikkunni ilagiit Quebec Citymi, Côte-Nordimi Gaspé Peninsulamilu katillugit amerlanngillat. Sumiiffinni taakkunani ullumikkut marlunnit amerlanerusunik ilageeqatigeeqarpoq, qatanngutillu naalagaaffilersaarfinni kusanarluinnartuni ataatsimiittarlutik.
ANGALASARTUTUT KIFFARTULERNEQ
1970-imi Simonelu ilagiinnik nakkutilliisutut angalasartutut kiffartulerpugut. Taava 1973-imi ilageeqatigiinni arlalinni angalasartutut kiffartulerpugut. Ukiuni taakkunani qatanngutit angutit pikkorissut Laurier Saumur * aamma David Splane, * angalasartutut kiffartortut, ilinniarfigeqaakka. Ataatsimeersuareeraangatta David uangalu ilinniartitsinitsinni qanoq pikkorinnerulersinnaanerluta immitsinnut siunnersoqatigiittarpugut. Eqqaamavara Davidip oqarfigigaanga: “Léonce, naggataarutaasumik oqalugiaatit nuannareqaara. Ajunngeqaaq, oqalugiaatinnili ilanngussatit atorlugit uanga pingasunik oqalugiaatiliorsinnaagaluarpunga!” Oqalugiaatinnut paasissutissanik amerlavallaanik ilannguseqqajaasarpunga. Eqqoqqissaartunik naatsunnguanillu paasissutissiisarnissara ilinniartariaqarpara.
Ilageeqatigiinnik arlalinnik nakkutilliisut ilagiinnik nakkutilliisunut qiimmassaasussaapput. Quebecimili oqaluussisartorpassuit ilisarisimalluarmannga ilageeqatigiinnut tikeraaraangama oqaluusseqatigiumasaqaannga. Taakkua oqaluusseqatigisarnerat nuannareqaara, ilagiinnilli nakkutilliisoq naammattumik piffissaqarfiginngitsoortarpara. Ilaanni ilagiinnik nakkutilliisup asannittup eqqaasippaanga: “Nuannerpoq qatanngutit piffissaqarfigisarakkit, eqqaamassavalli sapaatip-akunnera una uannut atortussaagakku. Uangattaaq qiimmassagassaavunga!” Inussiarnersumik eqqaasinneqarnera oqimaaqatigiissaarinerulernissannut iluaqutigeqaara.
Alianaraluartumik 1976-imi ilimaginngisatsinnik pisoqarpoq. Nuliara asasara, Simone, perululluni napparsimalerpoq toqukkullu qimagulluni. Tunniusimalluinnartuugami Jehovamillu asannittuulluni nuliaalluartuuvoq. Taassuminnga annaasaqarnerma naammagalugu atornissaanut oqaluussinermik ulapputeqarnera iluaqutigeqaara, Jehovalu qutsavigaara piffissami artornartorsiorninni asannilluni annertoqqusersorsimammanga. Kingorna, Carolyn Elliott, pioneri aallussilluartoq tuluttut oqaasilik, pisariaqartitsiffiunerusumi kiffartorniarluni Quebecimut nuussimasoq, katippara. Carolyn ammasuuvoq inunnillu ilumoorluni soqutiginnittuulluni, pingaartumik ittoortunut imaluunniit kiserliortunut. Angalasartutut kiffartorninni ilagisalermanga uannut iluaqutaaqaaq.
UKIOQ PINGAARUTEQANGAARTOQ
1978-imi januaarimi Quebecimi Pioneritut Ilinniarfimmi aatsaavissuaq aallartittussami ilinniartitsisussatut toqqarneqarpunga. Sammineqartussat uannut ilinniartunullu nutaajummata pissangaqaanga. Qujaqaanga klassimi siullermi ilinniartitakka pionererpassuummata misilittagaqarluartut. Naak uanga ilinniartitsisuugaluarlunga ilinniartitannit ilikkagaqaqaanga.
1978-imi kingusinnerusukkut Olympic Stadiumimi Montrealimiittumi nunanit tamalaanit peqataaffigineqartumik ataatsimeersuartoqarpoq ima qulequtalimmik “Guutip ajugaanera”. 80.000-t sinnerlugit
najuupput, Quebecimilu ataatsimeersuarnermi najuuttut aatsaat taama amerlatigalutik. Ataatsimeersuarnermi tusagassiortunik nakkutilliisoqarfimmi sulisussanngortinneqarpunga. Tusagassiortorpassuit oqaloqatigisarpakka tusagassiuutinilu nuannersumik eqqartorneqaqattaarnerput tupaallaatigalugu. Tv-kkut ratiuukkullu apersorneqarnerit akunnerit 20-t sinnerlugit aallakaatinneqarput allaaserisallu hundredilinnit amerlanerusut naqinneqarlutik. Tamanna nalunaajaataalluaqaaq!OQALUUSSIFFIGISARTAKKAMUT ALLAMUT NUUNNEQ
1996-imi inuuninni allanngorujussuartoqarpoq. Kuisikkamali Quebecimi franskisut oqaluttoqarfiusumi kiffartornikuullunga Torontomi tuluttut oqaluttoqarfiusumi kiffartoqquneqarpunga. Imminut piukkutinngilluinnarpunga tuluttullu oqqarlukkama oqalugiarnissara merseralugu. Misigisimavunga Jehovamut qinunerusariaqarlunga tatiginerusariaqarlugulu.
Kingumut eqqarsaatigalugu oqarsinnaavunga ukiuni marlunni nuannersorsuarmik Torontomi kiffartorsimallunga. Imminut tatigalunga tuluttut oqaluttalernissannik Carolynip qasusuilluni ikiorpaanga qatanngutillu tapersersorlungalu qiimmassartarpaannga. Piffissap sivikitsup ingerlanerani ikinngutitaartupallappugut.
Weekendimi ataatsimeersuarnissamut piareersarnerup aamma pisassat allat saniatigut tallimanngornikkut unnukkut matumiit matumut akunnerup ataatsip missaani oqaluussisarpunga. Immaqa inuit ilaat eqqarsartarput: ‘Sooq weekendimi ataatsimeersuarnissaq ulapaarfioreeqisoq sioqqullugu oqaluussisoqassava?’ Oqaluussinermili nuannersumik misigisaqarsimaneq uannut nakussatsissutaasarpoq. Maannamut allaat oqaluussereeraangama nuannaarnerulertarpunga.
1998-imi Carolyn uangalu specialpioneritut Montrealimut uteqqippugut. Tamanut oqaluussinermik aaqqissuussisutut aamma Jehovap Nalunaajaasui pillugit eqqortumik paasissutissiinniarlunga tusagassiuutitigut tunngasunik ukiuni arlalinni suliaqarpunga. Massakkut Carolynilu allamiunut Canadamut nooqqammisunut, amerlanertigut Biibili pillugu paasisaqarnerorusuttunut, oqaluussisarnerput nuannareqaarput.
Ukiuni 68-ini kuisimasutut Jehovamut kiffartornera eqqarsaatigigaangakku pilluaqqusaangaarsimasutut misigisarpunga. Oqaluussineq nuannarilernikuullugu allanillu sallusuissummik ilinniartitsisarluni pilluarnaqaaq. Paniga Lise uialu, qitornaat perormata, pioneritut aallartipput. Panimma kiffartornermini aallussilluartuujuarnera takullugu uummatikkut killitsissutigisarpara. Pingaartumik kristumioqatikka maligassiuilluarnermikkut siunnersuillaqqinnermikkullu anersaakkut ineriartornissannut kiffartorninnilu assigiinngitsunik suliaqarnissannut ikiuisimasut qujassutissaqarfigeqaakka. Paasivara qanorluunniit suliassinneqaraluarutta aatsaat Jehovap anersaava pissaaneqangaartoq tatigigutsigu aalajaasinnaasugut. (Tuss 51:13) Jehova qutsavigiuartarpara taassuma aqqanik unnersiutiginninneq pisinnaatitaaffigigakku. – Tuss 54:8.
^ imm. 16 W. Glen Howip misigisalikkersaarutaa, “Kampen er ikke jeres, men Guds”, Vågn op! apriilip 22-at 2000-moortumi atuarneqarsinnaavoq.
^ imm. 20 Laurier Saumurip misigisalikkersaarutaa, “Jeg fandt noget der var værd at kæmpe for”, Vagttårnet apriilip aallaqqaataat 1977-imoortumi atuarneqarsinnaavoq.
^ imm. 20 David Splane Jehovap Nalunaajaasuisa Siulersuisoqatigiivinut ilaasortaavoq.