1. Qanoq siun­nersor­neqarsin­naavugut, aamma sooq tamatta siun­nersor­neqar­tariaqar­tar­pugut?

 TAMATTA ilaan­nik­kut siun­nersor­neqar­tariaqar­tar­pugut. Immaqa ataq­qisatsin­nut siun­nersoq­qusin­naavugut. Imaluun­niit qatan­ngutip isumaalut­tup ornil­luta paasitis­sin­naavaatigut ‘kuk­kusumik toraagaqalersugut’, tassa peq­qis­simis­sutigisas­satsin­nik iliuuseqalersugut. (Gal 6:1) Aamma ingasat­tumik ajor­tuliorsimanitta kingunerisaanik naq­qin­neqar­nik­kut siun­nersor­neqarsin­naavugut. Siun­nersor­neqar­ner­put qanorluun­niit pis­suteqaraluar­pat tusar­naar­tariaqar­pugut. Taamaaliorutta iluaqutigis­savar­put inuuner­pullu annaas­sin­naal­lugu. – Uss 6:23.

2. Ussatit 12:15 naaper­torlugu sooq siun­nersuutit maleruar­tariaqar­pagut?

² Allas­simaf­fimmi qulequtarisatsinni ‘ilisimasut oqaasii tusaaniaq­qul­lugit’ kajumis­saar­neqar­pugut. (Uss 22:17) Inuup kialuun­niit suut tamaasa ilisimasaqarfigin­ngilai. Uagutsin­nit ilisimasaqar­nerusoqar­tuaan­narlunilu misilit­tagaqar­nerusoqar­tuaan­nar­poq. (Ussatit 12:15 atuaruk). Tassa siun­nersuutinik tusar­naar­tarutta maniguut­tuuner­put ersersis­savar­put. Aamma pisin­naasatta kil­leqar­nerat anguniak­kat­talu angunis­saan­nut ikior­neqar­tariaqar­ner­put ilisimal­lugit ersersis­savar­put. Kun­ngi Saalumuut isumas­sarsisitaal­luni ima allap­poq: ‘Amerlasuunik siun­nersuisoqarsimagaangat iluatsit­toqar­tar­poq.’ – Uss 15:22.

3. Qanoq ittunik siun­nersor­neqarsin­naavugut?

³ Toq­qaan­nar­tumik toq­qaan­nan­ngitsumil­luun­niit siun­nersor­neqarsin­naavugut. Toq­qaan­nan­ngitsumik siun­nersor­neqar­neq qanoq paasisariaqar­pa? Biibilimik Biibililersaarutitsin­nil­luun­niit atuar­nitsinni unikaal­lal­luta iliuuserisar­tak­kagut eqqarsaatigisin­naavagut, taman­nalu kajumis­sis­sutigalugu allan­nguisin­naavugut. (Hebr 4:12) Tamanna tas­saavoq toq­qaan­nan­ngitsumik  siun­nersor­neqar­neq. Taavami toq­qaan­nar­tumik siun­nersor­neqar­neq qanoq paasisariaqar­pa? Immaqa utoq­qaaner­tap qatan­ngutil­luun­niit anersaak­kut inersimal­luar­tup allap sulis­sutigisariaqak­katsin­nik paasitip­paatigut. Tamanna tas­saavoq toq­qaan­nartumik siun­nersor­neqar­neq. Asan­nin­nini kajumis­sis­sutigalugu Biibili tun­ngavigalugu uagutsin­nik siun­nersuisoqar­pat siun­nersuutaanik tusar­naar­nik­kut maleruaanik­kullu qujamasuutigin­nin­ner­put ersersis­savar­put.

4. Oqaluus­sisar­tup oqaasii 7:9 naaper­torlugu siun­nersor­neqaraangatta sunaveersaar­tariaqar­pugut?

⁴ Ingam­mik toq­qaan­nar­tumik siun­nersor­neqar­ner­put akueriuminaatsis­sin­naavar­put. Allaat ajual­las­sin­naavugut. Sooq? Naam­mal­luin­nan­ngitsuuner­put nas­suerutigeriaan­naagaluarlugu kuk­kus­suter­put aalajangersimasoq pil­lugu siun­nersuut akueriuminaatsis­sin­naavar­put. (Oqaluussisartup oqaasii 7:9 atuaruk). Immaqa imminut illersor­pugut. Siun­nersuisup pis­sutiginiagai apeq­qusersin­naavagut siun­nersueriaasialuun­niit ajual­las­sutigalugu. Immaqaluun­niit allaat siun­nersuisoq isor­nar­torsiorusus­sin­naavar­put ima eqqarsarluta: ‘Siun­nersor­tus­saan­ngik­kaluar­paanga, nam­minermi kuk­kusar­poq!’ Immaqalu allaat siun­nersuut iluarin­ngin­natsigu maleruar­nagu tusarusutatsin­nik allamit siun­nersor­neqarumas­saagut.

5. Allaaserisami matumani suut sam­mis­savagut?

⁵ Allaaserisami matumani inuit siun­nersor­neqar­nermin­nik itigar­titsisut akuersisullu Biibilimi oqalut­tuarineqar­tut sam­mis­savagut. Aamma siun­nersor­neqar­ner­put iluaqutigisin­naajumal­lugu susin­naanersugut sam­mis­savar­put.

6. Kun­ngip Rehabeam­mip siun­nersor­neqar­nerminut qisuariar­nera qanoq ilin­niutigaar­put?

⁶ Rehabeammi assersuutigeriar­tigu. Ataataata Saalumuup innut­tani oqimaatsunik nam­magas­sis­simavai. Rehabeam­milu Israalimi kun­ngin­ngorami innut­taasunit oqilisaateq­qusunit ornin­neqar­poq. Silatusaarluni qanoq akis­sanerluni angutinut utoq­qaanerusunut siun­nersoq­quvoq. Angutit utoq­qaanerusut kun­ngi oqarfigaat innut­taasut piumasaat­tut ilioruni tapersersor­tis­saqar­tuaan­nas­sasoq. (Kng 1. 12:3-7) Rehabeam­milli siun­nersuut tamanna iluarin­ngin­namiuk angutit peroriar­toqatigisimasani siunersior­pai. Angutit taakku 40-t mis­saan­nik ukioqarunaramik inuunerminni misilit­tagaqarsimas­sap­put. (Nal 2. 12:13) Tamatumanili siun­nersuinerlup­put. Siun­nersuip­put innut­taasut oqimaan­nerusunik nam­magas­sis­sagai. (Kng 1. 12:8-11) Assigiin­ngitsunik marlun­nik siun­nersor­neqarami sorleq malis­sanerlugu qinunik­kut Jehova aperisin­naagaluar­paa. Taamaalior­nanili angutit inuusun­nerusut siun­nersuutaat iluarinerugamiuk maleruar­paa. Tamanna Rehabeam­mimut Israalik­kun­nullu kingunerlorujus­suar­poq. Uagut­taaq tamatigut tusarusutatsin­nik siun­nersor­neqar­tar­navian­ngilagut. Guutilli oqaasianik tun­ngaveqar­pat maleruar­tariaqar­par­put.

7. Kun­ngimik Uzziiamik oqalut­tuamit suna paasivar­put?

⁷ Kunngip Uzziiap siun­nersor­neqar­nini tusaruman­ngilaa. Jehovap guutisiorfiata ilaanut palasit kisimik iserfigisin­naasaan­nut iser­poq tipigis­saatil­liiar­torluni. Jehovap palasiisa ima oqarfigaat: “Illit Naalak­kamut tipigis­saatil­liisus­saan­ngilatit. Taamaaliorsin­naatitaap­put palasit.” Uzziia qanoq qisuariar­pa? Maniguul­luni siun­nersuut akuerisimasuuguniuk ingerlaan­narlu guutisiorfim­mit anisimasuuguni Jehovamit isumak­keerfigineqarsimas­sagunaraluar­poq. Taamaalior­nanili Uzziia “kamaler­poq”. Sooq siun­nersor­neqar­nerminik itigar­titsiva? Isumaqarsimagunar­poq kun­ngiugami  qanorluun­niit iliorsin­naatitaal­luni. Jehovali taama isumaqan­ngilaq. Uzziia makitasaarami “toqus­sani tikil­lugu pupis­suuvoq”. (Nal 2. 26:16-21) Uzziiamik oqalut­tuamit paasivar­put kinaagaluarut­taluun­niit Biibilimik tun­ngavilim­mik siun­nersor­neqar­ner­put itigar­tik­kutsigu Jehovap iluariun­naas­sagaatigut.

8. Juubi siun­nersor­neqarami qanoq qisuariarpa?

⁸ Maligas­siuinerlut­tut sam­meriik­katta saniatigut siun­nersuutinik akuersiner­tik pis­sutigalugu pil­luaq­qusaasut Biibilimi aamma oqalut­tuarineqar­put. Juubi sam­meriar­tigu. Guutimik mianerin­nit­tuugaluarluni naam­mal­luin­nar­tuun­ngilaq. Atugarliungaar­nermini eqqun­ngitsumik isigin­nit­taaseqar­nini ersersip­paa. Taamaat­tumik Elihumit Jehovamillu siun­nersor­neqar­poq. Juubi qanoq qisuariar­pa? Maniguul­luni siun­nersor­neqar­nini akueralugu ima oqar­poq: “Uanga oqaluuserisimavakka paasin­ngisakka … Oqaaserisimasaraluakka tamaasa uter­tip­pakka peq­qis­simineralu takutil­lugu issumi arsanilu issial­lunga.” Juubi maniguuk­kami Jehovamit pil­luaq­quneqar­poq. – Job 42:3-6, 12-17.

9. Moorsisi siun­nersor­neqarami qanoq qisuariarpa, aamma sooq maligas­saal­luarpa?

⁹ Moorsisi ingasat­tumik kuk­kunermi kingorna siun­nersor­neqar­nerminik akuersigami maligas­saal­luar­poq. Ilaanni kamalerami Jehova ataq­qinaatis­sin­ngilaa. Tamanna pis­sutigalugu nunamut neriorsuutigisamut iseq­qusaajun­naar­poq. (Mos 4. 20:1-13) Aalajangiineq tamanna pil­lugu Moorsisip aliasun­nini oqaatigim­magu Jehova ima oqar­poq: “Tamanna uan­nut taaq­qis­san­ngilat.” (Mos 5. 3:23-27) Tamanna pil­lugu Moorsisip narrutsas­simaaler­nani Jehovap aalajangiinera akueraa, Jehovallu Israalik­kun­nut siulersuisuutit­tuar­paa. (Mos 5. 4:1) Juubi Moorsisilu siun­nersor­neqar­nermin­nik akuersip­put, taamaat­tumillu uagutsin­nut maligas­saal­luar­put. Juubi utoq­qatsis­sutis­sarsior­nani isigin­nit­taatsiminik allan­nguivoq. Moorsisip pisin­naatitaaf­fini immik­kut ittoq pingaar­titani annaagaluarlugu aalajaat­tuar­nermigut ersersip­paa Jehovamit siun­nersor­neqar­nini akueralugu.

10. (a) Ussatit 4:10-13 ersersin­neqar­tutut siun­nersor­neqar­ner­put akuerigaangatsigu qanoq iluaqutigisar­par­put? (b) Siun­nersor­neqar­tut ilaasa ajun­ngitsumik isigin­nit­taaseqar­ner­tik qanoq ersersip­paat?

¹⁰ Aalajaatsut, soorlu Juubi Moorsisilu, ilaaraangatsigit iluaqutigisar­par­put. (Ussatit 4:10-13 atuakkit). Uppeqater­pas­suagut taamaaliorsimap­put. Qatan­ngut Emmanuelimik atilik * Congo Kinshasami najugalik mianersoq­quneqarsimanini pil­lugu ima oqalut­tuar­poq: “Qatan­ngutit angutit anersaak­kut inersimal­luar­tut malugisimavaat anersaak­kut navianar­torsior­tunga, ikior­niarlungalu ornip­paan­nga. Siun­nersuutaat maleruar­para taamaat­tumillu ajor­nar­torsior­nis­saraluakka pin­ngitsoor­til­lugit.” Canadami pioneriusoq Meganimik atilik ima oqar­poq: “Tusarusutakka malin­nagit pisariaqar­titak­kali malil­lugit siun­nersor­neqar­tar­punga.” Qatan­ngullu Kroatiamiu Markomik atilik ima oqar­poq: “Immik­kut pisin­naatitaaf­figa annaavara, maan­nak­kulli pereersoq eqqarsaatigigaangakku paasisar­para siun­nersor­neqar­nera Jehovamut attaveqarluaq­qilis­sutigisimal­lugu.”

11. Siun­nersuutinik akuersineq pil­lugu qatan­ngut Karl Klein qanoq oqarpa?

¹¹ Siun­nersuum­mik akuersisoq alla tas­saavoq Siulersuisoqatigiin­nut ilaasor­taasimasoq qatan­ngut Karl Klein. Qatan­ngut Klein ikin­ngutin­naaminit Joseph F. Rutherfordimit sak­kor­tuumik siun­nersor­neqarsimanini pil­lugu misigisalik­kersaarluni oqalut­tuar­poq.  Nas­suer­poq aal­laq­qaam­mut siun­nersuut iluarisimanagu, ima oqalut­tuar­poq: “Qatan­ngutip Rutherfordip takoq­qik­kaminga nuan­naarluni ima ilas­sivaanga: ‘Aluu Karl!’ Sulili ajual­las­simaarama iluamik ilas­sin­ngin­nakku ima oqarfigaanga: ‘Karl, mianersorit! Diaavulup pisariniarsaraatit!’ Kan­ngusuum­merlunga ima akivara: ‘Ajual­las­simaalaan­ngilanga, qatan­ngut Rutherford.’ Ajul­las­simaar­nerali nalun­ngin­namiuk ima mianersoq­qoq­qiin­nar­paanga: ‘Ajun­ngilaq. Mianersorilli, Diaavulup pisariniarsaraatit.’ Ilumuungaarami! Qatan­ngutit uagutsin­nik oqaaq­qis­saarinis­samin­nut pisin­naatitaaf­feqar­tut oqaaq­qis­saarinerat pil­lugu uumigigutsigit Diaavulumit pisarineqariaan­naas­saagut.” * (Ef 4:25-27) Qatan­ngutip Kleinip qatan­ngum­mit Rutherfordimit siun­nersor­neqar­nini akueraa, ikin­ngutigiil­luar­tuar­pullu.

12. Siun­nersuutinik akuersinis­samut maniguun­neq qanoq iluaqutigis­savar­put? (Tussiaat 141:5)

¹² Siun­nersuutinik akuersinis­samut suna iluaqutigis­savar­put? Maniguulluta naam­mal­luin­nan­ngitsuuner­put qanorlu sianiitsigisin­naaner­put eqqaamasariaqar­pagut. Eqqaariik­katsitut Juubi eqqun­ngitsumik isigin­nit­taaseqar­poq. Allan­nguigamili Jehovamit pil­luaq­quneqar­poq. Sooq? Maniguut­tuugami. Imminit nukarliunerusumit Elihumit siun­nersor­neqar­nini Juubip maleruaramiuk maniguut­tuunini ersersip­paa. (Job 32:6, 7) Maniguuk­kutta siun­nersor­neqar­ner­put akueris­savar­put, misigigaluarut­taluun­niit siun­nersor­neqar­tariaqar­nata siun­nersuisorluun­niit uagutsin­nit nukarliunerugaluar­pat. Canadami utoq­qaaner­taasoq ima oqar­poq: “Siun­nersor­neqar­tan­ngik­kutta siumukar­nis­saq ajor­nas­saaq.” Tamat­tami anersaap inerititaanik inerititaqar­tuar­tariaqarlutalu nutaarsias­sanik nuan­nersunik oqaluus­sinitsinni ilin­niar­titsinitsin­nilu siumukar­tuar­tariaqar­pugut. – Tussiaat 141:5 atuaruk.

13. Siun­nersor­neqar­tar­ner­put qanoq isigisas­savar­put?

¹³ Siunnersorneqarneq Guutip asannin­neranut ersiutaasutut isigiuk. Jehovap pitsaaner­paamik kis­saap­paatigut. (Uss 4:20-22) Jehovap oqaatsini, Biibililersaarut kristumiuluun­niit inersimal­luar­toq aqqutigalugu siun­nersoraangamisigut uagutsin­nik asan­nin­nini ersersit­tar­paa. Hebræerit 12:9, 10-milu allas­simavoq ‘iluaqutis­satsin­nik perorsaatis­sit­taraatigut’.

14. Siun­nersor­neqaraangatta suna pingaar­tit­tas­savar­put?

¹⁴ Siunnersuut pingaartiguk siun­nersueriaaseq eqqar­saatigival­laarnagu. Ilaan­nik­kut misigisin­naasar­pugut uagutsin­nik siun­nersuisup  siun­nersueriaasia pitsaaval­laan­ngitsoq. Soorunami siun­nersuisar­tut sapin­ngisamin­nik tigujuminar­tumik siun­nersueriaaseqarusut­tar­put. * (Gal 6:1) Siun­nersor­neqaraangat­tali siun­nersuut pingaar­tit­tas­savar­put isumaqaraluarut­taluun­niit siun­nersuisoq pitsaanerusumik siun­nersueriaaseqar­tariaqar­toq. Uku eqqarsaatigisin­naavagut: ‘Siun­nersueriaasia iluarival­laan­ngik­kaluarlugu siun­nersuutaa atorsin­naavara? Siun­nersuisup naam­mal­luin­nan­ngis­susii isiginiar­pal­laar­nagit siun­nersuut ilin­niarfigisin­naavara?’ Qanorluun­niit siun­nersor­neqaraluarluta ilin­niarfiginiarsarigutsigu silatusaas­saagut. – Uss 15:31.

15. Sooq siun­nersor­tis­sarsior­tas­saagut?

¹⁵ Siun­nersor­tis­sarsior­tar­nis­samut Biibilimi kajumis­saar­neqar­pugut. Ussatit 13:10-mi ima allas­simavoq: “Siun­nersuutinik ilas­sin­nit­tuni ilisimas­suseqar­poq.” Ilumuus­susia! Allanit siun­nersor­neqar­nis­sar­tik utaq­qinagu siun­nersor­tis­sarsior­tar­tut anersaak­kut siumukar­nerusar­put. Taamaat­tumik siun­nersor­tik­kumal­lutit iliuuseqar­tarit.

16. Qaquguk­kut siun­nersoq­qusin­naasar­pugut?

¹⁶ Qaquguk­kut uppeqatitsin­nut siun­nersor­tis­sarsiorsin­naasar­pugut? Ilaatigut pisuni imaat­tuni: (1) Qatan­ngutip arnap oqaluus­sisar­toq misilit­tagaqarluar­toq Biibilimik misis­sueqateqar­nis­samut qaaq­quaa kingusin­nerusuk­kullu qanoq ilin­niar­titsil­laq­qin­nerulersin­naanerluni siun­nersoq­qul­luni. (2) Qatan­ngutip arnap aap­paqan­ngitsup atisarsiniarluni uppeqatini anersaak­kut inersimal­luar­toq isumasior­paa. (3) Qatan­ngutip angutip siul­ler­paamik tamanut oqalugiar­tus­saal­luni oqalugiar­nermik misilit­tagaqarluar­tumut oqalugiaatis­sani tusar­naaq­qis­saaq­quaa pitsan­ngorsaanis­saminullu siun­nersoq­qul­luni. Allaat ukior­pas­suarni oqalugiar­tareersimagaluar­toq taama siun­nersoq­qusaruni siun­nersuutillu maleruar­tarunigit silatusaas­saaq.

17. Siun­nersor­neqar­neq qanoq iluaqutigisin­naavar­put?

¹⁷ Sapaatit-akun­nerini qaam­matiniluun­niit tul­liut­tuni tamatta toq­qaan­nar­tumik toq­qaan­nan­ngitsumil­luun­niit siun­nersor­neqarumaar­pugut. Siun­nersor­neqaruit sam­meriik­kagut eqqaamaniak­kit. Maniguut­tuarit, siun­nersueriaaseq pival­laar­nagu siun­nersuut pingaar­tiguk siun­nersuullu maleruarlugu. Arlaan­nar­pul­luun­niit silatuujul­luni inun­ngun­ngilaq. ‘Siun­nersuutilli tusaaniar­tarutsigit’ Guutip oqaasiani neriorsuutigineqar­tutut ‘ilisimas­susermik pigisaqalis­saagut’. – Uss 19:20.