ATUAQQISSAAGASSAQ 9
Jiisusitut imminut pilliutigeriaannaagit
“Tunisineq tigusinermit pilluarnarneruvoq.” – APS 20:35.
ERINARSUUT 15 Jehovap angajulliliaa nersoruk!
QILANAARTUUT *
1. Jehovap innuttai ajunngitsumik qanoq pissuseqarpat?
ITSARSUARLI Biibilimi siulittuutigineqarpoq Guutip innuttai Jiisusimit siulersorneqarlutik Jehova kiffartorfigiumallugu ‘kajumillutik sassarumaartut’. (Tuss 110:3) Tamannalu ullutsinni eqquuppoq. Jehovap Nalunaajaasuisa ukiut tamaasa nalunaaquttap-akunneri millionilikkuutaat oqaluussinermut atortarpaat, kajumissutsiminnillu taamaaliortarput akissarsiaqaratik. Aamma uppeqatitik timikkut, misigissutsikkut anersaakkullu ikiorumallugit piffissaqarfigisarpaat. Utoqqaanertat ilagiinnilu kiffartortut nalunaaquttap-akunnerpassui atorlugit ataatsimiinnerit piareersartarpaat uppeqatitillu qiimmassarniarlugit pulaartarlugit. Sooruna Jehovamik Nalunaajaasut taamaaliortartut? Jehova inoqatitillu asagamikkit. – Mat 22:37-39.
2. Romamiut 15:1-3 naapertorlugit Jiisusip qanoq maligassippaatigut?
2 Jiisusip allat pisariaqartitaat nammineq pisariaqartitaminit pingaarnerutittarpai. Maligassiuineralu uagut sapinngisatsinnik malinniartarparput. (Romamiut 15:1-3 atuakkit). Taamaaliornerput nuannersumik kinguneqassaaq. Jiisusi ima oqarpoq: “Tunisineq tigusinermit pilluarnarneruvoq.” – ApS 20:35.
3. Allaaserisami matumani suut sammineqassappat?
3 Jiisusip allat ikiorumallugit imminut pilliutigeriaannaanera allaaserisami matumani sammissavarput qanorlu uagut ilaarsinnaaneripput eqqartorlugu. Aamma sammissavarput allanik kiffartuussinissamut qanoq kajumissuseqarnerulersinnaasugut.
JIISUSI ILAARUK
4. Jiisusi allat pisariaqartitaannik qanoq salliutitsiva?
4 Jiisusi qasugaluarluni allanik ikiuisarpoq. Kapernaap eqqaaniugunartoq Jiisusi inuppassuarnit orninneqarami qanoq qisuariartoq eqqarsaatigiuk. Unnuaq naallugu qinunikuugami qasungaatsiarsimassaaq. Piitsulli napparsimasullu takugamigit nalligingaalerpai. Napparsimasulli ajorunnaarsiinnarnagit killitsinnangaartumik inuit oqalugiarfigilerpai, oqalugiaallu taanna qaqqami oqaluutsimik maanna ilisimaneqarpoq. – Luk 6:12-20.
5. Ilaqutariinni ittuusut Jiisusi ilaarlugu qasugaluarlutik qanoq imminut pilliutigeriaannaasarpat?
5 Ilaqutariinni ittuusut Jiisusi qanoq ilaaraat. Una takorlooruk: Ulloq naallugu suleruloorsimalluni ilaqutariinni ittuusoq qasoqaluni angerlarpoq. Unnuk taanna ilaqutariittut atuaqqissaaqatigiinnissartik unitsiinnassanerlugu eqqarsaatigigaluarpaa, nukissaqarumallunili Jehovamut qinuvoq. Qinnutaalu Jehovap akimmagu pisarnermissut ilaqutariiullutik atuaqqissaaqatigiipput. Ataataalluartoq taanna meeqqaminut maligassiuilluarpoq, meeraasami paasivaat angajoqqaamik anersaakkut ittut pingaartinnerpaagaat.
6. Jiisusip kisimiikkusukkaluarluni allanik ikiuisarneranik assersuuteqarit.
6 Jiisusip kisimiikkusukkaluaraangamiluunniit allat piffissaqarfigisarpai. Johannesip imermut morsutsitsisartup toqutaasimanera tusaramiuk Jiisusi qanoq misigisimassasoq takorlooruk. Aliatsangaarsimassaaq. Biibilimi ima allassimavoq: “Jiisusi [Johannesip imermut morsutsisisartup toqutaanera pillugu] kalerrinneqarami kisimiikkusulluni avinngarusimasumut umiatsiarluni aallarpoq.” (Mat 14:10-13) Jiisusip kisimiikkusunnera paasisinnaavarput, amerlasuummi aliasunnerminni kisimiiffeqarusuttarput. Jiisusili kisimiinnissaminut periarfissaqanngilaq. Avinngarusimasumut apuukkami inuppassuit ornigussimasut takulerpai. Qanoq qisuariarpa? Taakkua pisariaqartitaat eqqarsaatigileramigit “nalligingaalerpai”. Nalunngilaa ikiorneqartariaqarlutillu tuppallersarneqartariaqartut. Taamaattumik kajumissuseqangaarluni ‘amerlasuunik ilinniartilerpai’. – Mak 6:31-34; Luk 9:10, 11.
7-8. Utoqqaanertat uppeqatitik pisariaqartitsigaangata Jiisusi qanoq ilaartarpaat? Assersuuteqarit.
7 Utoqqaanertat asannittut Jiisusi qanoq ilaaraat. Utoqqaanertat imminut pilliutigeriaannaallutik uagut pilluta iliuuseqangaartarnerat qujamasuutigeqaarput. Suliaat amerlasuut ilagiinnit takuneqarneq ajorput. Assersuutigalugu pinartoqartillugu Napparsimmavinnut Attaveqartitani ilaasortaasut uppeqatitik nakorsiartut ikioriartupallattarpaat, amerlanertigullu tamanna unnuakkut pisarpoq. Utoqqaanertannguilli ilaqutaasalu uppeqatitik misiginneqatigingaarlugit taakkua pisariaqartitaat salliuttarpaat.
8 Utoqqaanertat aamma naalagaaffilersaarfinnik allanillu sanaartoqataasarlutillu ajunaarnersuaqartillugu ikiuuttarput. Tamatuma saniatigut piffissarujussuaq atorlugu ilagiinni ilinniartitsillutillu qiimmassaasarput. Utoqqaanertat ilaqutaalu tamarmik nersualaarneqartariaqarput. Qanortoq imminut pilliutigeriaannaanerat pillugu Jehovap pilluaqqugiligit! Soorunami allatulli utoqqaanertat oqimaaqatigiissaarisariaqarput. Ilagiinni suliassanik ulapputeqartaraluarlutik ilaquttamik pisariaqartitaannik matussusiinissamut piffissaqartariaqarput.
IMMINUT PILLIUTIGERIAANNAANISSAT SULISSUTIGIUARUK
9. Filippimiut 2:4, 5-ilu naapertorlugit kristumiut tamarmik qanoq isiginnittaaseqartariaqarpat?
9 Filippimiut 2:4, 5 atuakkit. Tamatta Jiisusip imminut pilliutigeriaannaanera ilaartariaqarparput. Biibilimi allassimavoq Jiisusi ‘inussiatut ilersoq’. (Flp 2:7) Versi taanna qanoq ilikkagaqarfigisinnaavarput? Inussiaalluartoq naalakkami iluarisaanik iliornissaminut periarfissarsiortarpoq. Uagut Jehova uppeqatigullu kiffartuukkusuppagut. Taakku kiffartuulluarumallugit qanoq iliorsinnaavugut? Siunnersuutit tulliuttut maluginiakkit.
10. Imminut qanoq aperisinnaavugut?
10 Imminut misissorit. Imminut ima aperisarit: ‘Allat ikiorniarlugit qanoq imminut pilliutigeriaannaatigaanga? Utoqqaat illuanniittoq qatanngut pulaaqqullugu imaluunniit qatanngut ataatsimiigiarnissamut aaqqullugu aperineqaruma akuerseriaannaavunga? Ataatsimeersuartarfimmi eqqiaaqataanissamut naalagaaffilersaarfimmiluunniit aserfallatsaaliueqataanissamut kajumillunga piareersimasarpunga?’ Jehovamut tunniulluinnaratta taassuma pigilerpaatigut. Kissaatigaalu piffissarput, nukigut aningaasaatigullu allanik ikiuinitsinnut atussagigut. Taamaattumik imminut pilliutigeriaannaalluta taamaalioraangatta nuannaartarpoq. Tamanna sulissutigisariaqarlugu paasigutsigu qanoq iliussaagut?
11. Imminut pilliutigeriaannaanermik kajumissuseqalernissamut qinuneq qanoq iluaqutigisinnaavarput?
11 Ilumoorlutit Jehova qinnuigiuk. Immaqa imminut pilliutigeriaannaanissaq sulissutigisassaralugu paasivat sulissutiginissaali kajungerinagu. Taamaappat qamannga pisumik Jehova qinnuigiuk. Unneqqariffigiuk. Qanoq misiginerlutit Jehova oqaluttuuguk qinnuigalugulu ‘piumassuseqalerseqqullutit pissatseqqullutillu’. – Flp 2:13.
12. Nalunaajaasoq angut inuusuttoq ilagiinni qanoq ikiuussinnaava?
12 Inuusuttuuguit angut Nalunaajaasoq ilagiinni kiffartortunngornissamut kajumissuseqarnerulerumallutit Jehova qinnuigiuk. Sooq tamanna pingaaruteqarpa? Nunarsuaq tamakkerlugu Nalunaajaasut amerliartuinnarnerat pissutigalugu taamatut kiffartorsinnaasut pisariaqartinneqaleraluttuinnarmata. Aamma nunat ilaanni ilagiinni kiffartortut utoqqaanertanit ikinnerupput amerlasuullu utoqqaliarsaalersimallutik. Qanorluunniit kiffartoriaannaajuaannarnerit nuannaarutigissavat. Imminummi pilliutigeriaannaaguit Jehova nuannaartissavat. Aamma ilagiinni tusaamaneqarluassaatit allanillu ikiuisarnerit nalerisimaarutigissallugu.
13-14. Qatanngutigut ikiorniarlugit qanoq iliorsinnaavugut? (Saqqaani assiliaq takuuk.)
13 Allat pisariaqartitaat eqqumaffigikkit. Paulusip kristumiut Judiiamiittut ima kajumissaarpai: “Ajunngitsuliortarnissarsi avitseqateqartarnissarsilu puioqinasiuk, Guutimmi pilliutit taamaattut iluarilluinnarmagit.” (Hebr 13:16) Tamannalumi siunnersuutitsialaavoq! Kristumiut taakku taamatut allaffigiteqqammerlutik angerlarsimaffitsik, suliffitsik ilaquttatillu upperisaqatiginngisatik qimallugit ‘qaqqanut qimaasariaqarsimapput’. (Mat 24:16) Avitseqatigiittarnissaq piffissami tamatumani pisariaqartissimassavaat. Tamanna sioqqullugu taamaaliortarneq ileqquliussimagunikku qimarnguffimminni pigisakinnerugaluarlutik naammaginninnerussapput.
14 Uppeqatitta pisariaqartitsinertik oqaatigiuaannarneq ajorpaat. Assersuutigalugu takorlooruk qatanngutip nuliani toqukkut annaagaa. Annaasaqartup nerisassiuunneqartarnissani, biiliunneqartarnissani illumilu suliassanik ikiorneqartarnissani pisariaqartissavaa? Imaassinnaavoq akornutaasutut misigerusunnani ikioqqunngitsoq. Uagulli ikiorniarlugu siulliulluta iliuuseqarutta qujamasungaassaaq. Eqqarsarnaveersaartariaqarpugut suut tamaasa arlaatigut isumagineqarumaartut, imaluunniit pisariaqartitsisoq tamatigut nammineq ikioqqusarumaartoq. Imminut ima aperisarit: ‘Uanga taamatut nalaataqaraluaruma qanoq ikiorneqarusussagaluarpunga?’
15. Uppeqatitsinnik ikiueriaannaassagutta susariaqarpugut?
15 Ikiortissarsiorfigiuminartuugit. Ilagiinni uppeqatitsinnik ikiuukkumatuunik tamatta nalunngisaqarunarpugut. Eqiagineqartutut misigitinngisaannarpaatigut, nalunngilarpullu ikiortariaqaleraangatta piareersimajuartuusut. Uagut taakku assigerusuppagut! Utoqqaanertaq Alanimik atilik 45-nik ukiulik ikiortissarsiorfigiuminartutut ilisimaneqarusuppoq. Jiisusip maligassiaa eqqarsaatigalugu ima oqarpoq: “Jiisusi ulapittarpoq, taamaattorli inuit inuusuttuugaluarunik utoqqaagaluarunilluunniit orniginartillugu nangaanatik taassumunnga ikioqqusarput. Nalunngilaammi asagaatsik. Uanga Jiisusi ilaarlugu orniginartuullungalu inussiarnersuullungalu asannittoorusuppunga.”
16. Jiisusip maligassiaanik maleruaaqqissaarniarnitsinni Tussiaat 119:59, 60-ilu qanoq iluaqutigisinnaavagut?
16 Jiisusi ilaaqqissaarsinnaanngikkutsigu nikallussanngilagut. (Jaak 3:2) Sanasutut ilinniartoq ilinniartitsisuminit piginnaanikinnerusarpoq. Kukkusarninili ilinniutigisarlugulu ilinniartitsisuni sapinngisaminik ilaarniarsarisaruniuk pikkorissigaluttuinnassaaq. Taamatuttaaq Biibilimi atuaqqissaarnitsinni ilikkakkagut sapinngisamik maleruarniartarlugillu kukkussutigut ilinniutigisarutsigit Jiisusi ilaarsinnaanerulissavarput. – Tussiaat 119:59, 60 atuakkit.
IMMINUT PILLIUTIGERIAANNAANEQ ILUAQUTAAVOQ
17-18. Jiisusi ilaarlugu imminut pilliutigeriaannaanerput qanoq iluaqutaassava?
17 Imminut pilliutigeriaannaasarutta allat aamma taamaaliornissaannut kajumilersissinnaavagut. Tim, utoqqaanertaasoq, ima oqarpoq: “Qatanngutit angutit inuusuttunnguit ilaat ilagiinniittunik ikiueriaannaasartunik ilaarsisalersimapput. Ilaatigut tamanna pissutigalugu ilagiinni kiffartortunngorput. Angutit inuusuttut taakku ilagiitsinni ikiuuttarlutillu utoqqaanertanut iluaqutaangaartarput.”
18 Ullutsinni inuppassuit namminissarsiortuupput. Uagulli Jehovamut kiffaagatta allaanerorusuppugut. Jiisusip imminut pilliutigeriaannaanera killitsissutigalugu taanna sapinngisatsinnik ilaarusupparput. Jiisusi ilaaqqissaarsinnaanngikkaluarlugu sapinngisatsinnik tumai atuarsinnaavagut. (Pet 1. 2:21) Jiisusitut imminut pilliutigeriaannaagutta Jehovamit iluarisaassaagut.
ERINARSUUT 84 Sapinngisatsinnik ikiuisa
^ par. 5 Jiisusip allat pisariaqartitaat nammineq pisariaqartitaminit pingaarnerutittuarpai. Taassuma maligassiaa qanoq maleruarsinnaanerlutigu allaaserisami matumani sammissavarput. Aamma taamaaliornerput qanoq iluaqutigisinnaanerlutigu iserfigissavarput.
^ par. 57 ASSIMI MALUGISASSAT: Angutip inuusuttup Mikaelimik atillip ataatani napparsimmavimmiittoq utoqqaanertanit marlunnit pulaarneqartoq takugaa. Utoqqaanertat asannittuliornerat killitsissutigalugu ilagiinni pisariaqartitsisut eqqumaffigilerpai ikiortalerlugillu. Angutip inuusuttup allap Malimmik atillip Mikaelip asannittuliornera maluginiarpaa. Tamannalu naalagaaffilersaarfimmi eqqiaaqataanissaminut piumassuseqalissutigaa.